Tokanga Taha kia Sīsū Kalaisi

Fakamamafaʻi ʻa e sīpinga ʻa Sīsū Kalaisí.

Taukeí: Tokoniʻi e kau akó ke fakafehokotaki ʻa e meʻa ʻoku nau akó mo e founga hono fakahaaʻi ʻe Kalaisi ʻa e tefitoʻi moʻoní.

Fakamatalaʻi

ʻI hono tokoniʻi e kau akó ke hoko ʻa Sīsū Kalaisi ko e uho ʻo ʻenau akó, ʻe tokoni ia ke nau maʻu ha aʻusia fakaako fakataautaha mo mālohi ange. Ko e founga ʻe taha ʻe lava ke tau fakahoko ai ʻení ko hono tokoniʻi e kau akó ke fakafehokotaki e meʻa ʻoku nau akó ki he moʻui mo e sīpinga ʻa Sīsū Kalaisí. Te ke lava ʻo fai ʻeni ʻaki hono fakaʻaongaʻi e ngaahi fehuʻi fakafehokotaki ʻi he kotoa ʻo ha lēsoní. ʻOku tokoni e ngaahi fehuʻi ko ʻení ki he kau akó ke fakafehokotaki e moʻui mo e sīpinga ʻa Sīsū Kalaisí ki he

• ngaahi fakaikiiki ʻo ha talanoa mei he folofolá,

• ngaahi tefitoʻi moʻoni ʻi he folofolá, mo e

• ngaahi aʻusia ʻi heʻenau moʻuí.

Fakatātaaʻi

Ko ha ngaahi sīpinga ʻeni ʻe niʻihi ʻo e founga te ke ala tokoniʻi ai e kau akó ke fakafehokotaki mo e moʻui mo e sīpinga ʻa Sīsū Kalaisí:

• Hili hono lau ha talanoa mei he folofolá mo aleaʻi e ngaahi fakaikiikí, te ke lava ʻo fehuʻi, “Ko e hā e meʻa ʻi he talanoá ni ʻokú ne fakamanatu atu e moʻui mo e sīpinga ʻa Sīsū Kalaisí?”

• Hili hono ʻiloʻi ha tefitoʻi moʻoní, te ke lava ʻo fehuʻi, “Ko e fē ʻi he folofolá naʻe fakatātaaʻi ai ʻe Sīsū ʻa e tefitoʻi moʻoni ko ʻení?”

• Hili hono vakaiʻi fakaʻauliliki ha tefitoʻi moʻoni, te ke lava ʻo fehuʻi, “Ko e fē ha taimi kuó ke mamata ai ki hono fakatātaaʻi ʻe Sīsū ʻa e tefitoʻi moʻoni ko ʻení ʻi hoʻo moʻuí pe maʻau?”

• ʻI hono aleaʻi hono fakaʻaongaʻi ʻo ha tefitoʻi moʻoní, te ke lava ʻo fehuʻi, “Ko e hā ha meʻa mei he sīpinga ʻa Sīsuú ʻokú ne tokoniʻi koe ke ke moʻui fakaʻaufuli ange ʻaki ʻa e tefitoʻi moʻoni ko ʻení?”

• Te ke lava foki ʻo fehuʻi, “ʻE tokoni fēfē hono moʻui ʻaki e tefitoʻi moʻoni ko ʻení ke ke muimui ki he sīpinga ʻa Sīsū Kalaisí pea hoko ʻo hangē ko Iá?”

Lomiʻi heni ke vakai ki ha vitiō ʻo e sīpinga ko ʻení.

Fakaangaanga

Fakaʻaongaʻi ha founga ʻe taha pe lahi ange ʻi he ngaahi foungá ni ke fakatupulaki hoʻo malava ke tokoniʻi e kau akó ke nau fakafehokotaki mo e moʻui mo e sīpinga ʻa Sīsū Kalaisí:

• Fakakaukau ki he tefitoʻi moʻoní: “Kapau te tau talangofua neongo e ngaahi faingataʻá, ʻe tokoniʻi leva kitautolu ʻe he ʻOtuá.” ʻI hoʻo teuteú, akoako fakafehokotaki e tefitoʻi moʻoni ko ʻení ki ha sīpinga ʻe taha pe ua ʻo e moʻui ʻa Sīsuú ʻi he folofolá.

• Vakai ki ha palani ʻo e lēsoni ka hokó. Fili ha tefitoʻi moʻoni ʻokú ke palani ke tokoni ke ʻiloʻi ʻe he kau akó. Akoako hono hiki ha fehuʻi faingofua ʻe ua pe tolu ke tokoni ki he kau akó ke fakafehokotaki ʻa e tefitoʻi moʻoni ko iá ki he sīpinga ʻa Sīsū Kalaisí.

• Kumi ha feituʻu ʻi ha lēsoni palani hoko mai te ke tokanga taha ai ki hono fakaʻaongaʻí. Fakaangaanga hono hiki ha fakaafe ʻe ua pe tolu ʻe tokoni ki he kau akó ke nau fakakaukau ki he founga ʻe lava ke tokoniʻi ai kinautolu ʻe he sīpinga ʻa Sīsū Kalaisí ke fakaʻaongaʻi ha tefitoʻi moʻoní.

Aleaʻí pe Fakalaulaulotó

Fakalaulauloto ki he meʻa kuó ke ako mei he aʻusia ko ʻení. Mahalo te ke lava ʻo hiki ha niʻihi ʻo e ngaahi fakakaukau ko ʻení ʻi ha tohinoa ako. Fakakaukau ki he ngaahi fehuʻi ko ʻení:

• Ko e hā kuó u fakahoko kimuʻa ke fakafehokotaki ai e meʻa ʻoku ako ʻe he kau akó ʻi he folofolá ki he moʻui mo e sīpinga ʻa Sīsū Kalaisí?

• Ko e hā kuó u ako mei he aʻusia ko ʻení ʻe lava ʻo fakatupulaki ai ʻeku malava ke tokoniʻi e kau akó ke fakahoko e ngaahi fakafehokotaki ko ʻení kia Sīsū Kalaisí?

• Ko e hā te u fakahoko ke hokohoko atu ʻeku fakalakalaká?

Fakatahaʻi

Fakatahaʻi e meʻa kuó ke akoako fakahokó ke tokoni ki he kau akó ke fakafehokotaki ʻa e meʻa ʻoku nau akó kia Sīsū Kalaisi mo fakamamafaʻi ʻEne sīpingá. Lolotonga e uike hono hokó, fili ha tefitoʻi moʻoni ʻe taha ʻi he lēsoni takitaha te ke fakaʻaongaʻi ke tokoni ke fakafehokotaki ʻe he kau akó ʻa e meʻa ʻoku nau akó kia Sīsū Kalaisi mo ʻEne sīpingá.

Fie Ako Lahi Ange?

• Neil L. Andersen, “ʻOku Mau Lea ʻia Kalaisi,” konifelenisi lahi, ʻOkatopa 2020

• Section 3.1, “Unit 3: Teach the One,” Inservice Leaders’ Resources