“Dagiti Kapanunotan tapno Mapadur-as ti Bukodmo a Panagadal iti Nasantuan a Kasuratan,” Dagiti Kapanunotan iti Panagadal iti Nasantuan a Kasuratan (2021)
“Dagiti Kapanunotan tapno Mapadur-as ti Bukodmo a Panagadal iti Nasantuan a Kasuratan,” Dagiti Kapanunotan iti Panagadal iti Nasantuan a Kasuratan
Dagiti Kapanunotan tapno Mapadur-as ti Bukodmo a Panagadal iti Nasantuan a Kasuratan
Dagitoy ti sumagmamano a simple a wagas a mangpadur-as iti panagadalmo ti balikas ti Dios kadagiti nasantuan a kasuratan.
Agkararag para iti Inspirasion
Naglaon dagiti nasantuan a kasuratan iti balikas ti Dios. Kabayatan ti panagadalmo kadagitoy, dawatem iti Nailangitan nga Ama ti pannarabayna ken umawat iti Espirituna a mangtulong kenka a makaawat kadagitoy.
Sapulem dagiti Kinapudno maipapan ken ni Jesucristo
Isuronatayo dagiti nasantuan a kasuratan a paneknekan ti amin a banag maipapan ken ni Cristo (kitaen iti 2 Nephi 11:4; Moises 6:63), isu a sapulem Isuna kadagiti pasamak, estoria, ken pannursuro dagiti nasantuan a kasuratan. Ibilangmo ti panangisurat wenno panangmarka kadagiti bersikulo a mangisuro maipapan iti Mangisalakan ken no kasano ti mangsurot Kenkuana.
Sapulem dagiti Makaparegta a Balikas ken Ragup ti Balikas
Mabalin a makakitaka iti sumagmamano a balikas ken ragup ti balikas kadagiti nasantuan a kasuratan a makaawis iti riknam, a kasla naipangpangruna a naisurat dagitoy a para kenka. Mabalin a mariknada a personal nga adda pakainaiganna dagitoy ken mangparegta ken mangguyugoy kenka. Ibilangmo ti panangmarka kadagitoy kadagiti nasantuan a kasuratam wenno panangisurat kadagitoy iti study journalmo.
Sapulem dagiti Kinapudno iti Ebanghelio
No dadduma madakamat a direkta dagiti kinapudno iti ebanghelio (masansan a maawagan iti doktrina wenno dagiti pagbatayan), ken no dadduma mailadawanda babaen iti maysa a pagarigan wenno estoria. Saludsodem ti bagim, “Ania dagiti kinapudno iti ebanghelio a maisursuro kadagitoy a bersikulo?”
Dumngeg iti Espiritu
Imdengam dagiti kapanunotam ken riknam, nga uray dagitoy ket kasla awan pakainaiganna iti basbasaem. Dagita nga impresion ket mabalin a dagiti mismo a banag a kayat ti Nailangitan nga Amam a masursurom ken mariknam.
Yarigmo dagiti Nasantuan a Kasuratan iti Biagmo
Ibilangmo no kasano a mayaplikar iti biagmo dagiti estoria ken pannursuro a basbasaem. Kas pagarigan, mabalin a saludsoden iti bagim, “Ania dagiti padasko a maipada iti basbasaek?” wenno “Kasano a masurotko ti pagwadan daytoy a tao kadagiti nasantuan a kasuratan?”
Agdamag kadagiti Saludsod
Ti panagdamag kadagiti saludsod maipapan iti ebanghelio ti makatulong kenka a mangikeddeng no ania ti adalem. Bayat ti panangadalmo kadagiti nasantuan a kasuratan, mabalin a sumangbay dagiti saludsod iti panunotmo. Mabalin a mainaig dagitoy a saludsod ti no ania ti basbasaem wenno iti biagmo iti sapasap. Utobem dagitoy a saludsod, ken sapulem dagiti sungbat bayat ti panagtultuloymo a panagadal kadagiti nasantuan a kasuratan. Kalpasan ti panagadalmo, saludsodem no ania pay ti ipasursuro ti Dios, ket siputam dagiti sungbat kabayatan dagiti umay nga oras ken aldaw.
Usaren dagiti Tulong iti Panagadal iti Nasantuan a Kasuratan
Tapno magun-od dagiti nayon a nalawag a pannakaammo ken pannakaawat [insights] kadagiti bersikulo a basaem, usarem dagiti footnote, ti Topical Guide, ti Bible Dictionary, ti Pangiwanwan iti Nasantuan a Kasuratan (scriptures.Churchof JesusChrist.org), ken dadduma pay a tulong iti panagadal.
Ibilang ti Konteksto dagiti Nasantuan a Kasuratan
Masarakam dagiti napapateg a nalawag a pannakaammo ken pannakaawat maipapan iti nasantuan a kasuratan no ibilangmo ti konteksto daytoy—dagiti kasasaad wenno ti nakapasamakan ti nasantuan a kasuratan. Kas pagarigan, ti panangammo iti nagtaudan ken ti pammati dagiti tao nga insao ti propeta ket makatulong kenka a makaawat iti panggep dagiti mensahena.
Isuratmo dagiti Kapanunotam ken Riknam
Adu a wagas ti panangisurat kadagiti sumangbay nga impresion bayat ti panagadalmo. Kas pagarigan, mabalinmo a markaan ti maysa a napateg a balikas wenno ragup dagiti balikas ket isuratmo dagiti kapanunotam a kas maysa a palagip kadagiti nasantuan a kasuratam. Mabalinmo met nga isurat iti journal dagiti nalawag a pannakaammo ken pannakaawat [insights], rikna, ken impresion a maawatmo. Wenno mabalinmo nga isurat ti saludsod a dinamagmo sakbay ti rugi ti panagadalmo, a sarunuen dagiti sungbat a nakaiwanwanam.
Adalem dagiti Balikas dagiti Propeta ken Apostol iti Ud-udina nga Aldaw
Basaem ti insuro dagiti propeta ken apostol iti ud-udina nga aldaw maipapan kadagiti pagbatayan a masarakam kadagiti nasantuan a kasuratan. Adda a magun-od dagiti mensaheda iti “Sapasap a Komperensia,” “Dagiti Magasin,” ken dadduma pay a koleksion iti Gospel Library.
Basaen dagiti Estoria
Basaen dagiti estoria iti nasantuan a kasuratan, nga agkalkalikagum iti pannakaawat iti konteksto dagitoy (oras, lugar, nagsarita, ken dagiti agbuybuya wenno agdengdengngeg). Dagiti nailadawan nga estoria iti nasantuan a kasuratan ti dakkel a resource para iti daytoy, nangnangruna para kadagiti ubbing ken miembro a saan pay unay a pamiliar kadagiti nasantuan a kasuratan.
Ibinglay dagiti nalawag a pannakaammo ken pannakaawat [insights]
Ti panangilawlawag kadagiti nalawag a pannakaammo ken pannakaawat manipud iti bukodmo a panagadal ket maysa a nasayaat a wagas a mangisuro kadagiti dadduma ken mangtulong a mangpapigsa iti pannakaawatmo maipapan iti no ania ti nabasamon.
Agbiag babaen iti No Ania ti Masursurom
Saan laeng a makaparegta kadatayo ti panagadal iti nasantuan a kasuratan no di ketdi iturongnatayo pay a mangbalbaliw iti wagas a panagbiagtayo. Dumngeg no ania ti iparikna kenka ti Espiritu nga aramidem bayat ti panagbasam, ket kalpasanna agkumit nga agtignay kadagita a parikna.