E aha te mau rāve’a maita’i a’e nō te fa’a’ite i te here huru Mesia ?

Fa’ateitei ia vetahi ’ē

Noa atu e ’ere te fa’ahina’arora’a ta’ata nō tōna iho ’āpeni i te hara, e nehenehe e riro ’ei tāmatara’a. Noa atu ’aita paha te hō’ē ta’ata i mā’iti ’ia roa’a te reira mau mana’o, e nehenehe tāna e fafau e ha’apa’o i te mau fa’auera’a a te Atua. Te metua e tamari’i tāna e fa’aruru nei i te fa’ahina’arora’a ta’ata nō tōna iho ’āpeni ’aore rā tē fa’a’ite ra iāna ’ei homo’āpeni, e ti’a iāna ’ia mā’iti ’ia here ’e ’ia tauahi i te reira tamari’i. ’Ei autahira’a melo nō te ’Ēkālesia, e ti’a ia tātou ’ia mā’iti ’ia fa’atupu i te hō’ē pupu fāri’i maita’i.

« E mea faufa’a rahi roa ’ia māramarama tātou, nā mua roa ē, tei ni’a tātou tāta’itahi i te purūmu i te vāhi ta’a ’ē te tahi ’e te tahi, ’e tē fa’atupu nei tātou i te fa’a’itera’a i te ta’ata ’ati a’e ia tātou.

« ’Ua mātau vau i te ta’ata e haere mai nei i te fare purera’a i te mau sābati ato’a, ’ia ti’a ia rātou ’ia fa’auruhia ’e ’ia fa’ateiteihia, ’e ’o tē ho’i atu ma te feruri ē, ’ua ha’avāhia rātou ’e ’aita i herehia. ’Aita i hina’arohia. Mai te mea ra e ’aita e pārahira’a nō rātou i te fare purera’a. E ti’a ia tātou ’ia rave ta’a ’ē i te reira. E ti’a ia tātou ’ia ’ite hōhonu i te tumu e haere mai ai tātou i te purera’a i te sābati, ’e ’ia ha’apāpū ē, te mau ta’ata ato’a e haere mai, ’ia ’ite rātou ē, ’ua herehia rātou, ’ua hina’arohia, ’ua fāri’ihia ’e ’ua fa’ateiteihia. E mau ’arora’a tā te mau ta’ata ato’a ’aita tātou i ’ite. ’E e mea faufa’a roa ’ia ’ite tātou ē, ’ua here te Atua i te mau ta’ata ato’a ’ati a’e ia tātou, ’e e mea ti’a ia tātou ’ia hi’o ia rātou mai tā te Mesia e hi’o nei ia rātou. ’E e’ita tā tātou e nehenehe e vaiiho i te mana’o ha’avā ’ia fa’a’ite mai i te huru nō tā tātou ha’ara’a i pīha’i iho i te ta’ata. E ’ere i te mea tano. Te mana’o nei au ē, tē tu’u nei te Fatu ia tātou i te vāhi tei reira tātou ’e tē fa’atū’ati nei ’oia ia tātou i te mau ta’ata ’ati a’e ia tātou nō te hō’ē tumu. Nō te mea, e ’ere nō tō tātou ana’e haerera’a i mua, nō te tauturu ato’a rā ia vetahi ’ē ’ia haere i mua. ’E ’ua ’itehia iā’u ē, ’ua tu’uhia tātou i te vāhi tei reira tātou ’ia ti’a ia tātou ’ia here ’e ’ia fa’ateitei ia vetahi ’ē.

« E’ita e ti’a ia tātou ’ia riro ’aore rā ’ia pi’i ia tātou iho ’ei pipi nā te Mesia, mai te mea ’aita tātou e tauturu ia vetahi ’ē i ni’a i taua ’ē’a ra. E’ita te ’evanelia a Iesu Mesia e tu’u i te ta’ata i te hiti. E tu’u ra te ta’ata i te ta’ata i te hiti. ’E nā tātou e tātā’i i te reira. E tītauhia ia tātou ’ia vai ara noa ’e ’ia here ia rātou ’e ’ia vaiiho ia rātou i te taime nō te tupu i te rahi ’e ’ia māhorahora ’e ’ia riro ’ei mau ta’ata maita’i roa a’e. E tārēni ’e te ’aravihi tō rātou ’e e huru ta’ata te hina’arohia i roto i te bāsileia o te Atua. ’E mai te mea e patu tātou i te bāsileia o te Atua i ni’a i te fenua nei, e hina’aro tātou i te mau ta’ata ato’a ’ia haere mai, e haere mai e rave i tā rātou tuha’a. ’E e ti’a ia tātou ’ia ’ite i te reira. ’Ia ha’apoiri ana’e te ata o te tahi ta’ata i te ’ūputa o te fare purera’a, e ti’a ia rātou ’ia ’ite i terā iho taime ’ua tauahihia rātou ’e ’ua herehia ’e ’ua fa’ateiteihia ’e ’ua fa’auruhia, ’a haere atu ai rātou i rāpae ’e ’ia maita’i a’e. Nō te mea ’ua ’ite rātou ē, tē here nei te Fatu ia rātou. ’E nō te mea e mau hoa tō rātou i roto i tā rātou fa’aro’o » (Carol F. McConkie, « Lifting Others », ChurchofJesusChrist.org).

Tāvini ’e here i tō ’outou ta’ata tupu

« Hina’aro ’oe i tō Atua ia Iehova ma tō ’ā’au ato’a, ’e ma tō vārua ato’a, ’e ma tō mana’o ato’a. ’O te ture mātāmua teie ’e te hau i te rahi. ’E mai te reira ato’a te piti, e aroha atu ’oe i tō ta’ata tupu, mai tō aroha ia ’oe iho » (Mataio 22:37–39).

