Ko Hoku Hala ki he Moʻui Fakafalala pē Kiate Kitá

Ko e Kamatá

Tokotaha tokoní:

Kamata ʻaki ha fua lotu (mo e himi, kapau ʻe fie maʻu).
ʻE lava ke fakahoko ʻe ha mēmipa ʻo e kau palesitenisī fakasiteikí ha talateu mo ha fakamoʻoni.
ʻOku fakaafeʻi ʻe ha mēmipa ʻo e kōmiti fakasiteiki ki he moʻui fakafalala pē kiate kitá ʻa e kulupú kotoa ke fakaava ʻenau tohí ki he peesi 2, mo muimui ki ai ʻi hono lau ʻe he mēmipa ʻo e kōmití ʻa e palakalafi ʻe tolu ʻi laló.

ʻOku talitali lelei kimoutolu ki he fakataha lotu ʻo e Ko Hoku Hala ki he Moʻui Fakafalala pē Kiate Kitá. Ko e taumuʻa ʻo e fakataha ko ʻení ke tokoni ke mahino ʻa e ʻuhinga mo e founga te ke lava ai ʻo moʻui fakafalala lahi ange pē kiate koé. Te tau aleaʻi ʻa e ngaahi tefitoʻi moʻoní ʻi ha fanga kiʻi kulupu iiki, lau fakataha, fakalaulauloto, mo hiki ʻetau ngaahi fakakaukaú, kae ʻikai ko e lea ʻa ha tokotaha pē ki he kulupú.

Ko e konga mahuʻinga taha ʻo e aʻusia ko ʻení, ʻa e ngaahi ueʻi ʻokú ke maʻu ʻi he Laumālié ʻi hono fakahā atu ʻe he ʻEikí ʻa e meʻa te ke lava ʻo fai ke hoko ai ʻo hangē ko Iá. ʻOku mau poupouʻi atu koe ke ke hiki ‘a e ngaahi ongo ko ʻení ʻi hoʻo maʻu kinautolú, peá ke ngāueʻi kinautolu.

ʻI he fakaʻosinga ʻo e fakataha ko ʻení, ʻe fakaafeʻi ai koe ke ke fili ha kulupu moʻui fakafalala pē kiate kita te ne lava ke tokoniʻi koe ke ke aʻusia ha taha ʻo e ngaahi meʻá ni:

Kumi ha ngāue pe fakatupulaki hoʻo ngāue maʻuʻanga moʻui lolotongá
Tokangaʻi lelei ange hoʻo ngaahi meʻa fakapaʻanga fakatāutahá mo fakafāmilí
Fili ha hala ki he akó pea lavameʻa ʻi he akó
Fakatupulaki hoʻo pisinisi īkí

Ka ʻi he taimi ní, te tau feinga ke maheni lelei ange.

Tokotaha Tokoní Kole ki he kau maʻu fakataha ʻi he tēpile takitaha ke nau fakafeʻiloaki nounou kinautolu ki he niʻihi kehe ʻi heʻenau tēpilé. ʻOku totonu ke ʻoua ʻe laka hake ʻa e fakafeʻiloaki takitaha ʻi he sekoni ʻe 30 pe 40.

Ko e Hā ʻa e Moʻui Fakafalala pē Kiate Kita?

Lau:Ko e taumuʻa ʻo e polokalama moʻui fakafalala pē kiate kitá ke tokoniʻi e fakafoʻituituí ke nau moʻui fakafalala pē kiate kinautolu. ʻOku laka hake ʻa e moʻui fakafalala pē kiate kitá ʻi hono maʻu ʻo ha ngāue lelei, tukuʻanga meʻakai, pe paʻanga ʻi he pangikeé. Ko e moʻui fakafalala pē kiate kitá “ko e malava, tukupā, mo e feinga ia ke tokonaki maʻá e ngaahi fie maʻu fakalaumālie mo fakatuʻasino ʻo e moʻuí maʻata pea mo e fāmilí. ʻI he lava ke moʻui fakafalala ʻa e kāingalotú kiate kinautolu peé, te nau malava lelei ange ai ke tokoni mo tauhi ha niʻihi kehe,” pea hoko ʻa e ngāué ko ha tefitoʻi moʻoni ʻokú ne tataki ʻenau moʻuí (Tohi Tuʻutuʻuni Fika 2: Ko Hono Puleʻi ʻo e Siasí [2010], 6.1.1).

