Hōho’a

Iesu Mesia ’e te hō’ē māmoe

The Lost Sheep [Te māmoe mo’e], nā Yongsung Kim, havenlight.com

Te maita’i pae tino

4.0

’Ōmuara’a

E tītau te ’ohipa misiōnare i te pūpūra’a iāna i te pae tino ’e i te pae manava. E tauturu mai te mau ture i roto i teie tuha’a ’e i roto i Te fa’atanora’a i te orara’a misiōnare ia ’oe ’ia fa’aineine i tō ’oe ferurira’a ’e tō ’oe tino nō te tāvini maita’i a’e i te Fatu ’e tāna fā. ’A hi’o pinepine i teie mau ture i te roara’a o tā ’oe misiōni.

4.1

Te tāmā’ara’a ’e te fa’aineinera’a mā’a

E mea faufa’a rahi te inura’a maita’i i te pape ’e te tāmā’a-maita’i-ra’a nō tō ’oe maita’i.

4.1.1

Te mau arata’ira’a rahi nō te tāmā’ara’a

’A pe’e i te mau arata’ira’a rahi i muri nei nō te tāmā’ara’a :

’A inu e 6 ē 12 hāpaina pape mā (1,5 ē 3 litera) i te mahana tāta’itahi. Pēnei a’e e tītauhia e inu rahi atu ā i te pape ’e e ’amu i te tahi miti papa’ā mai te mea e tahe rahi tō ’oe hou ’aore rā tē fa’ahā’uti’uti ra ’oe i te tino.
E ’amu i te mā’a fāito au tei roto te mā’a tupu, te mā’a hotu, te terea (céréale), te hinu ea maita’i ’e te porotē’ina.
Fa’aiti i te mā’a ha’apa’ora’a ’ore, te mau soda, te mā’a hāmanihia ’e te mau fare tāmā’ara’a vitiviti.

4.1.2

Te tunura’a mā’a fifi ’ore

Ha’apa’o i te mau arata’ira’a i muri nei nō te ha’apāpū ē e mea fifi ’ore te fa’aineinera’a mā’a :

Horoi i te mau vāhi fa’aineinera’a mā’a i te pape mā ’e te ve’ave’a ’e te pāpu’ahia hou ’a tunu ai i te mā’a ’e i muri iho ato’a.
Horoi i te mau mauiha’a tunura’a mā’a ’e te mau mauiha’a tāmā’ara’a i te pape mā ’e te ve’ave’a ’e te pāpu’ahia i muri iho i te fa’a’ohipara’a i te reira.
Fa’ata’a i te ’īna’i ota, te moa ota, te huero moa ’e te mā’a nō te moana mai i te tahi atu mau mā’a i te taime tunura’a.
Tunu maita’i roa i te ’īna’i, te i’a ’e te moa.
Ha’apae i te ’amura’a i te mā’a ’ama ri’i noa ’aore rā te mā’a ota.
Tipitipi i te pa’a o te mau mā’a hotu ’e te mau mā’a tupu, ’aita ana’e, horoi maita’i i te reira.
Tu’u i roto i te fa’ato’eto’e te mā’a toe ’e te mā’a e ’ino i rāpae. Fa’aru’e i te mā’a tei vaiiho-noa-hia nā rāpae, hau atu i te taime i parauhia i ni’a i te pū’ohu, ’ia ’ore ’oe ’ia ma’ihia.
Tāmata i te ha’apae i te ’amu i te mā’a e ho’ohia i te pae purūmu, ’aita pa’i i pāpū roa te maita’i ’e te fifi ’ore o te mā’a.

Ha’apa’o tāmau noa i teie mau arata’ira’a, noa atu ā e tāmata vetahi ’ē (mai te tahi ato’a mau misiōnare) ’ia parau mai ē, e ’ere i te mea faufa’a rahi roa ’aore rā ’ua rahi roa terā.

