Didto sa Tanaman sa Getsemani, nasinati ni Jesukristo ang dili matugkad nga pag-antos isip kabahin sa Iyang Pag-ula. Kini mao ang una sa duha ka bahin nga leksiyon mahitungod sa pag-antos sa Manluluwas didto sa Getsemani ug sa doktrinal nga kamahinungdanon niini. Ang tumong niini nga leksiyon mao ang pagtabang ninyo aron mas makasabot sa unsay nahitabo didto sa Tanaman sa Getsemani ug sa unsang paagi kadto nahimong usa ka buhat sa gugma alang kanimo. Sa mosunod nga leksiyon, imong matun-an ang doktrina sa Pag-ula ni Jesukristo ug makat-onan unsaon nimo pagdawat og kusog ug tabang gikan sa Manluluwas.
Unsa ang nabuhat ni Jesukristo alang kanato?
Si Presidente Dallin H. Oaks mipaambit og bahin sa panagsulti niya kauban sa usa ka miyembro sa Simbahan. Tan-awa ang bidyo nga “Unsa ang Nabuhat sa Atong Manluluwas alang Kanato?” gikan sa code sa oras nga 0:00 hangtod sa 0:34. Kini nga bidyo anaa sa ChurchofJesusChrist.org.
Imahe
Presidente Dallin H. Oaks
Daghang tuig nang milabay, ako nakahimamat og babaye nga miingon nga gihangyo siya sa iyang mga higala sa pagbalik sa simbahan human sa katuigan nga dili na aktibo, apan wala siya makahunahuna og bisan unsa nga rason nga siya mobalik. Aron sa pagdasig kaniya, miingon ako, “Kon imong hunahunaon ang tanang mga butang nga nabuhat sa Manluluwas kanimo, daghan ka og mga rason nga mobalik aron sa pagsimba ug pagserbisyo Kaniya.” Nakurat ko sa dihang siya mitubag, “Unsay nabuhat Niya alang kanako?”
Unsaon nimo sa pagtubag sa pangutana niini nga babaye?
Jesukristo nag-antos sa Tanaman sa Getsemani
Imahe
kahoy nga oliba diha sa Tanaman sa Getsemani didto sa Israel
Human ang Manluluwas mitapos sa Pagpalabay [Passover] nga pagkaon, mipasiugda sa sakramento, ug miadto sa Bukid sa mga Oliba aron ipakigbahin ang Iyang kataposang mga pagtulon-an ngadto sa Iyang Apostoles, Siya miadto kauban ni Pedro, Santiago, ug Juan sa duol ra paingon sa Tanaman sa Getsemani. Ang pulong nga Getsemani nagpasabot og “pug-anan sa lana.” Ang pipila ka mahinungdanon kaayo nga mga elemento sa Pag-ula ni Jesukristo nahitabo sa Getsemani. Samtang magtuon ka niining mga hitaboa, hunahunaa kon sa unsang paagi ang pagsabot sa Pag-ula ni Jesukristo makatabang nimo sa pag-ila ug pagbati sa gugma sa Dios alang kanimo.
Ang mosunod nga mga tudling sa kasulatan naghulagway sa pipila ka mahinungdanong mga hitabo nga nahitabo isip kabahin sa pag-antos sa Manluluwas didto sa Tanaman sa Getsemani. Ikonsiderar ang pagkopya sa mosunod nga talaan diha sa imong journal sa pagtuon ug pagkompleto niini samtang magtuon ka sa mga bersikulo. Ikonsiderar usab nga badlisan ang mahinungdanong mga pulong ug mga hugpong sa mga pulong gikan niini nga mga bersikulo diha sa imong mga kasulatan.
Dugang sa pagbasa sa mga bersikulo sa ubos, pwede nimo tanawon ang “The Savior Suffers in Gethsemane [Ang Manluluwas Nag-atus didto sa Getsemani]” gikan sa time code 0:00 hangtod sa 5:52 (anaa sa ChurchofJesusChrist.org) ug hunahunaa nga imong nasaksihan kining sagrado nga panghitabo.
Basaha ang mosunod nga mga tudling sa kasulatan.
Unsa ang imong nakat-onan o gibati mahitungod kang Jesukristo gikan niini nga mga bersikulo?
