« បង្រៀនអំពីព្រះយេស៊ូវគ្រីស្ទ មិនថាអ្នកកំពុងបង្រៀនអ្វីនោះទេ » ការបង្រៀនតាមរបៀបរបស់ព្រះអង្គសង្គ្រោះ ៖ សម្រាប់អ្នកទាំងអស់ដែលបង្រៀននៅក្នុងគេហដ្ឋាន និងសាសនាចក្រ ( ឆ្នាំ ២០២២ )
« បង្រៀនអំពីព្រះយេស៊ូវគ្រីស្ទ មិនថាអ្នកកំពុងបង្រៀនអ្វីនោះទេ » ការបង្រៀនតាមរបៀបរបស់ព្រះអង្គសង្គ្រោះ
យើងទុកសេចក្ដីសុខសាន្ដនឹងអ្នក ដោយ វ៉លធើរ រ៉េន
បង្រៀនអំពីព្រះយេស៊ូវគ្រីស្ទ មិនថាអ្នកកំពុងបង្រៀនអ្វីនោះទេ
មានអ្វីៗជាច្រើនដើម្បីបង្រៀននៅក្នុងដំណឹងល្អដែលបានស្ដារឡើងវិញរបស់ព្រះយេស៊ូវគ្រីស្ទ—គោលការណ៍ បទបញ្ញត្តិ ការព្យាករណ៍ និងរឿងនានាមកពីព្រះគម្ពីរ ។ ប៉ុន្តែអ្វីៗទាំងនេះគឺជាមែកទាំងឡាយនៃដើមតែមួយ ដ្បិតវាមានគោលបំណងតែមួយ ៖ ដើម្បីជួយមនុស្សទាំងអស់ឲ្យមកកាន់ព្រះគ្រីស្ទ ហើយឲ្យល្អឥតខ្ចោះក្នុងទ្រង់ ( សូមមើល យ៉ារ៉ុម ១:១១; មរ៉ូណៃ ១០:៣២ ) ។ ដូច្នេះមិនថាអ្នកកំពុងបង្រៀនអ្វីនោះទេ សូមចាំថាអ្នកកំពុងតែបង្រៀនអំពីព្រះយេស៊ូវគ្រីស្ទ និងរបៀបកាន់តែប្រែក្លាយដូចជាទ្រង់យ៉ាងពិតប្រាកដ ។ ព្រះវិញ្ញាណបរិសុទ្ធអាចជួយអ្នករៀនទទួលស្គាល់សេចក្តីពិតអំពីព្រះអង្គសង្គ្រោះ និងព្រះចេស្តានៃការប្រោសលោះរបស់ទ្រង់នៅក្នុងគោលការណ៍នៃដំណឹងល្អ បទបញ្ញត្តិ និងការបង្រៀនប្រកបដោយការព្យាករនីមួយៗ ( សូមមើល យ៉ាកុប ៧:១០–១១ ) ។
តើអ្នកកំពុងបង្រៀនអំពីការបូជាមែនទេ ? សូមពិចារណាស្រាវជ្រាវជាមួយសិស្ស អំពីរបៀបនៃការបូជាដែលយើងធ្វើ ចង្អុលបង្ហាញព្រលឹងយើងទៅរក « ការបូជាមួយដ៏មហិមា និងចុងក្រោយបង្អស់ » របស់ព្រះអង្គសង្គ្រោះ ( អាលម៉ា ៣៤:១០ ) ។ តើអ្នកកំពុងបង្រៀនអំពីសាមគ្គីភាពមែនទេ ? សូមពិចារណាពិភាក្សាអំពីសាមគ្គីភាពដែលព្រះយេស៊ូវគ្រីស្ទសម្រេចបានជាមួយព្រះវរបិតារបស់ទ្រង់ និងការអញ្ជើញរបស់ទ្រង់ចំពោះយើងឲ្យរួមគ្នាតែមួយជាមួយទ្រង់ទាំងទ្វេ ( សូមមើល យ៉ូហាន ១៧ ) ។ សូមមើលឲ្យឃើញថា គ្រប់ប្រធានបទដំណឹងល្អទាំងអស់គឺជាឱកាសដើម្បីបង្រៀន និងរៀនសូត្រអំពីព្រះយេស៊ូវគ្រីស្ទ ។
