O se vaega o alii talavou ma tamaitai talavou o loo uu lima o le tasi ma le isi i se lio ma ataata i le tasi ma le isi e faamalosiau ai le tasi i le isi.
I le faaauauina ai o ana faatonuga ma uunaiga i le Au Paia i Korinito, sa aoao atu e Paulo e faapea e ao i tane ma fafine ona galulue faatasi ma lagolagoina e le tasi le isi ao latou mulimuli i le Alii. O le faamoemoega o lenei lesona o le fesoasoani lea ia te oe e malamalama atili pe aisea e manaomia ai e alii ma tamaitai le tasi ma le isi ina ia maua faamanuiaga tupito i le fuafuaga a le Tama Faalelagi.
Sauniuniga a le tagata aoga: Valaaulia tagata aoga e toe mafaufau i taimi sa o latou vaai ai o galulue faatasi alii ma tamaitai ma lagolagoina e le tasi le isi. Uunaia i latou e mafaufau po o a ni auala e faia ai e vaaiga eseese, tulaga gafatia, ma malosiaga o alii ma tamaitai se faatosinaga aoga i sootaga faaleulugalii, aiga, nuu, ma Ekalesia.
O se ulugalii o loo tietie i le la uila vilivae mo le faamalositino i le taeao.
Mafaufau i fesili nei a o e tagai i lenei ata o se paga tietie uila .
O a ni tomai faapitoa po o ni gafatia e fesoasoani i lenei au ina ia faamanuiaina le taumafaiga?
E faapefea e eseesega i le va o tagata taitoatasi ona faamalosia le la paga ma fesoasoani atili ai e galulue faatasi?
Ao e suesueina le 1 Korinito 11, mafaufau pe faapefea e alii ma tamaitai ona galulue faatasi i le amiotonu o se paaga tutusa ina ia faataunuu ai a laua matafaioi tofia faalelagi ma agavaa ai mo le ola e faavavau.
Fesoasoani i tagata aoga ia malamalama o nisi o aoaoga a Paulo e patino tonu i tulaga faaleaganuu o lena vaitaimi ma e faafaigata ona malamalama i ai. Faamanatu i tagata aoga e faaeteete e aua nei faamasino i tusitusiga a Paulo ma tagata o lena vaitaimi e fua i tulaga ua faaalia mai e le Alii mo aso nei.
I le 1 Korinito 11:1-16, sa tautalagia e Paulo aganuu a tagata Korinito i lona taimi sa le o gatasi ma le silasila a le Alii i matafaioi paia o alii ma tamaitai. E taua le aua nei fenumiai nei aganuu ma mea moni sa aoaoina atu e Paulo.
E ala i le aposetolo o Paulo, sa faaali mai e le Alii mea moni e faavavau e uiga i matafaioi paia o alii ma tamaitai i le 1 Korinito 11:11-12 .
Faitau le 1 Korinito 11:11-12, ma vaavaai i mea moni ua e aoaoina e uiga i le Atua, alii, ma tamaitai.
O tamaitai ma alii e faipaaga atoatoa ma le Alii
I le 1 Korinito 11:11 ua tatou aoaoina ai i le fuafuaga a le Tama Faalelagi, e taua uma ai alii ma tamaitai.
Mafaufau e faaali atu faamatalaga nei ma valaaulia tagata aoga e faitau ma talanoaina fesili o sosoo ai i paga po o vaega toalaiti. Atonu latou te mananao e faasoa i le vasega ni faataitaiga o le galulue faatasi o ni alii ma ni tamaitai.
Faitau i faamatalaga nei mai le folafolaga e uiga i le aiga mai sui o le Korama a Aposetolo e Toasefululua, ma vaai po o a auala e taua ai alii ma tamaitai i le fuafuaga a le Tama Faalelagi.
Mai le folafolaga e uiga i le aiga tatou te faitau ai faapea:
E mafai ona ausia le fiafia i le olaga faaleaiga pe a faavae i luga o aoaoga a le Alii o Iesu Keriso. O faaipoipoga ma aiga manuia, e faavaeina ma faatumauina i luga o mataupu faavae o le faatuatua, tatalo, salamo, faamagaloga, faaaloalo, alofa, agalelei, galuega, ma gaoioiga faafiafia tausaafia. I le fuafuaga paia, e ao ona pulefaamalumalu tamā i o latou aiga i le alofa ma le amiotonu ma o i latou e saunia mea e manaomia o le olaga ma le puipuiga mo o latou aiga. O tina e gafa autu ma le faafaileleina lea o a latou fanau. I nei matafaioi paia, e ao i tamā ma tina ona fesoasoani le tasi i le isi o se paaga tutusa.
(“O Le Aiga: O Se Folafolaga i le Lalolagi,” ChurchofJesusChrist.org)
Na aoao mai Peresitene M. Russell Ballard o le Korama a Aposetolo e Toasefululua:
Ata
O le atatosi aloaia o Peresitene M. Russell Ballard o le Korama o Aposetolo e Toasefululua, 2004.
