Batan-ong lalaki nga nag-anteyohos, naglingkod sa gawas nagbasa sa mga kasulatan. (horiz)
Adunay usa o lain pa nga panahon, nga kitang tanan kinahanglan nga mobarog sa unsa ang atong gituohan. Samtang namulong sa mga Santos nga nagpuyo sa Roma, si Pablo mideklarar nga “wala ko igakaulaw ang Maayong Balita” (Mga Taga-Roma 1:16). Ang iyang kahinam sa pagpakigbahin sa mensahe sa ebanghelyo mao ang pruweba. Kini nga leksiyon makatabang kanimo aron dili ka maulaw nga mailhan isip usa ka disipulo ni Jesukristo.
Unsa may imong nahibaloan?
Hunahunaa nga imong gisultihan ang usa sa imong mga higala kinsa anaa sa laing Kristohanong pagtuo nga kamo nagtuon sa Bag-ong Tugon sa seminary. Siya misulti kanimo nga ganahan siya sa Bag-ong Tugon apan usahay maglisod og sabot sa mga Epistola. Iya kamong gipangutana unsa ang imong nahibaloan mahitungod niini. Tubaga ang mosunod nga pasulit aron makita unsa ka kamaayo motubag kaniya.
Tubaga ang pasulit diha sa imong journal sa pagtuon. Ang eksaktong mga tubag anaa sa kataposan niini nga leksiyon.
Unsa ang mga Epistola?
Opisyal nga mga pahibalo sa Simbahan nga gihimo sa propeta
Mga pakigpulong nga gihatag sa mga lider sa Simbahan nga nakolekta sa milabay nga mga katuigan
Nagkalainlaing mga sulat nga sinulat sa mga lider sa Simbahan ngadto sa mga Santos
Kinsa ang gipasidunggan sa pagsulat sa 14 sa 21 ka epistola nga nalakip sa Bag-ong Tugon?
Pedro
Pablo
Lucas
Giunsa paghan-ay ang naunang 13 ka Epistola?
Kronolohiko (sa dihang kini gisulat)
Pinaagi sa importansiya
Pinaagi sa gitas-on
Kinsa pa ang pipila sa ubang mga tagsulat sa mga Espitola?
Santiago, Pedro, Juan, ug Judas
Santiago, Pedro, Juan, ug Esteban
Santiago, Pedro, Juan, ug Timoteo
Ang Epistola ngadto sa mga Taga-Roma
Ang basahon sa Mga Taga-Roma mao ang usa ka epistola nga gisulat ni Pablo ngadto sa mga Santos didto sa Roma sa dihang hapit na matapos ang iyang mga panaw sa pagka misyonaryo. Ang Roma—ang kapital sa Kagamhanan sa Roma—napuno sa kalibotanon nga mga pilosopiya ug nahimong usa ka lisod nga dapit sa pagsangyaw sa ebanghelyo ni Jesukristo. Si Pablo misulat sa mga Santos nga mga Romano aron sa paglig-on sa ilang hugot nga pagtuo, pag-andam kanila sa iyang pag-abot, pagtin-aw ug pagdepensa sa iyang mga pagtulon-an, ug sa pagdasig og panaghiusa tali sa mga Judio ug mga Hentil nga mga miyembro sa Simbahan.
Samtang magtuon ka sa Mga Taga-Roma 1, pangita og mga kamatuoran nga makadasig kanimo diha sa imong pagpaningkamot nga mahimong disipulo ni Jesukristo.
Wala ko igakaulaw
Tan-awa ang “Preparation of Joseph F. Smith: True Blue, Through and Through [Pag-andam ni Joseph F. Smith: Dili Matarog sa Pagkamaunungon, sa Hingpit]” (1:31) anaa sa ChurchofJesusChrist.org. Kini nga asoy makita usab sa Mga Pagtulon-an sa mga Presidente sa Simbahan: Joseph F. Smith [1998], 126.
Basaha ang Mga Taga-Roma 1:15–17, nga mangita kon unsa ang komon ni Presidente Joseph F. Smith ug Pablo. Ikonsiderar ang pagmarka sa mga pulong o mga hugpong sa pulong niini nga mga bersikulo nga imong nakita nga mahinungdanon.
Lagmit imong gimarkahan ang mga pulong nga “Wala ko igakaulaw ang [ebanghelyo ni Kristo]” sa Mga Taga-Roma 1:16.
Gikan sa imong nakat-onan mahitungod ni Pablo sa basahon sa Mga Buhat, giunsa niya pagpakita nga siya wala maulaw nga mailhan isip usa ka Kristiyano?
Unsa nga mga sitwasyon ang lagmit giatubang sa kabatan-onan karon diin sila kinahanglang mobarog ug dili ikaulaw ang ebanghelyo ni Kristo?
Si Pablo nasayod nga ang Roma usa ka lugar nga lisod puy-an ug sangyawan sa ebanghelyo. Siya nag-atubang usab og pagsupak gikan niadtong wala makasabot o misalikway sa iyang mga pagtulon-an. Bisan pa niana, si Pablo naikag sa pag-adto sa Roma ug pagsangyaw didto aron dalhon ang uban ngadto kang Kristo (tan-awa sa Mga Taga-Roma 1:15).