Māta’ita’i i teie video nō te ha’amāramaramara’a rahi atu ā nō ni’a i te mā’a maita’i ’e te mā’a fifi ’ore.

4.1.3

Te fifi-’ore-ra’a te pape ’e te mā’a hāmanihia i te ū

’O te pape mā noa ’e te mā’a hāmanihia i te ū tei rapa’auhia tē mea fifi ’ore e inu ’aore rā e ’amu.

Pe’e i teie mau arata’ira’a ’e te tahi atu ā tei hōro’ahia mai e tā ’oe misiōni :

Fa’a’ohipa i te tīti’a pape mai te mea tē tāvini ra ’oe i te hō’ē vāhi ’aita e pape mā.
Fa’a’ohipa i te pape mā nō te purūmu i te niho ’e nō te horoi ’e nō te fa’aineine i te mā’a.
’Amu noa i te mā’a tei rapa’auhia.

’Ia ’ite ’oe ē, tē vai ra te mau vāhi, te pape pa’ari ’e te mau pape tihota i te mau fare tāmā’ara’a ’e i te mau mātete, e ’ere i te pape tei tāmāhia. Hi’o maita’i, ’eiaha e rave i te pape pa’ari ’aore rā te pape tihota mai te mea e ’ere i te mea fifi ’ore.

4.2

Fa’ahā’uti’uti i te tino

E mea maita’i ’ia fa’ahā’uti’uti i te tino nō te ea, e tauturu te reira i te fa’a’ore i te urupu’upu’u. ’A fa’ariro i te reira ’ei ’ohipa mataro i te mahana tāta’itahi (hi’o 2.4.2). Tāniuniu i te piha tōro’a o te misiōni mai te mea e uira’a tā ’oe. Pe’e i te mau arata’ira’a ta’a ’ē o te misiōni, nā reira ato’a te mau arata’ira’a rahi i muri nei :

Rave i te mau fa’ahā’uti’utira’a tino ’e’ē i roto i te hepetoma, mai te fa’ahā’uti’utira’a nō te māfatu, te pūai ’e te fatifatira’a tino. Nō te pāruru ia ’oe, ’eiaha e rave i te amora’a tāpau.
Mai te mea e mātini ’āfa’ifa’i tā ’oe, e nehenehe ’oe e fa’a’ohipa i te hō’ē fa’anahora’a ha’amanahia e tō ’oe feiā fa’atere misiōni nō te fa’anaho i tā ’oe fa’ahā’uti’uti tino.
’Eiaha e rave i tā ’oe fa’ahā’uti’utira’a tino i te mau vāhi ta’ata ’aore rā te mau fare fa’ahā’uti’utira’a tino.

4.3

Ha’apa’o i te urupu’upu’u

E ’ohipa tītau rahi te ’ohipa misiōnare, ’e e nehenehe iho ā te urupu’upu’u ’ia tupu i terā taime ’e terā taime. E nehenehe e fa’aineine i tō ’oe tino ’e tō ’oe ferurira’a nō te ha’apa’o maita’i a’e i te urupu’upu’u maoti te tauturu a te ’utuāfare (hi’o 3.9.1) ’e maoti te peu ’amura’a mā’a ea maita’i (hi’o 4.1.1), te fa’ahā’uti’uti-pinepine-ra’a i te tino (hi’o 4.2), te ta’oto-maita’i-ra’a, te tu’utu’ura’a (relaxation) ’e te ’ohipa pae vārua (mai te pure, te ferurira’a ’e te ha’api’ira’a i te mau ha’api’ira’a).

I te roara’a o tā ’oe misiōni, e fa’a’ohipa i Te fa’atanora’a i te orara’a misiōnare nō te tauturu ia ’oe ’ia ha’apa’o i tō ’oe urupu’upu’u nō te tauturu ato’a i te tahi atu mau misiōnare. Mai te mea tē huru fifi ra ’oe ’e tō ’oe hoa misiōnare ’ia ha’apa’o i te urupu’upu’u ma te rāve’a au, ’aore rā tē vai ra te ’ohipa rū, ’a tāniuniu i tō ’oe feiā fa’atere misiōni.

