Si Jose ug Maria mibiyahe ngadto sa Betlehem, diin si Jesus natawo. Usa ka anghel ang nagpahibalo sa pagkatawo sa Manluluwas ngadto sa mga magbalantay sa karnero duol sa Betlehem (tan-awa sa Lucas 2:9–12), “ug sa kalit mitungha … ang usa ka dakong panon sa mga anghel sa langit nga nag-awit ug mga pagdayeg sa Dios: Dalaygon ang Dios sa kahitas-an, ug sa yuta panagdait sa mga tawo nga iyang gikahimut-an” (Lucas 2:13–14). Tinguha niini nga leksiyon nga matabangan ka sa pagrebyo sa mga panghitabo sa pagkatawo sa Manluluwas ug ipaila nganha kanimo ang doktrina nga gitudlo sa tudling sa doktrinal nga kahanas sa Lucas 2:10–12. Tun-an nimo ang tahas ni Jesukristo isip imong Manluluwas ug magkat-on kon sa unsa ka Niya giluwas aron ikaw, sama sa mga anghel, mahimong maghimaya usab ug magdayeg sa Dios para sa gasa sa Iyang Anak.
Ang Pagkatawo ni Jesus
Unsa ang pipila sa imong paboritong mga detalye mahitungod sa Pagkatawo ni Jesus?
Nganong makahuloganon man kanimo kini nga mga detalye?
Basaha ang Lucas 2:1–14, nga mangita niadto nga mga detalye nga importante kanimo o bag-ong mga detalye nga lagmit wala nimo namatikdan kaniadto sa sugilanon sa Pagkatawo ni Jesus.
Unsa nga mga detalye sa sugilanon sa Pagkatawo ni Jesus ang imong namatikdan nga importante kanimo?
Natawo ang usa ka Manluluwas
Basaha ang Lucas 2:10–12 pag-usab, nga mangita kon giunsa pagpahibalo sa anghel ang pagkatawo ni Jesus.
Ang Lucas 2:10–12 usa ka tudling sa doktrinal nga kahanas. Ikonsiderar ang pagmarka sa mga tudling sa doktrinal nga kahanas sa lahi nga paagi aron mas dali ra nimo kining makit-an. Makakat-on ka og dugang pa mahitungod niini nga tudling sa doktrinal nga kahanas sa sunod nga leksiyon.
Unsa ang unang titulo nga gigamit sa anghel para kang Jesukristo sa dihang iyang gipahibalo ang pagkatawo ni Jesus ngadto sa mga magbalantay sa karnero?
Nganong importante man nga sa tanang titulo nga aduna si Jesukristo, kini ang gigamit sa anghel aron ipahibalo ang Iyang pagkatawo?
Tingali makatabang ang pagkahibalo nga sa orihinal nga Griyego nga paghubad sa Biblia, ang pulong nga gigamit para sa Manluluwas nagkahulogan usab og tigluwas o tigpreserba.
Ang usa sa mga kamatuoran nga gitudlo niini nga tudling mao nga si Jesukristo mao ang Manluluwas sa kalibotan.
Nanginahanglan kita og Manluluwas
Si Elder D. Todd Christofferson sa Korum sa Napulog Duha ka Apostoles mipakigbahin sa mosunod nga kasinatian:
Imahe
Elder D. Todd Christofferson
Dugay na, usa ka tawo kinsa nahimong miyembro sa Simbahan sulod sa daghang katuigan nangutana nako, “Nganong magkinahanglan man ko ni Jesukristo? Gituman nako ang mga kasugoan; usa ko ka maayong tawo. Nganong magkinahanglan ko og Manluluwas?” Moingon gyod ko nga kining kapakyas sa miyembro sa pagsabot niining labing sukaranang bahin sa atong doktrina, kining sukaranang elemento sa plano sa kaluwasan, nakapahingangha kanako.
(D. Todd Christofferson, “Nganong Nagkinahanglan Kita ni Jesukristo,” Liahona, Dis. 2020, 19–20)
Pagtagana og panahon aron ikonsiderar kon unsaon nimo pagtubag, base sa imong kaugalingong mga hunahuna ug mga pamati, kon anaa ka sa lugar ni Elder Christofferson.
Mahimo kitang makakat-on mahitungod sa atong panginahanglan alang sa usa ka Manluluwas pinaagi sa pagtuon sa mga kasulatan ug sa mga pulong sa mga propeta (tan-awa sa Jacob 7:11).
