“Lesen 5: Ol Loa mo Ol Odinens,” Prijim Gospel Blong Mi: Wan Gaed blong Misinari Seves (2018), 86–94

“Lesen 5,” Prijim Gospel Blong Mi, 86–94

Lesen 5

Ol Loa mo Ol Odinens

Pikja

Kraes i stap holem wan smol sipsip

Rere blong Tij

Lesen ia i wok semmak olsem lesen 4. Fasin we yu yusum blong tij bae i dipen long ol nid, ol intres mo ol situesen blong ol pipol we yu stap tijim mo wanem we Spirit i lidim yu blong mekem. Oltaem tingting mo prea abaot olsem wanem yu save helpem ol narawan blong oli laef folem gospel. Tingting plante long ol kwestin mo level blong andastaning blong olgeta we yu tijim. Ol aedia i tekem tu:

Tijim wan o moa long ol loa mo odinens we i stap long lesen ia mo long semtaem luklukbak long ol lesen blong “Mesej blong Restoresen blong Gospel blong Jisas Kraes,” “Plan Ia blong Sevem Man,” mo “Gospel blong Jisas Kraes”. Eksampol, taem yufala i stap luklukbak long mesej blong Restoresen bae yu wantem tij abaot prishud mo misinari wok; taem yufala i stap tijim plan ia blong fasin blong sevem man, yu save tij abaot mared we i no save finis, ol tempol mo wok blong famli histri, mo stap tij mo lan insaed long Jos. Taem yufala i stap tijim gospel blong Jisas Kraes, yu save tij abaot stret mo smol rod mo stap givim seves insaed long Jos.
Tijim tu o tri loa mo ol odinens long wan lesen nomo.
Tijim wan loa mo odinens long wan lesen nomo.

Wok wetem ol memba blong helpem ol pipol we yu stap tijim blong akseptem mo statem blong laef folem ol loa mo ol odinens ia. Helpem ol pipol blong oli luksave se taem oli stap obei ol loa blong God, bae oli save stap klin long ol sin blong olgeta mo oli save stap long rod we i go long laef we i no save finis. Bae oli save gat eksperiens long wan pis mo glad we i moa bigwan. Bae oli save faenem ol ansa long ol kwestin blong laef mo faenem proteksen long save blong olgeta se oli blong tru Jos blong Jisas Kraes. Ol loa mo ol odinens oli stap blong lidim yumi blong laef wetem glad, wetem fet long Jisas Kraes, mo wetem wan strong hop blong kasem laef we i no save finis wetem Papa blong yumi long Heven.

Lanem abaot Ol Loa, Ol Odinens, mo Ol Komitmen

Taem yu stap stadi “Ol Loa mo Ol Odinens,” bae hem i help blong folem paten we i stap daon ia.

Stadi long seksen we i tokbaot doktrin ia, mo raetem wan simpol plan blong lesen wetem tri (3) kasem faef stamba poen.
Tijim kompanion blong yu wan sot pat blong lesen blong 2 o 3 minit. Praktis long olsem wanem bae yu invaetem hem blong mekem wanwan komitmen mo olsem wanem bae yu ansa long eni kwestin we hem i gat.
Toktok raon long ol gudfala wei blong folemap wanwan komitmen we ol niu memba oli bin akseptem.

Prishud mo Ol Okseleri

Prishud hem i paoa mo atoriti we God i givim long man blong mekem samting long nem blong Hem blong mekem se ol pikinini blong Hem oli save sef. Prishud paoa i blesem yumi evri wan. Tru long prishud, yumi kasem ol odinens blong sevem man, mo tu ol blesing blong kam oraet long sik, kamfot mo kaonsel.

Jisas Kraes i lidim Jos Ia blong Jisas Kraes blong ol Lata-dei Sent tru long ol aposol mo ol profet. Olgeta ia oli ol man we oli stret mo gud we God i singaotem olgeta mo oli kasem prishud. Bifo, Kraes i bin odenem ol Aposol blong Hem mo Hem i bin givim prishud long olgeta. Atoriti ia i bin lus taem ol pipol oli bin sakemaot gospel mo oli bin kilimded Kraes mo Ol Aposol.

