Doktrinal nga Kahanas: Mga Hebreohanon 12:9

Ang Langitnong Amahan Mao “ang Amahan sa mga Espiritu.”

Usa ka batan-ong lalaki nga nagbasa sa mga kasulatan.

Sa imong pagtuon sa Mga Hebreohanon 12:9, imong nakat-onan ang mahitungod sa imong relasyon ngadto sa Dios, kinsa mao “ang Amahan sa mga espiritu,” ug sa unsang paagi kini nakaapekto sa imong kinabuhi. Kini nga leksiyon makatabang nimo sa pagmemorya sa pakisayran sa doktrinal nga kahanas ug sa mahinungdanon nga hugpong sa pulong sa kasulatan alang sa Mga Hebreohanon 12:9, pagpasabot sa doktrina, ug paggamit sa mga baroganan sa pag-angkon og espirituhanong kahibalo sa tinuod nga mga sitwasyon sa kinabuhi.

Ipasabot ug isag-ulo

Sa miaging leksiyon imong nakat-onan nga ang Dios mao ang Amahan sa atong espiritu. Handurawa nga ikaw nakig-istorya sa usa ka higala kinsa nagpangutana kon kinsa sila. Gamita ang Mga Hebreohanon 12:9 aron matabangan sila. Diha sa imong pagtubag sa iyang mga pangutana o pagtubag sa iyang mga kabalaka, mahimong ilakip ang mosunod:

• Unsa ang ipasabot niini nga kita mga anak sa Dios ug nganong importante nga mahibaloan kini

• Sa unsang paagi nga ang pagsabot o wala pagsabot niini nga kamatuoran mahimong makaapekto sa atong pagkatawo ug bili sa kaugalingon

• Mga paagi nga ang kalibotan misulay pag-impluwensiya sa atong kahibalo mahitungod kon kinsa kita ug sa atong relasyon ngadto sa Dios, ug nganong gusto man natong suklan kini nga mga impluwensiya

Sa imong journal sa pagtuon, isulat ang unang letra sa matag pulong sa tudling sa kasulatan sa Mga Hebreohanon 12:9 ug ang iyang mahinungdanong hugpong sa pulong sa kasalutan nga, “ang Langitnong Amahan mao ‘ang Amahan sa mga espiritu.’” Balika og sulti ang tudling ug ang hugpong sa pulong, gamit lamang ang unang mga letra sa matag pulong isip mga tima-ilhan. Ihapa kon kapila ka kadaghan nagbalik-balik una nimo gibati nga imo na kining nasag-ulo.

Bansaya ang paggamit

Aron matabangan ka sa pagrebyo sa tulo ka mga baroganan sa pag-angkon og espirituhanong kahibalo, mahimong ikonsiderar ang mosunod nga mahinungdanong mga pulong:

• Hugot nga pagtuo

• Panglantaw

• Mga Tinubdan

1. Kompletoha ang mosunod diha sa imong journal sa pagtuon:

Tubaga ang mosunod nga mga pangutana. Kon gikinahanglan, mahimo kang mudangop sa mga parapo 5–12 diha sa “Pag-angkon og Espirituhanong Kahibalo nga seksiyon sa Mahinungdanon nga Dokumento sa Doktrinal nga Kahanas (2022).

• Sa unsang paagi nga ang matag usa niining mga pulong adunay kalabotan sa tulo ka mga baroganan sa pag-angkon ug espirituhanong kahibalo?

• Nganong importante man nga masabtan ug magamit kini nga mga baroganan?

2. Pagmugna og usa ka senaryo aron sa pagbansay sa paggamit sa mga baroganan sa pag-angkon og espirituhanong kahibalo pinaagi sa pagkompleto sa mosunod nga pangaghat diha sa imong journal sa pagtuon.

Si (Ngalan) usa ka batan-on kinsa (sitwasyon o panagbangi). Kini nakahimo niya nga mobati nga . Kalabot sa iyang relasyon ngadto sa Dios, siya naghunahuna nga .

Pananglitan, usa ka nakompletong senaryo lagmit mahimong ingon niini:

Si Leslie usa ka batan-on kinsa milabaw sa daghang extracurricular nga mga kalihokan ug usa ka lider taliwala sa iyang mga kauban. Kini nakahimo niya nga mobati nga malipayon. Kalabot sa iyang relasyon ngadto sa Dios, siya naghunahuna nga ang iyang kinabuhi maayo na kaayo og dagan nga wala na gayod niya nakita ang panginahanglan sa dakong pagtutok ngadto Kaniya.

3. Gamit ang senaryo nga imong gimugna, tubaga diha sa imong journal sa pagtuon ang labing menos sa usa ka pangutana gikan sa matag usa sa mosunod nga mga bahin.

Susiha ang mga konsepto ug mga pangutana inubanan sa mahangtorong panglantaw

• Unsa sa imong hunahuna ang pagtan-aw sa Langitnong Amahan niining tawhana? Nganong importante man alang niining tawhana ang pagkahibalo sa unsang paagi siya nakita sa Langitnong Amahan?

• Sa unsang paagi nga ang mas maayo nga pagsabot sa ilang balaang pagkatawo isip usa ka anak sa Dios makaapekto sa tawo niini nga sitwasyon?

Tinguhaa ang dugang nga panabot pinaagi sa balaanong gitudlo nga mga tinubdan

• Unsa ang imong nakat-onan gikan sa imong pagtuon sa Mga Hebreohanon 12:9 nga makatabang niini nga sitwasyon?

• Unsa pay laing mga tinubdan ang mahimong tun-an sa tawo diha sa imong senaryo nga siya ra, aron makakaplag og dugang nga mga panabot?

Lihok diha sa hugot nga pagtuo

• Unsa nga kasinatian, personal man o lahi, ang moabot sa imong hunahuna kung ikaw maghunahuna sa paglihok diha sa hugot nga pagtuo? Unsaon nimo paggamit niini aron matabangan ang tawo sa imong senaryo?

• Unsa nga mga sugyot ang lagmit nimong mahatag sa tawo sa imong senaryo aron matabangan siya sa paglihok diha sa hugot nga pagtuo?