Aleaʻi:Ko e hā ʻa e ngaahi ʻulungaanga ʻo ha taha ʻoku fakafalala pē kiate ia? ʻE fakafalala nai e niʻihi ʻoku moʻui fakafalala pē kiate kinautolú, ki he puleʻangá, pe tokoni mei he Siasí, kapau ʻoku nau lava pē ʻe kinautolu ʻo ngāueʻi ʻenau ngaahi fie maʻú?

ʻOku Mahuʻinga ʻa e Moʻui Fakafalala Pē Kiate Kitá ki he Fakamoʻuí

Lau:Naʻe akoʻi ʻe Palesiteni Thomas S. Monson: “Tuku ke tau moʻui fakafalala pē muʻa kiate kitautolu mo tauʻatāina. ʻE ʻikai lava ke toe maʻu ʻa e fakamoʻuí ʻi ha tefitoʻi moʻoni kehe” (“Guiding Principles of Personal and Family Welfare,” Ensign, Sepitema. 1986, 3; kupuʻi lea ʻa Marion G. Romney, ʻi he Conference Report, ʻOkatopa. 1976, 167).

Aleaʻi:ʻE founga fēfē haʻo hoko ʻo hangē ko e Tamai Hēvaní ʻi hoʻo moʻui fakafalala ange pē kiate koé?

ʻOku taha pē ʻa e Fakalaumālié mo e Fakatuʻasinó

ʻEkitivitī FAKAKULUPÚ _{(miniti ʻe 3–4)}

Aleaʻi fakakulupu e ngaahi fie maʻu fakatuʻasino mo fakalaumālie ʻo e moʻuí. Hiki ha niʻihi ʻo kinautolu ʻi lalo.

Ngaahi Fie Maʻu Fakatuʻasino ʻo e Moʻuí	Ngaahi Fie Maʻu Fakalaumālie ʻo e Moʻuí

Lau:Naʻe akoʻi ʻe Palesiteni Dieter F. Uchtdorf, “Hangē ko e ongo tafaʻaki ʻo ha foʻi paʻanga, ʻoku ʻikai faʻa fakamavahevaheʻi ʻa e meʻa fakamatelié mo e meʻa fakalaumālié” (“Tokoniʻi ʻi he Founga ʻa e ʻEikí,” Ensign pe Liahona, Nōvema 2011, 53). Kuo fakahā ʻe he ʻEikí ʻi he folofolá, “ʻOku fakalaumālie kiate au ʻa e ngaahi meʻa kotoa pē, pea ʻoku teʻeki ʻi ai ha taimi te u ʻoatu ai kiate kimoutolu ha fono ʻa ia ʻoku fakamatelie.” (T&F 29:34).

Aleaʻi:ʻE lava fēfē ke hoko hano kumi ha ngāue mo e ngāue maʻuʻanga moʻuí, ko ha meʻa fakatuʻasino mo fakalaumālie fakatouʻosi?

Ko e Hā e Tuʻunga ʻo e Moʻui Fakafalala Pē Kiate Kita Fakatuʻasino mo Fakalaumālie ʻOkú Ke ʻI Aí?

ʻEkitivitī Fakafoʻituituí _{(miniti ʻe 5)}

ʻOku fie maʻu ʻa e malava, tukupā, mo e feinga ki he moʻui fakafalala pē kiate kitá. ʻIate koe pē, ʻai ha fakaʻilonga tonu ʻi he puha takitaha ʻoku kaunga lelei taha kiate koé. Faitotonu ʻiate koe pē. Kapau ʻokú ke ongoʻi taʻefiemālie ke fakaʻilongaʻi ʻa e ngaahi meʻá ni ʻi he tokolahí, fakapuliki ʻa hoʻo ngaahi talí.

