« មើលទៅសិស្សតាមរបៀបដែលព្រះទតឃើញពួកគេ » ជំនាញអភិវឌ្ឍន៍គ្រូបង្រៀន ៖ ស្រឡាញ់មនុស្សដែលអ្នកបង្រៀន ( ឆ្នាំ ២០២៣ )
« មើលទៅសិស្សតាមរបៀបដែលព្រះទតឃើញពួកគេ » ជំនាញអភិវឌ្ឍន៍គ្រូបង្រៀន ៖ ស្រឡាញ់មនុស្សដែលអ្នកបង្រៀន
មើលទៅសិស្សតាមរបៀបដែលព្រះទតឃើញពួកគេ ។
ជំនាញ
សិក្សាសារលិខិតមកពីព្យាការីនាពេលថ្មីៗនេះ ដើម្បីយល់អំពីរបៀបដែលព្រះវរបិតាសួគ៌ទតឃើញយុវវ័យ ។
កំណត់និយមន័យ
អែលឌើរ ឌែល ជី រិនឡាន់ បានបង្រៀនថា « ដើម្បីបម្រើមនុស្សដទៃឲ្យមានប្រសិទ្ធភាព យើងត្រូវមើលឃើញពួកគេ … តាមរយៈព្រះនេត្ររបស់ព្រះវរបិតាសួគ៌ » ( « Through God’s Eyes » Ensign ឬ Liahonaខែ វិច្ឆិកា ឆ្នាំ ២០១៥ ទំព័រ ៩៤ ) ។ ពួកព្យាការីនៅរស់គឺជាបុរសដែលទទួលបានការបំផុសគំនិត ដែលត្រូវបានហៅឲ្យថ្លែងជំនួសព្រះអម្ចាស់ ។ ដោយយល់ដឹងនូវអ្វីដែលពួកព្យាការីកំពុងបង្រៀនអំពីយុវវ័យនៅសព្វថ្ងៃនេះ អ្នកអាចមើលទៅសិស្សរបស់អ្នកតាមរយៈព្រះនេត្ររបស់ព្រះបាន ហើយដឹងពីរបៀបដើម្បីជួយពួកគេគ្រប់ពេលបានកាន់តែប្រសើរ ។ របៀបមួយដើម្បីធ្វើកិច្ចការនេះ គឺត្រូវសិក្សាសារលិខិតមកពីព្យាការីដើម្បីស្វែងរកចម្លើយចំពោះសំណួរដូចខាងក្រោម ៖
-
តើពួកព្យាការី និងពួកសាវកកំពុងបង្រៀនអ្វីខ្លះអំពីអត្តសញ្ញាណរបស់យុវវ័យ ?
-
តើថ្នាក់ដឹកនាំនៃសាសនាចក្រកំពុងសុំឲ្យយុវវ័យធ្វើអ្វីខ្លះ ?
-
តើពួកព្យាការី និងពួកសាវកបើកសម្ដែងអ្វីខ្លះអំពីសេចក្ដីសង្ឃឹម បំណងប្រាថ្នា អារម្មណ៍ និងការរំពឹងទុករបស់ព្រះអម្ចាស់ចំពោះយុវវ័យ ?
នៅពេលអ្នកសិក្សាពាក្យសម្ដីរបស់ពួកព្យាការីដែលនៅរស់ ដើម្បីស្វែងរកចម្លើយចំពោះសំណួរទាំងនេះ ឬសំណួរផ្ទាល់ខ្លួនមួយចំនួន នោះអ្នកនឹងរីកចម្រើននៅក្នុងការយល់ដឹងរបស់អ្នកអំពីរបៀបដែលព្រះទតឃើញយុវវ័យនៃសាសនាចក្រ ។ នៅពេលអ្នកមើលឃើញសិស្សកាន់តែច្បាស់តាមរយៈព្រះនេត្ររបស់ព្រះ នោះអ្នកនឹងត្រូវបានបំផុសគំនិតឲ្យបង្រៀន និងប្រាស្រ័យទាក់ទងជាមួយនឹងយុវវ័យតាមរបៀបដ៏ខ្ពង់ខ្ពស់ និងបរិសុទ្ធជាង ។
គំរូ
-
បងស្រី អានថែល ហៀបនឹងចាប់ផ្តើមបង្រៀនសិស្សថ្នាក់វិទ្យាស្ថាន ។ មុនពេលជួបសិស្ស គាត់សិក្សាសុន្ទរកថារបស់ប្រធាន ណិលសុន « ការជ្រើសរើសដែលជះឥទ្ធិពលលើភាពអស់កល្បជានិច្ច » ខណៈពិចារណាអំពីសំណួរ « តើព្យាការីរបស់ព្រះអម្ចាស់ចង់ឲ្យខ្ញុំយល់ដឹងអ្វីខ្លះ អំពីយុវវ័យដែលខ្ញុំនឹងបង្រៀន ? » គាត់មើលឃើញកាន់តែច្បាស់តាមរបៀបដែលព្រះវបិតាសួគ៌ទតមកសិស្សរបស់គាត់ នៅពេលគាត់អានអត្ថបទដូចតទៅនេះ ៖ « ដំបូង និងសំខាន់បំផុត ក្មួយៗគឺជាបុត្ររបស់ព្រះ ។ ទីពីរ ក្នុងនាមជាសមាជិកនៃសាសនាចក្រ ក្មួយៗគឺជាបុត្រនៃសេចក្ដីសញ្ញា ។ និងទីបី ក្មួយៗគឺជាសិស្សរបស់ព្រះយេស៊ូវគ្រីស្ទ » ។