Prishud Atoriti i bin kambak long 1829 taem Jon Baptaes i bin kamaot long Profet Josef Smit mo Oliva Kowdri. Hem i bin putum ol han blong hem antap long ol hed blong tufala blong givim Aronik Prishud long tufala (luk long Doktrin mo Ol Kavenan 13). Wan sot taem afta Pita, Jemes, mo Jon we oli bin ol fas Twelef Aposol, oli bin putum ol han blong olgeta long Josef Smit mo Oliva Kowdri mo oli bin givim long olgeta Melkesedek Prishud, we Pita, Jemes, mo Jon oli bin kasem long Jisas Kraes (luk long Doktrin mo Ol Kavenan 27:12–13).

Wan man i save kasem atoriti blong prishud taem nomo hem i kasem stret odinesen long wan we i gat atoriti ia mo i putum ol han blong hem antap long hed blong hem. Wan man we i kasem prishud i kasem wan bigfala janis. Hem i mekem kavenan blong mekem ol tabu wok, givim seves long ol narawan, mo help blong bildimap Jos. Hem i mas wantem blong givim seves long God mo wan i mas odenem hem long paoa ia (luk long Doktrin mo Ol Kavenan 4:3; 63:57). Hem i nid tu blong olgeta we oli holem prishud blong oli mas mekem ol tabu odinens, olsem baptaes mo konfemesen. Taem wan i klin inaf mo i yusum prishud atoriti, bae paoa blong God i kamaot klia long hem. Oli save yusum paoa blong God long stret fasin nomo, wetem lav mo fasin blong gat longfala tingting.

?Olsem wanem nao ol woman ol pat long hemia? Presiden Dallin H. Oaks i tijim se ol woman we oli setem apat olgeta olsem ol misinari, Ol ofisa, o ol tija insaed long Jos, oli bin givim long olgeta “prishud atoriti blong mekem wan wok blong prishud” (“The Keys and Authority of the Priesthood,” Ensign o Liahona, May 2014, 51).

Evri prishud oli kam long God. I gat 2 prishud insaed long Jos: Aronik Prishud mo Melkesedek Prishud. Aronik Prishud i givim raet blong mekem ol odinens olsem baptaes, mo sakramen. Ol man we oli klin inaf we oli gat stret yia blong kasem, oli save kasem Aronik Prishud stret afta long baptaes mo konfemesen.

Ol man we oli klin inaf bae oli kasem yet Melkesedek, o Prishud we i moa hae. Ol memba blong Jos oli save kasem ol blesing long saed blong Spirit mo long saed blong bodi tru long paoa blong prishud ia. Olgeta we oli holem Melkesedek Prishud we oli klin inaf oli save givim presen we i Tabu Spirit, odenem ol narawan long prishud olsem we oli talem, anoentem olgeta we oli sik wetem tabu oel, mo givim ol blesing blong hiling mo kamfot. Ol hasban mo ol papa we oli klin inaf mo oli holem Melkesedek Prishud oli save givim ol spesel blesing long ol waef, pikinini mo narafala memba blong famli blong olgeta. Ol givhan brata mo sista oli lukaotgud long wanwan memba mo ol famli long hom blong ol memba. Ol givhan sista oli lukaotgud long ol woman insaed long Jos. Ol bisop mo ol stek presiden oli ol jaj insaed long Jos. Oli gat atoriti blong helpem Ol Sent we oli bin sin blong oli save sakem sin blong olgeta mo stap glad long ol blesing blong Jos membasip we i fulwan. Oli intaviu long ol pipol blong mekemsua we oli klin inaf blong save go insaed long tempol.

Long wan toktok blong Presiden Joseph Fielding Smith we i go long Ol Rilif Sosaeti : “From se oli no givim Prishud long ol sista, oli no putum han antap long hed blong givim long olgeta, hemia i no minim se Lod i no givim atoriti long olgeta. Wan [man] i save gat atoriti we oli bin givim long hem, o oli givim long wan sista, blong mekem sam samting nomo long Jos we oli sap fasem mo i tru, oli impoten blong sevem yumi, olsem wok blong ol sista long Haos blong Lod. Oli gat atoriti we oli bin givim long olgeta blong mekem sam bigfala mo naesfala samting, we i tabu blong Lod, mo we i fasem gud olgeta semmak olsem ol blesing we oli bin givim long olgeta tru long ol man we oli gat Prishud” (Joseph Fielding Smith, “Relief Society—an Aid to the Priesthood,” Relief Society Magazine, Jan. 1959, 4).