	ʻIkai ʻaupito	Tātātaha	Taimi pē ʻe niʻihi	Taimi lahi	Maʻu pē
ʻOku ou maʻu ʻa e taukei ke feau ʻeku ngaahi fie maʻú.
ʻOku ʻi ai ʻeku patiseti pea ʻoku ou muimui ki ai.
ʻOku ou fakahū ha paʻanga.
ʻOku ʻikai haʻaku moʻua (tukukehe kapau ko e ako pe ko ha ʻapi).
ʻOku fakatefito ʻeku moʻuí ʻi he ngaahi meʻa ʻoku mahuʻinga tahá.
ʻOku ou lotu mo ako folofola fakaʻaho.
ʻOku ou ongoʻi fakaʻaho e ngaahi ueʻi mei he Laumālié ʻi heʻeku moʻuí.
ʻOku ou totongi e vahehongofulú mo e ngaahi foakí.
ʻOku ou maʻu fakauike e sākalamēnití.
ʻOku ou taau ke maʻu ha lekomeni temipale.
ʻOku ou maʻu ha ngāue ke feau ʻeku ngaahi fie maʻú.
ʻOku ou lava ʻo maʻu ʻeku ngaahi fie maʻú ʻo ʻikai fakafalala ki ha polokalama faka-puleʻanga.
ʻOku ou totongi hoku falé fakamāhina pe mōkisi.
ʻOku ou maʻu ha tokoni fakafaitoʻo feʻunga.
ʻOku lava ʻeku fānaú ʻo hū ki he akó.
ʻOku ou lava ʻo tokoniʻi e niʻihi kehé ʻi he taimi ʻo ʻenau faingataʻaʻiá.

Fakalaulauloto:ʻOku toe ʻi ai ha ngaahi meʻa kehe ʻoku fie maʻu ke ke liliu ka ke fakafalala pē kiate koe? ʻE fēfē hoʻo moʻuí kapau te ke fakaleleiʻi e ngaahi meʻa ʻi ʻolungá?

ʻE Founga Fēfē Haʻaku Moʻui Fakafalala Pē Kiate Au ʻo Lahi Ange?

1. ʻE Lava ʻe he ʻEikí ʻo Tokoniʻi Koe Ke Ke Moʻui Fakafalala Pē Kiate Koe

Mamataʻi:“I Will Provide for My Saints,” maʻu atu ʻi he srs.lds.org/videos. (ʻIkai ha vitiō? Hokohoko atu hono laú.)

ʻEkitivitī FAKAKULUPÚ _{(miniti ʻe 5)}

Ko e tohi ʻeni naʻe vahevahe ʻe Palesiteni Dieter F. Uchtdorf ʻi he vitioó:

ʻI he kulupú:

Taufetongi ʻi hono lau e palakalafi takitaha.
ʻI he palakalafi takitaha, fakahoko ʻa e ngaahi meʻá ni:
- Laineʻi ‘a e ngaahi tāpuaki pau kuo talaʻofa mai ʻe he kau Palesitenisī ʻUluakí.
- Siakaleʻi ʻa e meʻa kuo pau ke ke fai ke maʻu e ngaahi tāpuaki ko iá.
- Aleaʻi nounou e meʻa ʻokú ke akó.

Siʻi Kāinga ʻOfeina:

Kuo fakahā mai ʻe he ʻEikí, “Ko ʻeku taumuʻá ke tauhi ʻa ʻeku kau māʻoniʻoní” (T&F 104:15). Ko e fakahā ko ʻení ko ha talaʻofa mei he ʻEikí te Ne ʻomi ha ngaahi tāpuaki fakatuʻasino pea fakaava e matapā ʻo e moʻui fakafalala pē kiate kitá, ʻa ia ko e malava ke tau maʻu ʻa e ngaahi fie maʻu ʻo e moʻuí maʻatautolu mo e kau mēmipa hotau fāmilí.

Kuo teuteuʻi ʻa e kiʻi tohi ko ʻení ke tokoniʻi ʻa e kau mēmipa ʻo e Siasí ke ako pea moʻui ʻaki ʻa e ngaahi tefitoʻi moʻoni ʻo e tuí, akó, ngāue mālohí, pea falala ki he ʻEikí. ʻI hoʻo tali mo moʻui ʻaki ʻa e ngaahi tefitoʻi moʻoni ko ʻení te ke malava lelei ange ʻo maʻu ʻa e ngaahi tāpuaki fakatuʻasino kuo talaʻofa mai ʻe he ʻEikí.

ʻOku mau fakaafeʻi koe ke ako faivelenga pea mo fakaʻaongaʻi ʻa e ngaahi tefitoʻi moʻoni ko ʻení pea akoʻi kinautolu ki he kau mēmipa ho fāmilí. ʻI hoʻo fai iá, ʻe faitāpuekina hoʻo moʻuí. Te ke ako ai ʻa e founga ke ngāueʻi ho hala ki he moʻui fakafalala kiate koe ʻoku lahi angé. ʻE tāpuakiʻi koe ʻaki ʻa e ʻamanaki leleí, melinó, mo ha fakalakalaka lahi ange.