Mai te mea tē vai ra tā ’oe rā’au nō te urupu’upu’u, ’a ha’apa’o i te reira, nā reira ato’a tei parauhia mai e te taote.

’Ua feruri te ’āpōsetolo Paulo i tāna mau tauto’ora’a misiōnare ’e ’ua ha’api’i ē, e pāturu, e turu ’e e tauturu te Fatu i te ta’ata e ’imi iāna. E’ita te Fatu e fa’aru’e ia ’oe. ’Ua ha’api’i Paulo ē :

« ’O te Atua ho’i ’o tei fa’aue i te māramarama ’ia ’ana’ana mai nā roto i te pōuri ra, ’o tei ’ana’ana mai ïa i roto i tō tātou ’ā’au, ’ia noa’a te māramarama o te ’ite i te hanahana o te Atua i te mata o Iesu Mesia ra […] ’Ua ’āti mātou i te pohe ’aita rā i apiapi ; ’ua pe’ape’a mātou, ’aita rā i ahoaho ; ’ua hāmani-’ino-hia, ’aita rā i fa’aru’e-roa-hia ; ’ua hurihia i raro, ’aita rā i pohe roa […] Nō te mea rā tei ia mātou ato’a taua ’ā’au fa’aro’o ra mai tei pāpa’ihia ra ē, ’Ua fa’aro’o vau, nō reira vau i parau ai ; ’ua fa’aro’o ato’a mātou i parau ai mātou nei […] « Tō tātou ho’i pohe iti poto māmā i teienei, tē fa’atupu nei ïa i te ora rahi roa teimaha ’e te mure ’ore nō tātou » (2 Korinetia 4:6, 8–9, 13, 17).

Nō te tahi atu ā ha’amāramaramara’a, hi’o i te tuha’a 7.6, « Te mau vaira’a fifi ».

4.4

Te utuutura’a a te taote

Ha’apa’o māite i te ea o tō ’oe tino ’e te manava. ’A fa’aara i te ta’ata ha’apa’o ea a te misiōni nō ni’a i tō ’oe mau fifi pae ea ato’a (mai te rā’au tā ’oe e rave nei, tō ’oe mau tatira’a (allergies), ’aore rā te mau ’ohipa ri’i e mea tītauhia ia ’oe ’ia ha’apae) ’ia tauturuhia ’oe nō te reira. ’A tāniuniu i te piha tōro’a o te misiōni mai te mea noa atu e uira’a tā ’oe nō ni’a i te fifi ea.

Nō tō ’oe pārurura’a :

’Eiaha e ’ōpere i tā ’oe mau rā’au nā te tahi noa atu ta’ata, ’aore rā ’eiaha e fa’a’ohipa i tā te tahi atu rā’au.
’Eiaha e tītau i te ’utuāfare ’aore rā te mau hoa ’ia hāpono mai i te rā’au tei ’ōpanihia i roto i te fenua ’aore rā te vāhi tei reira ’oe i te tāvinira’a.

Mai te mea e ’ohipa rū i te pae nō te ea, e feruri noa i te ’ohipa tano e rave i reira iho nō te pāruru ia ’oe ’aore rā nō te rapa’au ia ’oe. ’A tāniuniu i te mau piha ’ohipa rū i reira (mai te 911 i te Fenua Marite), mai te mea rā ē ’ua hōro’ahia mai te tahi mau arata’ira’a i roto i tā ’oe misiōni, ’a pe’e ïa i te reira. I muri noa iho, ’a tāniuniu i te feiā fa’atere misiōni.

