Lēsoni 8

Levaʻi Lelei ʻo e Ngaahi Meʻa Fakapaʻanga ʻa e Fāmilí

Taumuʻá

Ke tokoni ki he kau akó ke nau ngāueʻaki e ngaahi tefitoʻi moʻoni ʻoku malú ki hono levaʻi ʻo ʻenau meʻa fakapaʻanga ʻi honau ngaahi ʻapí.

Teuteú

Fakakaukau ki ha ngaahi founga ʻe lava ke ke fakahoko ai e ngaahi tefitoʻi moʻoni ʻi he “Ko ho Fatongia ʻi Hoʻo Hoko ko e Faiakó” (peesi x–xii ʻo e tohi lēsoni ko ʻení).
Lau e ngaahi ʻuluʻi fakamatala ʻo e lēsoní ʻoku ʻasi mataʻāʻā atú. ʻOku ʻomi ʻe he ngaahi ʻuluʻi fakamatala ko ʻení ha vakai fakalūkufua ki he ngaahi tokāteline mo e ngaahi tefitoʻi moʻoni ʻi he lēsoní. ʻIkai ngata aí, hanga ʻo ako fakamātoato ʻa e fakamatala ko e “Ko e Taʻefeliliuakí ʻi he Taimi ʻo e Feliliuakí” naʻe fai ʻe Palesiteni N. ʻEletoni Tena, ʻa ia ʻoku hā ʻi he peesi 35–39 ʻi he Tohi Fakahinohino Ako ʻa e Kau Ako ki he Ngaahi Fetuʻutaki ʻi he Nofo-malí mo e Fāmilí. ʻOku hoko ʻa e ngaahi tefitoʻi moʻoni ʻi he fakamatala ko ʻení ko e tefitoʻi fakamamafa ia ʻo e lēsoní. Fakalaulauloto ki he ngaahi tefitoʻi moʻoni ko ʻení ʻi he lolotonga ʻo e uiké, ke hoko ia ko e konga ʻo hoʻo teuteú. Kolea ʻa e tataki ʻa e Laumālié ʻi hono fakakaukauʻi pē ko e hā e meʻa ʻoku totonu ke ke fakamamafaʻi ke feʻunga mo e fiemaʻu ʻa e kau akó.
Fakamanatu ki he kau akó ke ʻomi ki he kalasí ʻenau ngaahi tatau ʻo e Tohi Fakahinohino Ako ʻa e Kau Ako ki he Ngaahi Fetuʻutaki ʻi he Nofo-malí mo e Fāmilí. ʻE fiemaʻu ke nau vakai ki he fakamatala ʻa Palesiteni Tená ʻi he lolotonga ʻo e lēsoní.
Kapau ʻokú ke ngāueʻaki e maʻuʻanga tokoni kehé ʻoku hā he peesi 49–50, peá ke haʻu ki he kalasí mo ha laʻi pepa pea mo ha peni pe peni vahevahe ke takitāuhi e kau akó.

Fokotuʻu ki he Founga Fai ʻo e Lēsoní

ʻOku mahuʻinga ʻaupito ki he nofo-mali fiefiá ʻa hono levaʻi lelei ʻo e ngaahi meʻa fakapaʻangá.

Fakaafeʻi ha ongo meʻa mali ke na haʻu ki muʻa ʻi he kalasí (tokanga ʻaupito pe ko hai ʻokú ke fakaafeʻí). Fakamatalaʻi ange te ke fakaʻaliʻali kia kinautolu e founga malava ai ʻe ha kiʻi meʻa siʻisiʻi ke ne fakamālohia ha nofo-mali pe fakatupu ha palopalema lalahi ʻi he nofo-malí. ʻOsi ko iá peá ke toki puke hake ha lauʻi paʻanga ki ʻolunga.

ʻOange ʻa e lauʻi paʻangá ki ha taha ʻo kinaua kuó ke ui mai ki muʻa ʻi he kalasí.

ʻOku uesia fēfē ha fetuʻutaki ʻi he nofo-mali ʻi he taimi ʻoku puleʻi toko taha ai pē ʻe he husepānití pe uaifí e paʻanga ʻa e fāmilí?

Hili hono aleaʻi ʻe he kau akó ʻa e fehuʻi ko ʻení, pea ke toe fakafoki mai e lauʻi paʻangá.

ʻOku uesia fēfē ʻa e fetuʻutaki ʻi he nofo-malí ʻi he taimi ʻoku ʻikai tokangaʻi ai ʻe ha taha e meʻa fakapaʻanga ʻa e fāmilí pe ko e taimi ʻoku puleʻi ai e ngaahi meʻa fakapaʻangá ia ʻe he ngaahi moʻua ʻoku haʻu fakataha mo ʻenau tupú?