Kātaki ʻo ʻiloʻi moʻoni ko e fānau koe ʻa ʻetau Tamai Hēvaní. ʻOkú Ne ʻofa ʻiate koe pea he ʻikai teitei liʻaki koe. ʻOkú Ne ʻafioʻi koe pea mo mateuteu ke ʻoatu e ngaahi tāpuaki fakalaumālie mo fakatuʻasino ʻo e moʻui fakafalala pē kiate kitá.

Fakaʻapaʻapa atu,

Ko e Kau Palesitenisī ʻUluakí

Fakalaulauloto:Ko e hā te u lava ʻo fakahoko fakataautaha ke maʻu ʻa e “ʻamanaki lelei lahi, melino, mo e fakalakalaka” kuo talaʻofa mai ʻe he Kau Palesitenisī ʻUluakí?

2. ʻE Lava ʻe he Folofolá ʻo Tokoniʻi Koe Ke Ke Hoko ʻo Moʻui Fakafalala Pē Kiate Koe

Lau:ʻOku tokoniʻi kitautolu ʻe he ʻEikí ʻi ha ngaahi founga kehekehe ʻi heʻetau ngāue ʻaki ʻa e tui kiate Iá. Ko e taha ʻo e ngaahi meʻangāue kuó Ne foaki maí ko e folofolá. Ne akoʻi ʻe Nīfai ʻo pehē, “Keinanga ʻi he ngaahi folofola ʻa Kalaisí; he vakai, ʻe fakahā kiate kimoutolu ʻe he ngaahi folofola ʻa Kalaisí ʻa e ngaahi meʻa kotoa pē ʻoku totonu ke mou faí” (2 Nīfai 32:3).

Aleaʻi:Ko e fē ha taimi naʻá ke maʻu ai e ngaahi fakahinohino ko ʻení ʻi hoʻo moʻuí?

ʻEkitivitī FAKAKULUPÚ _{(miniti ʻe 5–7)}

Naʻe foaki mai ‘a e Tohi ʻa Molomoná ko ha meʻangāue maʻa hotau kuongá. Kapau te tau fakatatau ʻa e ngaahi veesi ʻo e Tohi ʻa Molomoná ki heʻetau moʻuí, te tau maʻu e fakahinohino kotoa pē ʻoku tau fie maʻú. Lau mo aleaʻi fakakulupu ʻa e ngaahi fakamatala takitaha ʻi laló mei he kau palōfitá mo e kau ʻaposetoló. Laineʻi ‘a e ngaahi tāpuaki ne talaʻofa mai ki hono ako mo fakaʻaongaʻi ʻa e folofolá.

Henry B. Eyring: “Ko e faikehekehe lahi moʻoni ʻoku hoko ʻi heʻetau lau ʻa e folofolá ke ʻiloʻi ʻa e meʻa ke tau faí. … Te tau maʻu ʻa e ngaahi talí ʻi he folofolá. Hangē naʻe ʻosi mahino pē ki he ʻEikí ʻa hono kotoa ʻo ʻetau ngaahi palopalemá mo ʻetau ngaahi fie maʻú, peá Ne fokotuʻu ʻa e tokoní ʻi he folofolá maʻatautolu—kapau pē ā te tau fekumi ke maʻu ia.” (“A Discussion on Scripture Study,” Ensign, July 2005, 24).

Boyd K. Packer: “ʻOku ʻikai ha palopalema lahi ʻoku tau fehangahangai mo ia ʻe ʻikai lava ʻo maluʻi kitautolu mei ai ʻo ka tau ka ʻilo e ngaahi fakahaá” (“Teach the Scriptures,” Teaching Seminary Preservice Readings Religion 370, 471, and 475 [2004], 75).

Richard G. Scott: “ʻOku maʻu ʻe he Tohi ʻa Molomoná ʻa e tali ki he ngaahi palopalema ʻoku tau fehangahangai mo ia ʻi he ʻaho kotoa ʻo e moʻuí” (“The Power of the Book of Mormon in My Life,” Ensign, Oct. 1984, 10).

M. Russell Ballard: “Ko e Tohi ʻa Molomoná ʻa e maʻuʻanga tokoni lelei taha ki heʻetau ngaahi palopalema ʻi he moʻuí ʻo laka ange ia ʻi ha toe tohi kuó u ʻiloʻi” (ʻi he “We Add Our Witness,” Ensign, Mar. 1989, 8).

