ʻOfa ʻi he Niʻihi ʻOkú Ke Akoʻí

Fokotuʻu ha ʻātakai ʻoku fakaʻapaʻapaʻi ai e taha kotoa pea ʻiloʻi ʻoku fakamahuʻingaʻi ʻenau tokoní.

Taukeí: ʻAi ke ʻilo ʻokú ke mahuʻingaʻia he fānau akó kimuʻa pea nau fakamatala pe hiki honau nimá ke fakamatalá.

Fakamatalaʻi

Te tau lava ʻo fakahaaʻi ʻetau ʻofa ki heʻetau kau akó ʻaki hono fakahā kiate kinautolu ʻoku tau fakamahuʻingaʻi ʻenau tokoní. ʻI he taimi ʻe niʻihi ʻi he fakamatala ʻa e kau akó, mahalo ʻe hangē ʻoku ʻikai ke tau mahuʻingaʻia pe tohoakiʻi ʻetau tokangá ʻi he fakakaukau ki he meʻa hoko te tau lea ʻakí. ʻOku faingofua ke tau hanga kehe pe kamata sio ki heʻetau folofolá ʻi heʻetau fakakaukau ki he founga ke tali ʻakí. ʻOku mahuʻinga ke manatuʻi ʻoku fie maʻu ʻe he kau akó ke nau ongoʻi ʻoku fanongoa, ʻiloʻi, mo vakaiʻi kinautolu. Te tau lava ʻo tokoniʻi e kau akó ke nau ongoʻi peheni ʻaki ʻetau tokanga fakaʻaufuli kiate kinautolu ʻi heʻenau vahevahe e ngaahi fakamatalá. Ko e founga ʻe taha ke fakahoko ai ʻení ko e tafoki ho sinó ke hanga kiate kinautolu, sio ki honau matá, pea tokanga taha kiate kinautolu ʻi he kotoa ʻenau fakamatalá. Ko ha founga ʻe taha ko e lea ʻo fakahaaʻi ʻokú ke mahuʻingaʻia ʻi heʻenau tānakí kimuʻa pea nau fakamatalá. ʻI he taimi ʻoku hiki nima ai ha tokotaha ako, te ke lava ʻo pehē ange, “Soatani, ʻoku mau saiʻia he fanongo kiate koé. Kātaki ʻo talamai hoʻo fakakaukaú,” pe, “Tapu, ʻoku mau fiefia ke ako meiate koe. Ko e hā te ke loto ke tānaki maí?” ʻE lava ke fakahaaʻi ki he kau akó ʻi he fanga kiʻi ngāue faingofua ko ʻení ʻoku fakamahuʻingaʻi ʻenau ngaahi tānakí pea ʻoku mahuʻinga ia ki he aʻusia fakaakó.

Fakatātaaʻi

faiako mo e kau ako ʻi he lokiakó

Vakai ki he fakafōtunga e faiakó ni ʻi heʻene fanongo ki ha fakamatala ʻa ha tokotaha akó. ʻOkú ne tafoki ʻo sio ki he tokotaha akó. ʻOku ʻikai ke ne toe sio ki ha tokotaha ako kehe, folofolá pe meʻa kehe. ʻOku toe ʻi ai mo ha meʻa kehe ʻokú ke ako mei he taá ni ki hono fakahoko ki he kau akó ʻoku fakamahuʻingaʻi kinautolú?

Lomiʻi heni ke vakai ki ha vitiō ʻo e sīpinga ko ʻení.

Fakaangaanga

Fakaangaanga ʻa e taukei ko ʻení ʻi he uiké ni ʻaki hoʻo tokanga taha ki hoʻo fepōtalanoaʻaki mo e kakai kehé pea fakahā ange ʻokú ke mahuʻingaʻia ʻi heʻenau ngaahi tokoní. Hanga ki he tokotahá ʻo sio ki hono matá ʻi hoʻo talanoa mo iá. Liʻaki ha faʻahinga fakahohaʻa, pea tokanga taha pē ki he fakafoʻituituí.

Aleaʻí pe Fakalaulaulotó

• Ko e hā kuó ke ako fekauʻaki mo e mahuʻinga ʻo e founga fetuʻutaki ʻoku fakalongolongó mo lea ʻakí ʻi hono fakahaaʻi ki he niʻihi kehé ʻokú ke fakamahuʻingaʻi kinautolú?

• Ko e hā ha ngaahi founga kehe te ke lava ai ʻo fakahaaʻi ki he kau akó ʻokú ke mahuʻingaʻia ʻi heʻenau fakamatalá?

• Tuku ha kiʻi taimi ke fakakaukau ki ha ngaahi taimi naʻe fakatātaaʻi ai ʻe he Fakamoʻuí ʻa e taukei ko ʻení.

Fakatahaʻi

Lolotonga hoʻo lēsoni hono hokó, fakaʻaongaʻi e taukei ko ʻení ʻaki haʻo hanga ki hoʻo kau akó, tuku ki lalo hoʻo folofolá, pea sio hangatonu ki he kau akó ʻi heʻenau fakamatalá.

Fie Ako Lahi Ange?

• Gospel Topics, “Communication,” topics.ChurchofJesusChrist.org

• Mark Ogletree, “Lea Fakafanongo, & ʻOfa,” Liahona, Fēpueli 2014, 48–51