“Fakaafeʻi e kau akó ke nau moʻui ʻaki ʻa e meʻa ʻoku nau akó,” Fakatupulaki Ngaahi Taukei ʻa e Faiakó: Fakaafeʻi ʻa e Ako Fakamātoató (2023)
“Fakaafeʻi e kau akó ke nau moʻui ʻaki ʻa e meʻa ʻoku nau akó,” Fakatupulaki Ngaahi Taukei ʻa e Faiakó: Fakaafeʻi ʻa e Ako Fakamātoató
Fakaafeʻi e kau akó ke nau moʻui ʻaki ʻa e meʻa ʻoku nau akó.
Pōtoʻi Ngāué
Palani ke toe vakaiʻi ha ngaahi fakaafe naʻe fai ʻi ha kalasi kimuʻa pea fakaafeʻi e kau akó ke vahevahe ʻenau ngaahi aʻusia ʻi hono moʻui ʻaki ʻa e meʻa ne nau akó.
Fakaʻuhingaʻí
ʻI hoʻo teuteu ha ngaahi fakaafe ki he kau akó ke nau fakaʻaongaʻi ʻa e meʻa ʻoku nau akó, te ke lava foki ʻo palani ke toe vakaiʻi ʻa e fakaafe ko iá. ʻE lava ke hoko ʻa e ngaahi taimi vakaiʻi ko ʻení ʻi he kamataʻanga ʻo e ngaahi kalasi hoko maí, ʻo fakafou ʻi he ngaahi fetuʻutaki ʻi tuʻa ʻi he kalasí, lolotonga ʻa e ngaahi fakataha lotú, pe ʻi he lotolotonga ʻo e toʻú. Ke palani ha ngaahi taimi muimuiʻi, te ke lava ʻo fehuʻi pē kiate koe:
-
Ko e hā ha fakaafe te u lava ʻo fai te ne fakaʻatā ʻa e kau akó ke vahevahe ʻenau ngaahi aʻusia ʻi hono moʻui ʻaki ha moʻoni ne nau ako ʻi ha kalasi kimuʻa?
-
Ko e fē nai ha taimi lelei ke fakahoko ʻa e toe vakaiʻí?
ʻOku hanga ʻe hono fai ʻo e ongo fehuʻi ko ʻení ʻo fakaafeʻi ʻa e Laumālie Māʻoniʻoní ke ne tataki koe ʻi hoʻo palani ke fakahoko ʻa e toe vakaiʻí. ʻE tokoni ʻa e palani ke toe vakaiʻi ʻa e akó ke nau ongoʻi haʻisia mo fie fakahoko ʻenau ngaahi tukupaá, ʻa ia ʻe lava ʻo tokoni ke iku ki ha ului kia Sīsū Kalaisi.
Fakatātaaʻi
-
ʻI hono teuteuʻi ʻe Misa Tolotoni ʻi he faʻa lotu ʻa e aʻusia fakaako hono hokó maʻa ʻene kau akó, ʻokú ne fehuʻi loto pē, “Ko e hā ha fakaafe te u lava ʻo fai te ne fakaʻatā ʻa e kau akó ke vahevahe ʻenau aʻusia ʻi hono moʻui ʻaki ha moʻoni ne nau ako ʻi ha kalasi kimuʻa? Ko e fē nai ha taimi lelei ʻi he kalasi hokó ke fakahoko ʻa e toe vakaiʻí?” ʻOku haʻu kiate ia ʻa e fakakaukau ke ʻoange ha taimi ki he kau akó ʻi he kamataʻanga ʻo e kalasi hokó ke nau tohi ʻi heʻenau tohinoá fekauʻaki mo ʻenau feinga ke ngāueʻi ha moʻoni ne nau ako ʻi he lēsoni fakaʻosí.
Fakaangaanga
Fakaangaanga ʻeke ʻa e ngaahi fehuʻí ni ʻi hoʻo teuteu hoʻo ngaahi lēsoni ka hokó:
-
Ko e hā ha fakaafe te u lava ʻo fai te ne fakaʻatā ʻa e kau akó ke vahevahe ʻenau ngaahi aʻusia ʻi hono moʻui ʻaki e ngaahi moʻoni ne nau ako ʻi ha kalasi kimuʻa?
-
Ko e fē nai ha taimi lelei ke fakahoko ʻa e toe vakaiʻí?
Aleaʻi pe Fakalaulauloto
-
ʻE fakaloloto fēfē ʻe hoʻo toutou muimuiʻí ʻa e ului ʻa e toʻu tupu ʻokú ke akoʻí?
-
Ko e hā ha ngaahi founga kuo ʻosi ueʻi fakalaumālie ai koe ʻe he Laumālie Māʻoniʻoní ke tokoni ki he kau akó ke vahevahe ʻenau ngaahi aʻusia ʻi hono moʻui ʻaki ʻa e meʻa kuo nau akó?
-
Te ke lava fēfē ʻo faʻu ha tukufakaholo ʻo hono vahevahe ʻe he kau akó ʻenau ngaahi feinga ke moʻui ʻaki ʻa e ongoongoleleí ʻi he kotoa ʻo e kalasí ʻi ha foʻi teemi?
Fakatahaʻi
Fokotuʻu ha taimi ke ke ʻeke ai ʻa e ngaahi fehuʻi ko ʻení ko ha konga ʻo hoʻo teuteu lēsoní:
-
“Ko e hā ha fakaafe te u lava ʻo fai te ne fakaʻatā ʻa e kau akó ke vahevahe ʻenau ngaahi aʻusia ʻi hono moʻui ʻaki e ngaahi moʻoni ne nau ako ʻi ha kalasi kimuʻa?”
-
“Ko e fē nai ha taimi lelei ke fakahoko ʻa e toe vakaiʻí?”
Fie Ako Lahi Ange?
-
M. Russell Ballard, “Toe Vakaiʻí,” Ensign pe Liahona, Mē 2014, 78–81.