Russell M. Nelson: “ʻOkú ke fie maʻu ke toʻo atu ha tōʻonga ʻoku kovi? ʻOkú ke fie fakaleleiʻi e ngaahi vā fetuʻutaki ʻi ho fāmilí? ʻOkú ke fie fakalahi ho ivi fakalaumālié? Lau e Tohi ʻa Molomoná! Te ne ʻai koe ke ofi ange ki he ʻEikí mo Hono mālohi angaʻofá” (“A Testimony of the Book of Mormon,” Ensign, Nov. 1999, 71).

Fakalaulauloto:ʻI heʻeku feinga ke moʻui fakafalala ange kiate au peé, ko e hā te u lava ʻo fai ke maʻu ha fakahinohino fakataautaha mei he folofolá?

3. ʻE Lava ke Tokoniʻi Koe ke ke Kamata ʻi haʻo Kau ki ha Kulupu Moʻui Fakafalala pē Kiate Kita

Lau:Ke tokoniʻi koe ke ke moʻui fakafalala ange kiate koe peé, ʻokú ke maʻu ai ha faingamālie ke kau ki ha kulupu moʻui fakafalala pē kiate kita ʻi homou uōtí pe siteikí. Ko e kulupu moʻui fakafalala pē kiate kitá, ko ha kulupu ia ʻo ha niʻihi fakafoʻituitui ʻoku nau fakataha ke ako mo fakaʻaongaʻi ha ngaahi pōtoʻi ngāue ki he ngāue maʻuʻanga moʻuí, akó mo e ngaahi meʻa fakapaʻangá.

ʻOku meimei ke fakataha houa ʻe ua ʻa e ngaahi kulupu moʻui fakafalala pē kiate kitá ʻi he uike kotoa ʻi ha māhina ʻe tolu. ʻOku muimui ʻa e ngaahi fakatahá ʻi he founga tatau mo e fakataha lotu ko ʻení. ʻOku laukonga mo alea fakataha e kau mēmipa ʻo e kulupú, fakakakato e ngaahi ʻekitivitií, mo fakalaulauloto fakafoʻituitui koeʻuhí ke ueʻi hake kinautolu ʻe he Laumālie Maʻoniʻoní ki ha founga ngāue.

ʻOku kehe ʻa e kulupu moʻui fakafalala pē kiate kitá mei ha ngaahi kalasi lahi ʻi he Siasí. ʻOku ʻikai ha faiako! Ka ʻoku ngāue ʻa e kulupú hangē ha fakataha alēlea mo e Laumalie Māʻoniʻoní ʻa ia ko e faiakó. ʻOku fealēleaʻaki fakataha ʻa e kau mēmipa ʻo e kulupú ʻi heʻenau ako e ngaahi pōtoʻi ngāue foʻoú, solova e ngaahi palopalemá, tukupā ke fai ʻa e ngaahi meʻa ʻi he lolotonga ʻo e uiké mo felīpootiʻaki ʻenau fakalakalaká.

ʻOku fakatupulaki foki ha feohi fakakaumeʻa mālohi ʻi he kau mēmipa ʻo e kulupú pea ongoʻi e ʻofa ʻa e ʻOtuá ʻi heʻenau ngāue fakatahá. ʻI hoʻo kau ki ha kulupu, ʻe ʻikai ngata pē ʻi heʻene ʻaonga kiate koé, ka te ke lava ʻo tokoni lahi ʻi hono tokoniʻi ʻa e niʻihi kehé ʻi honau hala ke fakafalala pē kiate kinautolú!

Mamataʻi:“The Power of the Group,” maʻu atu ʻi he srs.lds.org/videos. (ʻIkai ha vitiō? Hokohoko atu hono laú.)

Tokotaha tokoní: Kapau ʻe maʻu, fakaafeʻi ha taha kuo ʻosi kau ki ha kulupu moʻui fakafalala pē kiate kita kimuʻa, ke ne vahevahe nounou (ʻi ha miniti ʻe tolu) ʻene aʻusiá.

Ko e Fē ʻa e Kulupu Moʻui Fakafalala Pē Kiate Kita ʻOku Totonu Ke U Kau Ki Aí?

