Painting depicting the parable of the ten virgins as taught by Jesus Christ. Five of the women are adding oil to their lamps in preparation to meet the bridegroom. The other five women have no oil and are asking the five wise virgins for oil. The wise women are not able to spare the oil for the foolish.
Duol sa kataposan sa Iyang tawhanong kinabuhi, si Jesukristo mitudlo sa Iyang mga tinun-an sa kaimportante sa pagkaandam sa Ikaduhang Pag-anhi pinaagi sa pagsugilon sa sambingay sa napulo ka dalaga. Kini nga leksiyon makatabang kaninyo sa pagsabot ug pagbati sa kaimportante sa pagpangandam sa inyong kaugalingon sa pakighimamat sa Ginoo sa Iyang pag-anhi og usab.
Andam o dili?
Paghunahuna og panahon diin kamo dili andam sa pipila ka butang nga nagkinahanglan og daghang pagpangandam.
Unsay pagbati kabahin niana?
Unsa ang pipila sa mga hinungdan nganong gipasagdan ninyo ang pag-andam alang sa piho nga mga butang?
Gradohi ang inyong kaugalingon sa sukod gikan sa 1 hangtod sa 10 (ang 1 nagpasabot nga kamo dili uyon; ang 10 nagpasabot nga kamo uyon) sa mosunod nga pamahayag:
Mibati ako nga andam alang sa Ikaduhang Pag-anhi ni Jesukristo.
Ang Mateo 25:1–13 naglangkob sa sambingay ni Jesukristo bahin sa napulo ka dalaga nga Iyang gitudlo aron matabangan ang Iyang mga sumusunod sa pag-andam sa Iyang Ikaduhang Pag-anhi. Sa inyong pagtuon, tinguhaa ang giya sa Espiritu Santo aron matabangan kamo nga mahibalo sa mga paagi nga kamo makaandam ug mga paagi nga kamo molambo. Pamalandongi ang mga pangutana sama sa “Kinsa man ako niini nga sambingay?”
Sa dili pa tun-an ang sambingay, importante nga masabtan ang mga kostumbre sa pagkasal sa Judeo sa kapanahonan sa Manluluwas. Ang pamanhunon, kinuyugan sa iyang suod nga mga higala, moadto inig kagabii sa panimalay sa pangasaw-onon alang sa seremonyas sa kasal. Human sa seremonyas, ang mga nanambong sa kasal moadto sa balay sa lalaki para sa kumbira. Ang mga bisita nga manguyog sa pundok, lakip ang mga dalaga o mga abay sa kasal, gilaoman nga magdala og kaugalingon nilang mga lampara o mga sulo [suga] nga nagpasabot nga labot sila sa kasaulogan sa kasal ug aron madugangan ang kahayag ug katahom sa okasyon.
Basaha ang Mateo 25:1–4, ug paglista og mga importanteng mga elemento sa sambingay sa Manluluwas sama sa mga tawo o mga butang. Sunod diha sa matag elemento, isulat kon kinsa o unsa ang ilang girepresentahan niini.
Unsa ang girepresentahan sa mga elemento diha sa sambingay sa napulo ka dalaga?
Ang modernong adlaw nga pagpadayag ug propetikanhong mga pagtulon-an makatabang ninyo sa pagsabot sa simbolikanhong mga kahulogan sa sambingay.
Si Presidente Dallin H. Oaks sa Unang Kapangulohan mitudlo nga: “Ang napulo ka mga birhen tataw nga nagrepresentar sa mga miyembro sa Simbahan ni Kristo, kay ang tanan giimbitar man sa kumbira sa kasal ug ang tanan nahibalo sa unsay gikinahanglan aron makasulod inig abot sa pamanhonon” (Dallin H. Oaks, “Pagpangandam alang sa Ikaduhang Pag-anhi,” Liahona, Mayo 2004, 8).
Ang mga suga nagsimbolo sa atong mga pagpamatuod (tan-awa sa David A. Bednar, “Nakabig ngadto sa Ginoo,” Liahona, Nob. 2012, 109). Timan-i nga ang tanang napulo ka dalaga adunay mga suga.
Ang lana nagsimbolo sa atong pagkakabig ngadto ni Ginoong Jesukristo (tan-awa sa David A. Bednar, “Nakabig ngadto sa Ginoo,” Liahona, Nob. 2012, 109). Kini naglakip sa atong mga paningkamot sa pagsunod sa giya sa Espiritu Santo ug sa pagpuyo nga magmasulundon sa Manluluwas ug sa Iyang ebanghelyo (tan-awa sa Doktrina ug Mga Pakigsaad 45:56–58; Spencer W. Kimball, Faith Precedes the Miracle [1972], 256).