Unsa ang imong nakat-onan o gibati mahitungod kang Jesukristo gikan niini nga mga bersikulo?
1. Tubaga ang labing minos duha sa mosunod nga mga pangutana diha sa imong journal sa pagtuon:
Unsa nga mga hunahuna, mga pagbati, o mga impresyon ang imong nasinati samtang gitun-an nimo kini nga mga bersikulo?
Unsa ang pipila ka pihong mga pulong o mga hugpong sa mga pulong gikan niini nga mga bersikulo ang labing importante kanimo? Ngano man?
Unsay natabang niini nga mga bersikulo sa imong pagbati mahitungod sa gugma sa Langitnong Amahan ug ni Jesukristo alang kanimo?
Ang kantidad sa bililhong gugma sa Dios
Si Elder D. Todd Christofferson sa Korum sa Napulog Duha ka Apostoles mipakigbahin kon sa unsang paagi ang pag-antos sa Manluluwas didto sa Getsemani nagpakita sa Iyang walay kataposang gugma alang kanato. Tan-awa ang bidyo nga “Magpabilin Kamo sa Akong Gugma” gikan sa time code nga 11:33 hangtod sa 14:02. Kini nga bidyo anaa sa ChurchofJesusChrist.org.
Imahe
Elder D. Todd Christofferson
Hunahunaon nato ang kantidad sa bililhong gugma sa Dios. Gipadayag ni Jesus nga ang pag-ula sa atong mga sala ug pagtubos kanato gikan sa kamatayon, sa pisikal ug sa espiritwal, Iyang pag-antos, naghimo Kaniya “gani ang Dios, ang labing halangdon sa tanan sa pagkurog tungod sa kasakit, ug sa pag-agas sa dugo sa matag lungag sa panit, ug sa pag-antos sa lawas ug sa espiritu—ug buot nga [Siya] unta dili moinom sa mapait nga kopa, ug mobiya” [Doktrina ug mga Pakigsaad 19:18]. Ang Iyang pag-antos sa Getsemani ug dayon sa krus mas labaw kay sa maantos sa tawo. Bisan pa, tungod sa Iyang gugma sa Iyang Amahan ug kanato, Siya milahutay, ug isip sangpotanan, makatanyag Siya kanato sa pagka-imortal ug kinabuhing dayon.
Simbolikanhon kaayo nga ang “dugo [migawas] gikan sa matag lungag sa panit” [Mosiah 3:7] samtang nag-antos si Jesus sa Getsemani, sa dapit sa pugaanan sa oliba. Aron makahimo og lana niadtong panahon sa Manluluwas, ang mga oliba unahon og dugmok nga paligiran kini og dakong bato. Ang mga “kupog” ibutang sa humok, dili kaayo hugot nga pagkalala nga mga basket nga ipatong-patong. Ang gibug-aton niini maoy makapagula sa una ug pinakanindot nga lana. Dayon dugangan ang pagpuga pinaagi sa pagbutang og dakong tuod o kahoy sa ibabaw sa gipatong-patong nga mga basket, aron makapagula og daghan pa nga lana. Sa kataposan, aron makuha ang pinakataposang mga tulu, ang tuod pabug-atan pa gyod og mga bato sa isig ka tumoy aron mahimo ang kinabug-atang dat-og. Ug oo, ang lana sama og dugo sa unang pag-agas niini.
Naghunahuna ko sa giistorya ni Mateo bahin sa Manluluwas dihang misulod Siya sa Getsemani nianang mapait nga kagabhion—nga Siya “nagsugod sa pagkasubo ug nabug-atan kaayo. …
“Ug sa nakalakaw siya sa unahan ug diyutay, siya mihapa ug nag-ampo nga nag-ingon, “Amahan ko, kon mahimo man, isaylo lang kanako kining kopa; gani, dili sumala sa akong pagbuot kondili sa imo.” [Mateo 26:37, 39].
Dayon, sa akong paghunahuna nga ang kapait nag-anam og kagrabe, nangaliyupo Siya og kahupayan sa ikaduhang higayon ug, sa kataposan, tingali sa kinagrabihan sa Iyang pag-antos, sa ikatulong higayon. Iyang nalahutay ang pag-antos hangtod ang kaangayan nahatagan og katagbawan ngadto sa kataposang patak. Kini Iyang gihimo sa pagtubos kanimo ug kanako.
