Gat Ol Mitinghaos mo Ol Nara Ples blong Wosip

Ol Prinsipol we Oli Lidim Wok

Taem oli stap lukluk long wan ples blong putum wan niu mitinghaos, ol lida blong Jos mo ol wokman blong Jos, oli folem olgeta gaedlaen ia.

1. Indipenden Laef—Yumi traehad blong sapotem Jos blong i gro i kam bigwan blong wan longfala taem. Wanwan eria blong Jos i mas gat wan gol blong save dipen long olgetawan long saed blong laef long wol ia.

2. Evriwan i Kasem—Yumi meksua se ol stamba tijing blong gospel, ol risos, mo ol seves, oli stap blong evriwan i save kasem mo yusum. Ol eria we oli stanap gud, oli mas helpem ol eria we oli no indipenden gud.

3. Ol Waes Man blong Lukaot long Samting—Yumi ol waes man we i stap lukaotgud long ol tabu risos. Yumi skelem gud olsem wanem ol desisen bae oli save tajem evri dei laef blong ol memba, mo hamas Jos i save mekem.

Ol prishud lida long Eria mo ol lokol lida oli traehad blong yusum ol prinsipol olsem we oli bin eksplenem insaed long Ol Prinsipol mo Ol Gaedlaen blong Mekem Plan blong Gat Ol Mitinghaos pepa, bifo oli askem blong gat moa ples.

Evri Samting I Semmak mo Wei blong Stretem Folem Situesen blong Yu

Evri mitinghaos i mas gat ol samting we oli sapotem fasin blong gat wan eksperiens blong wosip, mo blong holem ol program blong Jos. Hemia i tekem wan ples blong evriwan i kam tugeta wanples, ol ples blong tij, mo ol aktiviti. Ol lokol situesen—we i tekem tu saes blong yunit mo lidasip—maet bae i nid blong stretem folem situesen taem oli wantem putum wan mitinghaos.

Wan bilding blong miting, maet i hom blong wan memba, wan lokol skul, o wan komuniti senta, o wan ples we oli rentem, o wan ples we Jos i pem mo i bildim wan bilding long hem, o sam nara rod bakegen. Wanwan long ol rod ia, i mas ol rod we ol yunit oli save yusum blong wan longfala taem, hemia i nomata saes blong ol yunit, mo sapos Eria Presidensi i apruvum. Sapos oli yusum teknoloji, olsem ol odiovisuol tul, maet bae i isi blong stretem ol samting folem situesen.

Gat Wan Spes Folem Nid we I Stap

Ol eria lida mo ol lokol lida oli traem, folem wan waes wei, mekem se oli yusum ol mitinghaos long plante moa wei bifo oli askem sam moa spes. Bae oli givim wan spes afta we oli lukluk long namba we i moa hae blong atendens, mo namba blong ol yunit insaed long bilding, mo tu, ol risos aotsaed long wod o baondri blong stek folem ol travel taem we Eria Presidensi i tokbaot. Ol wokman blong Jos insaed long eria ia, oli wok wetem ol lokol lida blong Jos, nao oli givim ol bes tingting blong meksua se oli yusum gud ol risos blong Jos, nomata long ol baondri blong stek.

Praes

Ol eria lida o ol lokol lida oli lukaotem wan wei we i gud long saed blong mane, i save stap longtaem, mo i wan gudfala ansa blong lukluk long nid blong gat mitinghaos. Niufala spes ia, i mas stap olsem wan ples we i gat revren mo hae respek long hem, i simpol mo i stret wetem disaen mo lukluk blong ol nara bilding we oli stap raon long hem. Mo tu, oli mas yusum ol lokol materiol we i stap, wetem ol tul blong wok, mo ol fenija taem we i stret. Rod ia blong givim wan spes blong mitinghaos mo lukaotem ples ia, i mas help blong mekem Jos i dipen long hemwan long eria we hem i stap long hem.

Stap Longwe long Situesen we Yu Gat Intres long Hem

Ol lokol lida mo ol memba oli no sapos blong lidim ol bisnis wok long saed blong ol propeti blong Jos. Eksampol: oli no gat raet blong toktok raon long praes o blong pem o lisim wan propeti, o blong mekem eni komitmen we i mekem se Jos i mas spendem ol jeneral mane blong Jos. Ol taem we bae oli no folem rul ia, bae eria ofis o Mitinghaos Bilding Dipatmen bae i raetem wan leta from blong givim apruvol ia.

Mitinghaos Masta Plan

Blong mekem ol memba blong Jos oli kam strong moa, ol eria oli rere ol masta plan blong ol mitinghaos we bae i stap blong wan longfala taem. Ol plan ia, oli tekem ol desisen blong ademap o karemaot wan mitinghaos spes. Masta plan ia blong mekem ol mitinghaos ova long longfala taem, i sapotem eria plan blong mekem ol famli, ol memba mo ol yunit oli kam strong moa taem oli gat ol mitinghaos we oli simpol mo oli no sas tumas. Oli mekem hemia taem oli yusum ol mane long wan waes wei, oli tingting long hao ol desisen long saed blong mitinghaos i mekem ol memba blong Jos oli kam strong moa, mo givim wan spes we i stret long ol lokol situesen.