I le fuafuaga sili a lo tatou Tama Faalelagi o le faauuina i le perisitua, ua i ai i tane le tiutetauave tulagaese e faatautaia ai le perisitua, ae e le o i latou o le perisitua. O tane ma fafine ua i ai ni matafaioi eseese ae tutusa lava lo latou taua. E pei lava ona le mafai e se fafine ona fanauina se tamaitiiti e aunoa ma se tane, e faapena foi ona le mafai e se alii ona faaaogaina atoa le mana o le perisitua e faavae ai se aiga e faavavau e aunoa ma se fafine. … I le vaaiga e faavavau, o le mana foafoa atoa ai ma le mana o le perisitua e tauaveina faatasi e se tane ma se ava.
Na aoao mai Elder David A. Bednar o le Korama a Aposetolo e Toasefululua e faapea:
Ata
Elder David A. Bednar, atatosi aloaia o le Korama a Aposetolo e Toasefululua. 2020.
O le tuufaatasiga tulagaese o gafatiaga faaleagaga, faaletino, faalemafaufau, ma faalelagona o tane ma fafine, sa manaomia e faatino ai le fuafuaga o le fiafia. “E leai se tane pe a le o i ai le fafine, e leai foi se fafine pe a le o i ai le tane, i le Alii” ( 1 Korinito 11:11). O le tane ma le fafine ua faamoemoe ina ia aoaoina mai, faamalosia, faamanuia, ma faaatoatoaina e le tasi le isi.
(David A. Bednar, “Matou Te Talitonu i le Nofomama,” Ensign po o le Liahona, Me 2013, 41-42)
Tuu atu i tagata aoga ia lava se taimi e talanoaina ai mea ua latou mauaina faapea ma soo se fesili o ia i latou. Faalogo totoa a o latou tali mai, ma mafaufau e tuu atu ni fesili tuliloa e fesoasoani i tagata aoga e faalautele atili ai lo latou malamalama e pei o nei: Aisea e te manatu ai e taua le malamalama i lenei aoaoga? O le a se mea tatou te aoaoina e uiga i le silasila a le Tama Faalelagi i alii ma tamaitai? E faapefea ona ese lenei silasila mai le tulaga o talanoa ai le lalolagi e uiga i alii ma tamaitai? E faapefea e lena upumoni ona aafia ai ou uiga ma amioga?
Aisea e te manatu ai o le fuafuaga a le Tama Faalelagi, e ausia faatasi uma ai e Ona atalii ma Ona afafine le ola e faavavau?
E faapefea ona faaalia e lenei mea le alofa ma le faaaloalo o le Tama Faalelagi mo tamaitai ma alii?
E mafai faapefea e le malamalama ai i nei mea moni ona fesoasoani ia te oe pe a e feagai ma manatu faatauagai e uiga i matafaioi ma tiutetauave o alii ma tamaitai?
E faapefea ona e faaaogaina nei mea moni e uiga i tamaitai ma alii i lou olaga (mo se faataitaiga, i le aiga, i le lotu faatasi ma isi alii talavou po o tamaitai talavou, ma a o e tapena mo lou olaga faaleaiga i le lumanai)?
E fuafua i luga o le taimi avanoa o le vasega, atonu e aoga i tagata aoga ona faaauau le suesuega o le 1 Korinito 11 ma le talanoaina o le faamanatuga. Tagai i le vaega o “Gaoioiga Faaopoopo e Aoao Ai” mo se tasi o auala e mafai ona suesue ai tagata aoga e uiga i le faamanatuga.
Manatu ma Talaaga o Faamatalaga
E faapefea pe a faapea o tagata ou te alofa i ai e le faaipoipo pe maua ni fanau?
Atonu e i ai nisi e popole pe taumate pe faapefea ona faataunuu le fuafuaga a le Tama Faalelagi mo tamaitai ma alii mo i latou e le faaipoipo pe maua ni fanau. I le agaalofa tele, sa saunoa mai Peresitene Boyd K. Packer (1924-2015) o le Korama a Aposetolo e Toasefululua:
Ata
O le atatosi aloaia mulimuli o Elder Boyd K. Packer o le Korama o Aposetolo e Toasefululua, 2000. Na maliu i le aso 3 Iulai 2015.
O i latou e le faaipoipo po o latou e le mafai ona maua fanau ua le o taofia mai ia i latou faamanuiaga e faavavau o loo latou sailia ae, mo le taimi nei, e le o mafai ona latou au atu i ai. …
O ou faanaunauga faalilolilo ma olega o loimatā o le a pai atu i finagalo uma o le Tama ma le Alo. O le a e mauaina se faamautinoaga patino mai ia i Laua e faapea o le a faatumuina lou olaga ma e leai se faamanuiaga e tatau o le a taofia mai ia te oe.
I le avea ai ma se auauna a le Alii, ma galue ai i le tofi lea ua faauuina ai au, ou te tuuina atu ai ia i latou o i ai i ia tulaga se folafolaga o le a leai se mea e taua i lou faaolataga ma le faaeaga o le a le mafai ona tuuina atu ia te oe i le taimi e tatau ai.
