Usa sa mga katuyoan sa doktrinal nga kahanas mao ang pagtabang kanimo sa pagkat-on ug paggamit sa mga baroganan sa pag-angkon og espirituhanong kahibalo aron mahimong mas mahisama kang Jesukristo. Kini nga leksiyon gituyo aron sa pagtabang nimo sa pagsabot ug paggamit sa piho nga baroganan sa paglihok inubanan sa hugot nga pagtuo diha ni Jesukristo kon motumaw ang lisod nga mga hagit ug mga pangutana.
Kon motumaw ang lisod nga mga hagit ug mga pangutana
Atol sa mortalidad, kitang tanan makasugat og lisod nga mga hagit ug mga pangutana nga mahimong dili sayon sulbaron. Basaha ang mosunod nga mga sitwasyon samtang maghunahuna mahitungod sa susama nga mga kasinatian nimo o sa laing tawo nga imong nailhan.
Usa ka batan-on nga lalaki adunay daghan kaayo nga mga pangutana mahitungod sa mga palisiya sa Simbahan ug nagsugod sa paghunahuna kon tinuod ba gayod ang Simbahan.
Usa ka batan-ong babaye nakakita og usa ka post sa social media nga nagkwestiyon sa usa ka doktrina sa Simbahan. Karon nagsugod siya nga naghunahuna mahitungod niana nga doktrina sa iyang kaugalingon mismo.
Usa ka batan-ong babaye naghunahuna kon ang mga pag-ampo natubag ba gayod human ang iyang igsoon nga lalaki nag-antos ug namatay tungod sa usa ka grabe nga sakit, bisan pa man sa mga pag-ampo ug mga panalangin nga gitanyag alang kaniya.
Unsa ang pipila sa nagkalainlaing mga pamaagi nga ang mga tawo makapili sa pagtubag kon mag-atubang sila og lisod nga mga hagit o mga pangutana sama niini?
Pamalandonga sa makadiyot ang imong mga kasinatian sa pag-atubang og lisod nga mga hagit ug mga pangutana. Mahimong makatabang ang paghunahuna bahin sa mosunod nga mga pangutana: Nagmalamposon ka ba sa pagkaplag og mga tubag? Unsa ang nakatabang nimo sa pagkaplag og kalinaw? Unsay wala nakatabang?
Unsa ang pipila ka pangutana o mga hagit nga ikaw aduna (o nga nasayran sa ubang mga tawo nga ikaw aduna) nga dili sayon sa pagsulbad?
Ngano kaha nga itugot sa Langitnong Amahan nga kita adunay wala masulbad nga mga pangutana kaysa kanunayng mohatag kanato og mga tubag?
Kon motumaw ang mga pangutana, importante nga hinumdoman nga giawhag kita sa Ginoo nga mangutana ug magtinguha og mga tubag (tan-awa sa Mateo 7:7–8; Santiago 1:5–6; Doktrina ug mga Pakigsaad 42:61). Ang pagpangutana ug pagtinguha og mga tubag usa ka mahinungdanon nga bahin sa atong paningkamot nga makakat-on sa kamatuoran, sundan sa paggamit ug pagsunod sa unsay atong nakat-onan sa atong tinguha nga mahimong mas mahisama sa Manluluwas ug sa atong Langitnong Amahan.
Tulo ka baroganan nga makagiya kanato samtang kita magtinguha sa pagsulbad og mga pangutana o mga isyu ug molambo sa atong pagsabot sa mahangtoron nga mga kamatuoran naglakip sa:
Lihok inubanan sa hugot nga pagtuo.
Susiha ang mga konsepto ug mga pangutana nga adunay mahangtorong panglantaw.
Pagtinguha pa og dugang nga panabot pinaagi sa balaanong gitudlo nga mga tinubdan.
Tanang tulo niini nga mga baroganan mahimong importante nga gamiton kon ikaw mag-atubang og mga pangutana ug mga kabalaka nga dili sayon nga masulbad o kon kamo makasinati og mga pagsulay.
