Usa ka anghel nga nagtabang ni Pedro sa iyang paglingkawas gikan sa bilanggoan. Ang mga guwardiya sa bilanggoan walay panimuot diha sa yuta.
Ang Apostoles miatubang og pagsupak samtang naningkamot sila sa pagpadayon sa buhat sa Manluluwas. Si Santiago gimartir ubos sa mando ni Herodes, samtang si Pedro gibilanggo apan dayon giluwas sa usa ka anghel agig tubag sa mga pag-ampo gikan sa mga miyembro sa Simbahan. Kini nga leksiyon gituyo aron sa pagtabang kaninyo sa pagpalambo og mas dako nga pagsalig sa Langitnong Amahan ug sa Iyang mga tubag sa pag-ampo.
Lainlain nga mga resulta
Paghunahuna mahitungod sa lainlaing mga paagi nga posibleng motubag ang mga tawo sa mosunod nga mga sitwasyon:
Usa ka batan-ong lalaki makugihon nga nag-ampo sulod sa daghang katuigan alang sa kaayohan sa iyang amahan sa balatian nga kanser, apan ang iyang amahan wala maayo.
Usa ka batan-ong babaye mainitong nag-ampo alang sa kaayohan sa iyang inahan sa balatian nga kanser, ug human sa daghang mga tuig nga pag-antos, ang iyang inahan milagrosong naulian.
Kanus-a ka o ang uban adunay mga pag-ampo nga wala matubag sa paagi nga gilaoman?
Giunsa ninyo sa pagtubag?
Giunsa sa kalig-on sa inyong pagsalig sa Langitnong Amahan pag-impluwensiya ang inyong tubag?
Sa inyong journal sa pagtuon, ilha ang mga milagro o mga panalangin nga inyong gitinguha. Paghunahuna kon unsaon ang pagbutang og mas dakong pagsalig sa Dios makaimpluwesiya sa inyong kinabuhi alang sa mas maayo. Sa inyong pagtuon, pangita og mga kamatuoran ug mga pananglitan nga makatabang ninyo aron mapalambo ang mas dakong pagsalig sa Langitnong Amahan ug sa Iyang mga tubag sa mga pag-ampo.
Pagpanggukod sa mga miyembro sa Simbahan
Samtang nagpadayon sa pagkuyanap ang ebanghelyo, ang mga miyembro sa Simbahan ug ang mga lider gipanggukod sa Romano ug Judio nga mga lider. Pipila ka mga lider sa Simbahan, sama nila ni Pedro ug Juan, milagrosong naluwas sa Dios (tan-awa sa Mga Buhat 5:17–21), samtang ang uban, sama ni Esteban, wala (tan-awa sa Mga Buhat 7:54–60).
Handurawa ang inyong kaugalingon isip usa ka miyembro sa Simbahan atol niining mga hitaboa samtang inyong basahon ang Mga Buhat 12:1–4. Ang pulong nga vex nagpasabot sa pagdaogdaog o pagpasipala. Ang bersikulo 4 nagpasabot nga si Herodes nagbutang og 16 ka sundalo sa pagbantay ni Pedro samtang nagplano nga pahamtangan unya siya og kamatayon sa publiko.
Unsa nga mga pagbati ug mga pangutana ang lagmit anaa kaha kaninyo isip usa ka miyembro sa Simbahan niining panahona?
Basaha ang Mga Buhat 12:5, ug pangitaa kon giunsa pagtubag sa mga miyembro sa Simbahan.
Ngano kaha nga lisod man pagpakita og hugot nga pagtuo pinaagi sa pag-ampo alang kang Pedro?
Unsa kaha sa inyong hunahuna ang nasabtan sa mga miyembro sa Simbahan mahitungod sa Langitnong Amahan nga nakapadasig nila sa pagbuhat niini?
Basaha ang Mga Buhat 12:6–11, ug pangitaa giunsa pagkatubag ang mga pag-ampo sa mga miyembro sa Simbahan.
1. Tubaga ang mosunod nga mga pangutana diha sa inyong journal sa pagtuon.
Unsa nga mga pagbati o mga hunahuna ang lagmit ninyong masinati kon kamo nakasaksi niini nga tubag sa pag-ampo?
Sa unsang paagi nga ang usa ka hitabo nga sama niini makaapekto sa inyong pagsalig sa Langitnong Amahan?
Unsa nga mga kamatuoran mahitungod sa pag-ampo ang atong makat-onan gikan niini nga asoy?
