Li b’oqok sa’ mision
Ch’ol 3: Xtzolb’al ut xk’utb’al lix evangelio li Jesukristo

“Ch’ol 3: Xtzolb’al ut xk’utb’al lix evangelio li Jesukristo,” Jultika Lin Evangelio: Jun tenq’anel hu re xwotzb’al lix evangelio li Jesukristo (2023)

“Xtzolb’al ut xk’utb’al lix evangelio li Jesukristo,” Jultika Lin Evangelio

Jalam-uuch
The Baptism of Christ [Lix kub’iha’ li Kristo], xb’aan laj Joseph Brickey

Chʼol 3

Xtzolb’al ut xk’utb’al lix evangelio li Jesukristo

Sa’eb’ li raqal sa’ li ch’ol a’in wankeb’ li tz’aqal tzol’leb’, eb’ li jolomil na’leb’, ut eb’ li taqlahom re lix evangelio li Jesukristo. Eb’ li raqal a’in a’aneb’ li na’leb’ neke’xye li yo’yookil profeet ut apostol naq taatzol ut taak’ut. K’eeb’ileb’ arin re naq laa’at tatruuq chixtenq’ankileb’ laa was aawiitz’in chixtawb’al ru li tzol’leb’ chi Kristo chi saqen ru.

Li xb’een raqal sa’ li ch’ol a’in, a’an li b’oqok re xk’ulb’al li kub’iha’. Li rela’ li ch’ol a’aneb’ li kaahib’ chi raqal a’in:

Tzoleb’ li raqal re li loq’laj hu ut k’uulaheb’ sa’ aach’ool li tzol’leb’ li neke’tawman sa’ li junjunq chi raqal. Wi taab’aanu, li Musiq’ej tixk’ut xyaalileb’ li na’leb’ naq yooqat chi tzolok. A’an tatxtenq’a chixnawb’al k’a’ru taaye ut k’a’ru taab’aanu re xtenq’ankileb’ li kristiaan chixk’ulb’al xnawom xch’ooleb’ chirix li yaal. (Chi’ilmanq Tzol’leb’ ut Sumwank 84:85.)

Li kristiaan te’ok chixnawb’al chik ru li Kolonel naq te’xb’aanu li naxb’oqeb’ chixb’aanunkil. K’eheb’ li b’oqok sa’ li junjunq chi tzolok, ut tenq’aheb’ li kristiaan chixb’aanunkil li te’xye. Naq li kristiaan neke’xb’aanu li neke’xye, neke’ok chixyu’aminkil lix evangelio li Jesukristo ut chixkawresinkil rib’ chi ok sa’ sumwank rik’in li Dios.

K’ut chixjunileb’ li tzolok rub’elaj ut chirix naq neke’kub’e xha’. Eb’ li misioneer neke’k’amok b’e sa’ xk’utb’aleb’ li tzolok rub’elaj ut chirix. Eb’ li misioneer re teep malaj jalaneb’ chik komon neke’tz’aqon wi naru. Chi’ilmanq ch’ol 10 ut 13 re xtawb’al li na’leb’ chirix roksinkileb’ li komon sa’ li k’utuk.

Li kawresink-ib’ re k’utuk

Naq yooqat chixkawresinkil aawib’ re k’utuk, tz’il rix li na’leb’ choq’ re li junjunq chi kristiaan sa’ li aplicacion re Jultika Lin Evangelio. K’uub’ jun li tzolok li taatenq’anq re li kristiaan taatzol. K’oxla k’a’ru tento tixnaw ut taareek’a naq yooqex chirula’aninkil. Li Musiq’ej tixnimob’resi lix yalb’al aaq’e wi taakawresi aawib’ ut taak’uub’ aana’leb’.

A’ineb’ li patz’om choq’ aawe laa’at ut laa wochb’een re teek’oxla rik’in tijok naq yooqex chixkawresinkil eerib’ re k’utuk.

