Pagrebyo sa Doktrinal nga Kahanas 23

Sabta ug Ipasabot

A young woman studying the scriptures.

Ang usa sa mga katuyoan sa doktrinal nga kahanas mao ang pagtabang kanimo nga masabtan ang doktrina nga anaa sa mga tudling sa doktrinal nga kahanas ug mapasabot kini nga doktrina sa imong kaugalingong mga pulong. Kini nga leksiyon maghatag kanimo og kahigayonan sa pagpalawom sa imong pagsabot ug mapasabot ang mga kamatuoran nga anaa makita sa 13 ka mga tudling sa doktrinal nga kahanas gikan sa ikaduhang bahin sa Bag-ong Tugon.

Pagpangutana

• Kanus-a ka mibati og pagkamapasalamaton nga nakapangutana ka sa usa ka tawo? (Pananglitan, lagmit nakat-on ka og usa ka butang gumikan sa pagpangutana, o lagmit nakadawat ka og bililhon nga tambag human magtinguha og tambag gikan sa usa ka higala o ginikanan.)

• Unsa ang pipila sa mga rason nganong importante man kini nga mangutana kon nagkat-on sa ebanghelyo ni Jesukristo?

Si Presidente Henry B. Eyring sa Unang Kapangulohan miingon: “Ang pagpangutana ug ang pagtubag anaa sa kinauyokan sa tanang pagkat-on ug sa tanang pagtudlo” (“The Lord Will Multiply the Harvest” [kagabhion kauban ang Kinatibuk-ang Awtoridad, Feb. 6, 1998], 5–6, diha sa Teaching Seminary: Preservice Readings [2004], 98).

Ang pagpangutana mahitungod sa mga tudling sa doktrinal nga kahanas mahimong makatabang kanato nga mas makasabot niini ug mas hingpit nga modapit sa panabang sa Manluluwas nganhi sa atong mga kinabuhi.

Doktrinal nga Kahanas sa Bag-ong Tugon: 1 Mga Taga-Corinto–Gipadayag

1 Mga Taga-Corinto 6:19–20	“Ang inyong lawas templo sa Espiritu Santo.”
1 Mga Taga-Corinto 11:11	“Diha sa Ginoo ang babaye dili gawas sa lalaki ni ang lalaki gawas sa babaye”
1 Mga Taga-Corinto 15:20–22	“Kay ingon nga nangamatay ang tanang mga tawo tungod sa ilang pagkahiusa kang Adan, banhawon usab ang tanan tungod sa ilang pagkahiusa kang Kristo.”
1 Mga Taga-Corinto 15:40–42	Diha sa Pagkabanhaw, adunay tulo ka ang-ang sa himaya.
Mga Taga-Efeso 1:10	“Usa ka laraw nga pagatumanon inig-abot sa tukma nga panahon, laraw sa paghiusa diha kang Kristo sa tanang mga butang.”
Mga Taga-Efeso 2:19–20	Ang Simbahan “tinukod ibabaw sa patukoranan nga mao ang mga apostoles ug mga propeta, nga niini si Jesukristo mao ang ulohang bato sa pamag-ang.”
2 Mga Taga-Tesalonica 2:1–3	“Ang adlaw ni Kristo … dili pa moabot, hangtod nga mahitabo una ang pagsupil.”
2 Timoteo 3:15–17	“Ang balaan nga kasulatan … makagagahom sa pagtudlo kanimo ngadto sa kaluwasan.”
Mga Hebreohanon 12:9	Ang Langitnong Amahan mao “ang Amahan sa mga espiritu.”
Santiago 1:5–6	“Kon aduna man kaninyoy nakulangan og kaalam, papangayoa siya sa Dios.”
Santiago 2:17–18	“Ang [hugot nga pagtuo] patay kon kini walay binuhatan.”
1 Pedro 4:6	“Ang maayong balita [gi]wali hangtod ngadto sa mga patay.”
Pinadayag 20:12	“Ug ang mga patay gipanaghukman … pinasikad sa ilang mga binuhatan.”

Pagpili og usa sa 13 ka mga tudling sa doktrinal nga kahanas nga gusto nimong mas masabtan. Basaha kini og maayo. Tuki-a ang mga pulong ug mga hugpong sa mga pulong sa maong tudling sa doktrinal nga kahanas, nga magtimaan unsa ang imong nasabtan mahitungod sa tudling ug unsang mga pangutana ang lagmit ipangutana nimo o sa imong kaila mahitungod sa tudling. Pananglitan, usaka lagmit nimong ipangutana mahitungod sa Mga Taga-Efeso 2:19–20 mao ang “Unsa ang usa ka bato sa pamag-ang ug ngano nga si Jesukristo gitandi man niini?” O lagmit natingala ka unsa ang buot ipasabot sa hugpong sa pulong nga “pagsupil” diha sa 2 Mga Taga-Tesalonica 2:1–3 .

Pagsulat og daghang pangutana kutob sa makaya.

Sa higayon nga imo nang nasulat ang daghang mga pangutana kutob sa imong mahimo, pagpili og pipila ka mga pangutana nga sa imong hunahuna labing importante nga masabtan, ug tubaga kini gamit ang anaa nga mga himan sa pagtuon sa kasulatan. Kini nga mga himan naglakip sa Giya ngadto sa mga Kasulatan, mga footnote sa kasulatan, ang Gospel Library nga app, o mga pakigpulong sa kinatibuk-ang komperensiya. Mahimo usab ka nga mopili sa paggamit og pipila ka mga pamaagi sa pagtuon sa kasulatan nga imong nakat-onan karong tuiga, sama sa pagbasa sa nagpalibot nga mga bersikulo o pagsulay sa pagsabot sa konteksto sa kasulatan. Irekord ang imong mga tubag diha sa imong journal sa pagtuon.

Hinumdomi nga dili tanang mga pangutana sayon tubagon ug nga ang uban nagkinahanglan og dugang nga panahon ug maampoong pagtuon ug pagpamalandong.

Mahimong dapiton ang usa ka higala o miyembro sa pamilya sa pagtabang og tubag sa imong mga pangutana. Mahimo usab nimong balikon kini nga kalihokan gamit ang laing mga tudling sa doktrinal nga kahanas nga gusto nimong mas masabtan pag-ayo.

1. Tubaga ang mosunod nga mga pangutana diha sa imong journal sa pagtuon:

• Unsa nga tudling sa kasulatan ang imong gipili?

• Unsaon nimo sa pagpasabot niini nga tudling gamit ang imong kaugalingong mga pulong?

• Unsa ang imong nakat-onan mahitungod niining tudling sa kasulatan gikan niini nga kalihokan?

• Unsa ang natabang niini nga tudling sa kasulatan sa imong pagsabot mahitungod sa Manluluwas ug sa Iyang ebanghelyo?