Pasiuna

Ang pagkabilanggo sa usa ka minahal mahimong usa ka makahahadlok nga kasinatian. Tingali gibati nimo nga nag-inusara, naglisod nga makasugakod sa panalapi, og nabalaka bahin sa umaabot (tan-awa sa Isaias 41:10). Ang Langitnong Amahan ug si Jesukristo nasayod sa imong mga panginahanglan ug gusto nga mohupay kanimo. Usa sa mga paagi nga magpadala og tabang ang Dios mao ang paggamit sa ubang tawo. Tingali nasakitan ka ug naulaw, ug tingali gusto nimong ipahilayo ang imong kaugalingon gikan sa uban. Apan, ang pagtugot sa uban sa paghatag og tabang maoy usa ka paagi sa pagpakita sa Dios nga ikaw mapasalamaton sa Iyang gugma. Paliboti ang imong kaugalingon og mga tawo nga kasaligan nimo ug mga hanas nga makatabang.

Si Elder Jeffrey R. Holland sa Korum sa Napulog Duha ka Apostoles sa Ang Simbahan ni Jesukristo sa mga Santos sa Ulahing mga Adlaw, mitudlo: “Ang Dios sa dakong kahinam naghulat alang sa kahigayonan sa pagtubag sa inyong mga pag-ampo ug sa pagtuman sa inyong mga damgo, sama sa kanunay Niyang gibuhat. Apan dili Siya makahimo kon kamo dili mag-ampo, ug Siya dili makatuman kon kamo dili mangandoy. Sa ato pa, dili Siya makahimo kon dili kamo motuo” (“Terror, Triumph, and a Wedding Feast” [Brigham Young University devotional, Sept. 12, 2004], 3, speeches.byu.edu).

Si Sister Reyna I. Aburto, usa ka lider sa organisasyon sa mga babaye sa Simbahan, mihatag og dugang nga pag-awhag samtang siya mitudlo: “Kon gibati nimo nga dili na ka makahimo og usa pa ka lakang, palihog pangayo og tabang. Ang akong hangyo mao nga ayaw paghunong. Adunay paglaom. Adunay pagkaayo. Adunay hingpit nga kalipay. Adunay gugma nga nagpalibot kanimo. Palihog dangop ngadto sa matubsanon nga grasya sa Ginoo ug duol sa mga tawo sa imong palibot. Ayaw paghunong. Palihog ayaw paghunog” (sa “Sister to Sister Conversation” [Brigham Young University Women’s Conference, May 1, 2020], ChurchofJesusChrist.org).