Men and women working in a vineyard picking grapes. Outtakes include the Lord of the vineyard, hiring workers to work in the vineyard, people picking grapes, being paid for their labors and also some pictures of the surrounding countryside/landscape and people working on the film
Na fesili Peteru, “Ua matou tuua mea uma, a ua matou mulimuli atu ia te oe; se a foi se mea matou te maua?” (Mataio 19:27). Sa tali atu le Faaola i le tuuina atu o le faataoto i le aufaigaluega i le tovine. Ua aoao mai e lenei faataoto e faapea o i latou uma o e filifili e ofoina atu o latou olaga ia te Ia o le a maua le taui folafolaina, e tusa lava po o afea na amata ai ona latou savavali i le ala o le feagaiga. O lenei lesona e mafai ona fesoasoani e te lagona ai le faamoemoe o le a e mauaina faamanuiaga ua ofoina mai e Iesu Keriso e ala i Lana Togiola.
Vaai faalemafaufau i fuaitau faigata. Atonu e mafai ona sili atu ona malamalama tagata aoga i ni fuaitau o mau faigata o tusitusiga paia pe a mafai ona latou faatinoina pe vaai faalemafaufau i ai i se isi auala. O le faia o lena mea e mafai ona fesoasoani i tagata aoga e faavasega atoatoa ai mea na tutupu, tagata, ma auiliiliga i mau o tusitusiga paia.
Sauniuniga a le tagata aoga: Valaaulia tagata aoga e fai se lisi o faamanuiaga na latou maua mai le Alii ona sa aoaoina i latou i le talalelei a o laiti. I se isi itu, e mafai ona latou faia se lisi o avanoa e ono misia e tagata pe afai e le aoaoina i latou i le talalelei seiloga ua oo i se taimi mulimuli ane o le olaga. Fai atu i tagata aoga e mafaufau e uiga i mea e mafai ona latou aoaoina mai le lisi na latou faia.
Gaoioiga e Ono Talafeagai mo Aoaoga
Nai lo le faaaogaina o le ata faataitai o loo i lalo, mafaufau e faaaoga le gaoioiga lenei, ma fetuunai ai mo manaoga ma le aofaiga o vasega taitasi:
Valaaulia ni nai tagata aoga naunau e tutu ma uu limalua a latou tusitusiga paia po o se isi tusi ma faaloloa sao o latou lima i o latou luma mo le 2 minute. Folafola atu ia i latou se taui (pei o lole laiti) pe a mafai ona latou tumau ai i lena tulaga mo le taimi atoa. Mo le tai 30 sekone taitasi, valaaulia isi tagata aoga e fai lea lava foi tulaga, ae aua le folafolaina atu ia i latou se taui patino. I le na o le 30 sekone o totoe o le uluai 2 minute, valaaulia tagata aoga uma o totoe e fai lea lava tulaga. A uma le 2 minute, fai atu i tagata aoga uma e tuu i lalo o latou lima. Tuu atu i soo se tasi na auai, e amata i le na mulimuli auai, o le taui atoatoa na folafola atu ia i latou na volenitia.
Fesili atu i tagata aoga po o a ni o latou lagona e uiga i le gaoioiga. Afai e faitio tagata aoga muamua e uiga i le le tonu o le faiga o i latou, fesili ia i latou pe aisea latou te lagona ai faapea.
Manatunatu i le ata faataitai lenei:
Sa liliu talu ai nei Marisol i le Ekalesia, faatasi ai ma lona tina ma matua o matua. E lei leva, ae maliu lona tamamatua. Ua mafaufau Marisol pe o le a maua e lona tamamatua faamanuiaga ia e tasi o le a ia mauaina, e ui lava na taliaina e le tama le talalelei i se taimi mulimuli ane o lona olaga.
O le a sau tala e fai atu ia Marisol?
Na aoao atu e le Faaola i Ana Aposetolo i se faataoto e faaalia ai Lona popole alofa mo i latou uma o e filifili e mulimuli ia te Ia. I lenei lesona atoa, saili le musumusuga a le Agaga Paia a o e vaai mo upumoni o le a fesoasoani e te malamalama atili ai i manaoga o le Faaola mo i tatou.
O le aufaigaluega i le tovine
Mafaufau e fatu se siata i luga o le laupapa e i ai ni avanoa mo faamatalaga nei e uiga i vaega taitasi o tagata faigaluega: taimi amata, totogi folafolaina, itula faigaluega, ma le aofaiga o le totogi. Valaaulia tagata aoga e faauma le siata.
A o e suesue i lenei faataoto, e fesoasoani le iloa o se aso faigaluega masani i taimi o le Feagaiga Fou atonu e tusa ma le 12 itula, e amata i le taeao po ma faaiu i le afiafi. O le upu pene i fuaiupu nei e faasino i se tenari, o le tupe Roma e masani ona faaaoga e totogi ai se tagata faigaluega mo se aso atoa o galuega.