គ្រប់បទបញ្ញត្តិទាំងអស់ក៏ផ្តល់នូវឱកាសនេះផងដែរ ។ សូមកុំគ្រាន់តែផ្តោតលើក្រឹត្យវិន័យនៃដំណឹងល្អប៉ុណ្ណោះ—សូមរៀនអំពីអង្គតាក់តែច្បាប់ផងដែរ ។ ប្រសិនបើអ្នកពិភាក្សាអំពីពាក្យសម្ដីនៃប្រាជ្ញាវាងវៃ ហើយផ្តោតការពិភាក្សាត្រង់ចំណុចគួរធ្វើ និងមិនគួរធ្វើដើម្បីរស់នៅឲ្យមានសុខភាពល្អ នោះអ្នកបាត់បង់ឱកាសក្នុងការពិចារណាថា តើព្រះយេស៊ូវគ្រីស្ទខ្វល់ព្រះទ័យនឹងពួកយើងខ្លាំងប៉ុនណា—ទាំងសុខុមាលភាពខាងវិញ្ញាណ និងខាងសាច់ឈាមរបស់យើង—ដើម្បីប្រទានក្រឹត្យវិន័យនេះដល់ពួកយើង ។ សូមផ្តោតលើព្រះឆន្ទៈ និងការសព្វព្រះទ័យដ៏ខ្លាំងដែលព្រះអង្គសង្គ្រោះមាន ដើម្បីប្រទានពរដល់យើងជាមួយនឹងព្រះចេស្តារបស់ទ្រង់ ដើម្បីជួយយើងឲ្យរស់នៅតាមក្រឹត្យវិន័យរបស់ទ្រង់ ។ គ្រប់បទបញ្ញត្តិទាំងអស់ដែលទ្រង់បានប្រទានដល់យើង បើកសម្តែងអ្វីមួយអំពីព្រះទ័យ និងព្រះឆន្ទៈ និងព្រះរាជបំណងរបស់ទ្រង់—សូមរកឃើញអំណរក្នុងការស្វែងរកនេះជាមួយគ្នា !
សង្កត់ធ្ងន់លើគំរូរបស់ព្រះយេស៊ូវគ្រីស្ទ
យើងអាចផ្តោតលើព្រះយេស៊ូវគ្រីស្ទជាចំណុចសំខាន់នៃការបង្រៀន និងការរៀនសូត្ររបស់យើង ដោយទទួលស្គាល់ និងសង្កត់ធ្ងន់ថា ទ្រង់គឺជាគំរូដ៏ឥតខ្ចោះនៃគ្រប់គោលការណ៍នៃដំណឹងល្អទាំងអស់ ។ ក្នុងនាមជាពួកសិស្សយើងពុំគ្រាន់តែធ្វើតាមគោលការណ៍ប៉ុណ្ណោះទេ—យើងធ្វើតាមព្រះយេស៊ូវគ្រីស្ទផងដែរ ។ នៅពេលយើងផ្តោតយកចិត្តទុកដាក់លើគំរូដ៏ល្អឥតខ្ចោះរបស់ព្រះអង្គសង្គ្រោះ នោះព្រះវិញ្ញាណបរិសុទ្ធនឹងថ្លែងទីបន្ទាល់អំពីទ្រង់ ហើយបំផុសគំនិតពួកយើងឲ្យធ្វើតាមទ្រង់ ។
សូមស្រមៃមួយសន្ទុះថា អ្នកកំពុងបង្រៀនគោលការណ៍នៃកាន់ខ្ជាប់ដរាបដល់ចុងបំផុត ។ ការពិភាក្សាមួយអំពីរបៀបដែលព្រះអង្គសង្គ្រោះគឺជាគំរូនៃកាន់ខ្ជាប់ដរាបដល់ចុងបំផុត អាចនាំមកនូវអារម្មណ៍នៃគារវភាពដ៏ផ្អែមល្ហែមចំពោះទ្រង់ ។ តើអស់អ្នកដែលអ្នកបង្រៀនអាចរៀន និងទទួលអារម្មណ៍អ្វីខ្លះមកពីគំរូរបស់ទ្រង់ ?
