Ua talia e Iesu le tagata na fanau mai o tauaso ina ua toe maua o ia e le tagata i le mavae ai ona faamalolo o ia e Iesu.
Pe na i ai ea ia te oe se lagona taumamao mai i le Atua? Pe na i ai ea nisi tagata e te iloaina sa i ai lea lava lagona e tasi? Sa faamanatu atu e Paulo i le Au Paia i Korinito le alofa mutimutivale o Iesu Keriso na faaalia ia i latou. Sa aoao atu e Paulo i tagata ua vavaeeseina i latou mai le Atua e ala i le agasala. O le mea e lelei ai, e ala i le Togiola a Keriso e mafai ai ona toe aumaia i latou i se sootaga lelei ma le Atua ma maua ai le amiotonu o Keriso (tagai i le 2 Korinito 5:16–21). O lenei lesona e mafai ona fesoasoani ia te oe e faalatalata atili atu ai i le Atua ma avea ai ma tagata e finagalo o Ia ia avea ai oe.
Uunaia tagata aoga e o mai saunia mo le vasega. Pe a o mai saunia tagata aoga i le vasega, latou te valaaulia le Agaga Paia e aoao i latou ma ua i ai i se tulaga sili atu e fesoasoani ai i isi tagata aoga.
Sauniuniga a le tagata aoga: Valaaulia tagata aoga e mafaufau loloto e uiga i taimi na latou lagona ai le latalata atu i le Atua ma taimi na latou lagonaina ai le taumamao mai ia te Ia, ma o mai saunia i le vasega e utuvai mai i nei aafiaga.
Gaoioiga E Ono Mafai Ona Aoao Ai
O lau mafutaga ma le Atua
Iloilo tala faatusa nei. Mafaufau pe faapefea ona talitutusa pe ese ai foi lou tulaga patino mai nei vaaiga faataitai.
Faaali atu vaaiga faataitai nei pe valaaulia tagata aoga e fatufatu a latou lava vaaiga faataitai e aofia ai tulaga e ono lagona ai e se talavou le taumamao mai le Atua.
I se isi itu, amata le lesona e faaaoga ai le gaoioiga “Mauaina o le amiotonu o Keriso” i le vaega o “Gaoioiga Faaopoopo e Aoao ai” i le faaiuga o le lesona. O lenei gaoioiga e aofia ai le tala ia Jean Valjean mai le Les Miserables o loo ua faalelei ma le Atua.
O Jamilah o se soo maelega a Iesu Keriso. E toatele uo e vaai atu ia te ia o se faataitaiga. Peitai, a ia faia ni mea sese, na te lagonaina le faanoanoa e uiga ia te ia lava ma popole pe o le a mafai ona ia toe foi atu i le Tama Faalelagi i se aso.
E i ai ni amioga masani a Andre na te iloa e le lelei, ma e faigata ia te ia ona iloa pe mafai faapefea ona faamagaloina ma suia o ia. Sa taumate o ia pe mafai lava ona ia lagona le latalata atu i le Atua, ma na te le mautinoa pe aoga le taumafaiga i lea mea. E le manao o ia e talanoa i ona matua po o le epikopo e uiga i ona faafitauli.
Valaaulia tagata aoga e mafaufau i a latou sauniuniga mo le vasega a o latou faamaeaina le gaoioiga o mulimuli mai.
Mafaufau i lau lava sootaga ma le Tama Faalelagi. I lau api talaaga mo suesuega, faamatala ai le tulaga o lou lava olaga ma lou sootaga ma Ia. E mafai ona e faaaofia ai taimi e te lagona ai le latalata atu ia te Ia ma taimi e te lagona ai le taumamao faapea foi ma ou naunautaiga mo lau sootaga ma Ia i le lumanai.
A o e suesue ai, vaavaai mo upumoni e mafai ona fesoasoani ia te oe e malamalama ai i faamanuiaga o le faalatalata atu i le Atua ma pe mafai faapefea ona e faalatalata atu ia te Ia.