Mamataʻi:“Choosing a Self-Reliance Group,” available at srs.lds.org/videos. (ʻIkai ha vitiō? Lau ʻa e fakamatala nounou ʻa e ngaahi kulupú ʻi he peesi 11.)

ʻEkitivitī Fakafoʻituituí _{(miniti ʻe 3–4)}

Lau ʻa e ngaahi fakamatala ʻi laló ʻiate koe pē, pea siakaleʻi ʻa e (ngaahi) fakamatala ʻoku kau kia koé. ʻOku maʻu ʻa e fakamatala nounou ʻo e kulupu takitaha ʻi he peesi 11.

	Kumi ha Ngāue Lelei Ange	Ngaahi Meʻa Fakapaʻanga Fakatāutahá	Ako Koeʻuhí ko ha Ngāue Lelei Ange	Ko Hono Kamataʻi mo Fakatupulaki ʻEku Pisinisí
ʻOku ou fie maʻu ha paʻanga ʻi he vave tahá.	✓
ʻOku ʻikai haʻaku ngāue maʻuʻanga moʻui.	✓
ʻOku ou fie maʻu ha ngāue lelei ange.	✓
ʻOku ou fie maʻu ke fakahū ha paʻanga.		✓
ʻOku ou fie maʻu ke ʻoua ʻe toe fakamoʻua.		✓
ʻOku ou fie mateuteu fakapaʻanga ki he kahaʻú.		✓
ʻOku ou fie maʻu ha ako pe ako ngāue ke maʻu ha ngāue lelei pe kamata ha ngāue foʻou.			✓
ʻOku ou fie maʻu tokoni ʻi hono fili hoku hala ʻi he akó.			✓
ʻOku ou fie maʻu ke u lavameʻa ʻi he akó.			✓
ʻOku ou fie maʻu ke ako lahi ange fekauʻaki mo e ngaahi tokoni fakaako ʻa e Siasí, hangē ko e Pathway (vakai peesi 12).			✓
ʻOku ʻi ai haʻaku pisinisi ʻoku lolotonga lele.				✓
ʻOku ʻi ai haʻaku ngaahi maʻuʻanga tokoni ke kamataʻi ha pisinisi.				✓
Te u lava ʻo poupouʻi pē au ʻi hano kamataʻi ha pisinisi.				✓
ʻOku ou fie maʻu ke fakatupulaki ʻeku tui kia Sīsū Kalaisí.	✓	✓	✓	✓

Lau:‘Oku fie maʻu ʻa e tuí mo e ngāué ke fai ha ngaahi liliu ʻi heʻetau moʻuí. Ke ke fakalakalaká, ʻe fie maʻu ke ke tukupā ke fai ʻa e ngaahi meʻá ni:

Kau atu ʻi he uike kotoa pē (ʻoku meimei ke houa ʻe 2 he uike takitaha ʻi ha māhina ʻe 3).
Ngāueʻi ʻa e ngaahi tukupaá ʻi he lolotonga ʻo e uiké.
Poupouʻi e niʻihi kehe ʻi he kulupú ke nau lavameʻa.
Fakahoko ha ngāue fakauike ʻoku meimei houa ʻe 4 ki he 10 mavahe mei he ngaahi fakataha fakakulupú.

Fakalaulauloto:Ko e fē ʻa e kulupu ʻoku feʻunga mo lelei taha mo hoku tūkungá? ʻOku ou loto fiemālie nai ke fakahoko ʻa e ngaahi tukupaá ni ke moʻui fakafalala ange ai kiate au?

Ngaahi Fakamatala Fakanounou ʻo e Kulupú

ʻI he ngaahi kulupu kotoa ʻe fā ʻo e moʻui fakafalala pē kiate kitá, ʻoku ako mo akoako ai ʻe he kau mēmipá ʻa e ngaahi tefitoʻi moʻoni mei he tohi Ko Hoku Fakavaʻe ki he Moʻui Fakafalala Pē Kiate Kitá. ʻOku fakahoko ʻeni ʻi he kamataʻanga ʻo e ngaahi fakataha fakakulupu takitaha, hangē ko hono ako e ngaahi tefitoʻi moʻoni mo e ngaahi pōtoʻi ngāue ʻoku tokoni ki he kau mēmipa ʻo e kulupú ke fakalakalaka fakatuʻasino mo fakalaumālie, neongo pe ko e hā e hala kuo filí. ʻE maʻu ʻe he kau mēmipa ʻo e kulupú, ha tui lahi ange ki he mālohi ʻo Sīsū Kalaisi ke tokonaki maʻanautolú. Te nau akoako foki ‘a e ngaahi pōtoʻi ngāué, kau ai hono levaʻi e taimí, fetuʻutakí, mo e solova ʻo e ngaahi palopalemá.

