Ol Nara Infomesen long Saed blong Ol Mitinghaos Bilding

Artwok

Ol mitinghaos oli mas soemaot wan fasin blong revren mo respek long Jisas Kraes mo testifae long bilif blong ol memba long Hem. Art ia we i soem Jisas Kraes, oli mas putum long ol eria we i open blong help blong soemaot se Hem i stamba bilif. Ol open eria ia oli no mas gat ol samting we i save pulumaot tingting olsem ol notis bod, tebol, ol frem blong wud, o fenija we i nogud. Art we i soem Jisas Kraes, ol pikja blong ol skripja, mo Jos histri, oli stret blong putum long ol holwe mo klasrum.

Stek presiden o ol narafala lokol lida we oli givim wok long olgeta, olgeta nao oli jusum ol art long wan katalog blong ol art we Jos i apruvum blong putum long ol mitinghaos. Bilding maneja i save serem art katalog ia wetem ol lida taem oli nidim wan niu art. Art we i kam long ol nara ples, plante taem oli no akseptem. Ol rikwes blong ol eksepsen olsem, oli mas mekem tru long bilding maneja.

Oli no save putum ol art insaed long japel, o kolosap long ples blong baptaes. I no gat raet blong putum ol statiu, ston, art long wol, o art we oli mekem long ol smosmol glas, ston o tael, insaed o aotsaed long bilding. Maet polisi bae i no aplae long ol artwok we oli bin yusum finis blong plante yia.

Kopi Masin

Fasin blong pem ol kopi masin, eria ofis nao i talem tru long ol gaedlaen blong hem, we oli folem ol nid blong ol lokol yunit. Grup blong lukaotem bilding i responsibol blong pem ol kopi masin blong ol ofis blong stek mo ol tul senta blong mitinghaos.

Taem we i gat nid blong mekem seves o ripea wok, ol lokol lida oli kontaktem man we i givim seves ia, sapos i gat wan seves kontrak i stap we oli saenem. Sapos no, ol lokol lida oli kontaktem grup blong lukaotem bilding, o bilding manejmen, we i putum wan taem blong kam mekem wok mo i pem wok ia.

Ol saplae olsem pepa mo ingk blong printa, ol lokol yunit oli pem, mo oli yusum lokol yunit bajet mane blong olgeta.

Dekoresen

Ol dekoresen blong ol holidei aktiviti, kaekae blong mared, mo ol taem we i semmak olsem, oli save putum insaed o aotsaed long bilding blong wan sot taem. Ol dekoresen we i no ol flaoa, oli no save putum insaed long japel long taem blong sakramen miting. Oli no leftemap tingting blong putum ol dekoresen long ol open eria blong mekem se ol man i save lukluk moa blong soem respek mo revren long Sevya.

Ol dekoresen oli mas ol simpolwan mo oli no sas. Ol dekoresen i no mas laet hariap long faea. Oltaem oli mas folem ol faea mo sefti rul mo polisi.

Imejensi Komunikesen Tul

Ol wod mo ol stek oli no pem, o oli no akseptem ol satelaet telefon we oli donetem, o oli no pem o akseptem ol redio tul we oli no sas blong yusum long taem blong wan imejensi, o blong putum insaed long wan mitinghaos. Oli leftemap tingting blong ol lida blong faenem ol man o ol woman we oli gat finis ol tul ia blong oli help wetem ol spesel komunikesen nid blong wod mo stek.

Tul blong Ol Petriak

Long samfala kes nomo, bae wan petriak i no save yusum wan kompiuta (eksampol, maet hem i no gat kompiuta blong hemwan, o i no save yusum kompiuta we i stap long ofis blong klak insaed long wan mitinghaos). Sapos i olsem, wan stek presiden i save givim raet blong pem wan kompiuta mo mekem rikwes ia taem hem i kontaktem bilding maneja. Ol stek oli givim ol odio rekoding tul blong ol petriak oli yusum, mo mane i kamaot long lokol yunit bajet basket (LUBA).

Ol Fi

Oli no save mekem ol memba oli pem fi o diposit blong yusum ol mitinghaos, o ol propeti blong Jos blong mekem lafet blong mared, o fenerol, ol famli kam tugeta, ol misinari kam tugeta, ol konset we oli apruvum, o ol semmak aktiviti olsem.

Ol Flag

Nasonal flag i save flae long propeti blong Jos long eni taem, be i mas folem ol lokol gaedlaen. Oli save hangem nasonal flag insaed long ol bilding blong Jos long ol spesel taem. Blong soem tru fasin blong stap tru long nesen, i no nidim blong oli hangem nasonal flag oltaem long ol ples blong wosip.

Homskul mo Dei Kea

Nomata we Jos i leftemap strong tingting blong mas kasem wan edukesen, oli no stap yusum ol mitinghaos olsem ol homskul, o dei kea bilding, o blong stap holem ol homskul aktiviti.

Taem oli folem polisi ia, bae i mekem se i gat moa sefti, mo bae i mekem se bae Jos i no save pem sam takis.

Ol Satelaet mo Vidio Tul

Ol tul blong satelaet blong Jos mo vidio, oli save yusum nomo blong ol samting we bae oli no salem, olsem ol wok blong Jos olsem we stek presidensi o bisoprik i givim raet from. Evri tul ia, oli mas lokem gud oli sef i stap taem we oli no yusum olgeta. Oli no save karemaot long bilding blong go yusum long hom o blong yusum blong yuwan.

Fasin blong Yusum Propeti we Oli Serem

Fasin blong yusum propeti blong Jos we oli serem, i nidim blong i mas gat apruvol, we i tekem tu apruvol blong save go insaed long propeti blong Jos, ol get, yusum graon, problem blong baondri, agrimen blong givim raet blong wokbaot.

Ol Saen

Sapos wan stek presiden i gat ol kwestin abaot ol saen blong ol bilding blong Jos, bae hem i kontaktem bilding maneja.

Sno Masin

Jos i putum ol masin blong karemaot sno long wanwan mitinghaos we i nid blong gat. Ol memba blong Jos oli save yusum tul ia blong klinim ol ples blong wokbaot. Ol lida oli givim ol wok i go nomo long ol memba blong Jos we oli save gud samting, oli save responsibol, mo i tijim olgeta blong yusum ol tul ia long wan fasin we i sef mo blong man i no save kasem kil.

Ol Propeti blong Jos we Oli Emti

Ol propeti ia blong Jos we oli emti i stap, o oli no yusum, bae wan i no save yusum sapos i no gat raet we i kam long Eria Presiden. Long sam situesen, ol lokol memba oli save yusum emti propeti ia blong sot taem blong mekem garen. Kontaktem lokol bilding maneja wetem ol kwestin, o ol rikwes blong yusum propeti.