Paghunahuna og mga kasinatian diin, sama ni Pablo, ikaw adunay kahigayonan sa pagbarog o pagpakigbahin sa imong hugot nga pagtuo ni Jesukristo. Paghimo og mubo nga listahan sa imong journal. Ilakip ang imong mga hunahuna ug mga pagbati kon unsa kadako ang imong tinguha sa pagpakigbahin sa imong hugot nga pagtuo niadtong mga sitwasyona.
Ngano kaha ang usa ka batan-on mobati og kaulaw nga mailhan isip usa ka Kristiyano? Unsa ang ilang mahimong buhaton kon aduna sila niini nga mga hunahuna o mga pagbati?
Mga kasulatan ug modernong mga ehemplo
Rebyoha ang duha sa mosunod nga mga ehemplo sa mga tawo kinsa wala maulaw nga ipahibalo ang ilang hugot nga pagtuo sa Ginoo. Paghunahuna mahitungod sa ilang mga sitwasyon, ug pangita og mga pagkaparehas tali sa ilang kinabuhi ug sa imoha.
Kon ang uban naghukom kanimo: Ang babaye kinsa naghugas sa mga tiil ni Jesus sa iyang mga luha (Lucas 7:36–50)
Kon ikaw mopakigbahin sa ebanghelyo: Teren Bingham ug Brandon McEuen (“Sama og Uniporme” [5:01], ChurchofJesusChrist.org)
Unsa ang nakadasig kanimo mahitungod niini nga mga ehemplo?
Giunsa niini nga mga indibidwal pagpakita nga sila wala maulaw sa ebanghelyo ni Kristo?
Kinsa ang nahimong usa ka ehemplo sa imong kinabuhi nga wala maulaw sa ebanghelyo ni Jesukristo? Giunsa nila sa pagpakita ang ilang hugot nga pagtuo?
Ang Taga-Roma 1:15–17 nagsulti kanato nga ang kadasig ni Pablo sa ebanghelyo ni Kristo iyang nakab-ot tungod sa iyang pagsabot nga “[ang ebanghelyo] mao ang gahom sa Dios alang sa kaluwasan” alang sa tanang mga anak sa Dios. Sa laing pagkasulti, tungod kay si Pablo nasayod nga walay bisan usa nga maluwas kon wala ang ebanghelyo ni Jesukristo, siya gustong mopakigbahin niini sa tanan.
1. Tubaga ang labing minos duha sa mosunod nga mga pangutana diha sa imong journal sa pagtuon:
Sa unsang paagi nga ang paghinumdom sa unsay gibuhat sa Manluluwas alang kanimo makatabang kanimo aron dili ikaulaw Siya ug ang Iyang ebanghelyo?
Samtang adunay mga higayon nga kita tawgon aron pagpanalipod sa atong hugot nga pagtuo sa dagko o dramatikong mga pamaagi, kasagaran ang atong hugot nga pagtuo labing maayo nga mapakita sa gagmay ug yanong mga paagi (tan-awa sa Alma 37:6–7). Unsa kaha ang hitsura, paminaw, o bation nga “dili igakaulaw ang [ebanghelyo ni Kristo]” sa imong inadlaw-adlaw nga kinabuhi?
Taposa ang mosunod nga pamahayag: Wala ko igakaulaw ang ebanghelyo ni Jesukristo, tungod kay …
Ang mga tubag sa pasulit: (1) c; (2) b; (3) c; (4) a
Opsiyonal: Gustong Makakat-on Pa og Dugang?
Unsaon man nako sa pagpakigbahin sa akong pagpamatuod sa normal ug sa natural nga mga paagi?
Si Elder Dieter F. Uchtdorf sa Korum sa Napulog Duha ka Apostoles mitudlo:
Imahe
Opisyal nga hulagway ni Elder Dieter F. Uchtdorf sa Korum sa Napulog Duha ka Apostoles, 2006. Gitawag isip Ikaduhang Magtatambag sa Unang Kapangulohan, 3 sa Pebrero 2008. Gihimong opisyal nga hulagway niadtong 2008 nga gipuli sa litrato nga gikuha niadtong 2004.
Ako nahibalo nga pipila kanato mas mahigalaon kaysa uban. Okay ra na. Ang Ginoo naghimo niini nga posible alang sa matag usa kanato, sa atong kaugalingong paagi, aron mag-awhag sa uban nga moduol ug motan-aw ug moduol ug motabang. Dayon ang Dios mohimo sa Iyang pagluwas nga buhat, ug sila mahimong moduol ug magpabilin.
Mamahimo ba kong mosugyot og lima ka butang nga mahimo ni bisan kinsa aron makasalmot sa dakong sugo sa Manluluwas sa pagtabang sa pagpundok sa Israel.
Paduol ngadto sa Dios. …
Pun-a ang imong kasingkasing sa gugma alang sa uban. …
Paningkamot sa paglakaw sa dalan sa pagkadisipulo. …
Ipaambit unsay anaa sa imong kasingkasing. …
Salig sa Ginoo nga mahitabo ang Iyang mga milagro.