Lihok inubanan sa hugot nga pagtuo
Kini nga leksiyon gituyo aron sa pagtabang kanimo nga makasabot sa mosunod nga baroganan: samtang kita molihok inubanan sa hugot nga pagtuo, ang Ginoo mohatag kanato og kalinaw ug kalig-on samtang magtinguha kita og mga tubag sa atong mga pangutana ug mga kabalaka.
1. Tubaga ang mosunod nga pangutana diha sa imong journal sa pagtuon.
Unsa kahay gipasabot nga molihok inubanan sa hugot nga pagtuo?
Palawmi ang imong pagsabot kon unsay gipasabot sa paglihok inubanan sa hugot nga pagtuo pinaagi sa pagkompleto sa pagkat-on sa kalihokan sa ubos. Mahimong makatabang ang pagtuon uban ang laing tawo aron makabansay ka sa pagpasabot sa imong nasabtan ug makat-on sa uban.
Unsay gipasabot sa paglihok inubanan sa hugot nga pagtuo?
Basaha ang Mahinungdanon nga Dokumento sa Doktrinal nga Kahanas (2022) “Pag-angkon og Espirituhanong Kahibalo,” mga parapo 1–2 ug 5–7 ug ang mosunod nga pamahayag ni Elder Neil L. Andersen sa Korum sa Napulog Duha ka Apostoles. Samtang nagtuon ka, pangitaa kon unsa ang buot ipasabot sa paglihok inubanan sa hugot nga pagtuo ug kon unsa ang makatabang kanimo aron magamit kini nga baroganan kon ikaw adunay mga pangutana.
Imahe
Elder Neil L. Andersen
Ang hugot nga pagtuo dili moabot kanato pinaagi sa sulagma ni magpabilin kanato pinaagi sa katungod sa pagkatawo. … Ang hugot nga pagtuo diha ni Jesukristo usa ka gasa gikan sa langit nga moabot samtang kita mopili nga motuo ug samtang kita magtinguha ug maghupot niini. … Ang gidak-on sa inyong hugot nga pagtuo sa umaabot dili pinaagi sa sulagma, apan pinaagi sa pagpili. …
Ang hugot nga pagtuo dili gayod mangayo og tubag sa matag pangutana apan magtinguha sa kasiguroan ug kaisog sa pagpadayon, usahay sa pag-ila nga, “Wala ko masayod sa tanan, apan nasayod ko og igo aron magpadayon diha sa dalan sa pagkadisipulo.”
Ang pagtugot sa kaugalingon diha sa kanunayng pagduhaduha, nga maoy giawhag gikan sa mga walay pagtuo ug sa mga dili matinud-anon, makapahuyang sa hugot nga pagtuo sa usa ka tawo diha ni Jesukristo ug sa Pagpahiuli. “Ang tawo nga kalibotanon dili magadawat sa igatudlo sa Espiritu sa Dios: kay alang kaniya kini mga binuang” [1 Mga Taga-Corinto 2:14]. …
Bisan kon sa pagsugod ang inyong pagtuo tingali gamay ra, ang matarong nga mga pagpili makahatag og mas dakong pagsalig sa Dios, ug ang inyong pagtuo molambo.
Sa imong hunahuna nganong importante man ang paglihok inubanan sa hugot nga pagtuo kon kita adunay mga pangutana ug mga kabalaka?
Unsay imong nakat-onan gikan niini nga mga pagbasa mahitungod sa unsay gipasabot sa paglihok inubanan sa hugot nga pagtuo?
Hinumdomi ang lisod nga mga pangutana ug mga hagit nga imong giatubang, o rebyoha ang mga sitwasyon gikan sa sinugdanan sa leksiyon. Uban sa paghunahuna sa usa niini, pagbansay sa paggamit sa unsay imong nakat-onan mahitungod sa paglihok inubanan sa hugot nga pagtuo pinaagi sa pagtubag nga adunay daghang detalye kutob sa mahimo ngadto sa mosunod nga mga pangutana.
