Doktrinal nga Kahanas: Lucas 22:19–20
“Buhata Ninyo Kini aron Paghandom Kanako”
Sa inyong pagtuon sa Mateo 26:26–30, inyong nakat-onan ang mahitungod sa pagpaila sa Manluluwas sa ordinansa sa sakramento ngadto sa Iyang mga disipulo diha sa Kataposang Panihapon. Kini nga leksiyon makahatag kaninyo og kahigayonan sa pagdugang sa inyong kahanas sa doktrina bahin sa sakramento. Mahimo ninyo kini pinaagi sa pagsag-ulo sa pakisayran ug mahinungdanon nga hugpong sa kasulatan alang sa tudling sa doktrinal nga kahanas sa Lucas 22:19–20, pinaagi sa pagpasabot sa doktrina, ug pinaagi sa paggamit sa mga baroganan sa pag-angkon og espirituhanong kahibalo.
Imemorya ug ipasabot
Handurawa ang pagdala og higala ngadto sa simbahan kinsa walay kabangkaagan mahitungod sa naorganisar nga relihiyon o kang Jesukristo. Human sa miting sa sakramento, siya nangutana, “Unsa man ang katuyoan sa pagpasa sa pan ug tubig ngadto sa tanan?”
1. Tubaga ang mosunod nga pangutana diha sa inyong journal sa pagtuon:
-
Unsaon ninyo pagpasabot ang ordinansa sa sakramento ngadto sa usa ka higala?
Hinumdomi nga panahon sa Kataposang Panihapon kauban sa Iyang mga disipulo, ang Manluluwas mipasiugda sa ordinansa sa sakramento (tan-awa sa Mateo 26:26–30; Marcos 14:22–25; Lucas 22:17–20). Basaha ang tudling sa kasulatan sa doktrinal nga kahanas sa Lucas 22:19–20.
Diha sa inyong journal sa pagtuon, gamita ang lapis aron pagsulat sa mosunod nga pakisayran sa kasulatan ug sa mahinungdanon nga hugpong sa kasulatan: “Lucas 22:19–20: Si Jesukristo nagsugo, ambit kamo sa sakramento ‘alang sa paghinumdom kanako.’”
Sublia sa kusog nga tingog kini nga pakisayran sa kasulatan ug ang mahinungdanon nga hugpong sa kasulatan. Dayon papasa ang duha ka pulong o mga numero, ug bansaya ang pagsulti og balik sa pakisayran sa kasulatan ug hugpong sa pulong. Sublia kini nga paagi, nga mopapas sa mga pulong o mga numero ug pag-recite sa pakisayran sa kasulatan ug sa mahinungdanon nga hugpong sa pulong, hangtod ang tanang mga pulong ug mga numero napapas na. Dayon pagsulat og daghan kutob sa mahimo niini nga pakisayran sa kasulatan ug sa mahinungdanong mga pulong kutob sa inyong mahinumdoman.
Ipraktis ang paggamit
Irebyo sa daklit ang mga baroganan sa pag-angkon og espirituhanong kahibalo (tan-awa sa Mahinungdanon nga Dokumento sa Doktrinal nga Kahanas [2022], “Pag-angkon og Espirituhanong Kahibalo”). Pagpili og usa sa tulo ka baroganan sa pag-angkon og espirituhanong kahibalo ug pagdrowing og yanong simbolo o hulagway nga gibati ninyong makarepresentar niini.
Karon ipraktis ang paggamit sa mga baroganan sa pag-angkon og espirituhanong kahibalo ug ang doktrina nga gitudlo sa Lucas 22:19–20 pinaagi sa pagbasa sa mosunod nga senaryo ug pagtubag sa mga pangutana nga nagsunod.
Si Judy nga 15 anyos, namiyembro sa Simbahan sa tibuok niyang kinabuhi, ug kanunayng mitambong sa iyang mga miting sa simbahan. Nagpuyo siya kauban sa iyang inahan ug apohan nga babaye, kinsa mga maayo kaayong mga ehemplo kaniya. Niadtong milabay nga Dominggo, si Judy nainteresado sa mga hilisgotan sa mga mamumulong [speakers] sa miting sa sakramento. Ang matag mamumulong mipaambit og impluwensiyal ug sinserong personal nga mga kasinatian mahitungod sa pag-ambit sa sakramento ug giunsa niini pagtabang nga madugangan ang impluwensiya sa Manluluwas diha sa ilang kinabuhi. Kini nakapahunahuna niya mahitungod niya nga walay daghang susama nga mga kasinatian nga iyang kaugalingon. Iyang naamgohan nga panahon sa sakramento siya kanunay nga malinga sa iyang selfon o sa unsay ginabuhat sa uban, o naghunahuna siya mahitungod kon unsaon niya nga makauli dayon aron makatagpilaw.
-
Mibati ba kamo og sama niini sukad?
-
Ngano kaha nga ingon man niini ang bation sa mga tawo usahay?
Diha sa inyong journal sa pagtuon, paghimo og usa ka ulohan alang sa matag tulo ka baroganan sa pag-angkon og espirituhanong kahibalo: (1) lihokon inubanan sa hugot nga pagtuo, (2) susihon ang mga konsepto ug mga pangutana inubanan sa mahangtorong panglantaw, ug (3) tinguhaon ang dugang panabot pinaagi sa balaanong gitudlo nga mga tinubdan.
Ubos sa matag ulohan, isulat ang pihong mga paagi diin ang baroganan sa pag-angkon og espirituhanong kahibalo makatabang ni Judy sa iyang sitwasyon. Pananglitan, mahimo kang mosugyot og pihong mga paagi nga siya makalihok inubanan sa hugot nga pagtuo, mopaambit sa unsang paagi nga ang pagbaton og mahangtoron nga panglantaw makatabang sa iyang sitwasyon, ug pagsugyot og pipila ka balaanong gitudlo nga mga tinubdan nga tingali iyang magamit isip giya ug direksiyon.
2. Tubaga ang mosunod nga mga pangutana diha sa inyong journal sa pagtuon:
-
Unsa ang inyong itambag ni Judy aron masugdan ang pagsulbad sa iyang mga kabalaka?
-
Unsaon ninyo sa paggamit ang matag usa sa tulo ka baroganan sa pag-angkon og espirituhanong kahibalo aron matabangan si Judy?
Kon nagkinahanglan kamo og tabang sa paggamit niining mga baroganan sa pag-angkon og espirituhanong kahibalo, ikonsiderar ang mosunod nga mga pangutana.
Molihok inubanan sa hugot nga pagtuo
-
Unsa nga tambag ang inyong ihatag kang Judy nga makatabang niya aron makaangkon og mas maayong kasinatian sa pag-ambit sa sakramento?
-
Unsa kaha ang makababag sa iyang pagbuhat niining mga kausaban? Unsaon kaha niya pagbuntog kini nga mga babag?
Susiha ang mga konsepto ug mga pangutana inubanan sa mahangtorong panglantaw
-
Unsa nga mga pangutana ang inyong ikapangutana ni Judy aron matabangan siya nga makita ang iyang sitwasyon uban sa mahangtorong panglantaw? Nganong gipili ninyo kana nga mga pangutana?