Unsa nga mga pulong o mga hugpong sa mga pulong gikan niini nga pamahayag ang importante kanimo?
Sa unsang paagi ang pag-antos sa Manluluwas sa Getsemani nagpakita sa Iyang dakong gugma alang kanimo sa personal nga paagi?
Si Presidente Ezra Taft Benson (1899–1994) mipamatuod nga ang pag-antos sa Manluluwas didto sa Tanaman sa Getsemani, ug sa wala madugay sa Kalbaryo, “mao ang labing dako nga bugtong nga buhat sa gugma nga girekord sa kasaysayan” (Mga Pagtulon-an sa mga Presidente sa Simbahan: Ezra Taft Benson [2014], 113).
2. Gamit ang imong nakat-onan karon, irekord ang imong tubag sa mosunod nga pangutana, nga kabahin sa pakigpulong ni Presidente Oaks dapit sa sinugdanan sa leksiyon.
Unsa ang nabuhat ni Jesukristo alang kanako?
Opsiyonal: Gustong Makakat-on pa og Dugang?
Unsa man ang kamahinungdanon sa Getsemani?
Imahe
pug-anan sa oliba
Si Presidente Russell M. Nelson mitudlo:
Imahe
Presidente Russell M. Nelson
Ang pulong Getsemani naggikan sa duha ka Hebreo nga pulong: gath, nagpasabot nga “pagpuga,” ug shemen, nagpasabot nga “lana,” ilabi na sa oliba.
Didto ang mga oliba gipuga gamit ang gibug-aton sa dakong bato nga ligid aron pigsaton ang mahalon nga lana gikan sa mga oliba. Mao nga ang Kristo sa Tanaman sa Getsemani sa literal nga paagi gipuga tungod sa mga sala sa kalibotan. Gipaningot Siya og dagkong tulo sa dugo—ang “lana” sa iyang kinabuhi, nga nanglugsot sa matag lungag sa panit. …
… Hinumdomi, sama sa lawas sa oliba, nga gipuga alang sa lana nga naghatag og kahayag, mao nga ang Manluluwas gipuga. Gikan sa matag lungag sa panit miagas ang dugo sa kinabuhi sa atong Manunubos. Sa tanan nga malipayong mga adlaw sa inyong misyon, kon ang inyong kopa sa kalipay magaawas, hinumdomi ang Iyang kopa sa kapaitan nga maoy naghimo niini nga posible. Ug kon ang mga masakit nga mga pagsulay moabot kaninyo, hinumdomi ang Getsemani.
(Russell M. Nelson, “Why This Holy Land?,” Ensign, Dis. 1989, 17–18)
Unsa ang nabuhat sa atong Manluluwas alang kanato?
Si Presidente Dallin H. Oaks sa Unang Kapangulohan miingon:
Imahe
Presidente Dallin H. Oaks
Ubos sa plano sa atong Langitnong Amahan, [si Jesukristo] “milalang sa mga langit ug yuta” ( Doktrina ug mga Pakigsaad 14:9) aron nga ang matag usa kanato makabaton og mortal nga kasinatian nga gikinahanglan sa pagkaplag sa atong balaang kapalaran. Isip kabahin sa plano sa Amahan, ang Pagkabanhaw ni Jesukristo mibuntog sa kamatayon aron sa pagsiguro sa imortalidad sa matag usa kanato. Ang maulaong sakripisyo ni Jesukristo mihatag sa matag usa kanato sa oportunidad sa paghinulsol sa atong mga sala ug mobalik nga putli ngadto sa atong langitnong panimalay. Ang Iyang mga sugo ug mga pakigsaad nagpakita kanato sa agianan, ug ang Iyang pagkapari naghatag sa katungod sa pagpahigayon sa mga ordinansa nga gikinahanglan aron makab-ot kana nga padulngan. Ug ang atong Manluluwas andam nga misinati sa tanang mortal nga kasakit ug mga kahuyang nga Siya masayod kon unsaon pagpalig-on kanato diha sa atong mga kasakit.
Si Jesukristo mibuhat niining tanan tungod kay Siya nahigugma sa tanang mga anak sa Dios. Ang gugma mao ang hinungdan niining tanan, ug kini mao gikan pa sa sinugdanan.