Kumi ha Ngāue Lelei Ange

Kiate kinautolu ʻoku fekumi ki ha ngāue pe ngāue lelei angé. ʻE ako e kau mēmipa ʻo e kulupú ke nau kumi ha ngaahi faingamālie, kulupu fengāueʻaki, fakafeʻiloaki fakapalōfesinale kinautolu, mo teuteu ki he ngaahi ʻinitaviu ngāué. Te nau fokotuʻu foki ha ngaahi taumuʻa ki he ngaahi fetuʻutakí mo e ngaahi ʻinitaviú.

Ngaahi Meʻa Fakapaʻanga Fakatāutahá

Kiate kinautolu ʻoku fie maʻu ke mapuleʻi lelei ange ʻenau ngaahi meʻa fakapaʻangá. ʻE ako ‘e he kau mēmipa ʻo e kulupú e founga ke fakangata ai e fakamoʻuá, maluʻi mei he faingataʻa fakapaʻangá mo fakahū ki he kahaʻú. Te nau faʻu ha palani fakapaʻanga mo muimui ki ha patiseti. ʻOku poupouʻi atu e ngaahi hoa malí ke nau ʻalu fakataha.

Ako ki ha Ngāue Lelei Ange

Kiate kinautolu ʻoku fie ako fakaʻatamai lahi ange pe ako ngāue ke maʻu ha ngāué. ʻE fekumi, fokotuʻu, pea fakaʻaliʻali ʻe he kau mēmipa ʻo e kulupú ha ngaahi palani ngāue maʻuʻanga moʻui mo fakaako. Te nau fakamoleki foki ha taimi ʻi he uike takitaha ke akoako e ngaahi pōtoʻi ngāue te ne tokoniʻi kinautolu ke hoko ko ha kau ako lelei ange.

Ko Hono Kamataʻi mo Fakatupulaki ʻEku Pisinisí

Kiate kinautolu kuo ʻi ai haʻanau pisinisi pe maʻuʻanga tokoni ke kamataʻi ha pisinisí. ʻOku ako ʻe he kau mēmipa ʻo e kulupú ʻa e ngaahi taukei pe pōtoʻi ngāue ʻo e kau maʻu pisinisi lavameʻa īkí. ʻOku nau akoako ke tauhi e ngaahi lekōtí, fakamāketí mo hono levaʻi ʻo e paʻangá. Te nau talanoa mo e kau maʻu pisinisi leleí, ʻa e kau fakataú, mo e ngaahi kautaha hū koloá pea faʻufaʻu ha ngaahi palani ke fakatupulaki ʻenau pisinisí.

Fili ha Kulupu

ʻE tokoniʻi leva koe ʻe ha mēmipa ʻo e kōmiti moʻui fakafalala pē kiate kitá mo fokotuʻutuʻu ke ke kau ki ha kulupu moʻui fakafalala pē kiate kita. Hili hono fili hoʻo kulupú, hiki ʻa e ngaahi fakamatala ko ʻení.

Ko ʻEku Ngaahi Fakataha Fakakulupu Moʻui Fakafalala Pē Kiate Kitá
ʻAhó:
Taimí:
Feituʻú:
Hingoa ʻo e tokotaha tokoní:
Fika telefoní:

Tokotaha tokoní: Mahalo ʻe fie maʻu ʻe he maʻu mafai ʻokú ne tokangaʻí ke vahevahe ha fakamoʻoni nounou.

Fakaʻosi ʻaki ha lotu.

