O tamaiti aoga o loo talanoa i se vasega seminare.
Ua fuafuaina lenei lesona e fesoasoani ia te oe e iloilo ai sini na e faatuina ma lou tuputupu a’e patino na e mauaina i le faagasologa o lau suesuega o le Feagaiga Fou.
Iloiloina o le aoaoina o tagata aoga. O le tuuina atu o le avanoa i tagata aoga e iloilo ai mea o loo latou aoaoina e mafai ona latou tomanatu i auala o loo fesoasoani ai le Atua ia latou aoao ma tuputupu ae. Fesoasoani i tagata aoga ia latou iloa auala ua latou manuia ai ma auala e mafai ona faaleleia atili ai. A o latou tomanatu i lo latou alualu i luma ma luitau, e mafai ona latou maua faaaliga i le isi laasaga e sosoo ai e mafai ona latou savalia ina ia avea atili ai e faapei o Iesu Keriso.
Sauniuniga a le tagata aoga: Valaaulia tagata aoga e mafaufau loloto i auala ua latou alualu ai i luma e faatatau i sini faaleagaga a le tagata lava ia. Valaaulia foi ia latou ia mafaufau e uiga i mea ua latou aoaoina po o sini autu sa latou faatutuina a o latou suesue i le Roma ma le 1 Korinito 1-7.
Gaoioiga E Ono Mafai Ona Aoao Ai
O lenei lesona ua faamoemoe e fesoasoani i tagata aoga e iloilo sini na latou faatutuina, o lo latou gafatia e faamatala aoaoga i le Feagaiga Fou, ma pe o suia faapefea o latou uiga, manaoga, ma gafatia o le ola ai i le talalelei. O le suesuega a le vasega i le Roma 1-16 ; 1 Korinito 1-7 sa ono faamamafaina ai upumoni e ese mai nai lo o upumoni i gaoioiga nei. Afai o lea, e mafai ona fetuunai gaoioiga e faaaofia ai na upumoni.
O le avea ai ma se soo o Iesu Keriso
Ana mafai ona e malaga i soo se nofoaga fou, o fea e te manao e te alu iai?
A o e faimalaga, aisea e taua ai ona e iloilo po o e tumau i luga o le faasinoala? O le a le mea atonu e tupu pe ana e le faia?
E taua ona iloilo foi le tatou faigamalaga faaleagaga. Sa aoao mai e Peresitene M. Russell Ballard o le Korama a Aposetolo e Toasefululua le taua o le galue e faataunuu sini faaleagaga ona ia faaopoopo mai lea:
Ata
O le ata aloaia o Elder M. Russell Ballard o le Korama o Aposetolo e Toasefululua, 2004.
Ua ou iloaina ina ia ou taulai tumau i se mea … e manaomia ona le aunoa ona ou fesili ifo ia te au lava ia, “O faapefea le tulaga o au faatinoga?”
E tai pei o la e fai sau oe lava ia faatalanoaga patino ma oe lava ia. …
I le gasologa o vaiaso a sau, ia saili se taimi e iloilo ai sini o lou olaga ma au fuafuaga, ma faamautinoa ua ogatusa ma le fuafuaga sili a lo tatou Tama Faalelagi mo lo tatou fiafia. Afai e te manaomia ona salamo ma sui, ia mafaufau e faia nei loa lava. …
Ou te molimau atu e leai lava se isi sini e sili atu i le olaga faaletino nai lo le ola e faavavau faatasi ai ma o tatou Matua Faalelagi faapea ma lo tatou Faaola pele, le Alii o Iesu Keriso. Ae e sili atu nai lo nao so tatou sini—o la Latou foi sini lea. E i ai so Latou alofa atoatoa mo i tatou, e sili atu ona mamana nai lo so tatou gafatia e mafai ona tatou amata malamalama i ai. Latou te matua ogatusa e faavavau, atoatoa, ma i tatou. O i tatou o la Latou galuega. O lo tatou mamalu o lo Latou mamalu foi lea. E sili atu nai lo se isi lava mea, Latou te finagalo ina ia tatou toe foi atu i le aiga.
(M. Russell Ballard, “Toefoi Atu ma Mauaina,” Ensign po o le Liahona, Me 2017, 64-65)
Faaalu ni nai minute e te fesili ai ia te oe lava i fesili nei, e pei lava o e faia se faatalanoaga patino, maoti ma oe lava ia. Mafaufau e tusi au tali i lau api faamaumau mo suesuega.
O a ni mea na ou faia lata mai nei ia maua ai se molimau o ni upumoni patino e tauala mai i le Agaga Paia? O le a se mea na ou aoaoina e uiga i le mauaina o faaaliga e ala mai le Agaga Paia? (Atonu sa e faaaoga sina taimi e mafaufau ai i nei mea a o e suesue ai i le 1 Korinito 2 .)
O a ni sini sa ou faatuina ina ia ou latalata atili atu ai i le Faaola ma avea ai au ma Ona soo? O a manuia ua oo mai ia te au? O a faafitauli o feagai ma au? O a mea e manaomia ona ou faia e saili ai le fesoasoani a le Alii e faaauau ai pea le alualu i luma o lau faigamalaga faaleagaga?
Valaaulia tagata aoga e faasoa ane o latou manatu e uiga i fesili nei. Manatua o isi sini autu ma aafiaga e patino tonu ia te oe pe maaleale foi, ma e le faamalosia foi le faasoa mai e tagata aoga. Faamalo i tagata aoga e tusa ma o latou ausiaga . A faapea o loo feagai tagata aoga ma faafitauli o loo tauivi ia manumalo ai, mafaufau e fesiligia isi tagata uma o le vasega i fesili e faapea: O a lesona sa tatou aoaoina i lenei tausaga e ala i a tatou suesuega o le Feagaiga Fou e mafai ona fesoasoani i ia tulaga? O a ni aafiaga ua e maua e mafai ona fesoasoani i ia tulaga? Uunaia tagata aoga e faaauau pea le galulue i a latou sini, ma faaali atu le mautinoa o le a fesoasoani atu le Tama Faalelagi ia i latou a o latou taumafai e avea e faapei o Ia.