Sinsero ug kinasingkasing nga pag-ampo
Usa ka kamatuoran nga atong makat-onan niini nga asoy mao nga ang atong sinsero ug mainitong mga pag-ampo nagdapit sa mga milagro ug mga panalangin sa Dios sa atong mga kinabuhi ug sa mga kinabuhi sa uban.
Ang mga milagro nga resulta gikan sa matinud-anong pag-ampo kanunayng gagmay ug yano inay nga dagko ug dramatiko.
Mahimo ninyong tan-awon ang “Panagtukaw Kamo sa Tanang Panahon, ug Manag-ampo” gikan sa time code 12:17 hangtod 13:07, nga anaa makita sa https://www.churchofjesuschrist.org/study/general-conference/2020/10/41ballard?lang=ceb, o basaha ang mosunod nga pamahayag aron makakita og usa ka milagro gikan sa pag-ampo diha sa kinabuhi ni Presidente M. Russell Ballard sa Korum sa Napulog Duha ka Apostoles.
Imahe
Opisyal nga litrato ni Presidente M. Russell Ballard sa Korum sa Napulog Duha ka Apostoles, 2004.
Nahibalo ako sa gahom sa pag-ampo tungod sa akong kaugalingon nga kasinatian. Bag-o lang nag-inusara ako sa akong opisina. Bag-o lang ko nahuman sa usa ka proseso sa pagpatambal sa akong kamot. Nangitom kini ug ninglagom, mihubag, ug sakit kaayo. Samtang naglingkod ko dapit sa akong lamesa, dili ako makatutok sa importante ug lisod nga mga butang tungod kay nabalda ako sa kasakit niini.
Miluhod ako sa pag-ampo ug mihangyo ako sa Ginoo nga tabangan ako nga makatutok sa akong trabahoon aron molampos. Mibarog ko ug mibalik ngadto sa nagtipun-og nga papel sa akong lamesa. Dihadiha dayon, ang katin-aw ug ang [pagtutok] miabot sa akong hunahuna, ug akong nahuman ang dinalian kaayong mga butang sa akong atubangan.
2. Tubaga ang mosunod nga mga pangutana diha sa inyong journal sa pagtuon.
Unsa nga mga kasinatian ang nasinati ninyo o sa uban diin ang Dios mitubag sa mga pag-ampo?
Unsa ang gitudlo niini nga mga kasinatian diha kaninyo mahitungod sa mga tinguha ug mga pagbati sa Langitnong Amahan alang kaninyo ug sa uban?
Giunsa niini nga mga kasinatian pag-impluwensiya sa inyong tinguha ug abilidad sa pagsalig sa Langitnong Amahan?
Pagsalig sa Dios
Basaha ang Mga Buhat 12:12–17 aron makita giunsa pagtapos kini nga asoy. Timan-i nga ang Santiago nga nahisgotan sa bersikulo 17 dili parehas sa Santiago nga nahisgotan sa bersikulo 2.
Usahay ang mga pag-ampo dili matubag sa paagi nga atong gilaoman. Ang pagpakamartir ni Santiago mahimong usa sa pananglitan. Ang mga Santos niining panahona lagmit nag-ampo usab alang kang Santiago, apan gipatay gihapon siya ni Herodes (tan-awa sa Mga Buhat 12:2).
Pamalandongi ang mga senaryo gikan sa sinugdanan sa leksiyon ug ang mga panahon sa inyong kinabuhi diin ang Dios wala mitubag sa inyong mga pag-ampo sa paagi nga inyong gilaoman.
Unsa ang inyong nahibaloan mahitungod sa Langitnong Amahan nga makatabang ninyo sa pagsalig ngadto Kaniya niining mga sitwasyona?
Si Presidente Dallin H. Oaks sa Unang Kapangulohan mitudlo og usa ka butang nga makatabang kon ang atong mga pag-ampo mahimong dili matubag sa paagi nga atong gilaoman. Mahimong gusto ninyong tan-awon ang “Pag-ayo sa Masakiton” gikan sa time code 15:19 hangtod 16:55 o basahon ang mosunod nga pamahayag.
Imahe
Opisyal nga Litrato ni Presidente Dallin H. Oaks nga gikuha niadtong Marso 2018.
