Ang Talagsaon nga Pagpataliwala nga Pag-ampo sa Manluluwas
Imahe
Jesukristo nag-ampo uban sa mga disipulo
Ang pagkaila sa Langitnong Amahan ug ni Jesukristo sa personal nga paagi
Paghunahuna og usa ka importante nga tawo sa kasaysayan sa imong nasod.
Unsa man ang pipila ka butang nga imong nailhan mahitungod niana nga tawo?
Unsaon nimo sa paghulagway sa mga kalainan tali sa imong kahibalo mahitungod sa tawo sa kasaysayan ug kon unsa kasuod ang imong pagkaila sa suod nga sakop sa pamilya?
Karon paggahin og panahon sa pagrekord sa imong journal sa pagtuon unsay imong gibati mahitugod sa imong nahibaloan sa Langitnong Amahan ug kang Jesukrsito. Gibase ba lamang kini sa mga kamatuoran nga inyong nahibaloan mahitungod Kanila, o kini nahimong mas personal pa kay sa niana? Sa unsang paagi kaha kini mopanalangin sa imong kinabuhi ang pagkaila Kanila diha sa mas personal nga lebel?
Jesus nag-ampo alang sa Iyang mga disipulo
Pagkagabii sa wala pa ang Iyang pag-antos sa Getsemani, pagbudhi, ug Paglansang sa Krus, ang Manluluwas naghalad og kusog nga sagrado nga pag-ampo nga nailhan isip ang talagsaon nga Pagpataliwala nga Pag-ampo. Siya nag-ampo sa Langitnong Amahan aron mohangyo alang sa Iyang mga disipulo, lakip ang Iyang mga sumusunod nga nagpuyo sa atong panahon (tan-awa sa Juan 17:20). Sulayi sa paghanduraw kon unsa kaha ang gibati sa Apostoles nga makadungog kang Jesus nga nag-ampo alang kanila nianang sagrado nga kagabhion.
Unsa man ang atong makat-onan mahitungod sa ehemplo sa Manluluwas nga nag-ampo alang sa Iyang mga disipulo ug sa tanan nga mosunod Kaniya sa wala pa ang Iyang pag-antos didto sa Getsemani ug pagdakop?
Ang Juan 17:3 usa ka tudling sa doktrinal nga kahanas. Ikonsiderar ang pagmarka sa mga tudling sa doktrinal nga kahanas sa lahi nga paagi aron mas sayon ra nimo kining makit-an. Makakat-on ka og dugang pa mahitungod niini nga tudling sa doktrinal nga kahanas sa sunod nga leksiyon.
Basaha ang Juan 17:1–3, nga mangita sa mga panalangin nga giampo ni Jesukristo nga madawat sa Iyang mga disipulo.
Unsa ang gitinguha ni Jesukristo alang sa Iyang mga disipulo?
Ang mga hugpong sa pulong nga “kinabuhing dayon” ug “mahangturong kinabuhi” (mga bersikulo 2–3) kanunay nga masaypan sa pagsabot isip yanong pagpakabuhi hangtod sa kahangtoran. Ang Manluluwas nag-ampo nga kita makadawat og mas labaw pa niana. Ang “kinabuhing dayon” mao “ang kalidad sa kinabuhi nga gipuy-an sa atong Mahangturon nga Amahan. … Ang kinabuhing dayon, o kahimayaan, mao ang pagpuyo sa presensya sa Dios ug magpadayon isip mga pamilya (tan-awa sa Doktrina ug mga Pakigsaad 131:1–4)” (Gospel Topics, “Eternal Life,” topics.ChurchofJesusChrist.org). Ikonsiderar ang pagrekord niini nga kahulogan diha sa imong mga kasulatan duol sa bersikulo 3.
Sumala sa bersikulo 3, unsay usa ka butang nga gikinahanglan kanato aron makadawat sa kinabuhing dayon?
Usa ka kamatuoran nga atong makat-onan gikan sa pag-ampo sa Manluluwas mao nga aron makadawat og kinabuhing dayon, kinahanglan kitang makaila sa Langitnong Amahan ug ni Jesukristo.
Ngano kaha nga kita kinahanglan man nga makaila gayod sa Langitnong Amahan ug ni Jesukristo aron makadawat sa kinabuhing dayon?
Si Elder Michael John U. Teh sa Seventy mipasabot sa importansya sa pagkaila sa Manluluwas:
Imahe
Elder Michael John U. Teh
Kinahanglan natong ilhon nga ang pagkaila sa Manluluwas mao ang labing importante nga tinguhaon sa atong kinabuhi. Kini kinahanglan nga maoy mag-una labaw pa sa bisan unsa pa nga mga butang.
Ngano kaha nga ang pag-ila sa Manluluwas mao ang labing importanteng tinguhaon sa atong kinabuhi?
Unsa man ang makapalisod sa paghimong prayoridad sa pag-ila sa Manluluwas labaw sa ubang mga tinguha sa imong kinabuhi?
Pamalandongi sa makadiyot kon unsa kasuod ang imong relasyon sa usa ka miyembro sa pamilya o higala nga napalambo. Unsay imong gihimo aron mas makaila kanila? Aduna bay mahinungdanong mga kasinatian nga nakatabang nimo aron mailhan sila pag-ayo? Unsa kadugayon nga kining relasyon milambo?
1. Tubaga ang bisan usa lang sa mosunod nga mga pangutana diha sa imong journal sa pagtuon:
Unsaon nimo sa paggamit kini nga mga buhat nga nakatabang nimo sa pagpalambo og suod nga relasyon sa usa ka sakop sa pamilya o higala ngadto sa pag-ila sa Langitnong Amahan ug kang Jesukristo?
