Mateuteu maʻu pē ke ke tali e ngaahi ueʻi fakalaumālie fekauʻaki mo e ngaahi fiemaʻu ʻa e kau akó.

Pōtoʻi Ngāué

ʻEke ha fehuʻi ke siviʻi ʻa e akó kimuʻa pea hoko atu ʻa e lēsoní.

tangata ʻokú ne akoʻi ha kalasi

Fakaʻuhingaʻí

ʻOku fakaafeʻi kitautolu ʻe he Ko e Faiako ʻi he Founga ʻa e Fakamoʻuí ke tau fakalaulauloto ki he fehuʻi ko ʻení: “ʻOku ʻiloʻi nai ʻe kinautolu ʻokú ke akoʻí ʻokú ke mahuʻingaʻia ange ʻi heʻenau akó kae ʻikai ko hono fakakakato ha lēsoní?” ʻE lava ke fakahaaʻi ʻe he kau faiakó ʻoku nau mahuʻingaʻia ʻi he ako ʻa e kau akó ʻaki haʻanau ʻeke ha ngaahi fehuʻi fakamahino kimuʻa pea toki hoko atu ki he konga hoko ʻo ha lēsoni. Ke fai ʻení, ʻe toʻo ʻe he faiakó ha ngaahi miniti siʻi hili hono aleaʻi ha tefitoʻi moʻoni, tefito pe fehuʻi ke ne ʻeke ha fehuʻi ke fakamahinoʻi ʻa e meʻa ʻoku mahino ki he kau akó. ʻOku kau ʻi he sīpinga ʻo e ngaahi fehuʻi ko ʻení ʻa e:

• Ko e hā ʻokú ke akó?

• Ko e hā ha ngaahi fehuʻi ʻokú ke kei maʻu fekauʻaki mo e meʻa ʻoku tau akó?

• ʻOku ʻi ai mo ha toe meʻa ʻokú ke fifili ki ai?

• Naʻe fakapuputuʻu nai pe taʻe mahino ha meʻa heni?

ʻOku vakaiʻi ʻe he ngaahi fehuʻi ko ʻení ʻa e ako mo e mahino ʻa e kau akó pea ʻoku ʻikai totonu ke fai ia ʻi ha founga te ne fakamaaʻi kinautolu. ʻOku fakaafeʻi ʻe he tali ki he ngaahi fehuʻi ko ʻení ʻa e Laumālie Māʻoniʻoní ke tokoni ki ha faiako ke ne ʻiloʻi ʻa e founga ke tali ʻaki e ngaahi fiemaʻu ʻa e kau akó.

Fakatātaaʻi

• Hili ha fealeaʻaki ʻi he tui, naʻe kiʻi taʻofi ai ʻa Sisitā Lōpinisoni peá ne fehuʻi ange: “Kimuʻa pea tau hoko atu ki he konga folofola hokó, ʻoku ʻi ai mo ha toe meʻa kehe ʻoku mou fifili ki ai fekauʻaki mo e tuí?”

• Hili hono ako e ngaahi potufolofola fekauʻaki mo e Hāʻele ʻAnga Ua Maí, ʻoku fehuʻi ʻe Misa Māhina, “Te ke fakamatalaʻi fēfē ʻa e meʻa ʻokú ke ako fekauʻaki mo e Hāʻele ʻAnga Ua Maí?”

Fakaangaanga

1. Ko e hā ha ngaahi fehuʻi te ke lava ʻo ʻeke ke vakaiʻi e mahino ʻa e kau akó hili ha fealeaʻaki fekauʻaki mo e fakahaá ʻi he Tokāteline mo e Ngaahi Fuakava 8:2–3?

2. Vakai ki ha lēsoni ʻoku teu fakahoko ʻi he naunau fakalēsoní. Hiki ha ngaahi fehuʻi te ke lava ʻo ʻeke ke vakaiʻi e mahino ʻa e kau akó ki ha tefito kimuʻa pea hoko atú.

Aleaʻi pe Fakalaulauloto

• ʻE tokoniʻi fēfē koe ʻe he faʻahinga fehuʻi pehení ke ke mateuteu ke tali e ngaahi ueʻi fakalaumālie fekauʻaki mo e ngaahi fiemaʻu hoʻo kau akó?

Fakatahaʻi

• ʻI he uike ʻe ua ka hokó, feinga ke fai ha ngaahi fehuʻi ke vakaiʻi e ako ʻa e kau akó kimuʻa pea nau toki hiki ki he tefito hoko ʻi he lēsoní. Tokanga ki he ngaahi tali ʻa e kau akó mo e ngaahi ueʻi ʻa e Laumālie Māʻoniʻoní ʻi hoʻo fakakau ʻa e taukei ko ʻení ki he aʻusia fakaloki akó.

Fie Ako Lahi Ange?

• “An Evening with Elder David A. Bednar” (Ko ha efiafi mo ha Taki Māʻolunga, 7 Fēpueli 2020), ChurchofJesusChrist.org