(Boyd K. Packer, “O Le Molimau,” Ensign po o le Liahona, Me 2014, 95)
Aisea e manao ai Satani tatou te fevaevaeai o ni alii ma ni tamaitai?
Na aoao mai Peresitene Jean B. Bingham, o le sa avea ma Peresitene Aoao o le Aualofa:
Ata
Atatosi Aloaia o Sister Jean B. Bingham. Na pueina i le 2017.
Sa matua faamanuiaina le fili i lana sini e tavavae ese alii ma tamaitai i ana taumafaiga e pulea o tatou agaga. Ua iloa e Lusifelo afai na te mafai ona lepeti le lotogatasi e lagona e alii ma tamaitai, afai e mafai ona ia faafenumiai i tatou e uiga i lo tatou taua paia ma tiutetauave o feagaiga, o le a ia manumalo i le faatamaiaina o aiga, o iunite taua o le faavavau.
E faamaite e Satani le taufaatusatusa o se aupega e faatupu ai ni lagona o le faasausili po o le vaai maulalo le taualoa, a o natiaina le upumoni e faavavau e faapea o uluai eseesega faalenatura o alii ma tamaitai, ua mai le Atua ma e tutusa lava le taua. Na ia taumafai e faalumaina sao o tamaitai i le aiga ma i faapotopotoga lautele, ma faaitiitia ai lo latou tosinaga faagaeetia mo le lelei. O lana sini o le fatuina lea o se tauiviga mo le pulemalosi nai lo le patipatia o sao tulagaese o alii ma tamaitai e felagolagomai ai le tasi i le isi ma saofagā ai i le lotogatasi.
Mafaufau e faaali atu le vitio “Renaissance of Marriage” (2:36), e maua i le ChurchofJesusChrist.org, sa saunoa mai ai Peresitene Henry B. Eyring i se fonotaga tele faavaomalo e uiga i le faaipoipoga. Sa ia faasoa pe faapefea e matafaioi felagolagomai a taitoalua o le tane ma le ava ona maua ai le fiafia mo laua ma o la aiga i le olaga nei faapea le faavavau.
O auala e taulimaina ai e le Faaola ia tamaitai ma alii
Ina ia fesoasoani i tagata aoga e mafaufau pe faapefea ona fegalegaleai ma faatauaina e Iesu Keriso tamaitai ma alii, mafaufau e faaali atu ni ata eseese o Lona soifuaga. E mafai ona aofia ai le toe faatuina o Lasalo, le fafine sa i ai i le vaieli, le fafine mulilua, o le taitai talavou mauoa, o Iairo ma lona afafine, le fafine sa aafia i le puna toto, ma isi. Valaaulia tagata aoga e toe manatu pe faapefea ona faailoa mai e le faataitaiga a le Faaola le tulaga e tatau ona faatauaina ma faaaloalogia uma ai tamaitai ma alii i o latou olaga.
E tatau ona tatou suesueina o tatou olaga a o tatou aai ma feinu i le faamanatuga
Atonu e aoga mo tagata aoga le suesue o le 1 Korinito 11:23-32 ma le faailoaina o mea moni ua taua i luga (tagai i le fuaiupu 28). Atonu e fesoasoani ona faamatala atu sa faamanatu e Paulo i tagata o Korinito e uiga i le Talisuaga Mulimuli, lea sa faavaeina ai e Iesu Keriso le faamanatuga e fai ma faamanatu o Lana taulaga (tagai i fuaiupu 23-27). A maea ona faailoa mai e tagata aoga mea moni i le fuaiupu 28, mafaufau e faasoa atu le faamatalaga a Peresitene Howard W. Hunter (1907-95):
Ata
Howard W. Hunter
Sa ou fesili ifo ia te au lava i le fesili lenei: “Pe o ou tuuina le Atua i luga atu o isi mea uma ma tausi Ana poloaiga uma?” Ona oo mai lea o le tomanatuga ma le faaiuga. Ina ia osia se feagaiga ma le Alii ina ia tausia pea Ana poloaiga o se tuutooga, ma ina ia faafouina lena feagaiga e ala i le taumamafa i le faamanatuga e faapena foi le tutusa o lona taua tele. O taimi faamamalu o le mafaufau loloto a o tufaina le faamanatuga e tele naua sona taua. O ni taimi ia e suesue ifo ai le tagata ia te ia lava, suesue ou lava mafaufauga ma le tulaga o i ai, ia malamalama lelei ia te oe lava—o se taimi e toe tomanatu ai ma fai se faaiuga ia faaleleia.
(Howard W. Hunter, “Thoughts on the Sacrament,” Ensign, Me 1977, 25)
Ona mafai lea e tagata aoga ona mafaufau po o a ni fesili e mafai ona latou mafaufau loloto i ai i le isi vaiaso i le taimi o le faamanatuga ma toe iloilo o latou olaga. E mafai ona tusi nei fesili i luga o le laupapa.