Unsa nga mga kasinatian ang imong nasinati nga nakatabang nimo sa pag-ila sa Langitnong Amahan ug kang Jesukristo? Unsa ang imong nakat-onan pinaagi niini nga mga kasinatian?
Pagkaila sa Manluluwas pinaagi sa Iyang pag-ampo
Usa ka paagi aron makaila sa Manluluwas mao ang Iyang mga pag-ampo. Paggahin og pipila ka minuto aron mas makat-on kon kinsa ang Manluluwas pinaagi sa pagtuon kon unsa ang Iyang giampo diha sa Juan 17. Ang pipila sa mga bersikulo lagmit nimong pilion nga tutokan mao ang Juan 17:4–11, 20–26.
2. Tubaga ang bisan tulo lang sa mosunod nga mga pangutana diha sa imong journal sa pagtuon:
Unsa ang inyong nakat-onan mahitungod sa relasyon ni Jesukristo sa Iyang Amahan gikan niini nga pag-ampo?
Unsa nga mga panalangin ang gitinguha ni Jesukristo alang kanato?
Ngano man kaha nga Siya mag-ampo alang kanimo aron makadawat niining piho nga mga panalangin?
Unsa ang imong nakat-onan mahitungod kang Jesukristo ug sa Langitnong Amahan nga nakatabang nimo nga gustong mas makaila pa Kanila?
Hunahunaa kon unsa kaha ang bation nga masuod kaayo sa Langitnong Amahan ug sa Manluluwas nga ang imong relasyon mahulagway isip usa nga kauban Nila. Unsa kaha ang imong pamation niana? Sa unsa nga paagi nga ang imong kinabuhi mahimong mas maayo? Ang Langitnong Amahan ug si Jesukristo nahigugma kaayo kanimo ug nagtinguha nga mausa uban nimo. Si Jesukristo nag-ampo sa Langitnong Amahan aron matabangan ka nga makabaton og suod nga relasyon ngadto Kanila. Timan-i nga ang ingon niana nga relasyon mogahin og panahon ug paningkamot aron molambo, sa tibuok niini nga kinabuhi ug ngadto sa sunod.
Irekord diha sa imong journal sa pagtuon kon unsa ang andam nimong buhaton aron mas makaila sa Langitnong Amahan ug ni Jesukristo. Ilakip kon sa unsang paagi nga ikaw makahibalo nga ang imong relasyon uban Kanila nagkalig-on ug giunsa nimo sa pagtuo nga ang maong relasyon mopanalangin sa imong kinabuhi.
Opsiyonal: Gustong Makakat-on pa og Dugang?
Unsay atong mabuhat aron mas makaila sa Langitnong Amahan ug ni Jesukristo?
Si Presidente Henry B. Eyring sa Unang Kapangulohan nagtudlo:
Imahe
Presidente Henry B. Eyring
Kon gusto nimo nga magpabiling suod ngadto sa usa ka tawo kinsa imong gimahal, apan kinsa ikaw nahibulag, ikaw nasayod kon usaon sa pagbuhat niini. Makakaplag ka og usa ka paagi nga sa pagpakigsulti ngadto kanila, ikaw maminaw kanila, ug ikaw makadiskobre og mga paagi sa pagbuhat sa mga butang alang sa usag usa. Kon mas kanunay kana nga mahitabo, mas magpadayon kini og dugay, mahimong mas lawom ang kalig-on sa pagbati. Kon dako ang panahon nga molabay nga walay panag-istorya, pagpaminaw, ug pagbuhat, ang bugkos magkahuyang.
Ang Dios hingpit ug makagagahom sa tanan, ug kamo ug ako mga mortal. Apan siya ang atong Amahan, siya nahigugma kanato, ug siya nagtanyag og samang oportunidad sa pagpaduol ngadto kaniya sama sa usa ka mahigugmaon nga higala. Ug inyo kining buhaton sa susamang paagi: pagsulti, pagpaminaw, ug pagbuhat.
(Henry B. Eyring, “To Draw Closer to God,” Ensign, Mayo 1991, 66)
Elder C. Scott Grow sa Seventy mipasabot:
Imahe
Elder C. Scott Grow
Akong batan-ong mga higala, makasugod kita sa pag-ila sa Dios pinaagi sa pag-ampo. …
Samtang magtuon kamo sa kasulatan matag adlaw, mag-inusara man, ug uban sa imong pamilya, ikaw makakat-on sa pag-ila sa tingog sa Espiritu ug makaila sa Dios. …
Samtang magtinguha kita sa pagbuhat sa kabubut-on sa Dios pinaagi sa matinud-anong pagserbisyo Kaniya ug sa atong isigkatawo, atong mabati ang Iyang pag-aprubar ug makaila gayod Kaniya.
Ang Manluluwas misulti kanato nga ang labing maayong paagi sa pag-ila sa Dios mao ang pagkahimong sama Kaniya. Siya nagtudlo: “Busa, unsa nga matang sa mga tawo kamo mahisama? Sa pagkatinuod Ako moingon nganha kaninyo, gani sama nga Ako mao” [3 Nephi 27:27].
Ang katakos mahinungdanon aron mahimong sama Kaniya. …
Ang Dios nakaila kanimo ug nagdapit kanimo nga makaila Kaniya. Pag-ampo ngadto sa Amahan, pagtuon sa mga kasulatan, paningkamot sa pagbuhat sa kabubut-on sa Dios, paningkamot nga mahisama sa Manluluwas, ug pagsunod sa matarong nga mga tigtudlo. Samtang inyong buhaton, kamomakaila sa Dios ug ni Jesukristo, ug kamo makapanunod sa kinabuhing dayon.
(C. Scott Grow, “Ug Ang Kinabuhing Dayon Mao Kini,” Liahona, Mayo 2017, 121–24)