Faaleleiga
I le 2 Korinito 5 na tusia ai e Paulo e faapea a o tatou ola ai i le lalolagi, tatou te “oi” ma lagona le “mamafatu,” ma naunau e toe foi atu i lo tatou Tama oi le Lagi (tagai i le 2 Korinito 5:1–5). Mafaufau i taimi o lou olaga na e lagonaina ai se mea e pei ona faamatalaina e Paulo.
Faitau le 2 Korinito 5:17–20, ma vaavaai mo upumoni e mafai ona e faaaogaina i lou olaga pe a e lagona le taumamao mai le Atua. Ia manatua i nei fuaiupu, o le faalelei ma le faaleleiga o lona uiga o le toe foi i le lotogatasi ma alofa ma le Atua ina ua mavae le vavaeeseina mai ia te Ia.
Faaali atu fesili nei mo tagata aoga e vaai i ai a o latou suesue.
O a upu ma fasifuaitau i nei fuaiupu ( 2 Korinito 5:17–20) e sili ona faamatalaina ai mea na faia e le Faaola mo oe?
O le a le matafaioi a le Tama Faalelagi i le fesoasoani ia te oe e toe foi atu ia te Ia? (Tagai i le 2 Korinito 5:18–19 .)
O a faamanuiaga tatou te maua a o tatou taumafai e ola “ia Keriso”? ( 2 Korinito 5:17.)
O le tasi upumoni o loo aoao mai i le 2 Korinito 5:17–20 o le e mafai ona tatou faalelei ma le Atua ma avea ma tagata fou e ala i le Togiola a Iesu Keriso.
Sa aoao mai foi Paulo e uiga i le mafuaaga ua mafai ai ona avea i tatou ma tagata fou ma le uiga o lenei mea.
Faitau le 2 Korinito 5:21, ma vaavaai mo mau faasino i le Tama Faalelagi, Iesu Keriso, ma oe.
Valaaulia tagata aoga e faasoa mai mea na latou maua. Afai e manaomia, faamatala atu o “ia [he]” i le fuaiupu 21 e faasino i le Tama Faalelagi, a o “ia [him]” e faasino ia Iesu Keriso.
O le a se mea na e aoaoina mai lenei fuaiupu?
Fesoasoani i tagata aoga ina ia malamalama i lenei fuaiupu. Mafaufau e iloilo ma tagata aoga le parakalafa lenei, ma mafaufau pe faapefea ona fesoasoani i tagata aoga ia malamalama i lenei manatu faavae. Ia saunia e faasoa atu nei manatu i au lava upu.
I le 2 Korinito 5:21 o loo aoao mai ai e Paulo e faapea e ui lava sa lei tausalaina Iesu i le faia o se agasala, i le Faatoaga o Ketesemane ma luga o le satauro o Kalevaria sa Ia tauaveina i Ona lava luga le avega, o le mamafa, ma taunuuga o a tatou agasala. Pe a tatou saili ma le naunautai ina ia faamagaloina ma avea o se “tagata fou,” ua tatou taliaina le ofo a Iesu Keriso e faapea afai o le a tatou faatuatua ia te Ia ma salamo i a tatou agasala, o le a Ia ave a tatou agasala ma e mafai ona tatou maua Lana amiotonu. I lenei ala, o le a faamamaina ai i tatou, e pei lava ona mama o Ia (tagai foi i le Kolose 2:13–14 ; 1 Peteru 2:24).
Ia mautinoa e fesoasoani i tagata aoga ia malamalama o le faagasologa o le avea ai ma e mama e faapei o Iesu Keriso e manaomia ai se taumafaiga i le olaga atoa.
E faapefea ona fesoasoani aoaoga o loo i le 2 Korinito 5:21 e te malamalama atili ai i le mafuaaga e mafai ai ona avea i tatou ma tagata fou ia Keriso ma le uiga moni o lena mea?
O a manatu ma lagona atonu na oo i ai le Alo o le Atua e leai se agasala a o Ia tauave ma le loto i ai au agasala i Ona lava luga ina ia mafai ai ona e faalelei ma le Atua ma suia ai? (Mafaufau e faitau le Isaia 49:16 ma le Mataupu Faavae ma Feagaiga 19:18 a o lei tali atu i lenei fesili.)
