Ko Hono Tokangaʻi ʻo e Ngaahi ʻApisiasí

Ko Hono Fakamaʻa ʻo e Ngaahi ʻApisiasí

ʻOku totonu ke tauhi ʻa e ngaahi ʻapi-siasí ʻi ha founga ko ē te ne fakahaaʻi ai honau natula mo e taumuʻa toputapú. ʻE vahevahe ʻa e fatongia ki hono tauhi ʻo e ʻapi-siasí pea mo tuʻa ke maʻa mo māú ʻe he kau taki fakalotofonuá, kāingalotú, pea mo e kulupu ʻoku pule ki he nāunau fakatuʻasinó.

Kau ʻa e Mēmipá

ʻOku kole ki he kāingalotú ke nau fatongia ʻaki, fakataha mo e kulupu pule ki he ngaahi nāunau fakatuʻasinó, hono fakamaʻa mo tokangaʻi ʻo e ʻapi-siasí. Ko e tefitoʻi taumuʻa ʻo e kau mai ʻa e mēmipá ke ʻaonga pea mo tāpuekina ai ʻa e kāingalotú kātoa—kau ai ʻa e toʻutupú mo e kau māmālohí—ʻaki hano ʻoange ha ngaahi faingamālie ke nau tokoni. ʻOkú ne to e fakamamafaʻi mo fakalolotoʻi foki ʻa e fakaʻapaʻapaʻi e fale ʻo e ʻEikí ki he lotú.

ʻOku fokotuʻutuʻu pea mo fakahoko e kau ʻa e mēmipá, ʻi he malumalu ʻo e fakahinohino ʻa e kau palesitenisī fakasiteikí. ʻE lava ke ui ha kau fakafofonga falelotu fakasiteiki mo uooti ke nau tokoni ʻi hono akoʻi mo fakafekauʻaki ʻa e fatongia ko ʻení. (Vakai ki he fakamatala fekauʻaki mo e fokotuʻutuʻu ʻo e polokalamá.)

ʻOku holoki ʻa e fiemaʻu ke fai ha fakamaʻa fakaʻāuliliki mo ha ngaahi ngāue kehé ʻi he taimi ʻe hanga ai ʻe kinautolu ne nau fakaʻaongaʻi ʻa e falé ʻo fakamaau ʻi ha hili ʻenau fakaʻaongaʻí pea mo nau fakapotopoto, tokanga, mo fakaʻapaʻapaʻi he taimi kotoá.

ʻE lava ke fokotuʻutuʻu ʻe he fakafofonga falelotu fakauōtí, ʻi he feituʻu ʻe lava aí, pea mo tokangaʻi ʻa e ngaahi faingamālie ki hono fakamaʻa fakauiké. ʻOku totonu ke ʻoange ki he kāingalotu kotoa pē ha faingamālie ke nau kau ʻi hono fakamaʻá. ʻOku fakaafeʻi ʻa e kau talavoú mo e kau finemuí ke nau kau fakataha mo honau ngaahi fāmilí, ngaahi kōlomú, pe ngaahi kalasí.

ʻOku ʻikai totonu ke tuku ki he toʻutupú ke nau lokaʻi tāpuni ʻa e falelotú he poʻulí pe fakaʻaongaʻi ha ʻū meʻangāue mīsini.

Feituʻu Tauhiʻanga Meʻa ʻa e Mēmipá

ʻE lava ke ʻi ai ha feituʻu tauhiʻanga meʻa ʻa e mēmipá ʻi ha ʻapi-siasi, ʻa ia ʻe lava ke maʻu ai ʻe he kāingalotú ha meʻangāue mo ha nāunau ke fakaʻaongaʻi. ʻE lava ke fakafekauʻaki ʻe he kau fakafofonga falelotu fakasiteiki mo fakauōtí mo e kulupu pule ki he nāunau fakatuʻasinó hono fakanāunauʻi, fakafoʻou, mo tauhi ʻo e feituʻu ko ʻení.

Ngaahi Founga Ngāue ʻi ha Meʻa Fakatuʻupakē

ʻE fokotuʻutuʻu ʻe he kau taki lakanga taulaʻeiki fakalotofonuá ha ngaahi palani ke fai ʻi ha ngaahi meʻa fakatuʻupakē ʻe ala hoko ʻi ha ʻapi-siasi. Te nau fakaʻaongaʻi ʻa e ngaahi palani ko ʻení ke fakahinohinoʻi ʻa e kāingalotú pea mo fakaʻaongaʻi ʻi he lolotonga e taimi ʻo e ngaahi meʻa fakatuʻupakeé. ʻOku fokotuʻu atu ke fakaʻaliʻali ʻi ha ngaahi feituʻu taau ʻa e fakamatala fetuʻutaki ki he kau polisi fakalotofonuá, tāmate afí, mo e ngaahi vaʻa tokoni fakafaitoʻo ki he meʻa fakatuʻupakeé.