Mai te mea e tītauhia te rapa’aura’a rū ’ore, ’a tāniuniu i te ta’ata ha’apa’o ea a te misiōni i reira ra. Nō te mau hi’opo’ara’a taote rū ’ore, tītauhia te parau fa’ati’a a te ta’ata ha’apa’o ea. E nehenehe te ta’ata ha’apa’o ea e fa’atoro ia ’oe i te taote i tō ’oe vāhi.

Nō te tahi atu ā ha’amāramaramara’a, hi’o i te tuha’a 7.7, « Te mau fifi pae tino ’e pae manava ».

4.5

Te mau mea ataata ’e te ha’amata’u

E mau mea ataata e rave rahi tē nehenehe e ’apehia maoti te ferurira’a au ’e te ha’apa’ora’a i te mau ture a te misiōni, mai te fa’aeara’a i te vāhi e nehenehe ’oe e hi’o ’e e fa’aro’o i tō ’oe hoa misiōnare. Terā rā, e nehenehe te ta’ata e ha’apēpē ia ’oe noa atu ā tē tāmata ra ’oe i te pāruru ia ’oe Mai te mea e tupu te hō’ē fifi, ’a fa’a’ite i te reira i te hō’ē o te feiā fa’atere misiōni, i terā ra iho taime.

’A fa’aru’e i te hō’ē vāhi i reira iho mai te peu e mea huru ’ē terā vāhi, ’aore rā terā mau ta’ata ’aore rā terā vaira’a nō ’oe ’aore rā nō tō ’oe hoa misiōnare (noa atu e ha’api’ira’a). ’A fa’aro’o i te mau muhumuhu pae vārua. E nehenehe ’oe e vaiiho i tō ’oe hoa misiōnare mai te mea tē mana’o ra ’oe ē, e mea ataata ’oia nō ’oe. Mai te mea e vaiiho ’oe i tō ’oe hoa misiōnare, ’a pi’i i te hō’ē o tō feiā fa’atere misiōni i reira ra.

Nō te tahi atu ā ha’amāramaramara’a, hi’o i te tuha’a 7.8, « Te mau vaira’a fifi ».

4.6

Te vāhi fa’aeara’a

’A fa’a’ite i te fa’atura nō tō ’outou vāhi fa’aeara’a, te ta’ata nōna te fare ’aore rā te ta’ata fāri’i, ’e nō te veutupura’a. Mai te mea e tū’ino ’oe i te hō’ē mea, nā ’oe e ’aufau i te tātā’ira’a i ni’a tā ’oe iho moni. ’A paraparau i te ta’ata ha’apa’o fare a te misiōni mai te mea tē fifi ra ’oe i tō ’ōrua vāhi fa’aeara’a.

Nō te tahi atu ā ha’amāramaramara’a, hi’o i te tuha’a 7.9, « Te ’ohipa ataata ’ore i te fare ».

4.7

Te utara’a

’A ha’apa’o noa i te mau fa’aturera’a ’e te mau ture purūmu, nā reira ato’a te peu o te fenua ’a tere ai ’oe nā ni’a i te faura’o. ’A fa’a’ohipa i te ferurira’a au, ’a vai ara i te ta’ata ’ati a’e ia ’oe, ’a ha’amātau i tō ’outou vāhi ’e ’a pe’e i te mau ture pārurura’a rahi i roto i teie buka arata’i.

Nō te tahi atu ā ha’amāramaramara’a, hi’o i te tuha’a 7.10, « Te utara’a ataata ’ore ».

4.8

Te moni

Te moni tauturu nō te misiōnare, e tusia ïa a te mau melo tāta’itahi o te ’Ēkālesia. E moni mo’a te reira, ’ia fa’a’ohipa ’oe i te reira ma te pa’ari, te ha’avare ’ore ’e te ’āfaro roa e ti’a ai.