Ol okseleri oli oganaesesen tru long prishud atoriti blong oli help blong mekem ol memba oli kam strong. Tugeta, ol man mo ol woman oli stap olsem bigfala risos long misinari wok taem oli help blong stap faenem, tijim mo felosip wetem ol niufala konvet. Rilif Sosaeti we i tekem tu, ol woman we yia blong olgeta i 18 mo ova, oli givhan tru seves i go long ol famli, wanwan man mo woman mo long komuniti. Ol yang woman we yia blong olgeta i stat long 11 kasem 18, oli memba blong Yang Woman program. Ol boe we oli gat semmak yia, oli tekpat long Yang man program. Evri pikinini we yia blong olgeta i 3 kasem 11, oli pat blong Praemeri Oganaesesen. Evri memba we yia blong olgeta i 11 mo i go antap, oli enrol long Sandei Skul klas.

Stadi long Ol Skripja

Ol Invitesen

?Bae yu rere blong kasem Aronik Prishud? (Hemia i blong olgeta man we oli klin inaf mo yia blong olgeta i stret)
?Bae yu rere blong kasem Melkesedek Prishud? (Hemia i blong ol bigman we oli klin inaf)?
?Bae yu tekpat fulwan insaed long ol okseleri oganaesesen we bae yu stap long hem?

Misinari Wok

Ol memba we oli serem gospel oli kasem eksperiens blong glad mo oli gat Spirit blong Lod moa wetem olgeta. Taem yumi stap serem gospel, yumi glad from hamas gospel ia i impoten mo i gat mining long yumi, mo yumi filim moa lav blong God mo ol narawan. Lod i bin givim komanmen long olgeta we oli stap folem Hem blong oli mas prijim gospel raon long wol, mo givim janis long evriwan blong gat janis blong akseptem o blong sakemaot gospel ia. Taem ol pipol oli baptaes, oli mekem wan kavenan blong oltaem oli stap olsem ol witnes blong God. Oli kasem komanmen blong serem gospel wetem olgeta we oli no kasem yet. Taem oli laef folem gospel wetem fet, bae oli putum wan eksampol, blong soem long ol memba blong famli mo ol fren blong olgeta ol bigfala blesing we i kam taem oli laef folem gospel. Oli mas tekem ol janis we oli gat blong givim ansa long ol kwestin, serem ol nara tul we oli printim o ol kaset, mo invaetem ol narawan blong lanem moa abaot mesej blong gospel we i bin kambak. Ol memba oli mas prea from olgeta we oli no ol memba blong Jos yet. Oli mas prea blong gat ol janis blong mekem misinari wok—blong givim seves long olgeta we oli no gat semmak bilif wetem yumi mo serem wanem we yumi bilivim. Lod i promes blong helpem ol memba blong save wanem blong talem mo mekem taem oli stap serem gospel.

Stadi long Ol Skripja

Ol Invitesen

?Bae yu rere blong invaetem ol fren mo famli blong yu we oli no memba blong Jos blong save mitim ol misinari blong oli tijim olgeta abaot gospel?
?Bae yu prea from ol misinari mo from ol janis blong serem gospel?
?Bae yu rere blong givim seves long wan misin?

Mared We I No Save Finis

Stamba yunit blong Jos i famli. Insaed long famli, ol pipol oli gotru long plante eksperiens blong glad mo harem nogud blong laef. God i bin odenem mared bitwin man mo woman, mo hem i stamba samting long plan blong God we i no save finis, blong sevem ol pikinini blong Hem. Fasin ia blong stap krietem laef long wol ia, God i putum mo mared i protektem. Plan blong God blong stap hapi, i mekem se fasin blong holem taet ol famli tugeta i save gohed afta long ded. Be, mared i save stap blong taem we i no save finis nomo sapos ol man we oli gat raet mo oli holem prishud oli silim odinens ia insaed long ol tempol mo taem ol hasban mo ol waef we oli bin sil tugeta oli stap kipim ol kavenan we oli bin mekem. Ol hasban mo ol waef oli mas lavem olgeta. Taem oli stap obei ol komanmen mo laef folem ol prinsipol blong gospel, oli mas givim ona long ol promes blong mared fulwan (luk long “Wan Ofisol Toktok I Go long Wol”,” Ensign o Liahona, May 2017, 145; luk tu long Doktrin mo Ol Kavenan 42:22).