Fakaʻehiʻehi mei ha Vela

ʻE holoki ha ala hoko ʻa ha vela, ʻi he taimi ʻoku tokanga ai ʻa e taha kotoa ʻokú ne fakaʻaongaʻi ʻa e ʻapi-siasí. Ko ha ngaahi fokotuʻu ʻeni ʻe niʻihi ki ha meʻa ke taʻofi ha vela:

• Tauhi e ʻū naunau velangofuá kotoa—kau ai e ʻakaú, nāunau pepa, kemikale, mo e vevé—mavahe mei he ngaahi lokí, ngaahi tauhiʻanga meʻá, kapinetí, ngaahi feituʻu ʻoku ʻi ai e kulo ʻuhilá, tofunangá, meʻangāue fakamīsiní, nāunau fakaʻuhilá mo e kasá.

• Fakaʻehiʻehi mei hono ngāue ʻaki ʻo e ngaahi meʻa fakamāfana ʻoku tuʻu mavahé.

• ʻOua naʻa tuku taʻe tokangaʻi ʻa e ngaahi sitoú pe ʻōvaní ʻi he taimi ʻoku fakamafanaʻi ai ʻa e meʻakaí pe fakalili ha vaí.

Luelueʻangá mo e Ngaahi Hala ʻi Tuʻá

ʻOku mahuʻinga ke fakaʻataʻatā ʻa e ngaahi luelueʻanga pe ngaahi halaanga ʻi tuʻá ke hū mai mo mavahe lelei ai, ʻo tatau pē mo hono tauhi ʻe he kau takí ʻa e ngaahi holó mo e ngaahi hūʻanga kehe ʻi lotó ke ʻataá.

Ngaahi Kī ʻo e ʻApi-siasí

ʻE ʻoatu ʻe he kulupu pule ki he nāunau fakatuʻasinó ʻa e ʻū kī ʻo e ʻapi-siasí ki he kau taki fakasiteikí. ʻE tufaki ʻe he kau pīsopelikí ʻa e ʻū kií ki he kau taki fakauōtí ʻo fakatatau mo e fakahinohino ʻa e siteikí. ʻE tauhi ʻe he kau pīsopelikí takitaha ha lekooti ʻo e tokotaha ʻoku ʻi ai ʻene kií pea te nau lava ʻo ʻoange ha tatau ʻo e lekooti ko iá ki he fakafofonga falelotu fakasiteikí. ʻE fakafoki ʻe he kāingalotú ʻa e ngaahi kií kotoa ʻi he taimi ʻoku tukuange ai kinautolu mei ha ngaahi fatongia.

Paʻangá

He ʻikai tuku ha paʻanga ʻi he ʻapi-siasí he poó kakato pe taʻe-tokangaʻi ʻi ha faʻahinga taimi pē.

Ngaahi Founga Maluʻi mo Lokaʻí

ʻE fakakaukauʻi ʻe he kau taki faka-siteikí pe kau pīsope fakafofongá ke fakaʻaongaʻi ha taimi-tēpile ki he tāpuni ʻo e ʻapi-siasí mo e founga hono lokaʻí. ʻE fakahoko ʻa e ngaahi meʻa ko ʻení ʻi he pō kotoa pē, ʻi he ʻosi pē ʻa e taimi tāpuni kuo ʻosi fokotuʻú.

ʻE lava ke vahe ʻe he kau taki lakanga fakataulaʻeikí ha niʻihi fakafoʻituitui ke nau tautau toko ua ʻi hono lokaʻi ʻo e falé ke fakasiʻisiʻi ha hoko ʻa ha fakatuʻutāmaki. ʻOku kau ʻi he founga lokaʻí hano fakapapauʻi ʻoku ʻikai ke kei ʻi he falelotú ha kakai ʻoku ʻikai fakamafaiʻi, tāmateʻi kotoa ʻa e ngaahi māmá pe ʻea fakamokomokó, pea lokaʻi ʻa e ngaahi matapaá mo e ngaahi matapā sioʻatá.

ʻOku fiemaʻu ʻa e kāingalotu ʻo e Siasí ʻoku nau maʻu e kī ki he ʻapi-siasí ke nau tāpuni mo lokaʻi ʻa e ngaahi matapā ki tuʻá pea mo e ngaahi matapā sioʻatá ʻi heʻenau mavahé.

ʻE fakapapauʻi ʻe he kau taki fakalotofonuá ʻoku tauhi ʻa e ʻū komipiutá, mīsini hiki tataú, ʻū kīpooti fakaʻilekitulōnika ʻoku toʻotoʻó, mo e meʻangāue ki he ʻatá mo e leá, ʻi ha ngaahi loki pe ngaahi feituʻu tauhiʻanga meʻa ʻoku lokaʻi. ʻIkai ngata ai, ʻoku fakaʻilongaʻi ʻa e ʻū komipiutá mo e meʻangāue fakaʻilekitulōniká ko e koloa ʻa e Siasí, pea tauhi ha lisi ʻo e mōtolo mo e fika ʻo e meʻangāué.