Iloiloga 21 o le Atamai i Aoaoga Faavae

Faaaoga Fuaitau o le Atamai i Aoaoga Faavae

Ata

Young adults looking at the scriptures.

O se tasi o faamoemoega o le atamai i aoaoga faavae o le fesoasoani lea ia te oe ia malamalama atili i aoaoga a le Faaola, ma ia mafai ona faamatala i au lava upu, ma faaaoga i lou olaga. O lenei lesona o le a tuuina atu ia te oe se avanoa e faataitai ai ona faaaoga ni isi o fuaitau o le atamai i aoaoga faavae mo le Feagaiga Fou i ni tulaga eseese.

Sauniuniga a le tagata aoga:: Valaaulia tagata aoga e filifili se fuaitau faapitoa o le atamai i aoaoga faavae o le Feagaiga Fou na fesoasoani ia i latou ma ia saunia e faasoa mai i le vasega pe na faapefea ona fesoasoani ia i latou.

Gaoioiga E Ono Mafai Ona Aoao Ai

Iloilo fuaitau o le atamai i aoaoga faavae

E ono manaomia ona aoaoina se lesona o le fuaitau o le atamai i aoaoga faavae e suitulaga i lenei lesona toe faamanatu. Tagai i le faasologa faatulagaina o lesona ua saunia e le faatonu po o le taitai faamaopoopo o le eria po o le risone ina ia mautinoa o lesona o fuaitau o aoaoga faavae taitasi o le a aoaoina a o faaauau taualumaga o le seminare.

Mafaufau e valaaulia tagata aoga e suesue e le tasi le isi pe faaaoga se isi auala e iloilo ai fuaitau o le atamai i aoaoga faavae ma fasifuaitau autu o mau. E mafai e tagata aoga ona faaaoga le Pepa Autu o le Atamai i Aoaoga Faavae (2022) po o le polokalama o le Atamai i Aoaoga Faavae e fesoasoani ai ia i latou e iloilo ai fuaitau. E mafai ona faaaoga fuaitau eseese o le atamai i aoaoga faavae e sui ai fuaitau nei.

Toe faamanatu tusi faasino o mau ma fasifuaitau autu o mau mo fuaitau nei o le atamai i aoaoga faavae. Mafaufau pe mafai faapefea ona faaaoga le aoaoga faavae o loo i fuaitau taitasi i lou olaga.

Eperu 12:9 : O lo tatou Tama Faalelagi, o “le Tama o agaga.”

Iakopo 1:5–6 : “A e afai ua leai se poto i so outou, ina ole atu ia i le Atua.”

Iakopo 2:17–18 : “O le faatuatua, pe afai e le i ai galuega, e mate lava.”

1 Peteru 4:6 : “[Na] folafola atu ai le talalelei i e ua maliliu.”

Faaaliga 20:12 : “Ona faamasinoina ai lea o e na oti … e tusa ma a latou galuega.”

Faaaoga aoaoga faavae o loo aoao atu i fuaitau o le atamai i aoaoga faavae

O le tamaitusi Mo le Malosi o le Autalavou ua tuu mai ai le fautuaga lenei: “Suesue i tusitusiga paia i aso taitasi ma faaaoga mea e te faitauina i lou olaga. O tusitusiga paia o se punavai mamana o faaaliga patino ma le taitaiga ma o se malosiaga faifai pea i lau molimau” ([2011], 42).

O a ituaiga mea e te faia e fesoasoani ia te oe e faaaoga ai mea e te aoaoina mai tusitusiga paia i lou olaga?

E mafai ona faalagolago tagata aoga i a latou sauniuniga mo le vasega a o latou talia le fesili o le a mulimuli mai.

O le a se fuaitau o le atamai i aoaoga faavae na fesoasoani ia te oe i lou olaga? Na faapefea ona fesoasoani ia te oe?

O le gaoioiga lenei o le a fesoasoani ia te oe e faataitai ai le faaaogaina o fuaitau faapitoa o le atamai i aoaoga faavae i lou olaga. A o e faamaeaina le gaoioiga, ia mafai ona talia faaaliga patino. E mafai e le Agaga Paia ona musuia oe i mafaufauga po o manatu i auala e mafai ona e faaaogaina ai tusitusiga paia i lou lava olaga. Ia e sauni e tusi i lalo soo se uunaiga e te maua.

Tuu atu i tagata aoga taitasi se fasipepa, ma valaaulia i latou e faamaea le laasaga muamua o loo i lalo. Ona valaaulia lea o tagata aoga e pasi atu a latou pepa i se isi tagata o le vasega, na te faamaeaina le laasaga lua. Faaauau ona pasi le pepa i tagata aoga eseese mo laasaga tolu ma le fa. E mafai foi e tagata aoga ona faamaea lenei gaoioiga i luga o se masini tekinolosi faatasi ai ma se polokalama mo feau tusitusi.

A o lei amataina le vasega, e ono faamanuiaina i latou mai se faataitaiga e pei o lenei: 1. Ua taumanatunatu se tagata aoga pe silafia e le Tama Faalelagi i latou. 2. E mafai ona fesoasoani le Eperu 12:9 aua o loo aoao mai ai o le Atua o le Tama o o tatou agaga. 3. E mafai e se tagata aoga ona faasoa mai se aafiaga na latou lagonaina ai le silafia e le Atua o i latou. 4. Pe a ou loto vaivai, e mafai ona ou manatua o au o se atalii/afafine o le Atua.

Afai e manaomia e tagata aoga se fesoasoani e mafaufau ai i se tulaga faataitai talafeagai, mafaufau e tuuina atu ni nai faataitaiga e mafai ona faaaoga e tagata aoga.

Faamatala se tulaga faataitai e ono tupu i le olaga moni pe fai se fesili e fesootai i se tasi pe sili atu o fuaitau o mau o le atamai i aoaoga faavae i lenei lesona Eperu 12:9 ; Iakopo 1:5–6 ; Iakopo 2:17–18 ; 1 Peteru 4:6 ; Faaaliga 20:12).
Faailoa mai se fuaitau o mau o le atamai i aoaoga faavae mo le Feagaiga Fou, ma faamatala pe faapefea ona fesoasoani e te tali atu ai i le ata faataitai po o le fesili.
Faasoa se aafiaga e fesootai i le aoaoga faavae na aoaoina i le fuaitau. Atonu o se aafiaga patino, se aafiaga o se tasi e te iloa, po o se aafiaga o loo tusia i tusitusiga paia.
Faasoa auala e mafai ona e faaaogaina ai le aoaoga faavae i lou lava olaga po o mea e fesoasoani ia te oe e malamalama ai e uiga i le Tama Faalelagi po o Iesu Keriso.

A uma loa ona faatino e tagata aoga, valaaulia i latou e faitau tali i a latou pepa i le vasega. Ona mafai lea ona faasoa mai e tagata aoga mea na latou aoaoina mai le faalogo i manatu o isi tagata aoga. Afai e i ai se taimi, e mafai e tagata aoga ona toe fai le gaoioiga e faaaoga ai fuaitau eseese o le atamai i aoaoga faavae.

O le a se mea e mafai ona e faia i lenei vaiaso e fesoasoani ai ia te oe ina ia mafai ona faaaoga tusitusiga paia i lou olaga?
E mafai faapefea e lenei mea ona fesoasoani ia e faalatalata atili atu ai i le Faaola?

Fautuaina le vasega e faitau tusitusiga paia i aso taitasi ma faaaoga mea o loo latou aoaoina i o latou lava olaga. Molimau atu i faamanuiaga o le suesue o tusitusiga paia i aso taitasi.