I gat sakses oltaem long famli laef taem laef blong famli i stanap long ol tijing blong Lod Jisas Kraes mo taem ol papa mo mama oli mekem famli i kam faswan long evri samting. “Folem plan blong God, ol papa oli mas lidim ol famli blong olgeta wetem lav mo fasin blong stap stret oltaem. Oli gat wok ia tu, blong luk se ol famli blong olgeta i gat proteksen mo evri samting we oli nidim long laef. Ol fas wok blong wan mama hem i blong fidim ol pikinini blong tufala long saed blong spirit mo long saed blong bodi. “Long ol tabu wok ia, papa mo mama, tufala i mas helpem wanwan long tufala, olsem we tufala i semmak” (“Famli: Wan Ofisol Toktok I Go long Wol,” 145). Tugeta, papa mo mama oli tijim ol pikinini blong olgeta long gospel blong Jisas Kraes mo helpem olgeta blong oli laef folem.

Setan i putum plante samting i kam agensem ol famli. Sam yia i pas, ol lida blong Jos oli putum se long Mandei naet hem i wan taem blong famli haos naet. Ol papa mo mama oli mas yusum taem ia blong tijim ol pikinini blong olgeta long saed blong gospel, mekem ol rilesensip wetem olgeta oli kam strong, mo gat gudfala taem tugeta. Ol narafala wei blong mekem famli i kam strong moa, i blong gat tu famli prea mo famli skripja stadi evri dei, stap wosip long jos olsem wan famli, mo stap givim seves long ol narawan. Heven i ples we famli i stap gohed. Tru long ol odinens blong prishud mo stret laef, yumi save laef wetem God long ples we Hem i stap long hem, blong taem we i no save finis.

Stadi long Ol Skripja

Mared

Famli

Tijim Ol Pikinini

Ol Invitesen

?Bae yu save stap gat famli haos naet evri wik, famli prea evri dei, famli skripja stadi evri dei, mo ol narafala famli aktiviti?
?Bae yu save mekem rere blong go insaed long tempol blong (1) kasem endaomen blong yu? (2) blong mared blong taem naoia mo blong taem we i no save finis? (3) sapos yu mared, blong yu sil blong taem we i no save finis olsem hasban mo waef? mo (4) mekem se ol pikinini oli sil long yu?
?Bae yu wosip long Sabat olsem wan famli?
?Bae yu givim seves long ol narawan?

Ol Tempol mo Famli Histri

God i bin givim komanmen long ol pipol blong Hem blong bildim ol tempol. Insaed long tempol, yumi mekem ol tabu kavenan mo yumi endao wetem olgeta, o oli givim yumi, wan presen blong paoa mo save we i kam long antap. Paoa ia i helpem yumi long evri dei laef blong yumi, mo hem i mekem se yumi save bildim kingdom blong God. Insaed long tempol, yumi save mared blong taem naoia mo taem we i no save finis, nao i mekem i posibol blong ol famli oli stap tugeta blong oltaem wetem God. Afta wan yia olsem memba insaed long jos, ol bigman mo woman, oli save kasem wan rekomen long bisop blong olgeta blong oli save kasem endaomen blong olgetawan. Afta we oli kasem ol endaomen blong olgeta, ol mared kapol oli save sil o save mared blong taem we i no save finis.

Sevya i lavem evri pipol mo Hem i wantem se bae oli stap sevem olgeta. Be yet, ol milian pipol oli bin ded mo oli no bin gat janis blong harem mesej blong gospel blong Jisas Kraes we i kambak o kasem ol odinens we bae i sevem olgeta. Tru long gladhat mo sore blong Hem, Lod i mekem se evri man we i no bin gat janis blong kasem, andastanem, mo obei long gospel long taem we oli laef long wol, bae Hem i sevem olgeta. Oli stap prijim gospel ia long ol pipol we oli ded long spirit wol. Ol memba blong Jos long wol oli mekem ol odinens we bae i sevem olgeta long bihaf blong ol bubu mo ol narawan we oli ded. Olgeta we oli ded we naoia oli laef long spirit wol oli gat janis blong akseptem o blong sakemaot gospel mo ol odinens we oli bin mekem long bihaf blong olgeta.

