Pagsangkap og mga Meetinghouse ug Ubang mga Dapit sa Pagsimba

Giya nga mga Baroganan

Samtang ang bag-ong luna sa meetinghouse gikonsiderar, ang mga lider sa Simbahan ug mga empleyado mogamit niining giya nga mga baroganan:

1. Pagbarog pinaagi sa Kinaugalingong Paningkamot—Naningkamot kita sa pagsuporta og makapatunhay nga taas og termino nga kalamboan sa Simbahan. Ang matag area sa Simbahan kinahanglang adunay tumong nga makabarog pinaagi sa kinaugalingong paningkamot sa temporal nga paagi.

2. Pag-access—Gipaniguro nato nga ang mahinungdanong mga pagtulon-an sa ebanghelyo, mga kapanguhaan, ug mga serbisyo ma-access sa tanan. Ang malamboon nga mga area kinahanglan nga motabang sa mga area nga dili pa kaayo makabarog pinaagi sa kinaugalingong paningkamot.

3. Maalamon nga pagkatinugyanan—Kita maalamon nga mga tinugyanan sa sagrado nga mga kapanguhaan. Atong ikonsiderar kon sa unsang paagi nga ang mga desisyon makaapekto sa inadlaw-adlaw nga kinabuhi sa mga miyembro ug kon makaya sa partisipasyon sa Simbahan.

Ang area ug ang lokal nga mga lider sa pagkapari maningkamot sa paggamit sa mga baroganan nga gipasabot diha sa Principles and Guidelines for Meetinghouse Planning [Mga Baroganan ug mga Lagda alang sa Pagplano sa Meetinghouse] nga dokumento sa dili pa morekomendar og dugang nga luna.

Pagkapareho ug Pagpahiangay

Ang tanang meetinghouse kinahanglang adunay mga mahinungdanong bahin nga mosuporta sa kasinatian sa pagsimba ug sa mga programa sa Simbahan. Naglakip kini og luna alang sa kinatibuk-ang panagtigom, pagtudlo, ug mga kalihokan. Lokal nga mga kahimtang—naglakip sa mga gidak-on sa yunit ug pagpangulo—mahimong magkinahanglan og pagpahiangay kon mosangkap og mga meetinghouse.

Ang pasilidad sa panagtigom mahimong sa balay sa usa ka miyembro, lokal nga eskwelahan o sentro sa komunidad, giabangan nga luna, gitukod sa Simbahan o gipalit nga luna, o ubang mga opsiyon. Ang matag usa niini mahimong malungtaron nga mga solusyon alang sa mga yunit sa tanang gidak-on, sumala sa giaprobahan sa Kapangulohan sa Area. Ang paggamit sa teknolohiya, sama sa audiovisual nga mga ekipo, mahimong makapasayon sa ingon nga pagpahiangay.

Pagsangkap og Luna Base sa Panginahanglan

Ang area ug ang lokal nga mga lider maningkamot sa maalamong paagi nga mapalapad ang paggamit sa mga meetinghouse sa dili pa mohangyo og dugang nga luna. Ang luna kinahanglang isangkap human sa pagkonsiderar sa maximum nga attendance o gidaghanon sa mga yunit diha sa building, ingon man ang mga kapanguhaan sa gawas sa mga utlanan sa ward o stake sulod sa mga oras sa pagbiyahe nga gitino sa Kapangulohan sa Area. Ang mga empleyado sa Simbahan diha sa area, sa pagtinabangay sa lokal nga mga lider, mohimo og mga rekomendasyon nga magamit kutob sa mahimo ang mga kapanguhaan sa Simbahan, dili magsapayan sa mga utlanan sa stake.

Kabarato

Ang area ug ang lokal nga mga lider magtinguha og tukma ra sa ekonomikanhon nga paagi, malungtaron, ug makapatunhay nga solusyon ngadto sa mga panginahanglan sa meetinghouse. Ang bag-ong luna kinahanglang mopresentar og usa ka imahe nga may balaang pagtahod ug kaligdong, nindot, ug nahiangay sa desinyo ug panagway sa lokal nga palibot niini. Kinahanglan nga kini naggamit usab og anaa ra nga lokal nga mga materyal, mga ekipo, ug mga kagamitan kon gikinahanglan. Ang proseso sa pagsangkap ug pagpadagan sa luna sa meetinghouse kinahanglan nga makatabang nga mapalig-on ang pagbarog pinaagi sa kinaugalingong paningkamot diha sa area.