  • K’a’ru taqab’oq chixb’aanunkil li kristiaan re xtenq’ankil chixtawb’al xpaab’aal chirix li Jesukristo ut chi xik chi uub’ej? Rik’in li b’oqok taatenq’aheb’ li kristiaan chixjalb’aleb’ xk’a’uxl ut chixk’ulb’al “xwankil laj Tojol-ix” (Helaman 5:11). K’oxla b’ar wan li kristiaan sa’ xb’e, xyu’am, ut sa’ rajom ru. Chirix a’an, k’oxla jun malaj wiib’ chik li b’oqok taak’e sa’ li tzolok.

  • K’a’ruheb’ li tzol’leb’ ut li jolomil na’leb’ li te’xtenq’a li kristiaan chixb’aanunkil li ak xqab’oq chixb’aanunkil? Rik’in tijok, k’e reetaleb’ li tzol’leb’ ut jolomil na’leb’ li te’xtenq’aheb’ li kristiaan chixtawb’al ru k’a’ut naq aajel ru xb’aanunkil li neke’xye, choq’ reheb’ a’an ut choq’ re li Qaawa’.

  • Chan ru taqatenq’a li kristiaan chixtzolb’al li tzol’leb’? Re xkawresinkil aawib’ re xk’utb’al li tzol’leb’, tus ru ut k’os ru li taak’ut rik’ineb’ li tzolok 1–4. K’e reetaleb’ li patz’om, eb’ li raqal re li loq’laj hu, eb’ li na’leb’, ut eb’ li k’anjeleb’aal li te’xtenq’a li kristiaan chixtawb’al ru li k’a’ru taak’ut. Chi’ilmanq ch’ol 10 re xtawb’al li na’leb’ chirix xkawresinkil aawib’ re k’utuk chi chaab’il.

  • K’a’ruheb’ li osob’tesihom naxyeechi’i li Dios wi te’qak’ul ut te’qapaab’ li b’oqok? Naq yooqat chixtzolb’al li tzol’leb’, k’e reetaleb’ lix yeechi’inb’il osob’tesihom li Dios. Naq yooqat chi k’utuk, yeechi’iheb’ li osob’tesihom ut ch’olob’ xyaalaleb’.

  • Ani reheb’ li komon taaruuq taatz’aqonq? Sa’eb’ li ch’utam re rajlal xamaan re xk’uub’ankil li k’anjel, k’e reetal aniheb’ li komon li te’ruuq chetenq’ankil chixtzolb’al ut chixtenq’ankil li kristiaan. Naq maji’ texk’utuq, aatinan rik’ineb’ chirix li te’xb’aanu sa’ li tzolok. Chi’ilmanq ch’ol 10.

  • K’a’ru naru taqab’aanu re xtenq’ankileb’ li kristiaan chixb’aanunkil li xqapatz’ reheb’ chirix naq nokoxik? Aatinan sa’ junpaat rik’ineb’ wulaj wulaj re xtenq’ankileb’ li kristiaan chixb’aanunkil li ke’xye naq te’xb’aanu. Sik’ chan ru naq eb’ li komon te’ruuq chixtenq’ankileb’ li kristiaan chixb’aanunkil li ke’xye naq te’xb’aanu. Naru naq a’an rilb’al jun ch’ol sa’ lix Hu laj Mormon malaj sa’ jalan chik li loq’laj hu. Wi wan ani ink’a’ kixb’aanu li kixye naq tixb’aanu, maare us xpatz’b’al a’an wi’chik rub’elaj naq taapatz’ k’a’ruhaq chik. Chi’ilmanq ch’ol 11.

  • K’a’ru naru taqab’aanu re xtenq’ankileb’ rik’in li b’oqok jun chik? Chirix li junjunq chi k’utuk, tz’il rix k’a’ru ke’xk’ul li kristiaan yookat chixtzolb’al. Ma yoo chi nimank lix paab’aaleb’ chirix li Kristo? Ma yookeb’ chireek’ankil li Musiq’ej? Ma yookeb’ chixjalb’aleb’ xk’a’uxl ut chixb’aanunkil li xe’xye naq te’xb’aanu? Ma yookeb’ chi tijok, chirilb’al lix Hu laj Mormon, ut chi wulak sa’ li iglees? K’uub’ chan ru taatenq’aheb’.