-
បងប្រុស មូលល័រ មានការខកចិត្តដោយសារសិស្សក្នុងថ្នាក់សិក្ខាសាលារបស់គាត់ហាក់ដូចជាមិនសូវចូលរួមសោះ ។ គាត់ស្វែងរកជំនួយដោយការសិក្សាសុន្ទរកថាសន្និសីទទូទៅថ្មីៗបំផុត ដើម្បីស្វែងរកចម្លើយចំពោះសំណួរ « តើថ្នាក់ដឹកនាំសាសនាចក្របានចែកចាយអ្វីខ្លះអំពីក្ដីសង្ឃឹម បំណងប្រាថ្នា អារម្មណ៍ និងការរំពឹងទុករបស់ព្រះវរបិតាសួគ៌ចំពោះយុវវ័យ ? » ទស្សនៈរបស់គាត់ចំពោះសិស្សរបស់គាត់ត្រូវបានពង្រឹង នៅពេលគាត់អានពាក្យពេចន៍របស់អែលឌើរ ឌៀថើរ អេហ្វ អុជដូហ្វ ៖ « មិត្តសម្លាញ់របស់ខ្ញុំអើយ ខ្ញុំសូមនិយាយឡើងវិញ ប្រសិនបើព្រះអង្គសង្គ្រោះគង់នៅទីនេះនៅថ្ងៃនេះ នោះទ្រង់នឹងសម្តែងសេចក្តីស្រឡាញ់ដ៏គ្មានទីបញ្ចប់របស់ទ្រង់ចំពោះអ្នក ទ្រង់ទុកព្រះទ័យទាំងស្រុងលើអ្នក » ( « ព្រះយេស៊ូវគ្រីស្ទគឺជាកម្លាំងនៃយុវជន » លីអាហូណាខែ វិច្ឆិកា ឆ្នាំ ២០២២ ទំព័រ ១២ ) ។
អនុវត្ត
-
សូមសិក្សាសារលិខិតមកពីព្យាការីនាពេលថ្មីៗនេះ ហើយស្វែងរកគំនិតនានាដែលជួយអ្នកឲ្យដឹងអំពីរបៀបដែលព្រះវរបិតាសួគ៌ទតមកសិស្សរបស់អ្នក ។
រួមបញ្ចូល
-
សូមធ្វើបញ្ជីមួយនៃសេចក្តីថ្លែងការណ៍មកពីព្យាការីកាលពីឆ្នាំមុន ដែលជួយអ្នកឲ្យមើលទៅយុវវ័យ តាមព្រះនេត្ររបស់ព្រះវរបិតាសួគ៌ ។
ពិភាក្សា ឬសញ្ជឹងគិត
តើការឃើញយុវវ័យតាមព្រះនេត្ររបស់ព្រះអាចមានឥទ្ធិពលយ៉ាងណា ទៅលើរបៀបដែលអ្នកប្រព្រឹត្តចំពោះពួកគេ ?
-
តើសេចក្តីថ្លែងការណ៍មកពីព្យាការីអ្វីខ្លះ ដែលបានជួយអ្នកឲ្យមើលឃើញយុវវ័យតាមរបៀបដែលព្រះវរបិតាសួគ៌ទតឃើញពួកគេ ហើយតើវាមានភាពខុសគ្នាអ្វីខ្លះសម្រាប់អ្នក ?
-
តើមានសំណួរអ្វីផ្សេងទៀតដែលអ្នកអាចសញ្ជឹងគិតបាន ពេលកំពុងសិក្សាសារលិខិតមកពីព្យាការី ដើម្បីជួយអ្នកឲ្យយល់កាន់តែច្បាស់អំពីយុវវ័យនៃសាសនាចក្រ ?
តើចង់បានបន្ថែមទៀតទេ ?
-
រ័សុល អិម ណិលសុន « ការជ្រើសរើសដែលជះឥទ្ធិពលលើភាពអស់កល្បជានិច្ច » ( ការប្រជុំធម្មនិដ្ឋានទូទាំងពិភពលោកសម្រាប់យុវមជ្ឈិមវ័យ ថ្ងៃទី ១៥ ខែ ឧសភា ឆ្នាំ ២០២២ ) នៅលើគេហទំព័រ ChurchofJesusChrist.org
-
ឌែល ជី រិនឡាន់ « Through God’s Eyes » Ensign ឬ Liahonaខែ វិច្ឆិកា ឆ្នាំ ២០១៥ ទំព័រ ៩៣–៩៤
-
ឆាដ អេច វិប « His Representatives » ( ការចាក់ផ្សាយអំពីការបំពាក់បំប៉នរបស់ថ្នាក់សិក្ខាសាលា និងថ្នាក់វិទ្យាស្ថានសាសនាប្រចាំឆ្នាំ នៅថ្ងៃទី ២១ ខែ មករា ឆ្នាំ ២០២២ ) នៅលើគេហទំព័រ broadcasts.ChurchofJesusChrist.org