2. Tubaga ang mosunod nga mga pangutana:
Unsa ang hagit o pangutana nga imong gipili nga magbansay sa paglihok inubanan sa hugot nga pagtuo?
Unsa ang duha o tulo ka paagi nga ang usa ka tawo mahimong molihok inubanan sa hugot nga pagtuo niini nga sitwasyon?
Unsa man kabahin niini nga sitwasyon ang lagmit mohimong lisod sa paglihok inubanan sa hugot nga pagtuo diha kang Jesukristo? Unsaon nimo sa pagbuntog niini nga mga hagit?
Unsa man ang ganahan nimo nga pihong mahinumdoman mahitungod sa Langitnong Amahan ug ni Jesukristo samtang ikaw anaa niini nga sitwasyon? Sa unsang paagi nga ang paghinumdom niadto nga mga butang makatabang kanimo?
Opsiyonal: Gustong Makakat-on pa og Dugang?
Sayop ba nga adunay mga pangutana mahitungod sa ebanghelyo?
Si Presidente Dieter F. Uchtdorf sa Unang Kapangulohan mitudlo mahitungod sa bili sa matinuoron nga mga pangutana:
Imahe
Elder Dieter F. Uchtdorf
Natural lang nga dunay mga pangutana—ang gamayng liso sa matinuorong pangutana sagad mogitib ug mohingkod sa pagkadakong kahoy sa panabot. Dunay pipila ka miyembro sa Simbahan kinsa, sa usa ka higayon, wala makasulay og seryoso o sensitibong mga pangutana. Usa sa mga katuyoan sa Simbahan mao ang pag-alima ug pag-ugmad sa liso sa hugot nga pagtuo—bisan sa balason nga yuta sa pagduhaduha ug kawalay kaseguroan. Ang hugot nga pagtuo molaom sa mga butang diin dili makita diin mga tinuod.
Busa, mga kaigsoonan—akong mga higala—palihog, duhaduhai una ang inyong pagduhaduha sa dili pa mo magduhaduha sa inyong pagtuo. Dili gayod nato tugotan nga himoon kitang binilanggo sa atong pagduhaduha ug ilayo kita sa diosnong gugma, kalinaw, ug gasa nga moabot pinaagi sa hugot nga pagtuo kang Ginoong Jesukristo.
Sa unsang paagi nga akong madugangan ang akong abilidad nga molihok inubanan sa hugot nga pagtuo?
Si Presidente Russell M. Nelson mitudlo mahitungod sa usa ka proseso nga atong mahimo aron sa pagpalambo sa atong hugot nga pagtuo:
Imahe
Presidente Russell M. Nelson
Ang atong hugot nga pagtuo madugangan matag higayon kita mogamit sa atong hugot nga pagtuo diha Kaniya. Mao kana ang gipasabot sa pagkat-on pinaagi sa hugot nga pagtuo.
Pananglitan, matag higayon nga kita adunay hugot nga pagtuo nga magmasulundon sa mga balaod sa Dios—bisan kon ang inila nga mga opinyon nagtamay kanato—o sa matag higayon nga kita mobatok sa kalingawan o mga ideolohiya nga nagsaulog sa pagsupak sa pakigsaad, kita nagpakita sa atong hugot nga pagtuo, nga maoy makapadugang sa atong hugot nga pagtuo.
Tinuod nga mga sitwasyon sa kinabuhi bahin sa mga indibidwal nga naglihok inubanan sa hugot nga pagtuo
Ikonsiderar ang patan-aw sa usa o sa duha sa mosunod nga mga bidyo, mangita sa unsay imong makat-onan gikan niini nga mga inbidwal nga makatabang kanimo sa paglihok inubanan sa hugot nga pagtuo kon ikaw adunay lisod nga mga pangutana o mga hagit.
Nganong kinahanglan nga dili ko mahadlok sa wala masulbad nga mga pangutana?
