Mga Parkinganan sa Meetinghouse

Mga Lagda bahin sa mga Parkinganan alang sa Estados Unidos ug Canada

Alang sa mga lider sa Estados Unidos ug Canada ang mosunod nga impormasyon mahitungod sa paggamit sa mga parkinganan, magamit nga parkinganan alang niadtong adunay mga kakulangan, ug dagkong mga basurahan. Mahimong makatabang kini niadtong anaa sa ubang mga dapit. Hinoon, ikonsiderar ang lokal nga mga regulasyon ug mga panginahanglan, ug mokonsulta sa inyong lokal nga manedyer sa mga pasilidad alang sa tukma nga aplikasyon.

Paggamit sa Parkinganan

Agi og dugang sa mga lagda nga makita diha sa 35.5.8 sa Kinatibuk-ang Tamdanan nga Basahon, hinumdomi nga ang pagpa-parking sa ubang mga organisasyon o mga indibidwal magbutang sa Simbahan ngadto sa mga risgo, mga tulubagon, ug mas dakong kantidad sa pagmentinar. Makamugna kini og negatibong mga epekto sa real-estate ug posibling mawad-an sa pribilehiyo nga walay apil sa pagbayad og buhis alang sa kabtangan. Bisan ang paggamit sa parkinganan alang sa mga kalihokan sa kabatan-onan aron sa pagpangita og pundo (depende sa matang sa kalihokan) mahimong mosangpot ngadto sa bayranan sa buhis alang sa kabtangan ug buhis sa kinitaan.

Ang bisan unsang mga eksepsiyon sa polisiya kinahanglang ikoordinar ngadto sa inyong lokal nga manedyer sa mga pasilidad ug aprobahan sa direktor sa temporal nga mga kalihokan. Ang mga eksepsiyon kinahanglang makabenepisyo sa Simbahan (sama sa paglikay sa mga kasungian sa paggamit sa Simbahan), malikay sa legal nga mga problema, ug mahatagan sa tukmang mga pag-aprobar sa dili pa ihatag ang pagtugot sa paggamit.

Agi og dugang sa mga parkinganan, ang mga pananglitan sa mga paggamit sa komon nga kabtangan nga nagkinahanglan sa pag-aprobar naglakip sa mga paggamit sa kabtangan sa Simbahan, mga ganghaan, komon nga mga agianan, mga isyu sa utlanan, ug mga kasabotan sa katungod sa dalan.

Gigahin nga Magamit nga Parkinganan

Ang gidaghanon sa magamit nga luna nga parkinganan sa mga tawo nga adunay mga kakulangan, sama sa gikinahanglan sa lokal nga pamalaod, gimarkahan nga anaa sa saktong sumbanan. Hinoon, ang mga bishop o mga lider sa stake mahimong mohangyo sa manedyer sa mga pasilidad sa pagmarka og dugang pa nga magamit nga mga luna kon gikinahanglan.

Alang sa mga miting sa dagkong mga pundok, sama sa komperensiya sa stake, ang lokal nga mga lider mosiguro ug (bisan temporaryo lang) mogahin og igong magamit nga parkinganan. Ang mga bishop makigkoordinar sa ubang mga ward kon kanunay sila nga magkadungan sa paggamit sa gambalay ug sa mga parkinganan niini. Pananglitan, ang usa ka ward tingali wala nay igong luna tungod kay gigamit na sa nag-unang ward ang mga luna.

Ang mga bishop motudlo ug mopahinumdom sa mga miyembro mahitungod sa tukma nga paggamit sa parkinganan. Pananglitan, ang pagparking sa wala markahi nga luna nga duol kaayo sa magamit nga luna makapahimo niining dili na magamit. Bisan kadtong adunay tukma nga mga placard o mga permit kinahanglang mopahawa sa mga luna nga pang-van alang sa uban nga adunay sakyanan nga kinahanglan og mekanikal nga mga pag-alsa o nagkinahanglan og dugang nga luna sa pagkarga ug pagdiskarga.

Alang sa dugang nga impormasyon gikan sa Simbahan, bisitaha ang Disabilities nga website.

Dagko ug Gagmay nga mga Basurahan

Ang dagko ug gagmay nga mga basurahan alang sa Simbahan nga paggamit lamang. Aron dili magamit sa uban mahimo kining butangan og mga koral, mga kandado, o ubang mga pamaagi, kon gikinahanglan.