Isip mga anak sa Dios, nga nasayod sa Iyang dakong gugma ug sa Iyang dili masukod nga kahibalo kon unsay labing maayo alang sa atong mahangtoron nga kaayohan, mosalig kita Kaniya. Ang unang baroganan sa ebanghelyo mao ang hugot nga pagtuo diha ni Ginoong Jesukristo, ug ang hugot nga pagtuo nagkahulogan og pagsalig. Akong gibati kana nga pagsalig sa usa ka pagpamulong nga gihatag sa akong ig-agaw sa panahon [sa] usa ka lubong sa batan-ong babaye kinsa namatay sa grabe nga sakit. Namulong siya niini nga mga pulong, nga sa sinugdan mipahingangha kanako ug dayon milig-on kanako: “Nasayod ako nga kabubut-on kadto sa Ginoo nga siya namatay. Siya adunay maayo kaayo nga medikal nga pag-atiman. Gihatagan siya og mga panalangin sa [pagkapari]. Ang iyang ngalan gibutang sa listahanan sa mga ngalan sa nagkinahanglan og pag-ampo [prayer roll] sa templo. Siya ang gihisgotan sa gatosan ka mga pag-ampo aron mahimsog og balik. Ug nasayod ako nga adunay igo nga hugot nga pagtuo niini nga pamilya nga mamaayo unta siya gawas kon kabubut-on sa Ginoo nga pagakuhaon siya niining higayona.” Akong gibati kanang sama nga pagsalig diha sa mga pulong sa amahan sa usa ka laing pinili nga batang babaye kansang kinabuhi gikuha tungod sa kanser sa iyang batan-on nga pangedaron. Siya mipahayag, “Ang hugot nga pagtuo sa among pamilya anaa kang Jesukristo, ug wala magdepende sa mga resulta.” Kadto nga mga pagtulon-an mga tinuod gayod alang kanako. Atong himoon kutob sa atong mahimo aron ayohon ang usa ka minahal, ug dayon mosalig kita sa Ginoo alang sa resulta.
(Dallin H. Oaks, “Pag-ayo sa Masakiton,” Liahona, Mayo 2010, 50)
Unsa ang gitudlo ni Presidente Oaks nga pamati ninyo importanteng hinumdoman? Ngano man?
3. Buhata ang mosunod.
Base sa unsa inyong nakat-onan karon, pagsulat og entry sa inyong journal agig tubag sa usa o daghan pa sa mosunod nga mga pag-aghat:
Unsa ang inyong nakat-onan mahitungod sa Langitnong Amahan nga nakapadugang sa inyong pagsalig Kaniya
Unsa ang inyong nakat-onan mahitungod sa pag-ampo nga gusto ninyong mahinumdoman
Mga pagbati nga inyong nadawat gikan sa Espiritu Santo kon unsaon pagpalambo sa inyong kaugalingong mga pag-ampo o unsaon ninyo pagpangita og mas dakong pagsalig sa Langitnong Amahan
Opsiyonal: Gustong Makakat-on pa og Dugang?
Unsa ang angay natong masabtan kon ang mga tubag sa pag-ampo ingon og wala moabot?
Si Elder Richard G. Scott sa Korum sa Napulog Duha ka Apostoles mipasabot:
Imahe
Kataposang opisyal nga litrato ni Elder Richard G. Scott sa Korum sa Napulog Duha ka Apostoles, 2004. Namatay niadtong 22 sa Septiyembre 2015.
Kon ang mga tubag sa dinalian nga pag-ampo ingon og wala moabot, mahimong wala kita makasabot sa pipila ka mga kamatuoran mahitungod sa pag-ampo, o tungod kay kita wala makamatikod sa mga tubag kon kini moabut. …
… Maminaw Siya sa kada pag-ampo ug motubag niini sa Iyang pamaagi.
(Richard G. Scott, “Kabubut-on ug mga Tubag:Pag-ila sa Pagpadayag,” Liahona, Hunyo 2014, 48–49)
Unsaon sa akong mga pag-ampo pagpanalangin sa mga lider sa Simbahan karon?
Diha sa mga kasulatan atong nakat-onan nga ang Unang Kapangulohan gisuportahan sa “pagsalig, pagtuo, ug pag-ampo sa simbahan” (tan-awa sa Doktrina ug Mga Pakigsaad 107:22). Samtang nagserbisyo isip Presidente sa Simbahan, si Thomas S. Monson (1927–2018) mipakigbahin, “Sa akong gisulti sa nangaging mga komperensiya, nagpasalamat ako ninyo sa inyong mga pag-ampo alang nako. Gikinahanglan ko kini, gibati nako kini.” (“Ang Dios Maga-uban Ninyo Hangtod nga Magkita Kita Pag-usab,” Liahona, Nob. 2012, 111).
