Wok blong Givhan
Mekem Givhan Wok I Wan Wok blong Stap Glad
Ol Prinsipol

Ol Givhan Prinsipol

Mekem Givhan Wok I Wan Wok blong Stap Glad

Blong stap givim seves wetem lav, i tekem glad i go long hem we i givim samting, mo hem we i kasem samting.

Liahona, Epril 2019

Pikja
Jesus with the leper

MAN WE I KASEM LEPROSI WE I TALEM TANGKYU, I KAM LONG JOHN STEEL

Samtaem, taem yumi stap lukaotem hapines long laef ia, i olsem se yumi stap ron antap long masin blong eksasaes ia. Yumi ron, yumi ron gogo, be yet, yumi filim se yumi no go kasem eni ples yet. Long sam, tingting ia blong givhan long ol narawan, i olsem se bae yumi mekem moa.

Be Papa blong yumi long Heven i wantem yumi blong gat eksperiens ia blong stap filim glad ia, mo Hem i bin talem long yumi se: “ol man oli stap, blong oli save gat glad” (2 Nifae 2:25). Mo Sevya i bin tijim se fasin blong givhan long ol nara man, i wan stamba pat blong wei we yumi tekem glad i kam insaed long ol laef blong yumi, mo insaed long ol laef blong ol narawan.

?Wanem Ia, Glad?

Glad, oli talem se hem i wan “filing blong bigfala harem gud mo hapines.”1 Ol Lata-dei profet oli bin mekem hemia i moa klia taem oli talem weaples nao glad i kam long hem, mo olsem wanem nao yumi faenem. “Glad we yumi filim, i no from ol situesen blong laef blong yumi, be hem i from samting we yumi lukluk faswan long laef blong yumi,” hemia Presiden Russel M. Nelson i bin talem. “… Glad i kam long Jisas Kraes, mo from Jisas Kraes. Hem i stamba blong evri glad.”2

Wok blong Givhan I Tekem Glad I Kam

Taem Lihae i tekem mo kakae frut blong tri blong laef, sol blong hem i bin fulap long wan “bigfala glad we i bigwan tumas” (1 Nifae 8:12). Fasfala filing blong hem, i blong serem frut ia wetem olgeta we hem i lavem.

Fasin blong yumi, blong glad blong givhan long ol nara man i save tekem kaen glad ia i kam long yumi, mo i go long olgeta. Sevya i bin tijim ol disaepol blong Hem se frut we yumi karem taem yumi joen long Hem, i help blong tekem i kam long yumi, wan glad ia we i fulwan (luk long Jon 15:1–11). Taem yumi mekem wok blong Hem, blong givim seves mo tekem ol narafala man oli kam long Hem, i save stap olsem wan eksperiens we i gat fulap glad long hem (luk long Luk 15:7; Alma 29:9; Doktrin mo Ol Kavenan 18:16; 50:22). Yumi save gat glad ia iven sapos yumi stap fesem agens, mo sapos yumi stap safa (luk long 2 Korin 7:4; Kolosi 1:11).

Sevya i bin soem yumi eksampol ia we i stret evriwan, se, wan long ol nambawan ples blong kasem tru glad long laef long wol ia, hem i tru long seves. Taem yumi givhan long ol brata mo sista blong yumi, semmak olsem Sevya i bin mekem, wetem jareti mo lav insaed long hat blong yumi, bae yumi save filim glad ia we i go i bitim simpol hapines.

“Taem yumi akseptem mo mekem wok blong givhan wetem wan hat we i wantem mekem, bambae yumi stap kam kolosap blong kam Saeon pipol, mo bae yumi filim bigfala glad wetem olgeta we yumi bin helpem olgeta folem rod ia blong stap disaepol;” hemia Sista Jean B. Bingham, Rilif Sosaeti Jeneral Presiden nao i bin tijim.3

?Olsem Wanem Nao Yumi Save Mekem se I Gat Moa Glad Insaed long Wok blong Givhan?