Faitau le Mataio 20:1–7, ma vaavaai pe na faapefea ona faafaigaluega e le alii o le tovine le aufaigaluega.Atonu e te manao e matamata i le vitio “Aufaigaluega i le Tovine” mai le faailotaimi 0:00 i le 1:33, e maua i le ChurchofJesusChrist.org.
Na faamatala e Elder Jeffrey R. Holland o le Korama a Aposetolo e Toasefululua:
Ata
Official Portrait of Elder Jeffrey R. Holland. Photographed January 2018.
I taimi o le Faaola, e le mafai e se tagata masani ma lona aiga ona faia ni mea se tele atu nai lo le ola ai i mea latou te maua i lena aso. Afai e te le galue pe faifaatoaga pe fagota pe faatau atu se mea, masalo lava e te le ai.
Fesoasoani i tagata aoga e iloilo le faataoto mai manatu eseese o vaega taitasi o le aufaigaluega.
O ai e te manatu o loo faatusa i ai le alii o le tovine ma le au faigaluega?
O le a sou manatu o le a se lagona o le avea ma se tasi o tagata faigaluega muamua na faafaigaluegaina mo le aso?
O a ni manatu ma ni lagona e te manatu na i ai i le aufaigaluega o loo faatalitali e faafaigaluegaina a o faagasolo le aso?
Faitau le Mataio 20:8–16, ma vaavaai pe na faapefea ona uma le aso mo le aufaigaluega uma.Atonu e te manao e matamata i le vitio “Aufaigaluega i le Tovine” mai le faailotaimi 1:34 i le 3:00, e maua i le ChurchofJesusChrist.org.
Atonu e fesoasoani le iloa o le faafaigaluegaina e le alii o le tovine i lenei faataoto e mafai ona faatusa i le ulu atu i se feagaiga ma le Tama Faalelagi ma Iesu Keriso. O le totogi e mafai ona faatusa i faamanuiaga o le ola e faavavau.
Fai atu nisi po o fesili uma nei (po o isi fesili) e fesoasoani ai i tagata aoga ia iloa uiga paia na faaalia e le alii o le tovine.
O le a sou lagona i le alii o le tovine pe ana faapea o oe o se tasi na muamua faafaigaluega? o se tasi na mulimuli?
O a ni auala na faaalia ai e le alii o le tovine le alofa ma le popole mo tagata faigaluega uma?
A e malamalama o le alii o le tovine e mafai ona suitulaga i le Tama Faalelagi po o Iesu Keriso, o a ni uiga paia e te vaaia ia te ia?
O le a se mea na e aoaoina mai lenei faataoto?
O le alofamutimutivale o le Alii
Na faasoa mai e Elder Jeffrey R. Holland ni upumoni taua e mafai ona tatou aoao i ai e uiga i le Alii mai lenei faataoto. Atonu e te manao e matamata i le vitio “O Le Aufaigaluega i le Tovine” (o loo maua i le ChurchofJesusChrist.org) mai le faailotaimi 10:02 i le 11:42, pe faitau i le faamatalaga lenei.
Ata
Official Portrait of Elder Jeffrey R. Holland. Photographed January 2018.
O lenei faataoto—e pei o faataoto uma—e le o faatatau tele i le au faigaluega po o totogi, e sili atu nai lo isi faataoto ia e faatatau i mamoe ma oti. O le tala lenei e faatatau i le lelei o le Atua, o Lona onosai ma le loto faamagalo, ma le Togiola a le Alii o Iesu Keriso. O se tala e uiga i le agalelei ma le agaalofa. O se tala e uiga i le alofa tunoa. Ua faamamafa mai ai le manatu sa ou faalogo i ai i le tele o tausaga ua mavae e mautinoa lava o le mea e sili ona fiafia i ai le Atua i le avea ai ma Atua, o le fiafia lea o le alofa mutimutivale, aemaise lava ia i latou e le o faamoemoeina lena mea ma e tele lava ina lagona latou te le agavaa i ai.
Ou te le o iloaina pe o ai o loo i ai i lenei aofia toatele i le aso o manaomia e faalogo i le savali o le faamagaloga lea o loo i ai i lenei faataoto, ae peitai po o le a lava le tuai ona e mafaufau i ai, pe o le a foi le tele o avanoa e te manatu ua e misia, pe o le a foi le tele o mea sese e te lagona sa e faia, po o ni taleni e te manatu e te le o mauaina, po o le a foi le mamao ese mai le aiga ma le Atua e te lagona ua oo i ai lau malaga, ou te molimau atu e te le i malaga lava i se mamao e le mafai ona aapa atu i ai le alofa faalelagi. E le mafai ona e magoto ia maualalo ifo nai lo le malamalama le gata o le Togiola a Keriso.