Faamatalaina o le alofa tunoa o Iesu Keriso
Ina ia fesoasoani e iloilo lou malamalama i se tasi o upumoni taua o le talalelei sa e suesueina lata mai nei, fai le gaoioiga lenei:
Vaai faalemafaufau e faapea ua faafesootai ane oe e faifeautalai. O loo latou aoao atu i se tasi tou te tupulaga o loo faafaigata ona ia malamalama i le alofa tunoa o Iesu Keriso. Ua talosaga ane faifeautalai tou te o faatasi ma i laua i le latou aoaoga atofaina e sosoo ai ina ia mafai ona e faasoa atu mea ua e iloa e uiga i le alofa tunoa o le Faaola ma pe ua faapefea ona faamanuiaina ai lou olaga i le mulimuli ia Iesu Keriso.
Faaaoga se avanoa e te suesue ai i tusitusiga paia e maua ai fuaiupu ma upumoni e mafai ona fesoasoani atu. O le faitauina o nisi o fuaiupu nei atonu o le a fesoasoani ai:
Tusi i lalo pe faapefea ona e faamatalaina le alofa tunoa o le Faaola i au lava upu.
I le faaaogaina o se mau mai i le Roma, ia faasoa atu se upumoni se tasi e uiga i le alofa tunoa o le Faaola ma auala e mafai ona tatou taliaina ai i o tatou olaga. Mafaufau e faaaofia pe faapefea e le iloaina o nei upumoni ona aumaia oe ina ia e latalata atili atu i le Faaola.
Ia mautinoa ia lava le taimi e tuu i tagata aoga e sauniuni ai. A maea galuega a tagata aoga, e mafai ona latou galulue ma se paga i le vasega ma fesuisuiai e aoao e le tasi le isi e pei ona latou faasoa nei mea ma se isi o loo aoaoina e faifeautalai.
Faateleina o lou manao ia tasi ia Keriso
O le lotogatasi o se tasi foi lea o manatu taua i tusi a Paulo i tagata o Roma ma Korinito.
Mafaufau e valaaulia tagata aoga e filifili se fuaiupu se tasi pe lua o loo aoao atu ai Paulo e uiga i le lotogatasi (mo se faataitaiga, Roma 14:19 po o le Roma 15:1). Ona fai lea o se tasi o gaoioiga nei:
Tauloto faatasi o se vasega se fuaiupu po o ni fuaiupu.
Vaevae tagata aoga i vaega toalaiti ma valaaulia e tauloto leotele le fuaiupu po o fuaiupu ma fesuisuiai le tagata e faia laina taitasi o le mau. Afai e manaomia e tagata aoga se isi luitau, e mafai ona latou fesuisuiai le tagata e tauina upu taitasi.
Tauloto e le vasega fuaiupu taitasi e tasi le upu i le taimi, ae fesuisuiai tagata aoga e tauina upu taitasi.
Fai i tagata aoga e iloilo le lelei o le latou galulue faatasi ma faasoa mai ni malamalamaaga ua latou aoaoina e uiga i le lotogatasi e ala i lea gaoioiga. Valaaulia tagata aoga e aotele mea na aoao mai e Paulo i le fuaiupu po o fuaiupu.
a. Saili se fuaiupu sa e suesuena i le Roma po o le 1 Korinito na aoaoina oe i se upumoni anoa e faatatau i le lotogatasi ma isi ia Keriso. O nisi faataitaiga e maua i le Roma 12:10–21 ; 14:10–13, 19 ; 15:1–7 ma i le 1 Korinito 1:10–13 ; 3:3–9 . O le a se upumoni o loo aoao mai e le fuaiupu na e filifilia?
e. Mafaufau i se taimi sa oo ai ia te oe ni mea o loo aoao mai e Paulo i le fuaiupu sa e filifilia. O le a se mea ua e manatu e sili ona saofaga i le tele o au taumafaiga ina ia lotogatasi ia Keriso?
i. Tali mai se lua o fesili nei:
O le a le eseesega o le galulue faatasi lelei ma le lotogatasi e ala ia Iesu Keriso ma Lana talalelei?
Aisea e anoa ai ia te oe le upumoni sa e filifilia i le aitema a?
I le masina ua tuanai, sa faapefea ona faatupulaia lou malamalama i le lotogatasi ma lou manao e autasi ma isi?
O le a sau mea na fai ua atili ai ona avea oe o se tasi e fia autasi atili ma isi ia Keriso?
O a luitau o feagai ma oe a o e galue ia atili ona e lotogatasi ma isi?
Saili le taitaiga a le Agaga Paia e fesoasoani ia te oe e iloa ai auala e finagalo le Alii ina ia e lotogatasi ai ma isi ia Keriso. Saili foi faaaliga pe faapefea ona e manumalo i luitau e ono feagai ma oe.
Faaauau ona agai pea i luma i lau faigamalaga faaleagaga, e latalata atili atu ai i le Tama Faalelagi ma Iesu Keriso. Ia iloa e alolofa i Laua ia te oe ma o loo sauni e fesoasoani atu ia te oe i au taumafaiga.
Molimau atu e uiga i le Tama Faalelagi ma Iesu Keriso ma lo Laua finagalo e fesoasoani mai.