Paglikay sa Magkasukwahi nga Tinguha

Ang lokal nga mga lider ug mga miyembro kinahanglang dili moimpluwensya og pangnegosyo nga mga pakigsabot alang sa mga kabtangan sa Simbahan. Pananglitan, sila dili awtorisado nga makigsabot sa pagpalit o pag-abang og kabtangan o sa paghimo og bisan unsang mga pasalig nga mag-obligar sa paggasto sa kinatibuk-ang mga pundo sa Simbahan. Ang mga eksepsiyon kinahanglan gayod nga aprobahan pinaagi sa sulat sa buhatan sa area o sa Departamento sa mga Pasilidad sa Meetinghouse.

Kinatibuk-ang Pagplano sa Meetinghouse

Aron mapalig-on ang mga miyembro sa Simbahan, ang mga area mag-andam og malungtaron nga kinatibuk-ang mga plano sa meetinghouse. Kini nga mga plano maglakip sa mga desisyon sa pagdugang o pag-usab (o pagtangtang) sa luna sa meetinghouse. Ang malungtaron nga kinatibuk-ang pagplano sa meetinghouse mosuporta sa plano sa area sa paglig-on sa mga pamilya, mga miyembro, ug mga yunit pinaagi sa pagsangkap og mga meetinghouse diha sa yano ug makaya nga paagi. Himoon kini pinaagi sa maalamong paggamit sa mga kapanguhaan, pagkonsiderar sa epekto sa mga desisyon kalabot sa meetinghouse bahin sa paglig-on sa mga miyembro sa Simbahan, ug pagsangkap og luna nga tukma ngadto sa lokal nga mga kahimtang.

Ubos sa direksyon sa Kapangulohan sa Area, ang Area Seventy, ang direktor alang sa temporal nga mga kalihokan, ug kawani sa area mopresentar sa mga rekomendasyon bahin sa meetinghouse ngadto sa mga lider sa pagkapari, maghiusa sa pagtinabangay uban nila aron sa pagsulbad sa mga problema, ug paghimo og kataposan nga pagplano sa meetinghouse nga angayng ilakip sa kinatibuk-ang plano. Pagahimoon kini diha sa miting sa coordinating council uban sa gisangonan nga mga presidente sa stake. Ang kapangulohan sa stake mahimong mohatag og impormasyon ngadto sa Kapangulohan sa Area nga moabag sa direktor sa temporal nga mga kalihokan sa pag-andam ug pag-update sa kinatibuk-ang plano.

Alang sa dugang nga impormasyon, ang mga lider sa pagkapari kinahanglang morebyo sa Meetinghouse Master Planning Guidelines [Mga Lagda sa Kinatibuk-ang Pagplano og Meetinghouse] nga booklet.

Paggahin og Pundo alang sa mga Pasilidad sa Meetinghouse

Ang luna sa meetinghouse gipundohan pinaagi sa tinuig nga plano sa mga Pasilidad sa Meetinghouse. Ang mga Kapangulohan sa Area mosumiter sa ilang tinuig nga mga plano ngadto sa Budget and Appropriations Committee pinaagi sa Presiding Bishopric.

Pagsusi sa Panginahanglan sa Bag-ong Luna alang sa Pagsimba

Ang mga butang nga makaapekto sa pagplano sa umaabot nga mga meetinghouse ug ubang mga luna alang sa pagsimba naglakip sa matang sa sagad nga mga yunit sa Simbahan diha sa dapit; gipaspason sa nangagi nga kalamboan ug sa mga sundanan; gibana-bana nga kalamboan; giplano nga pagbahin sa mga yunit; ug ang gidak-on, lokasyon, ug gidaghanon sa naggamit sa anaa nang daan nga gambalay.

Mga Opsiyon alang sa Pag-angkon og Dugang nga Luna

Ang buhatan sa area mokonsiderar sa pipila ka opsiyon sa pagtino sa labing tukma nga paagi nga matubag ang panginahanglan sa dugang nga mga luna alang sa pagsimba. Kana nga mga opsiyon naglakip sa pag-usab sa mga programa sa lokal nga yunit, makigsalo sa luna sa ubang mga yunit sa Simbahan, pag-usab sa anaa nang daan nga luna, pagtukod og gambalay agi og dugang sa anaa nang daan nga luna, pag-abang og luna, pagpalit sa natukod na nga gambalay, o pagtukod og bag-o nga meetinghouse.