From samting ia, ol memba blong Jos oli lukaotem ol infomesen abaot ol bubu blong olgeta we oli ded finis. Afta, oli save ademap ol infomesen we oli faenem long Jos databes long FamilySearch.org. Wan man o woman i save mekem hemia hemwan o wetem help blong wan konsalten blong tempol o famli histri. Databes blong Jos bae i letem ol memba blong Jos blong serem mo printimaot mo tekem nem blong ol famli we oli ded finis i go long tempol we oli nidim blong mekem ol odinens blong sevem olgeta we bae oli mekem long bihaf blong olgeta we oli ded finis, insaed long tempol. Hemia i wan narafala impoten samting blong mekem famli histri. Ol memba we oli klin inaf we yia blong olgeta i stret(oli gat 12 yia mo moa), hemia ol niu memba tu, oli save kasem long bisop blong olgeta, wan limit yus rekomen blong mekem ol baptaes blong olgeta we oli ded.

Famli Histri

Wok wetem wod misin lida blong helpem olgeta we yu stap tijim mo ol niu konvet oli save long wan wod memba we i save gud long tempol mo famli histri seves (olsem wan konsalten blong tempol mo famli histri). Olgeta oli save helpem ol pipol ia blong faenem ol famli blong olgeta we oli ded finis, we oli nidim blong mekem ol odinens blong olgeta. Long eni ples we i posibol, go wetem ol niufala memba long tempol. Tekpat wetem olgeta blong mekem ol tempol odinens.

Stadi long Ol Skripja

Ol Invitesen

?Bae yu save rere blong yu kasem ol tempol odinens? (I no longtaem afta long baptaes mo konfemesen, ol memba we oli klin inaf we yia blong olgeta i stret (stat long 12) oli save kasem wan rekomen blong go long tempol mo tekem pat long ol baptaes blong olgeta dedman.)
?Bae yu save tekpat long wok blong famli histri mo givim ol nem blong ol bubu blong yu blong oli save kasem ol proksi tempol odinens?

Seves

Wan long ol bigfala blesing blong membasip insaed long Jos, i janis ia blong givim seves. Taem yumi givim seves long ol narawan wetem lav, yumi stap givim seves long God. Taem yumi kasem baptaes, yumi mekem kavenan blong givim seves olsem (luk long Mosaea 18:8–10). Yumi mas kam blong save ol nid blong ol narawan long saed blong bodi mo long saed blong spirit. Afta, yumi givim taem blong yumi, ol talen, mo ol samting we i gat nid long hem blong helpem olgeta we oli stap long nid. Yumi folem eksampol blong Sevya, we i kam blong givim seves long ol narawan. Yumi mas mekem wanem we Jisas i bin mekem mo kam olsem Hem.

Stret afta long baptaes, ol niu memba oli kasem blesing blong wan responsabiliti blong help insaed long Jos, we i kam long ol prishud lida. Hemia oli singaotem wan koling. Evri wok we oli mekem insaed long Jos i fri . I no gat wan man we oli pem seves blong hem. Taem yumi akseptem ol koling, oli sastenem yumi long fored blong evri man long wan miting blong Jos blong mekem se ol nara memba oli save luksave koling blong yu mo givim sapot long yu. Wan prishud lida i setem yumi apat mo hem i givim yumi spesel blesing blong i helpem yumi blong fulfilim ol koling blong yumi. Jos i nidim ol talen mo samting we memba i save mekem blong fulumap plante kaen koling. Evri koling oli impoten mo oli help blong bildim kingdom blong God. Yumi mas traem blong akseptem ol koling olsem mo wok had blong lanem mo fulfilim ol diuti blong yumi. Taem yumi stap mekem olsem, yumi stap groap long fet, developem ol niu talen, mo kam antap long save blong givim seves, mo yumi save kasem plante narafala blesing.