« Teie tā’u parau, ’ia aroha ’outou ia ’outou iho, mai iā’u e aroha atu ia ’outou na » (Ioane 15:12).

E fa’a’ite tātou i tō tātou here i te Atua nā roto i te ha’apa’ora’a i tāna mau fa’auera’a (hi’o Ioane 14:15) ’e nā roto i te herera’a i te tahi ’e te tahi (hi’o Ioane 13:34). Mai te peu e melo ’utuāfare tō ’outou ’aore rā e hoa e fa’aruru nei i te fa’ahina’arora’a ta’ata nō tōna iho ’āpeni ’aore rā tei parauhia e homo’āpeni, ’a here ia rātou. ’Ua nā ’ō mai te peresideni Henry B. Eyring :

« Mai te mea e hina’aro ’outou e fa’aea noa i pīha’i iho i te hō’ē ta’ata tā ’outou i here, ’o tei fa’aātea rā i teienei, ’ua ’ite ’outou e aha te rave. E ’itehia ia ’outou te hō’ē rāve’a nō te paraparau ia rātou, e fa’aro’o ’outou ia rātou ’e e ’itehia ia ’outou te mau rāve’a nō te rave i te tahi mau ’ohipa nō te tahi ’e te tahi. Pinepine atu te reira i te tupu, maoro noa ato’a te reira e hōhonu noa ato’a atu te tā’amura’a au i te tahi. Mai te peu e rahi roa te taime ’aita e paraparaura’a, ’aita e fa’aro’ora’a ’e ’aita e ravera’a, e paruparu mai te tā’amura’a.

E mea maita’i roa te Atua ’e te pūai hope, e mea tāhuti ’outou ’e o vau nei. ’O ’oia rā tō tātou Metua, ’ua here ’oia ia tātou, ’e tē pūpū nei ’oia i te hō’ē ā rāve’a nō te ha’afātata iāna mai tā te hō’ē hoa rahi e rave. ’E e nā reira ato’a ho’i ’outou i te rave : E paraparau, e fa’aro’o ’e e rave » (« To Draw Closer to God », Ensign, Mē 1991, 66).

E fa’a’ite ’outou i tō ’outou here i te Atua nā roto i te herera’a ’e te tāvinira’a ia vetahi ’ē.

« ’E inaha, e fa’a’ite atu vau ia ’outou na i taua mau mea nei, ’ia ’ite ’outou i te pa’ari ; ’ia ’ite ho’i ’outou ē, ’a tāvini ai ’outou i te ta’ata nei tē tāvini ra ïa ’outou i tō ’outou Atua ra » (Mosia 2:17).

E aha te aura’a nō te herera’a i te tahi ’e te tahi ? E mea aupuru te here. E tari’a fa’aro’o te here. E tauahi mai te here. E fa’auru te here. ’O te here te pū nō tō tātou rirora’a ’ei ta’ata, inaha ho’i e tamari’i tātou nā te Atua ’e « e aroha ho’i te Atua » (1 Ioane 4:8). I te tāmā’ara’a hope’a, ’ua parau fa’ahou te Fa’aora ē, « ’o te mea teie e ’ite ai te ta’ata ato’a ē, e pipi ’outou nā’u, ’ia aroha ’outou ia ’outou iho » (Ioane 13:35).

Fa’atura i te mau ta’a-’ē-ra’a

Mai te peu e melo ’utuāfare tō ’outou ’aore rā e hoa e fa’aruru nei i te fa’ahina’arora’a ta’ata nō tōna iho ’āpeni ’aore rā tei parauhia e homo’āpeni, ’a here ia rātou. Te fa’auera’a e here i te tahi ’e te tahi, ’o rātou ato’a ïa ’aita e hi’o nei i teie nei ao mai ia tātou nei.

Mai tā Elder Dallin H. Oaks i ha’apāpū mai :

« I roto i te mau autā’atira’a ’e i te mau huru e rave rahi o te orara’a, e tītauhia ia tātou ’ia ora ’e tera ’e tera ta’a-’ē-ra’a. Mai te mea e mea faufa’a te reira, ’eiaha tātou e huna ’aore rā, e fa’aru’e i tō tātou nei ta’a-’ē-ra’a, ’oia mau, ’ei feiā pe’e i te Mesia, e ti’a ia tātou ’ia ora ma te hau i pīha’i iho i terā mau ta’ata ’o tē ’ore e tū’ati nei te mana’o i ni’a i tā tātou mau faufa’a ’aore rā, ’o tē ’ore e fāri’i nei i te mau ha’api’ira’a niu nō te reira. Tē tu’u nei te fa’anahora’a nō te fa’aorara’a a te Metua ia tātou, tā tātou i ’ite nā roto i te heheura’a, i roto i te orara’a tāhuti nei i reira e tītauhia ai ia tātou ’ia ha’apa’o i tāna mau fa’auera’a. ’O te herera’a ato’a ho’i i tō tātou mau ta’ata tupu nō terā ’e terā ta’ere, e terā ’e terā ti’aturira’a, mai iāna i aroha mai ia tātou nei. Mai tā te hō’ē peropheta nō te Buka a Moromona i ha’api’i mai, ’ia haere tātou i mua, ma te ‘here i te Atua ’e te ta’ata ato’a’ (2 Nephi 31:20) » (« Te herera’a ia vetahi ’ē ’e te orara’a i roto i te ta’a-’ē-ra’a », Liahona, Novema 2014, 28).