Pagdonar og Yuta

Ang Simbahan mabinantayon sa pagdawat sa idonar nga yuta. Kon ang usa ka tawo gusto nga modonar og yuta ngadto sa Simbahan, ang lokal nga mga lider sa pagkapari mokontak sa buhatan sa area. Alang niadtong anaa sa Estados Unidos o Canada, tawag sa Real Estate Services Division diha sa Departamento sa mga Pasilidad sa Meetinghouse sa 1-801-240-5685 o 1-800-453-3860.

Ang lokal nga mga lider dili modawat o mohatag og mga resibo alang sa gidonar nga yuta. Ang mga gidonar nga yuta o mga kabilin kinahanglan nga itanyag nga walay nakabutang nga mga kondisyon kon unsaon kini paggamit o pagdispatsar.

Sumbanan nga Arkitekturanhon nga mga Plano sa Meetinghouse

Ang mga empleyado sa Simbahan diha sa area nag-andam og sumbanan nga arkitekturanhon nga mga plano sa simbahan aron mohaom sa lokal nga mga kahimtang ug mga panginahanglan. Kon ang usa ka bag-ong meetinghouse pagatukoron, usa ka haom nga sumbanan nga plano ang pilion. Kana nga plano naglatid sa mga polisiya alang sa mga kwarto, mga mahinungdanong bahin, ug ekipo nga ilakip niini nga mga dapit sa pagsimba.

Pagpalambo sa Proyekto sa Pagtukod og Meetinghouse

Kon makab-ot na ang tanang kriterya sa pagtukod og bag-ong meetinghouse ug ang giplano nga pagtukod sa proyekto maaprobahan na, naapil na sa tinuig nga plano, aduna nay pundo, ug nakaeskedyul na, ang meetinghouse nga proyekto mag-uswag na ngadto sa hugna sa pagpalambo sa proyekto.

Sa tukma nga panahon atol sa pagpalambo sa proyekto, ang manedyer sa proyekto, nga makigkonsulta sa manedyer sa mga pasilidad, makigkita sa kapangulohan sa stake sa pagrebyo ug pagpili gikan sa anaa nga mga opsiyon alang sa mga estilo diha sa sumbanan nga mga plano. Ang opsiyon sa pagpahigayon og usa ka seremonya sa pagsugod sa konstruksyon mahimong hisgotan usab. Ang manedyer sa mga pasilidad sa matag karon ug unya mohatag sa kapangulohan sa stake og mga update sa tibuok proseso sa pagpalambo.

Pagtukod sa Proyekto

Kon makompleto na ang hugna sa pagpalambo sa proyekto, ang buhatan sa area mo-award sa kontrata sa pagtukod. Uban sa tabang sa manedyer sa mga pasilidad, ang manedyer sa proyekto mopahigayon og miting sa dili pa sugdan ang pagtukod kauban sa mga lider sa stake ug sa kontraktor. Kadtong anaa sa miting morebyo sa tagsa-tagsa nila nga mga tahas, mohimo sa kataposang pagpili sa mga opsiyon sa estilo ug mga kagamitan sumala sa sumbanan sa plano sa lokal nga area, ug morebyo sa eskedyul sa proyekto.

Pagtugyan sa Meetinghouse

Kon mahuman na ang proyekto sa konstruksyon, ang manedyer sa proyekto pormal nga “motugyan” sa gambalay o sa gidugang niini ngadto sa manedyer sa mga pasilidad. Ang manedyer sa mga pasilidad moplano ug modumala sa mga pamaagi sa kinatibuk-ang pagpanglimpyo ug pagmentinar ug mohimo sa ubang mga buluhaton nga gikinahanglan sa pag-andam sa gambalay aron gamiton.

Ang manedyer sa mga pasilidad mopahigayon og usa ka miting sa pag-orient ug sa paglibot sa gambalay alang sa lokal nga mga lider. Siya mohatag og inisyal nga mga instruksiyon sa nagkadaiyang mga sistema sa gambalay ngadto sa mga representante sa gambalay sa stake ug mga ward. Siya mohatag sa mga yawe ngadto sa lokal nga mga lider ug morebyo sa mga eskedyul sa pagpanglimpyo ug pagpaapil sa mga miyembro.

Pag-abang og Luna alang sa Meetinghouse

Alang sa pagpangabang og bag-ong meetinghouse, ang lokal nga mga lider mokonsulta sa manedyer sa pagplano sa mga pasilidad sa meetinghouse sa area sa pagtino sa mga kwalipikasyon. Ang galastohan sa abang bayaran gikan sa operational budget sa facilities management group.

