Seminare
2 Korinito 8–13

2 Korinito 8–13

Vaaiga Aoao

Sa valaaulia e Paulo le Au Paia i Korinito e mulimuli i le faataitaiga a le Faaola e ala i le ositaulagaina o mea ua latou maua e tausi ai e matitiva. Sa ia faasoa mai nisi o mafatiaga sa ia onosaia ma le auala na mafai ai ona ia maua le olioli i na aafiaga e ala i le fesoasoani a le Faaola. Ina ua faitioina o ia e nisi o tagata o le Ekalesia i Korinito, sa ia tali atu e ala i le valaauliaina o i latou ia iloilo lo latou lava sootaga ia Keriso.

Saunia e Aoao Atu

O faamatalaga nei e tuuina atu ai i faiaoga ni manatu i mea e ono manaomia ona muai saunia mo lesona taitasi.

2 Korinito 8–9

Faamoemoega o le lesona: O lenei lesona e mafai ona fesoasoani i tagata aoga e mulimuli ai i le faataitaiga a Iesu Keriso e ala i le faasoa atu o mea latou te maua ia i latou o e manaomia le fesoasoani.

  • Sauniuniga a le tagata aoga: Valaaulia tagata aoga e vaavaai i aitema o loo lisi i luga o se pepa o Sefuluai ma Isi Taulaga ma ia saunia e faasoa mai po o a uiga o aitema i laina eseese. E mafai foi ona latou fesili atu i soo se fesili o i ai e uiga i lenei pepa.

  • Anotusi e faaali atu: O le saunoaga a Elder Jeffrey R. Holland faatasi ai ma se upu o loo misi ma se pepa o Sefuluai ma Isi Taulaga

  • Fautuaga faafaiaoga i fesootaiga faavitio: Mafaufau e valaaulia se epikopo i le lotoifale po o se peresitene o le Aualofa e faasoa atu i tagata aoga pe faapefea ona faaaoga tupe o le taulaga anapogi e faamanuia ai i latou e le tagolima.

2 Korinito 11–12

Faamoemoega o le lesona: O lenei lesona e mafai ona fesoasoani i tagata aoga e faalagolago i le Alii a o latou taumafai e onosai ma le faamaoni i o latou lava luitau.

  • Sauniuniga a le tagata aoga: Valaaulia tagata aoga ina ia saunia e faasoa mai pe aisea latou te lagona ai e le moni le faamatalaga lenei: “Afai e lava lo tatou faatuatua e tatalo ai ia Iesu Keriso, o le a aveesea e le Tama Faalelagi soo se tofotofoga o loo tatou feagai.”

  • Mea faitino po o le ata e faaali mai: O se mea matuitui po o se ata o se mea matuitui

  • Vitio:“Mountains to Climb” (5:05)

  • Fautuaga faafaiaoga i fesootaiga faavitio: A uma ona suesue e tagata aoga le 2 Korinito 12:8–10 , mafaufau e faaaoga le manatu ua faaulutalaina “Faatuatua e le faamaloloina” i le vaega “Gaoioiga Faaopoopo e Aoao ai”. Mafaufau e sue le tusiga ““Taliaina o le Finagalo ma le Taimi a le Alii” (Ensign, Aok. 2016, 29–35) i le ChurchofJesusChrist.org ma faasoa atu le lau ina ia mafai ai e tagata aoga ona feauauai i le faitauina o le tala.

2 Korinito 13

Faamoemoega o le lesona: O lenei lesona e mafai ona fesoasoani i tagata aoga e iloilo ai lo latou faatuatua i le Alii ma faatoilalo ai le faaosoosoga e faitioina Ana auauna.

  • Sauniuniga a le tagata aoga:Valaaulia tagata aoga e mafaufau pe o a ni o latou lagona pe a latou faalogo i tagata o tautatala faatautee e uiga i le Ekalesia a le Faaola po o Ana auauna.

  • Anotusi e faaali atu: O le saunoaga a Peresitene Henry B. Eyring ma fesili mo tagata aoga e mafaufau loloto i ai

  • Fautuaga faafaiaoga i fesootaiga faavitio: Ina ia faataga tagata aoga e suesue nisi tala o tusitusiga paia, mafaufau e vaevae tagata aoga i ni vaega toalaiti ma tuu i totonu o potu e taapeape iai. Valaaulia i latou e suesue se tala se tasi pe sili atu e faamatala ai taunuuga e oo i ai ona o le faitioina o auauna a le Alii. Ona mafai lea e vaega taitasi ona filifili se sooupu e faasoa atu i le vasega atoa se mea na latou aoaoina.

Iloilo Lou Aoaoina 9

Faamoemoega o le lesona:O lenei lesona ua faamoemoe e fesoasoani i tagata aoga e iloilo ai sini na latou faatutuina ma le tuputupu ae o le tagata lava ia na latou maua mai i a latou suesuega o le Feagaiga Fou.

  • Sauniuniga a le tagata aoga: Valaaulia tagata aoga e toe faamanatu auala na latou taumafai ai e faaaoga mataupu faavae sa latou aoaoina mai le 1 Korinito 8–16 ma le 2 Korinito.

  • Fautuaga faafaiaoga i fesootaiga faavitio: Afai e foliga mai e le iloa e tagata aoga le auala e faaaoga ai le FamilySearch.org po o le polokalama o le FamilySearch, mafaufau e tuu atu ia i latou se taimi i le vasega e suesue i ai. Atonu foi e aoga le valaaulia o se tagata aoga se toatasi e iloa ona faaaoga le polokalama e sau saunia e faasoa mai ni nai fesoasoani na latou aoaoina. E mafai ona latou faasoa mai a latou lau mai a latou telefoni po o komepiuta ina ia mafai ai e isi tagata uma o le vasega ona iloa mea o loo latou faia.

Iloiloga 20 o le Atamai i Aoaoga Faavae

Faamoemoega o le lesona: O lenei lesona o le a tuu atu ai i tagata aoga se avanoa e faalauteleina ai lo latou malamalama ma faataitai ai le faamalamalamaina o upumoni mai fuaitau eseese o le atamai i aoaoga faavae o le Feagaiga Fou.

  • Sauniuniga a le tagata aoga: Valaaulia tagata aoga e toe faamanatu ia fuaitau o le atamai i aoaoga faavae o le Feagaiga Fou ma filifili se fuaitau se tasi latou te mananao e malamalama atili i ai.

  • Anotusi e faaali atu: O ata eseese e fa o Iesu Keriso

  • Fautuaga faafaiaoga i fesootaiga faavitio: I le taufaaiuiuga o le lesona, e mafai ona valaaulia tagata aoga e saili mo fuaitau faaopoopo o le atamai i aoaoga faavae e faateleina ai lo latou malamalama i se fuaitau filifilia o le Feagaiga Fou. Mafaufau e faavasega tagata aoga i ni potu se fa e taape i ai, e sailiili e vaega taitasi fuaitau o le atamai i aoaoga faavae mai se isi kosi o mau suesueina. A toe tuu faatasi le vasega, valaaulia vaega taitasi e faasoa mai fuaitau na latou maua i a latou tusi o mau na atofaina atu. E mafai ona valaaulia tagata aoga e faasoa mai a latou lau ina ia mafai ai e a latou uo aoga ona iloa le auala na latou faaaogaina ai meafaigaluega i le polokalama o le Gospel Library.