1. Tubaga ang mosunod nga mga pangutana diha sa inyong journal sa pagtuon:
Hain niining may simbolikanhong kahulugan ang labing mahinungdanon kaninyo, ug ngano?
Unsaon ninyo sa pagpasabot sa kaugalingon ninyong mga pulong ang mga kalainan tali sa danghag ug maalamon nga mga dalaga?
Unsa ang pipila ka sanglitanan sa mga butang nga atong mahimo aron mabutangan og simbolikanhong lana ang atong mga suga?
Basaha ang nahibilin nga sambingay sa Mateo 25:5–13. Sa inyong pagbuhat niini, hunahunaa ang inyong kaugalingon isip usa sa mga dalaga. Mahimo kamong mamati sa pagsaysay sa kasulatan nga anaa sa ChurchofJesusChrist.org o sa Libarya sa Ebanghelyo nga app.
Sa Mateo 25:12, hibaloi ang tubag sa pamanhonon ngadto sa danghag nga mga dalaga kinsa misulay pagsulod sa kasaulogan sa kasal nga naulahi ug walay igo sa gikinahanglan nga lana. Ipasabot nga ang Hubad ni Joseph Smith, sa Mateo 25:11 nagklaro nga ang pamanhonon miingon, “Kamo wala makaila kanako”.
Sa paghinumdom kon unsay girepresentahan sa lana, nganong gikinahanglan man ang lana aron tinuod nga makaila sa Manluluwas ug maandam sa paghimamat Kaniya?
Ngano kaha nga ang maalamon nga mga dalaga wala lamang basta diretso lang nga mihatag og lana ngadto sa mga danghag nga dalaga?
Si Elder David A. Bednar sa Korum sa Napulog Duha ka Apostoles mitudlo:
Imahe
Elder David A. Bednar, Quorum of the Twelve Apostles official portrait. 2020.
Usa sa dakong katuyoan sa mortalidad dili kay sa pagkat-on lamang mahitungod sa Bugtong Anak sa Amahan apan sa pagpaningkamot usab nga makaila Kaniya. … Makaila kita sa Manluluwas kon mobuhat kita sa atong pinakamaayo sa pag-adto asa ang gusto Niya nga kita moadto, kon maningkamot kita sa pagsulti sa gusto Niya nga atong isulti, ug kon mamahimo kita sa unsay Iyang gusto nga kita mamahimo.
(David A. Bednar,“Kon Nakaila Pa Kamo Kanako,” Liahona, Nob. 2016, 103, 104)
Ikonsiderar ang pagrekord sa mosunod nga kamatuoran: Ako mahimo nga makaila sa Manluluwas ug makaandam sa Iyang Pag-anhi pinaagi sa pagpaningkamot nga mosunod sa Iyang mga ehemplo sa matarong nga pagpakabuhi.Paggahin og pipila ka minuto aron magsulat og modernong adlaw nga bersiyon niini nga sambingay. Sa unsang paagi magpakabuhi ang maalamon nga mga dalaga karon? Unsaon ninyo pag-ila nga sila nakaila sa Ginoo ug nga nakabig Kaniya? Sa unsang paagi magpakabuhi ang danghag nga mga dalaga? Unsa ang pipila sa mga hinungdan nga sila magpaabot aron makaila sa Ginoo?
Sa inyong opinyon, nganong takos man ang paningkamot sa pag-ila sa Manluluwas ug maandam sa paghimamat Kaniya sa panahon nga Siya moanhi pag-usab?
Sa unsang paagi nga ang paningkamot nga magpakabuhi sama sa Manluluwas makatabang kanato nga mas makaila Kaniya?
Unsa nga mga kasinatian ug matarong nga mga buhat ang nakatabang kaayo kaninyo aron makaila ni Jesukristo?
2. Kompletoha ang mosunod nga kalihokan diha sa inyong journal sa pagtuon:
Imahe
Simple drawing of an ancient oil lamp.
Pagdrowing og usa ka yano nga suga diha sa inyong journal sa pagtuon. Tinguhaa ang giya sa Espiritu Santo aron mahibalo sa mga ehemplo nga inyong nabuhat aron makaila sa Manluluwas ug sa mga paagi nga kamo maandam alang sa Iyang pag-anhi. Ikonsiderar ang pagsulat niini diha sa sulod sa suga sa pagsimbolo sa inyong lana. Pagtinguha usab og inspirasyon aron mahibalo kon unsa ang gusto sa Ginoo nga inyong buhaton karon aron mas makaila Kaniya ug mas maandam alang sa Iyang pag-anhi. Pagsulat og usa o duha niini diha sa gawas sa inyong suga, nga nagsimbolo sa lana nga kinahanglan gihapon ninyong maangkon.