Alang sa pag-renew sa abangan sa meetinghouse, ang lokal nga mga lider mokonsulta sa manedyer sa mga pasilidad, kinsa maoy mopahigayon sa hangyo. Ang usa ka temporaryo nga pasilidad mahimong abangan kon ang anaa nang daan nga mga meetinghouse dili magamit sa mga ward atol sa pag-renovate sa meetinghouse.

Ang buhatan sa area makigsabot sa mga kondisyon alang sa tanang kasabotan sa pag-abang.

Pag-abang og Temporaryo nga Luna

Ang temporaryo nga mga pasilidad mahimong abangan sa Simbahan kon ang magamit nga luna dili makaigo sa usa ka kalihokan sa stake, sama sa stake ug regional nga mga komperensiya, mga fireside, mga sport nga dulaon sa sulod, o multicultural nga mga kalihokan. Laing kapilian nga mga solusyon, lakip ang pagpahigayon og daghang sesyon o paggamit og teknolohiya (sama sa mga pagsibya), kinahanglan nga ikonsiderar sa dili pa moabang og temporaryong mga pasilidad.

Kon ang temporaryo nga pasilidad gikinahanglan, ang lokal nga mga lider mokonsulta sa manedyer sa mga pasilidad aron mahan-ay ang gikinahanglan nga kontrata o kasabotan. Ang manedyer sa mga pasilidad mosumiter dayon sa kasabotan ug sa porma nga “Request for Temporary Leased Facility [Hangyo alang sa Temporaryo nga Abangan nga Pasilidad]” ngadto sa buhatan sa area. Ang mga hangyo kinahanglang isumiter sa layo pa ang pagkinahanglan niini. Kon kini nga mga pamaagi masunod, ang mga galastohan sa abang bayaran gikan sa kinatibuk-ang mga pundo sa Simbahan.

Ang mga pasilidad nga abangan alang sa kalihokan sa mga sport nga dulaon sa gawas bayaran sa lokal nga yunit.

Mga Tulumanon sa Seremonya sa Pagsugod sa Kontruksyon

Human maaprobahi ang proyekto sa bag-ong gambalay, ang Kapangulohan sa Area mahimong motugot sa tulumanon sa seremonya sa pagsugod sa konstruksyon agi og pagpangandam alang sa pagtukod. Kini nga tulumanon dili himoon sa Dominggo. Ang presidente sa stake nga naapil mokonsulta sa Area Seventy alang sa direksyon.

Pagpahinungod sa mga Gambalay

Ang kataposan [final] nga pagtugot alang sa pagpahinungod ihatag sa Kapangulohan sa Area pinaagi sa pakig-koordinar sa direktor sa temporal nga mga kalihokan. Ang Kapangulohan sa Area makigtambayayong sa presidente sa stake o sa misyon ug motudlo kon kinsa ang responsable alang sa pagpahinungod sa gambalay.

Ang programa alang sa tulumanon sa pagpahinungod kinahanglang pinasubay sa katuyoan sa maong kalihokan. Kinahanglang dili kini tas-on o maglakip og taas nga mga pasundayag sa musika. Igo nga panahon ang kinahanglang ihatag alang sa gisangonan nga lider sa pagpamulong ug sa pagpahinungod sa gambalay.

Human sa pagpahinungod nga pag-ampo, kinahanglang adunay tukma nga himno o pinili nga musika ug mubo nga pag-ampo sa pagtapos sa tulumanon.

Ang pagpahinungod nga mga pag-ampo sa mga gambalay mahimong i-rekord uban sa pagtugot gikan sa tigdumalang awtoridad.

Ang giabangan nga mga meetinghouse mahimong ipahinungod kon ang tanan nga mosunod nga kondisyon matuman:

1. Ang tanang giabangan nga lugar, walay labot sa gikinahanglan nga komon nga dapit (sama sa pultahan, hawanan, ug mga kasilyas), gamiton lang sa Simbahan.

2. Ang pag-abang sobra kay sa usa ka tuig.

3. Ang Kapangulohan sa Area motugot sa pagpahinungod sa giabangan nga meetinghouse.

Kon matuman kini nga mga kondisyon ug ang meetinghouse ipahinungod na, ang pag-ampo sa pagpahinungod kinahanglang maglakip sa pinulongan nga ang meetinghouse gipahinungod “sulod sa tagal sa pag-abang.”