I gat plante wei blong tekem moa glad i kam insaed long wok blong yumi blong givhan. Hemia samfala tingting:

  1. Andastanem stamba tingting blong yu long wok blong givhan. I gat plante risen blong givhan. Long en, ol traehad blong yumi oli mas ron stret wetem ol stamba tingting blong God “blong mekem man i nomo save ded mo i kasem laef we i no save finis” (Moses 1:39). Taem yumi stap akseptem invitesen blong Presiden Russel M. Nelson blong helpem ol narawan folem rod ia blong kavenan, yumi save faenem glad blong stap tekpat long wok blong God.4 (Blong gat moa long saed blong stamba tingting blong stap givhan, luk long “Ol Prinsipol blong Givhan: Stamba Tingting we Bae I Jenisim Givhan blong Yumi,” insaed long Liahona blong Jenuware 2019.

  2. Mekem wok blong givhan i abaot ol pipol, be i no ol wok blong mekem. Presiden Thomas S. Monson, plante taem i bin mekem yumi tingbaot: “Neva letem wan problem we yu mas stretem i kam moa impoten bitim wan man we i nidim lav.”5 Givhan i abaot fasin blong lavem ol pipol, i no abaot fasin blong mekem ol samting. Taem yumi stap kam antap blong lavem man olsem we Sevya i bin mekem, bambae yumi moa open long glad ia we i kam taem yumi givim seves long ol narafala man.

  3. Mekem givhan wok i simpol nomo. Presiden M. Russell Ballard, Akting Presiden blong Kworom blong Olgeta Twelef Aposol, i stap talem long yumi: “Ol bigfala samting oli kam blong hapen tru long ol simpol mo smol samting. … Ol smol mo simpol aksen blong kaen fasin mo seves, bambae oli hipap i stap i go kasem wan laef we i fulap long lav long Papa long Heven, wetem strong tingting long wok blong Lod Jisas Kraes, mo wetem wan filing blong pis mo glad evri taem we yumi go helpem wan narawan.”6

  4. Tekemaot hevi tingting long wok blong stap givhan. Hem i no responsabiliti blong yu blong wokemaot rod blong wan, blong Lod i sevem hem. Hemia i bisnis blong wanwan wetem Lod. Responsabiliti blong yumi, hem i blong lavem olgeta mo helpem olgeta blong tanem olgeta i go long Jisas Kraes, we i Sevya blong olgeta.

Pikja
Jesus with children

KRAES WETEM OL PIKININI LONG BUK BLONG MOMON, I KAM LONG DEL PARSON

No Karemaot Glad ia blong Stap Givim Seves

Samtaem, sam pipol oli no wantem askem help, mekem se, blong yumi givim seves blong yumi, bae i stret samting ia we oli nidim. Be blong fosem olgeta blong akseptem help blong yumi, hemia i no ansa tu. Blong askem raet bifo yumi givhan, hemia i wan gud tingting.

Elda Dieter F. Uchtdorf blong Kworom blong Olgeta Twelef Aposol, i tokbaot wan singgel mama we i gat misel—mo afta, ol pikinini blong hem tu, oli sik. Haos ia, we oltaem i klin, i kam doti wetem ol samting olbaot. Ol plet mo klos blong wasem, oli hipap.

Blong smol taem, sista ia i filim se ol samting i go tumas; be ol sista blong Rilif Sosaeti oli noknok long doa blong hem. Oli no talem: “Sapos mifala i save help, bae yu jes talem.” Taem oli luk situesen we i stap, oli jiam, oli tekem aksen.

“Oli kliarem ol samting we oli stap olbaot, oli mekem laet mo klia lukluk i kam insaed long hom, mo oli ringim wan fren blong i karem plante kaekae we haos ia i nidim. Taem we, long en, oli finisim wok blong olgeta mo oli talem tata, oli lego yangfala mama ia i stap krae—i krae from hem i fulap long tangkyu mo lav”7

Tufala tugeta, hem we i givim samting, mo hem we i kasem samting, tugeta i filim glad ia we i mekem hat blong tufala i wom.