Pangitaa ang tabang sa Ginoo sa inyong pagpaningkamot nga mas maila Siya ug maandam nga mahimamat Siya.
Opsiyonal: Gustong Makahibalo pa og Dugang?
Mateo 25:6. Unsa ang kahulogan sa tungang gabii nga pag-abot sa pamanhonon?
Kadaghanan sa seremonyas sa kasal sa mga Judeo mahitabo sa gabii. Ang pipila ka tudling sa kasulatan nagpasabot sa Manluluwas nga mianhi pag-usab sama sa kawatan sa kagabhion (tan-awa sa Hubad ni Joseph Smith, Lucas 12:44 [sa Giya ngadto sa mga Kasulatan]; 1Mga Taga-Tesalonica 5:2; 2Pedro 3:10; Doktrina ug Mga Pakigsaad 45:19; 106:4). Ang pag-abot sa pamanhonon sa tungang gabii nagsugyot sa wala damhang oras sa pagbalik sa Manluluwas. Si Presidente Spencer W. Kimball (1895–1985) mipasabot:
Imahe
Portrait painting of President Spencer W. Kimball.
Ang danghag nga mga dalaga dili supak sa pagpalit og lana. Nahibalo sila nga kinahanglan silang dunay lana. Basta kay naglangay-langay lang sila, wala mahibalo kon kanus-a moabot ang pamanhonon. … Ang tungang gabii ulahi na kaayo alang niadtong maglangay-langay.
(Spencer W. Kimball, Faith Precedes the Miracle [1972], 256)
Unsa kaha kon moabot Siya ugma?
Si Presidente Dallin H. Oaks sa Unang Kapangulohan mitudlo sa mosunod:
Imahe
Official Portrait of President Dallin H. Oaks taken March 2018.
Kon kita nahibalo nga makigkita kita sa Ginoo ugma—pinaagi sa atong kamatayon nga wala sa oras o pinaagi sa Iyang kalit nga pag-abot—unsa may atong buhaton karon? Unsa nga mga pagkumpisal ang atong himoon? Unsa nga mga binuhatan ang atong undangon? Unsa nga mga problema ang atong husayon? Unsa nga pagpasaylo ang atong ihatag? Unsa nga mga pagpamatuod ang atong ipaambit?
Kon kita mobuhat niini nga mga butanga, nganong dili man karon? Nganong dili man mangita og kalinaw samtang maangkon pa ang kalinaw? Kon ang atong mga lampara sa pagpangandam hapit na mahurot, sugdan dayon nato ang pagtimbol niini.
(Dallin H. Oaks, “Pagpangandam alang sa Ikaduhang Pag-anhi,” Liahona, Mayo 2004, 9)
Nganong ang mga maalamon nga mga dalaga dili man andam nga mopakigbahin sa ilang lana?
Sa paghisgot bahin sa maalamon nga mga dalaga nga wala mopakigbahin sa ilang lana ngadto sa mga danghag nga mga dalaga, Si Presidente Spencer W. Kimball (1895–1985) mitudlo:
Imahe
Portrait painting of President Spencer W. Kimball.
Dili kini hinakog o kawalay pagbati. Ang matang sa lana nga gikinahanglan sa pagbanwag sa agianan ug paghayag sa kangitngit dili ikapaambit. Unsaon man pagpaambit sa usa ka tawo sa kamasulundon sa baroganan sa ikapulo … ? … Unsaon man pagpaambit sa usa ka tawo sa mga kinaiya o kaputli, o sa kasinatian sa misyon? Unsaon man sa pagpaambit sa usa ka tawo ang mga pribilehiyo sa templo? Ang kada usa kinahanglan gayod nga moangkon niana nga matang sa lana alang sa iyang kaugalingon mismo. …
Sa atong kinabuhi ang lana sa pagpangandam matigom pinaagi sa kada t[u]lo ngadto sa usa ka t[u]lo pinaagi sa matarong nga pagpakabuhi. … Ang matag buhat sa pagpahinungod ug pagsunod maoy usa ka t[u]lo nga gidugang sa atong pundohanan.
(Spencer W. Kimball, Faith Precedes the Miracle [1972], 255–56)