Tuu atu i tagata aoga se faataitaiga i ona po nei i ala e mafai ai ona tatou faalelei ma le Atua. Mafaufau e faasoa atu se aafiaga patino. A le o lea, e mafai ona faaali atu se vitio e pei o lenei.
Ina ia vaai i se faataitaiga i ona po nei o se tasi ua faalelei ma le Atua ma avea “o se tagata fou” e ala i le Togiola a Iesu Keriso, matamata i le “I Know His Grace Is There When I Fall” (6:24). E mafai ona maua lenei vitio i le ChurchofJesusChrist.org.
Mafaufau loloto pe na faapefea ona e maua, po o se tasi e te iloa, le faamalologa ma le faaleleiga ua ofoina mai e le Faaola e ala i Lana Togiola.
Mafaufau e fai atu i tagata aoga e faasoa mai ni o latou manatu po o ni lagona (faamanatu atu ia i latou e aua nei faasoa maia se mea e patino tele pe le faalauaiteleina). Afai latou te faasoa mai se aafiaga, fai atu fesili tulitatao e pei o le “O le a se mea na aoao atu e lenei aafiaga ia te oe e uiga ia Iesu Keriso ma Lana Togiola?” po o le “O a ni faatinoga na faia e lenei tagata na mafai ai ona ia faalelei ma le Atua? Aisea e te manatu ai na faia e na faatinoga se eseesega?”
O le mafaufau loloto i mataupu faavae o le talalelei e mafai ona fesoasoani ia i tatou e malamalama atili ai ma lagona lo latou taua. Toe faitau le faamatalaga o le tulaga o lou olaga i le taimi nei ma le sootaga ma le Atua na e tusia i le amataga o le lesona. Ona faaalu lea o ni nai minute e mafaufau loloto ai i fesili nei:
Faaali atu manatu nei i tagata aoga e mafaufau loloto i ai. Mafaufau e faaopoopo ni manatu patino po o le valaaulia o tagata aoga e faasoa mai o latou manatu e uiga i mea e mafai ona latou mafaufau loloto i ai e faavae i mea sa latou aoaoina i lenei lesona.
Faamata o a ni foliga ma lagona o le faaleleia ai ma le Atua e faavavau?
O a ni auala e te manao e avea ai ma se ua fou e ala i le Togiola a Iesu Keriso?
O a ni aafiaga na e oo i ai i lou olaga e faaalia ai le naunautai o Iesu Keriso e fesoasoani ia te oe ina ia e suia?
Na faapefea ona fesoasoani le mafaufau loloto?
O le a se mea ua e aoaoina i lenei lesona e uiga i lagona ma naunautaiga o le Tama Faalelagi ma Iesu Keriso mo oe?
Aoao, lagona, ma faia
I lau api talaaga mo suesuega, tusi ai mea na e aoaoina ma lagonaina i lenei aso sa sili ona anoa ia te oe ma pe aisea foi. Tusi i lalo mea ua musuia oe e fai e mafai ona fesoasoani ia te oe e faalelei ai ma le Atua ma avea ai ma “se tagata fou” ia Keriso. O a ni suiga atonu e te faamoemoe e te vaaia ia te oe lava (i se tausaga, lua tausaga, po o le lima tausaga) o se tasi ua suia moni ia Keriso?
Valaaulia tagata aoga o e o gauai e faasoa atu o latou manatu ma lagona. Mafaufau e faasoa atu foi lagona patino.
Manatu ma Talaaga o Faamatalaga
E mafai faapefea ona fesoasoani ia ou ola ai i le talalelei a Keriso ma avea ai “o se tagata fou” ia te Ia?
Na faamatala mai Elder Ulisses Soares o le Korama a Aposetolo e Toasefululua:
Ata
Atatosi aloaia o Elder Ulisses Soares, Korama a Aposetolo e Toasefululua.
O le faatuatua faateleina ma le liuaina o le a fesoasoani ia i tatou ia osia ma tausia feagaiga ma le Atua, o le mea lea e faamalosia ai lo tatou manao e mulimuli ia Iesu ma fatu ai se suiga moni faaleagaga i totonu o i tatou—i nisi faaupuga, o le liuaina o i tatou i se tagata fou, e pei ona aoao mai ai le Aposetolo o Paulo i lana tusi i tagata Korinito ( 2 Korinito 5:17). O lenei liuga o le a aumaia ia i tatou se fiafia sili, aoga, ma se olaga maloloina ma fesoasoani ai ia i tatou e faatumauina se vaaiga e faavavau.