Ol sista mo ol man we oli gat prishud oli save kasem ol asaenmen blong givhan long ol narafala wan. Taem ol memba oli stap givhan, oli faenemaot tru long storian mo insperesen, hamas taem, mo wanem kaen wei blong kontak bae oli gat wetem olgeta we oli stap givim kea long olgeta. Ol givhan brata oli lukaot long wanwan man mo woman mo ol famli long wan hom. Ol givhan sista oli ripresentem Rilif Sosaeti taem oli stap lukaot long wanwan sista we oli asaenem long olgeta.

Sam long ol janis blong lukaot long olgeta we oli stap long nid, i kam tru long ol koling. Ol narafala janis blong givhan oli hapen insaed long ol hom blong ol memba, ol neba ,o ol komuniti, olsem we oli kodinetem tru long JustServe (long ples we oli apruvum). Ol memba oli save helpem tu olgeta we oli pua mo stap long nid we oli blong evri fet raon long wol tru long sapot blong yumaniterian wok blong Jos, stap tekpat long ol wok blong fesem disasta mo blong stap helpem ol narawan we oli stap long nid.

Stadi long Ol Skripja

Jareti

Lukaot long Ol Pua

Yumi Stap blong Givim Seves

Ol Invitesen

?Bae yu akseptem wan koling o wan asaenmen sapos oli talem long yu (we i tekem tu, wan asaenmen olsem givhan brata o givhan sista)?
?Bae yu sapotem ol narawan long ol koling blong olgeta?

Stap Tij mo Lan Insaed long Jos

Jos i bin oganaes blong i mekem ol laef blong ol memba oli kam stret evriwan mo i blesem ol laef blong olgeta. Hem i givim ol janis blong yumi tijim wanwan long yumi long gospel, kam fren mo givim seves long wanwan long yumi, mo sapotem wanwan long yumi taem yumi stap traem blong stap sef. Insaed long famli mo tru long Jos, oli tijim wanwan memba long ol doktrin blong gospel. Taem oli singaotem ol memba blong tij, oli kasem ol buk mo ol narafala samting we i save helpem olgeta blong mekemgud wok ia.

Stadi long Ol Skripja

Invitesen

?Bae yu go long Jos?

Stanap Strong Kasem En

Taem yumi stap gohed blong laef folem gospel, yumi stap gro kolosap moa long Papa blong yumi long Heven. Yumi stap glad mo laekem moa Atonmen blong Sevya. Ol famli blong yumi oli kam kolosap moa. Yumi gat ol gudfala eksperiens blong lav, glad, mo pis we i kam taem yumi stap folem Sevya mo yusum Atonmen blong hem. Ol hat blong yumi oli jenis, mo yumi faenem sekiuriti taem yumi laef folem gospel we i kambak.

Taem yumi stap gohed blong yusum fet blong yumi long Kraes, sakem sin mo stap riniu ol kavenan blong yumi, yumi stap glad oltaem long Tabu Spirit we i stap lidim yumi. Sapos yumi stap strong kasem en blong ol laef blong yumi mo stap tru long ol kavenan blong yumi, bae yumi save kasem laef we i no save finis.

Presiden Russell M. Nelson i tijim: “Stap long kavenan rod. Komitmen blong yu blong folem Sevya taem yu mekem ol kavenan wetem Hem, mo afta, blong gohed blong holem ol kavenan ia, bambae i openem doa long evri spesel janis long saed blong spirit, mo blong kasem ol blesing ia we i stap long ol man, woman, mo pikinini long evri ples. En, we wanwan long yumi i stap traehad from, i blong oli kavremap yumi wetem paoa insaed long wan haos blong Lod, blong yumi sil olsem ol famli—blong yumi stap fetful long ol kavenan we yumi mekem insaed long tempol; ol kavenan ia oli mekem yumi kwalifae from presen ia we i moa bigwan, we i kam long God, we i laef we i no save finis” (live telecast from the annex of the Salt Lake Temple, Jan. 16, 2018)

Sam memba nomo oli no stap strong kasem en o oli no stap aktiv fulwan long jos. Be, blong stap strong kasem en i responsabiliti blong wanwan long yumi. Yumi “mas wok had blong mekem [yumi] stap sef” (Filipae 2:12), mo yumi mas sevem mo lavem olgeta narawan we fet blong olgeta i go daon mo oli no aktiv.

Stadi long Ol Skripja

Invitesen

?Bae yu gohed blong laef folem gospel taem yu gohed blong stap kipim kavenan blong baptaes ia truaot long laef blong yu?