Seminary
Doktrinal nga Kahanas: 1 Mga Taga-Corinto 6:19–20

Doktrinal nga Kahanas: 1 Mga Taga-Corinto 6:19–20

“Ang Inyong Lawas Mao ang Templo sa Espiritu Santo”

Imahe
Duha ka batan-on nga naglakaw latas sa usa ka taytayan. Tinglarag kini. Ang batang mga lalaki ingon og nag-istoryahanay. Ang taytayan nag-umbaw sa usa ka lanaw. Didto sa layo makita nimo ang mga luna ug ekipo sa playground.

Sa imong pagtuon sa 1 Mga Taga-Corinto 6, imong nakat-onan ang mahitungod sa sumbanan sa Ginoo sa sekswal nga kaputli ug ang importansiya sa imong pisikal nga lawas. Kini nga leksiyon makatabang kanimo nga madugangan ang imong kahanas niini nga mga pagtulon-an pinaagi sa paghatag kanimo og kahigayonan sa pagsag-ulo sa pakisayran ug sa mahinungdanong hugpong sa mga pulong sa kasulatan alang sa 1 Mga Taga-Corinto 6:19–20, sa pagpasabot sa doktrina, ug sa paggamit sa mga baroganan sa pag-angkon og espirituhanon nga kahibalo ngadto sa usa ka tinuod nga sitwasyon sa kinabuhi.

Ipasabot ug Isag-ulo

Handurawa nga anaa sa usa ka klase o korum nga panaghisgot sa dihang ang usa ka mas batang klasmeyt nangutana sa magtutudlo, “Unsa man gayod na ang balaod sa kaputli?” Ang magtutudlo mihangyo sa ubang mga estudyante, apil nimo, nga motubag.

Gamit ang mga kamatuoran nga gitudlo sa tudling sa doktrinal nga kahanas sa 1 Mga Taga-Corinto 6:19–20, pagplano unsa ang mahimo nimong ipakigbahin sa imong mga klasmeyt aron matabangan sila nga makasabot sa sumbanan sa Ginoo sa sekswal nga kaputli, o kaputli, ug nganong importante kini.

1. Tubaga ang mosunod nga pangutana diha sa imong journal sa pagtuon:

  • Gamit ang mga pagtulon-an nga narekord diha sa 1 Mga Taga-Corinto 6:19–20, unsaon kaha nimo pagpasabot ngadto sa usa ka tawo kon unsa ang balaod sa Ginoo sa kaputli ug nganong importante kini?

Aron matabangan ka sa pagsag-ulo sa pakisayran alang sa tudling sa doktrinal nga kahanas sa 1 Mga Taga-Corinto 6:19–20 ug sa mahinungdanong hugpong sa mga pulong niini sa kasulatan nga “Ang imong lawas mao ang templo sa Espiritu Santo,” ikonsiderar ang paghimo og hulagway, meme, o i-collage ang mga litrato aron pagrepresentar niini nga tudling ug sa doktrina nga gitudlo. Ang biswal nga imong gihimo gikinahanglang halandomon apan gikinahanglan usab nga matinahoron ug nagtahod sa kasulatan ug sa doktrina nga gitudlo niini. Mahimo nimo gamiton ang hulagway nga imong gidrowing sa usa ka tawo nga nagtindog tapad sa templo sa kalihokan diha sa leksiyon sa 1 Mga Taga-Corinto 6. Seguroha nga isulat ang pakisayran nga 1 Mga Taga-Corinto 6:19–20 ug ang mahinungdanong hugpong sa pulong sa kasulatan diha duol sa imong hulagway.

Samtang nagtan-aw sa biswal nga pagrepresentar nga imong gihimo o gipili, litoka ang pakisayran sa tudling sa kasulatan ug mahinungdanong hugpong sa mga pulong sa kasulatan diha sa imong hunahuna hangtod imong mabati nga imo na kining namemorya.