2 Korinito 5:17–21 . E mafai faapefea ona ou malamalama atili i mea na aoao mai e Paulo i nei fuaiupu?
O le faamalamalamaga lenei e mafai ona fesoasoani ia te oe e malamalama ai i nisi o upu ma fasifuaitau i fuaiupu nei:
O le avea ai “o se tagata fou” o lona uiga “o tatou loto, foliga, ma le natura [ua] liua ina ia avea atili e faapei o le Faaola” (Benjamin M. Z. Tai, “O Le Mana o le Tusi a Mamona i le Liuaina,” Ensign po o le Liahona, Me 2020, 47).
O le “lei tuuaia [e Keriso o] a latou agasala ia te i latou” o lona uiga ona o le mea na faia e Keriso mo i tatou, pe a tatou faalelei ma le Atua e le faitaulia a tatou agasala e faasagatau ma i tatou.
Gaoioiga Faaopoopo e Aoao Ai
2 Korinito 5:14–21 . O le fesuiaiga o a tatou agasala mo le amiotonu o Keriso
Afai e manaomia e le vasega se fesoasoani e malamalama ai i aoaoga a Paulo i le 2 Korinito 5:14–21, mafaufau e matamata i le “Good Shepherd, Lamb of God” (15:18) mai le faailo taimi 10:30 i le 12:10 po o le “The Atonement: Our Greatest Hope” (20:21) mai le faailo taimi 3:36 i le 6:30, o loo maua uma i le ChurchofJesusChrist.org. Valaaulia tagata aoga e tusi ni faatusatusaga i le va o nei tala ma le 2 Korinito 5:14–21 . O nei tala e mafai ona fesoasoani ia i latou e iloa ai le ala na tauave ai e Iesu Keriso a tatou agasala i Ona lava luga ina ia mafai ai ona tatou maua le avanoa e maua ai Lana amiotonu.
Mafaufau e matamata i le “Togiola” (15:21) mai le taimi 6:48 i le 8:43, o loo maua i le ChurchofJesusChrist.org, lea o loo faamatala ai e Elder D. Todd Christofferson o le Korama a Aposetolo e Toasefululua se tala mai le tusi Les Miserables. Valaaulia tagata aoga e mafaufau i ni auala na faia e Epikopo Bienvenu, o le na faasaoina Jean Valjean ina ia mafai ai ona ia lelei atili, e talitutusa ma le Faaola ma auala tatou te pei ai o Jean Valjean. Valaaulia i latou e suesue le 2 Korinito 5:14–21 ma vaai pe faapefea ona tutusa le tala na faamatala e Elder Christofferson ma mea o loo aoao mai e Paulo e uiga i le avea ma tagata fou ia Keriso ma taliaina Lana amiotonu.
E mafai ona manuia tagata aoga mai le talanoaina o le meaalofa o le Agaga Paia. Valaaulia i latou e faitau le 2 Korinito 5:1–5 . Ona valaaulia lea o i latou ia malamalama atili i le fasifuaitau “o le faamaoni o le Agaga” e ala i le faitauina o le Bible Dictionary, “ Earnest .”
Atatosi aloaia o Peresitene Henry B. Eyring na pueina ia Mati 2018.
Afai ua e lagonaina le aafiaga a le Agaga Paia i le aso nei, atonu e avea lena mea o se faamaoniga faapea ua galue le Togiola i lou olaga.
(Henry B. Eyring, “Gifts of the Spirit for Hard Times,” Ensign, Iuni 2007, 23)
Valaaulia tagata aoga e tali i fesili e pei o le “E faapefea ona uunaia e le Agaga Paia lou talitonuga i le Togiola a le Faaola ma le folafolaga o le ola e faavavau?” ma le “E faapefea e aafiaga i le taimi nei ma le Agaga Paia ona aumaia ia i tatou se manatu pe faapei le fiafia ai i le ola e faavavau faatasi ma le Tama Faalelagi?”
