Tomai Faataitai 2

Faaaoga Tusitusiga Paia i Lou Aoao Atu

O loo i ai i tusitusiga paia afioga a le Atua ma e mafai ona i ai se aafiaga mamana ia i latou o e faitauina. O le faaaogaina o tusitusiga paia i lo tatou aoao atu o se auala aoga lea e fesoasoani ai i isi ia o mai ia Iesu Keriso.

Taitai o talanoaga: Taumafai ia faapuupuu i vaega o le “Faamatalatala” ma le “Faapupula” ina ia tele ai le taimi o tagata aoao e faataitai ai.

Faamatalatala

Taitai o talanoaga: Ina ia faailoa atu le autu mo lenei faataitaiga o tomai, valaaulia tagata aoao e sue le mataupu e 10 o le Tala’i La’u Talalelei (2023) ma sue le ulutala “Faaaoga ia Tusitusiga Paia” i le itulau e 182. Ona faasoa atu lea o faatonuga nei:

Faitau le parakalafa muamua ma le lisi ua faailogaina i le “Faaaoga ia Tusitusiga Paia” (Tala’i La’u Talalelei, 182). Vaavaai mo mafuaaga e taua ai le faaaogaina o tusitusiga paia a o tatou aoao atu le talalelei a Iesu Keriso.

• O le a se mea na e aoaoina?

Taitai o talanoaga: Faamalamalama atu o laasaga nei e mafai ona fesoasoani ia i tatou e faaaoga lelei ai tusitusiga paia i a tatou aoaoga. Faaali atu laasaga nei ina ia mafai e tagata a’oa’o ona faasino i ai i le gaoioiga faataitai atoa.

• Folasia atu le mau (e aofia ai le talaaga ma le talafaasolopito).

• Faitau le mau (fesoasoani e faamatala lona uiga ma faamatala upu faigata).

• Faaaoga ia tusitusiga paia.

Taitai o talanoaga: O laasaga taitasi e tolu o loo lisiina o se ulutala i le mataupu e 10 o le Tala’i La’u Talalelei (itulau e 183). Suesue faatasi nei vaega o le Tala’i La’u Talalelei e fesoasoani ai i tagata a’oa’o ia malamalama i le auala e mafai ai ona latou faaaogaina ma le mataalia ia tusitusiga paia i a latou aoaoga. Taulai atu i le auala o le a fesoasoani ai le mulimuli i nei mataupu faavae i tagata latou te aoaoina e latalata atili atu ai i le Faaola.

Faapupula

Taitai o talanoaga: Faasino le vasega i le pusa “Suesuega a le Tagata Lava Ia pe Faalesoa” i le itulau e 184 o le Tala’i La’u Talalelei. Filifili se tasi o fuaitau o mau mai le gaoioiga ma faaaoga e faapupula ai laasaga sa e aoaoina.

Faataitai

Taitai o talanoaga: Faasoa atu faatonuga nei. Tuu atu i tagata o le vasega se taimi e saunia taitoatasi ai ona faataitai lea ma se paga.

Faamaea le gaoioiga o le “Suesuega a le Tagata Lava Ia pe Faalesoa” o loo maua i le faaiuga o le vaega “Faaaoga ia Tusitusiga Paia” o le mataupu e 10 (Tala’i La’u Talalelei, 184).

Taitai o talanoaga: A maea tagata aoao, valaaulia i latou e faataitai i se paga le faailoaina atu o mau na latou filifilia. A maea ona faataitai e tagata o le vasega, e mafai ona e tofia tagata taitoatasi e galulue faatasi ma se isi paga ma valaaulia i latou e toe faataitai.

Faaaoga

Taitai o talanoaga: Faasoa atu se valaaulia e pei o lenei e fesoasoani ai i tagata aoao e faaaoga lenei tomai:

I le vaiaso a sau, vaavaai mo se avanoa e mulimuli ai i laasaga ua e aoaoina mo le faaaogaina lelei o tusitusiga paia. E mafai ona e faia lenei mea i le suesueina o tusitusiga paia faaleaiga, afiafi faaleaiga, ma se uo, i se nofoaga faalelotu, po o se vaega o au taumafaiga e auauna atu i isi.