Ngaahi Faingamālie Fakaako ʻa e CES

ʻOku ʻomi ʻe he Polokalama Ako ʻa e Siasí (CES) ha ngaahi faingamālie fakaako ʻoku maʻamaʻa hono totongí ʻa ia ʻe ala maʻu ai ha ngāue ʻoku lelei angé. ʻOku kau ai ʻa e:

Fanga kiʻi kalasi iiki ʻi he ʻinitanetí mo e ako mei he LDS Business College ke tokoniʻi koe ke ke taau ke maʻu ha ngāue pau, fakalakalaka ʻi hoʻo ngāue maʻuʻanga moʻui lolotongá, pe maʻu ha tohi fakamoʻoni ako. ʻOku ʻi ai ha ngaahi kalasi miniti ʻe 15 ki he uike ʻe 12 pea ʻe lava ke maʻu ai ha ʻinitaviu ngāue pau.
Ko e Pathway ko ha polokalama taʻu ʻe taha ia te ne tokoniʻi koe ke ke mateuteu ke hū pe foki ki he ʻunivēsití. ʻOku toʻo ʻe he kau akó ʻa e ngaahi kalasi he ʻinitanetí mo kau ʻi he ngaahi fakataha fakafeituʻu. ʻE lava ʻe he kau akó ʻi heʻenau ʻosí ʻo ngāueʻi ha tohi fakamoʻoni ako pe mataʻitohi ʻi he ngaahi ʻapi ako fakalotofonuá, BYU–Idaho, pe LDS Business College. ʻOku fie maʻu ke lavaʻi ʻa e lea faka-Pilitāniá ʻi he Pathway.

Ke ʻilo ko e hā ʻoku maʻu ʻi ho feituʻú, ʻaʻahi ki he churcheducation.lds.org.

Founga ki hono Fakahoko ʻo ha Fakataha Lotu ʻo e Ko Hoku Halá

Fakahinohino ki ha Kōmiti Moʻui Fakafalala Pē Kiate Kita ʻa e Siteikí

Kimuʻa ʻi he Fakataha Lotú:

Toe vakaiʻi pea fakakakato ʻa e kiʻi tohí ni ʻiate koe pē.
ʻOta ha ngaahi tohi Ko Hoku Hala ki he Moʻui Fakafalala Pē Kiate Kitá feʻunga maʻá e kau akó (store.lds.org).
Fie maʻu ke ʻi ai ha peni pe peni vahevahe feʻunga maʻá e kau akó.
Fokotuʻu ha ngaahi tēpile fuopotopoto feʻunga ʻi he holó.
ʻAi ke tuʻu e kau mēmipa ʻo e kōmiti moʻui fakafalala pē kiate kitá he matapā takitaha, ʻo talitali kinautolu ʻoku haʻú mo tangutu fakataha mo e kau akó ʻi he ngaahi tēpilé.
Fakaafeʻi ha taha kuo kau ʻi ha kulupu kimuʻa ke vahevahe ʻene aʻusia ʻi he fakataha lotú kapau ʻe lava (vakai peesi 9).
ʻAʻahi ki he srs.lds.org/report ke download e Foomu Lipooti Fakataha Lotú ke fakakakato lolotonga e fakataha lotú.

Lolotonga e Fakataha Lotú:

ʻAi ke nofo ha mēmipa ʻe taha ʻo e kōmití ʻi he tēpile kotoa pē ke poupouʻi ʻa e fealeaʻaki fakakulupú mo tokangaʻi e ngaahi meʻa kotoa pē.
Fakamanatu ki he kau akó ke tukuhifo ke fakalongolongo ʻenau ngaahi telefoni toʻotoʻó.
Fakakaukau ke kamata e fakataha lotú ʻaki ha hiva, lotu mo ha lea talitali nounou (miniti ʻe 3–5) mei ha taki lakanga fakataulaʻeiki pe ha mēmipa ʻo e kōmiti fakasiteiki ki he moʻui fakafalala pē kiate kitá.
Muimui ki he tohí ʻo hangē pē ko ʻene hā atú.
ʻAi ke hiki ʻe he tokotaha tokoni kulupu takitaha e hingoa mo e fika telefoni ʻo e tokotaha kotoa ʻoku kau ki heʻene kulupú. ʻI he ʻuluaki fakataha fakakulupú, ʻe fakakakato ‘e he tokotaha tokoni kotoa pē ha foomu lesisita fakakulupu ʻoku toe fakaikiiki angé.
Kapau ʻoku kau ki he siteikí ha ʻēlia fakasiokālafi lahi, ʻe lava ke fakakaukau e kōmiti fakasiteikí ke vahevahe ʻa e ngaahi kulupú ʻo fakatatau ki he feituʻu ʻoku ʻi ai e kau mēmipa ʻo e kulupú.

ʻI he ʻosi ʻa e Fakataha Lotú:

ʻAlu ki he srs.lds.org/report ke fakahū ʻa e ngaahi fakamatala mei he Foomu Lipooti Fakataha Lotú.