4.8.1

Te moni tauturu nō te misiōnare

’A fa’a’ohipa i te moni tauturu nō te misiōnare nō te ’aufau i tā ’oe mau mea, ’o tē turu ia ’oe i roto i tā ’oe ’ohipa misiōnare. Ta’a ’ē noa atu te tahi ri’i tumu ta’a ’ē, i te rahira’a taime e fa’a’ohipa ’oe i te tā’āto’ara’a o te moni tauturu nō te misiōnare o te ’āva’e tāta’itahi. ’Eiaha e fa’aherehere i te reira moni misiōni ’aore rā ’eiaha e hōro’a i te reira i te tahi atu ta’ata, ’e tae noa atu te ta’ata i tō ’oe fare. ’Eiaha e tāparu ’aore rā e tārahu atu i te moni.

I roto i tā ’oe tāpura ha’amāu’ara’a nō te moni tauturu nō te misiōnare, tē vai ra :

Te ’aufaura’a i te ō ha’apaera’a mā’a i te pāroita ’aore rā te ’āma’a i reira ’oe te tavinira’a.
Te mau mea nō te fa’aineinera’a i te mā’a maita’i (hi’o 4.1.1).
Te utara’a, mai te mōrī ’aore rā te pere’o’o mata’eina’a.
Te ’atu’atura’a i te rouru ’e te mau mea tāmā tino.
Te mau mea tāmāra’a fare ’e te pu’ara’a ’ahu.
Te mau ha’amāu’ara’a i te fare rata ’e te mau ha’amāu’ara’a nō te natirara, nō te tāniuniu i te fare i te mau hepetoma ato’a (hi’o 3.8).
Te tahi mau tāmā’ara’a ri’i noa i te fare tāmā’ara’a, te fare tāmā’ara’a mātauhia ’e te fare tāmā’ara’a vitiviti.

’Aita e tītauhia ’ia ’aufau i te tuha’a ’ahuru i ni’a i te moni tauturu nō te misiōnare.

Hi’o i te 4.8.2 nō te tāpura tauiha’a e ’aufau i tā ’oe iho moni.

4.8.2

Tā ’oe iho moni

Tā ’oe iho moni, ’o te moni ïa tei fa’atae-’āfaro-hia ia ’oe mai te fare mai. ’A fa’a’ohipa i tā ’oe iho moni nō te mau tauiha’a mai teie :

Te ’ahu ’e te tia’a ’āpī.
Te ho’ora’a, te ’atu’atura’a ’e te tātā’ira’a i tō ’oe pere’o’o ta’ata’ahi.
Nō te mau rā’au e ’ere nā te misiōni e ’aufau, mai tā te ta’ata iho tuha’a ’aufaura’a nō te rapa’aura’a, te mau hi’opo’ara’a mata ’e te niho ’e te tahi atu ā rapa’aura’a tei vai a’ena nā mua a’e i te misiōni.
Te mau fa’autu’ara’a moni i ni’a i te purūmu ’e i ni’a i te vāhi tāpe’ara’a pere’o’o.
Te mau tātā’ira’a o te fare mai te mea nā ’oe i vāvahi.
Te mau mātini ha’uti rīpene ’e ha’uti video.
Te mau tao’a ha’amana’ora’a ’e te mau tao’a hōro’a.

Te tuha’a ’ahuru i ni’a i tā ’oe iho moni ’e i ni’a i te ’āpī o te hō’ē taiete ’aore rā te hō’ē fa’a’ohipara’a faufa’a (investissement) i tō ’oe fare, ’ia ’aufauhia te reira i tā ’oe iho moni, nā roto i tā ’oe pāroita tumu ’aore rā nā roto i te ō nā ni’a i te natirara.