ព្រះអង្គសង្គ្រោះបានធ្វើជាគំរូដ៏ល្អឥតខ្ចោះសម្រាប់ពួកយើងទាំងអស់គ្នា ។ ទ្រង់បានព្យាបាលពួកគេទាំងអស់គ្នា ដោយ ម៉ៃឃល ម៉ម
បង្រៀនអំពី ងារ តួនាទី និងបុគ្គលិកលក្ខណៈរបស់ព្រះយេស៊ូវគ្រីស្ទ
ព្រះយេស៊ូវគ្រីស្ទមានងារច្រើននៅក្នុងព្រះគម្ពីរ ។ ងារនីមួយៗឆ្លុះបញ្ចាំងពីតួនាទីមួយរបស់ទ្រង់នៅក្នុងផែនការរបស់ព្រះ ហើយបង្រៀនយើងអំពីបុគ្គលិកលក្ខណៈដ៏ទេវភាពរបស់ទ្រង់ ។ អ្នកអាចពិចារណាស្រាវជ្រាវជាមួយសិស្សនូវងារដូចជា កូនចៀមនៃព្រះ ព្រះគាំទ្រ មេសម្រេចសេចក្តីជំនឿរបស់យើង និងពន្លឺនៃលោកីយ បង្រៀនយើងអ្វីខ្លះអំពីព្រះយេស៊ូវគ្រីស្ទ ។ ពេលអ្នកជួយសិស្សឲ្យស្គាល់ព្រះអង្គសង្គ្រោះកាន់តែច្បាស់ នោះសូមសិក្សាឲ្យកាន់តែច្រើនអំពីអ្វីដែលទ្រង់បានមានព្រះបន្ទូល និងបានធ្វើដែលបង្ហាញថាទ្រង់ជានរណា និងតួនាទីដែលទ្រង់មានព្រះទ័យចង់ដើរតួនៅក្នុងជីវិតរបស់ពួកយើង ។ នៅពេលអ្នករៀនជាមួយគ្នាអំពីអត្តចរិត និងបុគ្គលិកលក្ខណៈរបស់ព្រះអង្គសង្គ្រោះ នោះព្រះវិញ្ញាណបរិសុទ្ធនឹងពង្រីកការយល់ដឹង និងសេចក្តីស្រឡាញ់របស់អ្នកចំពោះទ្រង់កាន់តែស៊ីជម្រៅ ។
ស្វែងរកនិមិត្តរូបនានាដែលធ្វើបន្ទាល់អំពីព្រះយេស៊ូវគ្រីស្ទ
ព្រះអម្ចាស់បានប្រកាសថា « គ្រប់អ្វីទាំងអស់ត្រូវបានបង្កើត ហើយធ្វើឡើងមក ដើម្បីធ្វើបន្ទាល់អំពីយើង » ( ម៉ូសេ ៦:៦៣ សូមមើលផងដែរ នីហ្វៃទី ២ ១១:៤ ) ។ ដោយមានសេចក្តីពិតនោះនៅក្នុងចិត្ត នោះយើងអាចរៀនមើលឃើញនិមិត្តរូបជាច្រើន នៅក្នុងព្រះគម្ពីរដែលធ្វើបន្ទាល់អំពីព្រះអង្គសង្គ្រោះ ។ និមិត្តរូបទាំងនេះរួមមានដូចជា នំបុ័ង ទឹក និងពន្លឺជាដើម ។ ពេលយើងយល់ពីរបៀបដែលវត្ថុទាំងនេះទាក់ទងជាមួយនឹងព្រះអង្គសង្គ្រោះ នោះវត្ថុទាំងនេះអាចបង្រៀនយើងអំពីព្រះចេស្តា និងបុគ្គលិកលក្ខណៈរបស់ទ្រង់បាន ។ អ្នកក៏អាចរកឃើញរឿងប្រៀបធៀបនានាទៅនឹងព្រះជន្មរបស់ព្រះអង្គសង្គ្រោះ នៅក្នុងជីវិតរបស់ពួកព្យាការី និងពួកបុរសស្ដ្រីដ៏ស្មោះត្រង់ផ្សេងទៀតនៅក្នុងព្រះគម្ពីរផងដែរ ។ ការរកមើលនិមិត្តរូបនានាបើកសម្តែងសេចក្តីពិតអំពីព្រះអង្គសង្គ្រោះ នៅកន្លែងខ្លះដែលអ្នកអាចមើលរំលង ។