“Ekkoch Kokkot ne Aeochueno An Om Famini Kaeo Pukefel,” Ekkoch Kokkotun Kaeo Pukefel (2021)
“Ekkoch Kokkot ne Aeochueno An Om Famini Kaeo Pukefel,” Ekkoch Kokkotun Kaeo Pukefel
Ekkoch Kokkot ne Aeochueno An Om Famini Kaeo Pukefel
An famini kaeo pukefel iteiten fansoun a ew aan mi manaman ne anisi om famini ne kaeo ewe kapas allim. Ifa ukukun me ifa taman ami annea fengen non ami we famini ese kon auchea usun ami soun achocho ne fofori. Nupwen kopwe fori pwe kaeon pukefel epwe ew auchean kinikinin manauen om famini, kopwe anisi chochon om famini repwe arap ngeni Jises Kraist me amari ar kapasen pwarata won nongonongen An kapas.
Ekieki usun ekkei kapaseis:
-
Ifa usun ka tongeni pesei chochon om famini repwe kaeo ekkewe pukefel won winikaper?
-
Met ka tongeni fori ne pesei chochon om famini repwe aporousa met ra kaeo?
-
Ifa usun ka tongeni itenapei ekkewe nongonong ka kaeo me non ekkewe pukefel non iteiten fansoun asukun?
Chechemeni pwe ewe imw ina ewe murinon neni ne kaeo me asukuna ewe kapas allim. Ka tongeni kaeo me asukuna ewe kapas allim non imw non napanap minne rese tufich me non ew klasin Mwichefen. Kopwe angoch nupwen ka ekieki usun ekkoch aanen om kopwe anisi om famini ne kaeo seni ekkewe pukefel. Ekieki ekkoch ekkei kokkot ne anapano an om famini kaeo pukefel.
Nounou Kön
Konu ekkoch kon mi apochokuna ekkewe nongonong mi keit me non ekkewe pukefel.
Aporousa Pukefel mi Auchea
Awora fansoun ngeni chochon famini ar repwe aporousa uwokisin non pukefel minne ra kuna pwe mi auchea ngenir fansoun ar kaeo.
Aea Pwisin Om Kapas
Etiwa chochon famini repwe mennapei non pwisin ar kapas met ra sinei seni ekkewe pukefel ka kaeo.
Nounou ekkewe Pukefel ngeni Manauom
Mwirin om annea ew uwokisin non pukefel, eisini chochon famini repwe aporousa ekkoch napanap ewe uwokisin a fich ngeni manauer.
Eis ew Kapaseis
Etiwa chochon famini repwe eis ew kapaseisen kapas allim, me mwirin awora fansoun ne kut uwokisin minne ir mi tongeni pwonueni ewe kapaseis.
Pwari ew Pukefel
Fini ew uwokisin ka kuna pwe mi auchea, me pwari ikewe chochon famini repwe kuna fan chommong. Etiwa chochon famini pwe emon me emon epwe fini ew uwokisin epwe pwari.
Fori ew Tettenin Pukefel
Ren ew famini, fini ekkoch uwokisin oupwe aporous wor non ewe wik epwe feito.
Amwochu non ekiek ekkewe Pukefel
Fini ew uwokisn pukefel mi auchea ngeni om famini, me etiwa chohon famini repwe amwochu non ar ekiek ren ar anniwini iteiten ran ika fori ew urumotun chechemeni.
Aea fengen Pisekin ekkewe Nesen
Kutta ekkoch pisek mi wewe ngeni ekkewe sopun me uwokisn minne oua anneani ren ami we famini. Etiwa chochon famini repwe kapas ren ifa usun ew me ew mettoch a wewe ngeni ekkewe afanafan non ekkewe pukefel.
Fini ew Itenap
Mut ngeni chochon famini pwe emon me emon epwe fini ew itenap ewe famini epwe kaeo fengeni. Aea ewe Topical Guide, ewe Bible Dictionary, ika ewe Guide to the Scriptures (scriptures.ChurchofJesusChrist.org) ne kutta uwokisin pukefel usun ewe itenap.
Chungani echo Sasing
Anneani ekkoch uwokisin non om we famini, me mwirin awora fansoun ren chochon famini ar repwe chungani och mettoch mi wewe ngeni met oua anneani. Awora fansoun ne porous fengen usun an emon me emon chunga.
Pwomweni ew Tutunap
Mwirin ami anneani ew tutunap, etiwa chochon famini repwe pwomweni. Mwirin, kapas fengen ren ifa usun ewe tutunap a wewe ngeni ekkewe mettoch ka mefi won winikapom me ren om we famini.
Elter David A. Bednar a aitikich: “Ew me ew iotekin famini, ew me ew fansoun an famini kaeo pukefel, me ew me ew pwinin famini a ew rasen peinit won ewe pekin chunga non manauach. Esap wor mettoch a fis epwe usun nge mi fokkun amwarar me mwoch non ekiek. Nge usun chok ekkewe rasen peinit mi on me gold ra och fengen me awora ew amwararen chunga, iwe pwan ach soun foffori mettoch mi kukkun a tongeni emweni ngeni watten pungunon pekin ngun” (“More Diligent and Concerned at Home,” Liahona, Nov. 2009, 19–20).