Anda long daereksen blong Eria Presidensi, Eria Seventi, daerekta blong ol afea blong laef ia, mo ol wokman blong eria oli presentem ol tingting long saed blong mitinghaos i go long ol prishud lida, oli wok wan wetem olgeta blong oli stretem ol wari, mo oli krietem wan faenol mitinghaos plan we bae oli putum insaed long masta plan ia. Hemia, oli save mekem long wan kodineting kaonsel miting wetem ol stek presiden we oli gat wok ia. Stek presidensi i save nid blong givim infomesen long Eria Presidensi; ol infomesen ia bae oli helpem daerekta blong ol afea blong laef ia blong stap mekem rere mo apdeitem wan masta plan.

Blong gat moa infomesen, ol prishud lida oli mas luklukbak long Ol Gaedlaen blong Mitinghaos Masta Plan we i stap long wan smol buklet.

Mane blong Mekem Ol Mitinghaos Bilding

Spes blong mitinghaos, mane blong hem i kam tru long Mitinghaos Bilding yia plan. Ol Eria Presidensi oli sendem yia plan blong olgeta i go long Bajet mo Apropriesen Komiti, tru long Prisaeding Bisoprik.

Skelem Nid blong Wan Niu Spes blong Wosip

I gat samfala samting we i save jenisim ol plan blong mekem ol fiuja mitinghaos mo gat ol nara spes blong wosip; ol samting ia i wanem i go wetem ol yunit blong Jos long eria ia; hamas Jos i stap gro mo ol paten blong hemia; fiuja namba blong hamas Jos bae i gro; ol plan blong wei blong seraotem ol yunit; mo saes, ples mo hamas bae oli yusum bilding ia.

Sam Nara Wei blong Kasem Moa Spes

Eria ofis i tingting long plante defren rod blong faenemaot bes wei we i stret blong lukluk long nid blong gat moa spes blong wosip. Ol wei ia, i tekem blong stap jenisim ol program blong ol lokol yunit, blong serem spes wetem ol nara yunit, blong gat nara plan long wei blong yusum spes we i stap, bildim wan nara bilding long spes we i stap, lisim wan spes, pem wan bilding we i stap finis, o bildim wan niu mitinghaos.

Donesen blong Ol Propeti Olsem Graon

Jos i save jusum blong akseptem o no ol donesen blong ol propeti olsem graon. Sapos i gat wan we i wantem donetem wan graon i go long Jos, ol lokol prishud lida oli kontaktem eria ofis. Long Yunaeted Stet o Kanada, ringim Real Estate Services Division we i stap long Mitinghaos Bilding Dipatmen long ol namba ia 1-801-240-5685 o 1-800-453-3860.

Ol lokol lida oli no mas akseptem o givim ol risit blong ol donesen we oli ol graon. Ol donesen blong ol graon, oli mas givim we i no gat eni kondisen we oli putum long saed blong yusum o salem olgeta.

Ol Standet Mitinghaos Akitek Plan

Ol wokman blong Jos long eria oli rere ol standet mitinghaos akitek plan blong i go stret wetem ol situesen mo ol nid blong ples. Taem i gat wan niu mitinghaos we oli bildim, oli jusum wan stret standet plan i stap. Plan ia, i givim aotlaen polisi blong ol rum, ol samting insaed, mo ol tul insaed long ol ples ia blong wosip.

Projek Divelopmen blong Bildim Wan Mitinghaos

Taem oli mitim evri kondisen blong stap bildim wan niu mitinghaos mo oli apruvum wan propos plan blong bildim wan bilding, mo oli putum i go long yia plan, mo oli gat mane from, mo oli putum taem blong bildim hemia, nao projek blong mitinghaos ia i muv i go long step blong projek divelopmen.

Long wan stret taem long taem blong projek divelopmen, projek maneja, we i toktok wetem bilding maneja, i mit wetem stek presidensi blong luklukbak mo jusum ol defren stael we oli stap long ol standet plan. Joes ia blong holem wan seves blong brekem graon, oli save toktok raon long hemia tu. Bilding maneja i givim ol apdeit oltaem long stek presidensi, taem we divelopmen i stap gohed.

Projek blong Bildim

Taem we divelopmen projek step i finis, eria ofis i givim kontrak blong bildim bilding ia. Wetem help blong bilding maneja, projek maneja i lidim wan miting bifo oli statem wok blong bildim mitinghaos ia wetem ol lida blong stek, mo wetem kontrakta. Olgeta long miting ia, oli luklukbak long stret rol blong olgeta, oli mekem faenol desisen long ol defren stael mo fenija folem ol standet plan blong lokol eria, mo oli luklukbak long taemtebol blong projek ia.