Ang kahanas sa pagtuon sa kasulatan nga makapalambo sa imong pagsabot sa doktrina ug mga baroganan mao ang paghimo og mga cross-reference sa imong mga kasulatan. Aron mag-cross reference, paghimo og link sa Gospel Library nga app o pagkonekta sa may kalabotan nga mga kasulatan pinaagi sa pagrekord og pakisayran sa kasulatan duol sa laing tudling sa kasulatan.
Tun-i ang tulo hangtod sa upat sa mosunod nga mga tudling sa kasulatan aron makatabang sa pagtubag sa mga pangutana nga “Nganong nanginahanglan ako og Manluluwas?”ug “Luwason Niya ako gikan sa unsa?” Ikonsiderar ang pag-cross reference niini nga mga tudling pinaagi sa pag-link niini sa Lucas 2:10–12 diha sa Gospel Library nga app o pinaagi sa pagrekord sa pakisayran nga Lucas 2:10–12 duol sa mga bersikulo nga imong gitun-an.
1. Tubaga ang mosunod nga mga pangutana diha sa imong journal sa pagtuon:
Unsa nga mga kasulatan ang imong gipili?
Sa unsang paagi nga nakatabang kanimo kini nga mga kasulatan sa pagtubag sa mga pangutana nga “Nganong nanginahanglan ako og Manluluwas?” ug “Luwason Niya ako gikan sa unsa?”
Unsa ang gitanyag kanimo sa Manluluwas
Tan-awa ang bidyo nga “Why We Need a Savior—A Christmas Message about Our Savior Jesus Christ [Nganong Nagkinahanglan Kita og usa ka Manluluwas—Usa ka Mensahe sa Pasko mahitungod sa Atong Manluluwas si Jesukristo]” (2:15), nga mangita kon nganong nanginahanglan kita og Manluluwas. Kini nga bidyo anaa sa ChurchofJesusChrist.org.
Gipamatud-an ni Elder Christofferson ang pipila sa mga panalangin nga madawat nato pinaagi kang Jesukristo:
Imahe
Elder D. Todd Christofferson
Tungod sa Pag-ula ni Jesukristo, kita maulian gikan sa dili maayong mga pagpili. Tungod sa Pag-ula ni Jesukristo, ang mga epekto ngari kanato sa sala ug kasaypanan sa uban, ug sa uban pang dili makiangayon, gitarong. Aron mamaayo, ug mahimong balaan, nagkinahanglan kita og Manluluwas.
(D. Todd Christofferson, “Nganong Nagkinahanglan Kita ni Jesukristo,” Liahona, Dis. 2020, 22)
Diha sa Lucas 2:10 gipahayag sa anghel nga, “Ania ako nagdalag maayong balita alang kaninyo nga makalipay kaayo.”
2. Tubaga ang bisan usa lamang sa mosunod nga mga pangutana diha sa imong journal sa pagtuon:
Giunsa nimo pagkakita og “dakong kalipay” diha sa imong Manluluwas, nga si Jesukristo?
Unsa ang atong mahimo aron madugangan ang atong kalipay diha sa Manluluwas?
Opsiyonal: Gustong Makakat-on pa og Dugang?
Nganong miadto man si Maria ug Jose sa Betlehem aron mobayad og buhis?
Si Caesar Augustus usa ka makamao ug madasigong tigmando sa Roma kansang paghari—gikan niadtong 31 B.C. hangtod sa A.D.14—nailhan sa kahapsay ug pagsunod sa balaod. Ang “pagpanglista [taxing]” nga nahisgotan sa Lucas 2:2 sa tinuod lang usa ka paglista [o census] sa mga tawo para sa umaabot nga mga katuyoan sa pagbuhis, usa ka paglista nga nagkinahanglan sa tigbayad og buhis nga personal nga mosumiter sa gikinahanglan nga impormasyon. Tungod kay si Jose ug Maria parehong mga kaliwat ni Hari David, gikinahanglan sila nga mobiyahe ngadto sa Betlehem, nga mao ang yutang natawhan ni Hari David. … Ang karaang mga propeta mipamatuod nga ang Mesiyas matawo sa Betlehem, sa dapit sa Jerusalem (tan-awa sa Miqueas 5:2; Alma 7:10). Ang Bethlehem anaa sa mga 85–90 ka milya (137–145 ka kilometro) habagatan sa Nazaret, malakaw sa labing ubos upat ngadto sa lima ka adlaw, tingali mas taas kon hunahunaon ang kahimtang ni Maria.
(Manwal sa Estudyante sa Bag-ong Tugon [2014], 143)