Fakatupulaki ʻa e Ngaahi Taukei ʻa e Faiakó
Tokoniʻi ʻa e kau akó ke nau maʻu ha fakafehokotaki fakataautaha ʻi he tokāteline ʻo Sīsū Kalaisí.

“Tokoniʻi ʻa e kau akó ke nau maʻu ha fakafehokotaki fakataautaha ʻi he tokāteline ʻo Sīsū Kalaisí,” Fakatupulaki Ngaahi Taukei ʻa e Faiakó: Akoʻi ʻa e Tokāteliné (2023)

“Tokoniʻi ʻa e kau akó ke nau maʻu ha fakafehokotaki fakataautaha ʻi he tokāteline ʻo Sīsū Kalaisí,” Fakatupulaki Ngaahi Taukei ʻa e Faiakó: Akoʻi ʻa e Tokāteliné

Tokoniʻi e kau akó ke nau ongoʻi ha mahuʻingaʻia fakatāutaha ʻi he tokāteline ʻo Sīsū Kalaisí.

Pōtoʻi Ngāué

Teuteuʻi ha ngaahi fakaafe mo ha ngaahi lea fakaʻaiʻai ʻe tokoni ki he kau akó ke nau maʻu ha fakafehokotaki fakataautaha ʻi ha konga folofola.

ʻĪmisi
fefine ʻokú ne akoʻi ha kau ako

Fakaʻuhingaʻí

ʻE lava ke maʻu ʻe he kau akó ha fakafehokotaki fakataautaha ʻi he folofolá ʻi heʻenau fakakaukau ki he founga ʻe lava ke ʻuhingamālie mo ʻaonga ai ʻa e meʻa ʻoku nau akó ʻi honau ngaahi tūkungá. Ko e founga ʻe taha ʻe lava ke tokoni ai e kau faiakó ki he kau akó ʻi he founga ko ʻení ko hono teuteuʻi ha ngaahi fakaafe mo ha ngaahi lea fakaʻaiʻai ʻoku kau ai ʻa e ngaahi meʻá ni:

  • Ko ha faingamālie ke fakakaukau ai ʻa e kau akó ki he ngaahi tūkunga lolotonga ʻo ʻenau moʻuí.

  • Ko ha taimi ke lau ai ʻe he kau akó ha potufolofola.

  • Ko ha lea fakaʻaiʻai ʻe tokoni ki he kau akó ke ʻiloʻi ʻa e ngaahi meʻa ʻoku faitatau ʻi honau ngaahi tūkungá mo e ngaahi tūkunga ʻo kinautolu ʻoku nau lau fekauʻaki mo ia ʻi he folofolá. Hangē ko ʻení, “Ko ʻeku aʻusiá ʻoku hangē ia ko Pitá koeʻuhí …”

  • Ko ha faingamālie maʻá e kau akó ke nau fakalaulauloto ki he founga ʻe lava ke ueʻi ai ʻe he ngaahi tali faivelenga ʻa kinautolu ʻi he folofolá ʻenau ngaahi tali faivelenga ʻi he ʻaho ní.

ʻE tokoni hono fai ʻení ke ako ʻe he kau akó ʻa e founga ke ako ai mei he folofolá mo fakaʻatā ʻa e Laumālie Māʻoniʻoní ke tokoniʻi kinautolu ke nau ongoʻi ha mahuʻingaʻia fakataautaha.

Fakatātaaʻi

ʻI he teuteu ʻe Sisitā Uiliamisi ʻene lēsoni ki he Ngāue 4–5, ʻokú ne fakakau ʻa e ngaahi meʻá ni ʻi heʻene palaní:

  • Fehuʻi ki he kau akó: “Ko e hā ha meʻa ʻi hoʻo moʻuí te ke lava ala fiemaʻu ai ha tokoni ʻi he ʻahó ni?”

  • Fakaafeʻi ʻa e kau akó ke nau lau pea tali: “ʻI hoʻo lau ʻa e Ngāue 4:1–13, kātaki ʻo teuteu ke fakaʻosi ʻa e konga lea fakaʻaiʻai ko ʻení: ʻʻOku hangē ʻeku moʻuí ko Pita mo Sioné koeʻuhí …’”

  • Fehuʻi ki he kau akó: “Ko e hā ʻokú ke ako mei he ngaahi tali ʻa Pita mo Sioné ʻe lava ʻo tokoni atu kiate koe?”

Fakaangaanga

  • Teuteuʻi ha ngaahi fakaafe mo ha ngaahi konga lea fakaʻaiʻai ʻe tokoni ki he kau akó ke nau maʻu ha fakafehokotaki fakataautaha ʻi ha lēsoni ʻoku ʻamanaki ke fakahoko ʻi he uike ni. Vahevahe hoʻo ngaahi fakaafé mo e ngaahi fakamatala fakaʻaiʻaí mo ha kaungāmeʻa, mēmipa ʻo e fāmilí, pe kaungā-ngāue pea kole ha fakamatala tokoni.

Aleaʻi pe Fakalaulauloto

  • ʻE tokoni fēfē hono faʻu ʻo e faʻahinga fakaafe mo e ueʻi pehení ke maʻu ʻe he kau akó ha fakafehokotaki fakataautaha?

  • ʻE fakaleleiʻi fēfē ʻe he faʻahinga fakaafe pehení ʻa e aʻusia fakaakó?

  • Ko e hā ha ngaahi founga kehe te ke lava ai ʻo tokoni ki he kau akó ke nau maʻu ha fakafehokotaki fakataautaha ʻi he folofolá?

Fakatahaʻi

  • Faʻu ha palani ke fakaangaanga faʻu ha ngaahi fakaafe mo ha ngaahi fakamatala fakaʻaiʻai ʻe tokoni ki he kau akó ke nau maʻu ha fakafehokotaki fakataautaha ʻi he tokāteline mo e tefitoʻi moʻoni ʻo e ongoongoleleí ʻokú ke akoʻí.

Fie Ako Lahi Ange?