Plan blong Givim Mitinghaos

Taem we projek blong bildim mitinghaos i finis, projek maneja i “givim” bilding, o nara bilding i go long bilding maneja. Bilding maneja i mekem ol plan mo i manejem bigfala klinap mo ol rod blong mentenem bilding, mo i mekem evri narafala wok we i nid blong mekem blong rere bilding ia blong oli yusum.

Bilding maneja i holem wan miting blong soem wei blong yusum bilding, mo i wokbaot wetem ol lokol lida i go tru long bilding ia. Hem i givim ol las instraksen long ol defren sistem blong bilding i go long ol stek mo wod bilding ripresentativ. Hem i givim ol ki i go long ol lokol lida mo i luklukbak long taemtebol blong klinap mo taem ol memba oli tekpat blong klinap.

Lisim Ol Mitinghaos Spes

Long saed blong ol lis blong ol niu mitinghaos, ol lokol lida oli toktok wetem eria mitinghaos bilding plan maneja blong faenemaot sapos oli kwalifae o no. Ol mane blong pem ol lis oli kamaot long bajet blong bilding manejmen operesen.

Long saed blong riniu ol lis blong ol mitinghaos, ol lokol lida oli toktok wetem eria mitinghaos bilding plan maneja we bae i mekem rikwes ia. Oli save yusum wan bilding blong sot taem, we bae oli save lisim; hemia sapos ol mitinghaos we oli stap oli no save tekem ol wod ia long taem we oli stap bildimbak wan mitinghaos.

Eria Ofis i toktok from ol kondisen blong evri agrimen blong lis.

Rentem Wan Spes blong Sot Taem

Ol bilding we oli rentem blong sot taem, Jos i save pem rent ia taem we i no gat wan nara spes blong holem wan stek aktiviti, olsem wan stek mo eria konfrens, ol faeasaed, ol spot we oli plei insaed long bilding, o ol maltikalja aktiviti. I gat ol nara ansa i stap, olsem blong holem plante sesen, o yusum teknoloji (olsem ol brodkas); oli mas lukluk long ol rod ia bifo oli rentem wan spes blong sot taem.

Sapos i nid blong rentem wan bilding blong sot taem, ol lokol lida oli toktok wetem bilding maneja blong oli stretem wan kontrak o wan agrimen. Nao bilding maneja i sendem agrimen ia mo wan “Rikwes blong Lisim wan Bilding blong Sot Taem” i go long eria ofis. Ol rikwes ia oli mas sendem i go longtaem bifo nid ia i kam antap. Taem oli folem gud ol defren step ia, oli yusum ol jeneral mane blong Jos blong pem hemia.

Ol ples blong ol spot aktiviti we oli holem aotsaed long bilding, oli stap rentem olgeta mo yusum mane blong lokol yunit.

Seves blong Brekem Graon blong Bilding

Afta we oli apruvum wan niufala bilding projek, Eria Presidensi i save gat wan seves blong brekem graon blong bilding, blong rere long wok blong stat bildim bilding. Seves ia, oli no save holem long Sandei. Stek presiden i toktok wetem Eria Seventi blong kasem daereksen.

Stap Dediketem Ol Bilding

Las apruvol blong dedikesen, Eria Presidensi nao i givim taem hem i kodinetem hemia wetem daerekta blong afea blong wol ia. Eria Presidensi i wok wetem stek o misin presiden mo i talemaot huia i responsibol blong dediketem bilding.

Program blong wan dedikesen seves bae i go stret wetem stamba tingting blong taem ia. Hem i no mas longwan o tekem tumas miusik presentesen. Oli mas putum inaf taem blong lida we i kasem wok ia, blong i toktok mo i dediketem bilding.

Afta long dedikesen prea, bae i gat wan hym, we i stret, o i save gat wan miusik namba we i stret, mo wan sot prea blong klosem seves ia.

Ol dedikesen prea blong ol bilding bae oli rekodem wetem raet we i kam long prisaeding atoriti.

Ol mitinghaos we oli lisim o rentem, oli save dediketem olgeta, sapos oli mitim evri kondisen ia:

1. Evri spes we oli lisim o rentem, be i no ol eria we evriwan i yusum (olsem ol rod blong kam insaed long bilding, ol korido, mo toelet), Jos nomo i stap yusum.

2. Lis o rent ia i blong moa bitim wan yia.

3. Eria Presidensi i apruvum blong oli dediketem mitinghaos ia we oli rentemaot.

Sapos oli mitim evri kondisen ia mo oli dediketem mitinghaos, insaed long dedikesen prea, bae oli mas talemaot toktok ia se mitinghaos ia, bae oli dediketem “blong kasem taem we lis o rent i finis.”