Pagbansay sa paggamit

Diha sa imong journal sa pagtuon, mubo nga irekord kon unsa ang imong nahibaloan ug nahinumdoman mahitungod sa mga baroganan sa pag-angkon og espirituhanong kahibalo nga dili motan-aw sa lain pang mga tinubdan. Kon ikaw nahuman na, tan-awa ang Mahinungdanon nga Dokumento sa Doktrinal nga Kahanas (2023) aron masusi ang imong kahibalo ug magdugang og bisan unsang importante nga impormasyon nga lagmit imong nalimtan.

Pamalandongi ang mosunod nga sitwasyon. Dayon tubaga ang mga pangutana nga mosunod gamit ang mga baroganan sa pag-angkon og espirituhanong kahibalo ug ang doktrina nga gitudlo sa 1 Mga Taga-Corinto 6:19–20 nga ang atong mga lawas mao ang mga templo sa Dios diin ang Espiritu makapuyo. Isip alternatibo, mahimo usab ka nga magmugna og usa ka lahi nga senaryo nga mas mahinungdanon kanimo o sa kabatan-onan sa imong dapit.

Usa ka tinedyer ang nagdako nga nasayod sa mga sumbanan sa Ginoo sa pagkaputli apan, human maanaa sa taudtaod nga seryosong pagpakigrelasyon, mibati og usa ka tinguha sa pagpahayag sa iyang [lalaki] mga pagbati pinaagi sa pag-apil sa usa ka sekswal nga relasyon sa iyang hinigugma nga babaye [girlfriend]. Siya adunay mga miyembro sa pamilya ug mga higala kinsa adunay sekswal nga mga relasyon sa wala pa ang kaminyoon, ug daw malipayon silang tanan.

Susiha ang mga konsepto ug mga pangutana inubanan sa mahangtorong panglantaw

Si Elder David A. Bednar sa Korum sa Napulog Duha ka Apostoles mihatag og gibug-aton nga “ang mahangtorong importansiya sa kaputli masabtan lang sa lapad nga konteksto sa plano sa Langitnong Amahan sa kalipay para sa Iyang mga anak” (“Kita Nagtuo sa Pagkaputli,” Liahona, Mayo 2013, 41).

  • Unsa ang pihong mga aspeto sa plano sa kaluwasan sa Langitnong Amahan ang gusto nimo nga masabtan ug mapamalandongan sa tawo niini nga sitwasyon?

  • Sa unsang paagi nga ang mga kamatuoran sa 1 Mga Taga-Corinto 6:19–20 nakaapekto sa paagi sa imong panglantaw sa balaod sa kaputli ug sa imong relasyon sa Dios nga Kapangulohan?

Pagtinguha pa og dugang nga panabot pinaagi sa balaang gitudlo nga mga tinubdan

Ikonsidera ang pagpili og usa o daghan sa mosunod nga balaanong gitudlo nga mga tinubdan alang sa pagpangita og mga kamatuoran nga mahimong magamit ug makatabang sa senaryo nga imong gipili.

Tubaga ang mosunod nga pangutana:

  • Unsa ang imong nakaplagan nga lagmit makatabang niini nga senaryo?

Molihok inubanan sa hugot nga pagtuo

  • Unsa ang pipila sa lainlaing mga paagi nga ang usa ka indibidwal lagmit mopili sa paglihok inubanan sa hugot nga pagtuo niini nga sitwasyon?

  • Unsa nga mga kasinatian nga aduna ka bahin sa Langitnong Amahan ug ni Jesukristo nga makatabang kanimo sa pagsalig Kanila ug pagsunod sa Ilang mga pagtulon-an?

2. Buhata ang mosunod diha sa imong journal sa pagtuon:

I-summarize unsaon sa matag usa sa mga baroganan sa pag-angkon og espirituhanong kahibalo nga mahimong magamit ngadto sa senaryo. Kon ikaw naghimo og kaugalingon nimong senaryo, seguroha usab sa paglakip og usa ka pinamubo [summary] niana nga sitwasyon.