Li k’utuk chalen laa waam jo’ b’eresinb’il xb’aan li Musiq’ej

Re chixjunileb’ li elder ut li hermana, li Xb’eenil Awa’b’ejil ut lix Molameb’ li Kab’laju chi Apostol ke’xye:

“Laa’o naqaj xk’utb’al resil li evangelio li k’ojob’anb’il wi’chik chi jo’kan naq taakanab’aaq li Musiq’ej chixb’eresinkileb’ li misioneer jo’eb’ ajwi’ li yookeb’ chi tzole’k. Aajel ru xtzolb’aleb’ li na’leb; re li [tzolok], a’b’an me’k’ute’k yal chi jo’kan. Tento naq li misioneer taaroksi tz’aqal li raatin a’an a’ yaal jo’ chanru b’eresinb’il xb’aan li Musiq’ej. Ink’a’ taa’aatinaq rik’in aatin tz’aqal jultikanb’il sa’ xk’a’uxl, tixye b’an li k’a’ru na’el chaq sa’ li raam. Naru naxjal xtusb’aleb’ li tzolok, re tixk’ut li taamusiq’aaq chixk’utb’al, a’ yaal li aajel ru ut li rajom ru li [kristiaan]. Rik’in na’leb’ li na’alan chaq sa’ xch’ool ut rik’in tz’aqal li raatin, a’an tento tixch’olob’ xyaalalil li k’a’ru naxk’ut.”

Jalam-uuch
eb’ li misioneer neke’xnaw ru jun winq

Li k’utuk ut li b’oqok a’ yaal li rajom ru li junjunq chi kristiaan

K’eeb’il aawe chan ru taak’uteb’ li tzolok re xtenq’ankileb’ li kristiaan chixkawresinkil rib’ chi tz’aqal choq’ re li kub’iha’ ut li k’ojob’aak choq’ komon. Li raqal taak’ut, jo’q’e taak’ut, ut jo’ k’ihal li hoonal taawoksi re xk’utb’al, a’an b’aanunb’il a’ yaal li rajom ru li kristiaan yookat chixtzolb’al ut a’ yaal lix b’eresihom li Musiq’ej. Qayehaq, wi yookat raj chixtzolb’aleb’ li kristiaan li maawa’eb’ aj Kristiano, naru nakatikib’ rik’in xtenq’ankileb’ chixnawb’al ru li qaChoxahil Yuwa’ ut chixtawb’al ru lix k’uub’anb’il na’leb’ (chi’ilmanq “Xtzolb’aleb’ li kristiaan li maawa’eb’ aj Kristiano” sa’ li ch’ol 10).

Kanab’ li Musiq’ej chab’eresinkil rik’ineb’ li b’oqok taak’e reheb’ ut jo’q’e taak’eheb’. Li chaab’il b’oqok sa’ li hoonal tz’aqal chaab’il naru tixtenq’aheb’ li kristiaan chixb’aanunkil li k’a’ru tixnimob’resi lix paab’aaleb’. Li te’xb’aanu naru naxk’ameb’ sa’ jun nimla jalaak sa’ xch’ooleb’ (chi’ilmanq Mosiah 5:2; Alma 5:12–14).

K’uteb’ li tzolok li moko ch’a’ajeb’ ta, li saqen ru, ut li ink’a’ neke’b’ay. Us naq li tzolok ink’a’ tixq’ax ru 30 k’asal, ut naru ajwi’ nakatzol jun kristiaan chiru yal 5 k’asal.

Chi kok’ aj xsa’ taa’ajmanq naq wiib’ oxib’ sut texch’utlaaq re xtzolb’al chixjunileb’ li na’leb’ wankeb’ sa’ jun raqal. Li kristiaan te’xtaw ru li taak’ut chi chaab’il wi’chik wi b’ab’ayeb’ li tzolok, wi taatzoleb’ rajlal , ut wi yal junjunq chi na’leb’ tex’aatinaq wi’ rajlal sut.

Xtzolb’aleb’ li loq’laj hu

K’a’ru li b’eresinb’ilat chixk’utb’al?

K’a’ut naq aajel ru xtzolb’al li tzol’leb’ sa’eb’ li tzolok?