Mafaufau i le mea na aoao mai e Elder Holland ua uma ona e iloa e moni e uiga i le Tama Faalelagi ma Iesu Keriso. Na faapefea ona e iloa e moni?
O a ni manatu faaopoopo po o ni lagona ua ia te oe e uiga i le Tama Faalelagi ma Iesu Keriso ona o mea ua e aoaoina i lenei aso?
E mafai faapefea e mea ua e aoaoina ona aafia ai lou olaga i aso taitasi?
Molimau atu i le alofa mutimutivale o Iesu Keriso ma Lona finagalo e faamanuia i latou uma e o mai ia te Ia. Mafaufau e faasoa atu se aafiaga patino pe fai atu i tagata aoga e faasoa mai ma le talafeagai pe na faapefea ona latou lagonaina Lona alofa mutimutivale ma le alofa tunoa.
Tala ma Faamatalaga o Talaaga
O le a le faamoemoega o le galue i le tovine a le Alii?
Na aoao mai Peresitene Dallin H. Oaks o le Au Peresitene Sili:
Ata
Official Portrait of President Dallin H. Oaks taken March 2018.
O le taui a le Matai i le faamasinoga mulimuli e le fuafuaina i le umi na tatou galulue ai i le tovine. Tatou te le mauaina o tatou taui faalelagi i le oomiina o o tatou taimi faigaluega i le masini. O le mea e taua, o a tatou galuega i le fale faigaluega o le Alii e afua ai ona avea i tatou ma se tasi. O nisi o tatou, o lenei tulaga e manaomia ai se taimi e umi atu nai lo isi. O le mea taua i le iuga o le tulaga lea ua avea ai i tatou e ala ia tatou galuega.
(Dallin H. Oaks, “The Challenge to Become,” Ensign, Nov. 2000, 34)
Na aoao mai Elder Jeffrey R. Holland o le Korama a Aposetolo e Toasefululua:
Ata
Official Portrait of Elder Jeffrey R. Holland. Photographed January 2018.
Ou te molimau atu i le mana faafouina o le alofa o le Atua ma le vavega o Lona alofa tunoa. O Lona popole, e mo le faatuatua o le a iu ina e mauaina, ae le o le itula o le aso na e mauaina ai lena faatuatua.
Afai la sa e osia ni feagaiga, tausi i ai. Afai e te lei osia lava, ia osi nei. Afai sa e osia ma e toe solia, ia salamo ma toe faaleleia. E le tuai lava pe afai o loo fetalai mai le Matai o le Tovine o loo i ai pea le taimi. … Aua le faatuai. Ua faasolo ina tuai.
O le lauga a Elder Holland “O Le Au Faigaluega i le Tovine”
E faalagolago i manaoga o tagata aoga, o le saunoaga a Elder Holland “O Le Au Faigaluega i le Tovine” (Ensign po o le Liahona, Me 2012, 31–33) e mafai ona faaaoga e aoao atu ai mea nei:
faatoilaloina o le lotoleaga ma le fua (tagai i le parakalafa 2–8 o lana lauga po o le faailotaimi 0:23–7:08 o le vitio)
lafoai o le le fiafia i tua ma agai i luma ma le faatuatua (tagai i le parakalafa 9–11 po o le faailotaimi 7:08–9:57)
Luka 18:1–8, 35–43 . O le faataoto i le faamasino amioletonu ma le faamaloloina o se tauaso aisi
O nei tala e lua e mafai ona aoao faatasi pe tuueseese foi. O loo faaalia uma mai ai le mataupu faavae e faapea afai tatou te faamaoni ma finafinau i a tatou tatalo i aso taitasi i le Tama Faalelagi ma a o tatou faatinoina le faatuatua ia Iesu Keriso, e mafai ona tatou maua lo La alofa mutimutivale.
I le faataoto i le faamasino amioletonu (tagai i le Luka 18:1–8), o se faamasino sa le i ano i se fafine ua oti lana tane na filifili e fesoasoani ia te ia ona sa ia faavaivaia o ia i lana aioiga. Na aoao mai e le Faaola lenei faataoto e faamamafa atu ai e mautinoa lava e faafofoga ma tali mai le Atua “i lana lava filifilia, o e alalaga atu ia te ia i le ao ma le po” ( Luka 18:7).
E faapefea ona faaalia lenei lava upumoni e tasi i le olaga o se tagata tauaso aisi na alaga mo le fesoasoani a le Alii? (tagai i le Luka 18:35–43).
O a ni auala e mafai ai e le ola i lenei mataupu faavae ona fesoasoani ia te oe i lou olaga i aso taitasi?
Na faapefea ona faaalia e le Tama Faalelagi Lona naunau e tali atu ia te oe, e tusa lava pe le oo mai na tali i le taimi po o le auala tatou te faamoemoe o le a oo mai ai?