Stap Praktisim Glad long Laef blong Yu

Moa bae yumi save praktisim, insaed long laef blong yumi, fasin blong gat moa glad, moa pis mo moa filing blong filim hapi, moa bae yumi save serem samting wetem ol narawan taem yumi stap givhan. Glad i stap kam tru long Tabu Spirit (luk long Galesia 5:22 mo Doktrin mo Ol Kavenan 11:13). Hem i wan samting we yumi save prea blong kasem (luk long Doktrin mo Ol Kavenan 136:29) mo invaetem insaed long laef blong yumi. Hemia sam tingting blong save praktisim glad insaed long laef blong yumi:

  1. Kaontem ol blesing blong yu. Taem yu stap luklukgud insaed long laef blong yu, raetemdaon insaed long jenol blong yu ol samting we God i blesem yu wetem.8 Tekem not long evri gud samting raon long yu.9 Lukluk gud long wanem i stap holemtaet yu blong filim glad, mo raetemdaon ol wei blong stretem ol samting ia, o blong andastanem gud moa ol samting ia. Long taem blong Ista taem ia, tekem taem blong lukaotem sam wei blong joen gud moa wetem Sevya (luk long Doktrin mo Ol Kavenan 101:36).

  2. Praktisim fasin blong gat tingting long ol narawan. Glad i kam moa isi long yu long ol taem we yu stap tingting long wan ples we i kwaet gud.10 Lisin gud long wanem i tekem glad i kam long yu (luk long 1 Kronikel 16:15). Samtaem, i nid blong tekem sam taem longwe long media, blong praktisim fasin blong gat tingting long ol narawan.11

  3. Stap longwe long fasin blong stap komperem yu long narawan. Oli talem finis se fasin blong stap komperem yu long narawan, i wanem we i stap stilim glad blong yu. Pol i givim woning ia se, “I gat sam man oli stap, we oli ting se oli haeman. Olgeta nomo oli putum mak blong makem olgeta, se hu i hae man mo hu i no haeman. Nao olgeta nomo oli stap jajem olgeta, from tingting blong olgeta. Be olgeta ya oli krangke nomo. Mifala i luk se i no stret blong mifala i go stanap wetem olgeta, blong makem se hu i hae moa” (2 Korin 10:12).

  4. Lukaotem revelesen blong yuwan. Sevya i tijim: “Sapos yufala i askem, bambae yufala i kasem wan revelesen folem nara revelesen, wan save folem nara save, blong yufala i save ol sikret mo ol trutok blong kingdom we bae oli givim pis—we oli tekem glad i kam, we oli tekem laef we i no save finis i kam.” (Doktrin mo Ol Kavenan 42:61).

Invitesen blong Tekem Aksen

?Olsem wanem nao yu save mekem glad insaed long laef blong yu i kam antap moa tru long wok blong givhan?

Ol Not

  1. “Joy,” en.oxforddictionaries.com

  2. Russell M. Nelson, “Joy and Spiritual Survival,” Liahona, Nov. 2016, 82.

  3. Jean B. Bingham, “Givhan Olsem we Sevya I Mekem,” Liahona, Mei 2018, 104.

  4. Luk long Russell M. Nelson, “Taem Yumi Stap Muv Tugeta I Go Fored, Liahona, Epril 2018, 4–7.

  5. Thomas S. Monson, “Finding Joy in the Journey,” Liahona, Nov. 2008, 86.

  6. M. Russell Ballard, “Finding Joy through Loving Service,” Liahona, May 2011, 49.

  7. Luk long Dieter F. Uchtdorf, “Living the Gospel Joyful,” Liahona, Nov. 2014, 120–123.

  8. Luk long Henry B. Eyring, “O Remember, Remember,” Liahona, Nov. 2007, 67.

  9. Jean B. Bingham, “Blong Yufala I Save Glad Oltaem,” https://www.lds.org/general-conference/2017/10/that-your-joy-might-be-full?lang=bis, Okt 2017.

  10. Luk long Dieter F. Uchtdorf, “Of Things That Matter Most,” Liahona, Nov. 2010, 21.

  11. Luk long Gary E. Stevenson, “Eklips long Saed blong Spirit,” https://www.lds.org/general-conference/2017/10/spiritual-eclipse?lang=bis, Nov. 2017.