« ជំនាញ ៖ សួរសំណួរតាមដានទៅកាន់សិស្ស » ធនធានផ្តល់ការគាំទ្រ និងការបំពាក់បំប៉នដល់គ្រូបង្រៀន ( ឆ្នាំ២០២៤ )

អញ្ជើញឲ្យរៀនសូត្រដោយឧស្សាហ៍ព្យាយាម

ជំនាញ ៖ សួរសំណួរតាមដានទៅកាន់សិស្ស ។

តើអ្វីជាការយល់ដឹង ឬសមត្ថភាពដំបូងរបស់ខ្ញុំ ? ( ការវាយតម្លៃ ) ៖

សូមសរសេរសំណួរតាមដានសម្រាប់សេចក្ដីថ្លែងការណ៍ខាងក្រោម ដែលបានផ្ដល់ដោយសិស្សនៅក្នុងថ្នាក់របស់អ្នក ៖

« ប៉ុន្មានថ្ងៃមុន ពេលខ្ញុំកំពុងអានព្រះគម្ពីរ ខ្ញុំបានរកឃើញខគម្ពីរមួយដែលខ្ញុំពិតជាត្រូវការស្ដាប់ឮជាខ្លាំង » ។

តើវាគឺជាអ្វី ហើយហេតុអ្វីបានជាវាសំខាន់ ? ( កំណត់និយមន័យ ) ៖

ការសួរសំណួរតាមដានអញ្ជើញសិស្សឲ្យចែកចាយបន្ថែមទៀតអំពីអ្វីដែលពួកគេកំពុងគិត និងកំពុងទទួលអារម្មណ៍ ។ វាក៏អនុញ្ញាតឲ្យគ្រូបង្រៀនបន្តផ្តោតអារម្មណ៍ទៅលើសិស្ស ហើយផ្តល់ឱកាសឲ្យសិស្សចូលរួមក្នុងកម្រិតមួយដែលកាន់តែជ្រាលជ្រៅផងដែរ ។ លើសពីនោះ វាក៏នាំមកនូវវិវរណៈមកពីព្រះវិញ្ញាណ ទាំងសម្រាប់សិស្ស និងគ្រូបង្រៀនផងដែរ ។ ពេលអ្នកស្តាប់មតិយោបល់ ឬសំណួររបស់សិស្សម្នាក់ វិធីម្យ៉ាងដើម្បីរៀបចំខ្លួនសម្រាប់សំណួរតាមដាននោះ គឺដោយការសួរខ្លួនឯងថា « តើខ្ញុំចង់ដឹងអ្វីបន្ថែមទៀត ? » ( ទាក់ទងនឹងមតិយោបល់ សំណួរ ឬសិស្សនោះ ) បន្ទាប់មក សូមសួរសិស្សអំពីអ្វីដែលអ្នកចង់ដឹង ។ ខាងក្រោមនេះជាឧទាហរណ៍មួយចំនួនដែលអាចជួយអ្នកឲ្យចាប់ផ្ដើមសួរសំណួរតាមដាន ៖

« តើប្អូនអាចប្រាប់គ្រូបន្ថែមអំពី … បានទេ ? »
« សូមជួយយើងយល់បន្ថែមអំពីអ្វីដែលប្អូនចង់មានន័យ ពេលនិយាយថា… ? »
« តើប្អូនបានរៀនអ្វីខ្លះអំពី… ? »
« តើប្អូនគិតថា ហេតុអីបានជា… ? »

តើនរណា ឬតើអ្វីទៅដែលផ្ដល់នូវការពន្យល់ដ៏ល្អមួយអំពីការណ៍នេះ ? ( គំរូ ) ៖

ពេល ហ័ន ចែកចាយបទពិសោធន៍មួយអំពីការអធិស្ឋានជាគ្រួសាររបស់គាត់ ខ្ញុំបានសួរខ្លួនឯងថា « តើខ្ញុំចង់ដឹងអ្វីទៀតអំពីបទពិសោធន៍របស់ ហ័ន ? » ខណៈពេលខ្ញុំស្ដាប់ ខ្ញុំចង់ដឹងពីអ្វីដែលគាត់បានរៀនអំពីព្រះវរបិតាសួគ៌តាមរយៈបទពិសោធន៍នោះ ដូច្នេះខ្ញុំសួរថា « ហ័ន តើប្អូនបានរៀនអ្វីខ្លះអំពីព្រះវរបិតាសួគ៌ចេញពីបទពិសោធន៍នោះ ? »

តើខ្ញុំអាចហាត់រៀនប្រើជំនាញនេះ ឬអនុវត្តតាមគោលការណ៍នេះដោយរបៀបណា ? ( អនុវត្ត ) ៖

កាលអ្នកអានមតិយោបល់ខាងក្រោមពីសិស្ស ចូរសួរខ្លួនឯងថា « តើខ្ញុំចង់ដឹងអ្វីបន្ថែមទៀត ? » សូមសរសេរសំណួរតាមដានមួយ ដែលអ្នកអាចនឹងសួរសិស្សម្នាក់នេះ ។

« ប៉ុន្មានថ្ងៃមុន ពេលខ្ញុំកំពុងអានព្រះគម្ពីរ ខ្ញុំបានរកឃើញខគម្ពីរមួយដែលខ្ញុំពិតជាត្រូវការស្ដាប់ឮជាខ្លាំង » ។
« តើខ្ញុំអាចដឹងយ៉ាងដូចម្ដេចថា នៅពេលណាវាជាគំនិតផ្ទាល់ខ្លួនរបស់ខ្ញុំ ឬនៅពេលណាព្រះវិញ្ញាណបរិសុទ្ធកំពុងមានព្រះបន្ទូល ? »
« ព្រះគម្ពីរនេះរំឭកខ្ញុំពីអ្វីដែលប្រធាន ណិលសុន បានមានប្រសាសន៍អំពីការធ្វើជាអ្នកផ្សះផ្សាគេ » ។

ជញ្ជឹងគិត ឬពិភាក្សា ៖

ហេតុអ្វីបានជាការសួរសំណួរតាមដានជាផ្នែកដ៏សំខាន់មួយនៃបទពិសោធន៍រៀនសូត្រ ?

សូមប្រៀបធៀបអ្វីដែលអ្នកបានធ្វើនៅក្នុងការវាយតម្លៃដំបូង ទៅនឹងការអនុវត្តដែលអ្នកទើបតែបានបញ្ចប់នេះ ។ តើអ្នកសង្កេតឃើញមានភាពខុសគ្នាអ្វីខ្លះ ?

តើខ្ញុំនឹងរួមបញ្ចូលចំណុចនេះនៅពេលណា និងដោយរបៀបណា ?

សូមអនុវត្តអ្វីដែលអ្នកបានរៀននៅថ្ងៃនេះ ដោយចំណាយពេលសួរសំណួរតាមដាន នៅពេលសិស្សចែកចាយបទពិសោធន៍របស់ពួកគេជាមួយអ្នកនៅសប្ដាហ៍ក្រោយ ។

សូមសរសេរផែនការមួយដែលនឹងជួយអ្នកឲ្យហាត់អនុវត្តជំនាញនេះ ចាប់ពីពេលនេះតទៅជារៀងរាល់ថ្ងៃ ។