4.8.3

Te fa’anahora’a nō te fa’arava’ira’a iāna iho ’e te tāpura ha’amāu’ara’a

’A riro ’ei ta’ata fa’arava’i iāna iho i roto i tā ’oe misiōni maoti te ha’amaura’a ’e te pe’era’a i te hō’ē tāpura ha’amāu’ara’a. E riro te reira ’aravihi i te tauturu ’e i te ha’amaita’i ia ’oe i tō ’oe orara’a tā’āto’a. ’Eiaha e ani i tō ’oe mau hoa misiōnare ’aore rā te ’utuāfare i te tahi fa’ahou moni maoti rā nō te mau ’ohipa rū.

Te ha’amaura’a ’e te pe’era’a i te hō’ē tāpura ha’amāu’ara’a, ’oia ato’a ïa te tāpurara’a i te mau mea e ho’o nō te ’āva’e ’ei reira e mā’iti ai e aha te mau tauiha’a faufa’a roa nō te ’aufau nā mua i te reira. Mā’iti nā mua i tei tītauhia, i muri mai e mā’iti atu ai i te mea hina’arohia.

Mai te mea ’ua hina’aro ’oe i te tahi atu ā moni, ’aore rā e mau uira’a tā ’oe nō ni’a i te mau ha’amāu’ara’a, ’a paraparau i te pāpa’i parau i te pae nō te moni ’aore rā i tō ’oe feiā fa’atere misiōni.

4.9

Te ’ahu ’e te hōho’a

’Ei ti’a mana nō Iesu Mesia ’e nō tāna ’Ēkālesia i fa’aho’ihia mai, pinepine ’o tō ’oe hōho’a te poro’i mātāmua tā te ta’ata e fāri’i. ’Ia tū’ati te reira i te poro’i mo’a tei pi’ihia ’oe ’ia fa’a’ite. I te roara’a o tā ’oe misiōni, ’a hi’o maita’i ē, e tauturu tō ’oe hōho’a ’e tō ’oe huru i te ta’ata ’ia fa’atumu i ni’a i terā poro’i.

4.9.1

Te mau ture rahi nō ni’a i te ’ahu ’e te hōho’a

Tē vai ra te tahi mau ’ahu ’e te tahi huru ’ahu tei parauhia ’ia ’ō’omo nō te tū’ati i te ta’ere ’e te huru o te reva o tā ’oe misiōni. I te mahana fa’aineinera’a, e ’ō’omo i te mātauhia nō te misiōnare i mua i te ta’ata. Terā rā, mai te mea e ’ohipa ri’i ta’a ’ē, e nehenehe e ’ō’omo i te tahi atu ’ahu. Hi’o na i te mau fa’aturera’a tei ’itehia i ni’a ia ChurchofJesusChrist.org/callings/missionary/dress-and-appearance Tē hōro’a nei teie tahua natirara i te tahi hi’ora’a nō te ’ahu tano ’e te tura nō tā ’oe misiōni. E nehenehe tō ’outou feiā fa’atere misiōni, nā reira ato’a te peresidenira’a ārea, e taui i teie mau arata’ira’a, nō te fa’atano i te vaira’a o te mau mea i reira.

Hi’o i te 7.7.4 nō te tahi atu ā parau nō ni’a i te pārurura’a i tō ’oe ’iri i te mau hōhonira’a ’ānimara ’e te mau manumanu.

4.9.2

Te mau fa’aturera’a rarahi no te fa’anehenehera’a

Pe’e i te mau fa’aturera’a nō ni’a i te fa’anehenehera’a tano :

Hopu i te pape i te mau mahana tāta’itahi, mai te mea e nehenehe.
’A purūmu pinepine i te niho.
’A fa’a’ohipa i te fa’ano’ano’a i te mahana tāta’itahi.
’A horoi pinepine i tō ’oe rouru.
’A horoi pinepine i tō ’oe rima, nā mua a’e i te fa’aineinera’a i te mā’a ’e i muri iho i te haerera’a i te haumiti.
’A parai i te mono’i pāruru mahana.
’A mā’iti i te hōho’a rouru ’āfaro maita’i, te mea ’ōhie ’ia tāpe’a noa.