Hili hono aleaʻi ʻo e fehuʻi ko ʻení, pea ke toe fakafoki ange e lauʻi paʻangá. Fekau ki he husepānití ke ne puke ia ʻi hono nimá, pea kole ki he uaifí ke hili ki ai hono nimá. Fakamatalaʻi ange ko hono levaʻi ʻo e paʻangá ʻoku ʻikai ko e kī mahuʻinga taha ia ki ha fetuʻutaki ʻi ha nofo-mali feʻofoʻofá ni. Ka neongo ia, ko e taimi ʻoku ngāue fakataha ai ha husepāniti mo ha uaifi ke levaʻi ʻena meʻa fakapaʻangá, ʻoku na fāitaha ʻi ha ngāue mahuʻinga ke maau e fokotuʻutuʻu hona fāmilí. ʻOkú na toe taʻofi ai foki mo ha ngaahi ʻahiʻahi faingataʻa. Ko e niʻihi ʻo e ngaahi palopalema faingataʻa taha ʻi he nofo malí ʻoku hoko ia ʻi he taimi ʻoku ʻikai levaʻi lelei ai ʻa e maʻuʻanga paʻangá ʻi he founga ʻe lelei taha ki he fāmilí.

Ko e hā e ngaahi founga ʻoku fakamālohia ai ha nofo-mali ʻi he taimi ʻoku ngāue fakataha ai ʻa e husepānití mo e uaifí ʻi hono levaʻi ʻenau meʻa fakapaʻangá?

Oku totonu ke ngāue fakataha ʻa e husepānití mo e uaifí ke na muimui ki he ngaahi tefitoʻi moʻoni mahuʻinga ʻo hono levaʻi lelei ʻo e paʻangá.

Kole ki he kau akó ke nau vakai ki he peesi 35–39 ʻi he Tohi Fakahinohino Ako ʻa e Kau Ako Ki he Ngaahi Fetuʻutaki ʻi he Nofo-malí mo e Fāmilí. Fekau ke nau lau fakavave pē ʻa e fakamatala ko ia ʻoku fakataumuʻa “Ko e Taʻefeliliuaki ʻi he Taimi ʻo e Feliliuakí” Pea ke nau kumi ki he fakamatala ʻa Palesiteni N. ʻEletoni Tena ki he “ngaahi tefitoʻi moʻoni ʻe nima ʻo e taʻefeliliuaki fakaʻekonōmiká.” Hiki he palakipoé ʻa e ngaahi tefitoʻi moʻoni ʻe nimá ʻi hono maʻu pē kinautolu ʻe he kau akó

Totongi totonu ʻa e vahehongofulú.

Moʻui ʻi he meʻa ʻoku siʻi ange ʻi he meʻa ʻokú ke maʻu maí.

Ako ke ke lava ʻi ʻiloʻi hono faikehekehe ʻo e ngaahi meʻa ʻoku fie maʻú mei he ngaahi meʻa ʻokú te loto pē ke maʻu maí.

Faʻu mo moʻui ʻo fakatatau ki ha patiseti.

Ke ke faitotonu ʻi hoʻo ngaahi meʻa fakapaʻanga kotoa pē.

Hili hoʻo hiki kotoa e ngaahi tefitoʻi moʻoni ʻe nimá ki he palakipoé, ngāueʻaki e ngaahi nāunau ko ʻení ke fakahoko ʻaki ha fealēleaʻaki fekauʻaki mo kinautolu:

Totongi totonu ʻa e vahehongofulú.

Fakaafeʻi ha taha ke ne lau ʻa e fakamatala ko ʻeni naʻe fai ʻe Palesiteni Tena (peesi 36 ʻi he Tohi Fakahinohino Ako ʻa e Kau Ako ki he Ngaahi Fetuʻutaki ʻi he Nofo-malí mo e Fāmilí):

“Ko ha fekau ʻa e totongi vahehongofulú, pea ko ha fekau ia mo ha talaʻofa. Kapau te tau talangofua ki he fekau ko iá, ʻoku talaʻofa mai leva te tau ‘tuʻumālie ʻi he fonuá.’ ʻOku ʻikai ko e tuʻumālie ʻeni ʻi he koloa fakaemāmaní pē—ka ʻoku lava ʻo kau ki ai ʻa e fiefia ʻi he moʻui leleí mo e longomoʻui ʻo e ʻatamaí. ʻOku kau ki ai ʻa e uouangataha ʻa e fāmilí mo e tupulaki fakalaumālié. ʻOku ou fakatauange pē, ko kimoutolu ko ia ʻoku ʻikai te mou totongi vahehongofulu kakato he taimi ní, te mou feinga ke mou maʻu ʻa e tui mo e ivi ko ia te mou lava ʻo totongi ai iá. Ko e taimi ko ia te mou fakahoko ai homou fatongia ko ʻeni ki homou Tupuʻangá, te mou maʻu ai ha fiefia lahi ange ʻaupito, ʻa ia ko e fiefia ia ʻoku maʻu ʻe kinautolu pē ʻoku nau faivelenga ʻi hono tauhi ʻo e fekau ko ʻení (ʻi he Conference Report, Oct. 1979, 119; pe Ensign, Nov. 1979, 81).

Kuo founga fēfē hono ʻomi ʻe he totongi vahehongofulú ʻa e ngaahi tāpuakí ki ho fāmilí pe niʻihi kehe ʻokú ke ʻilo?

Moʻui ʻi he meʻa ʻoku siʻi ange ʻi he meʻa ʻokú ke maʻú.

Fehuʻi ki ha toko taha ako ke ne lau ʻa e fakamatala ko ʻeni naʻe fai ʻe Palesiteni Tena (peesi 36–37 ʻo e Tohi Fakahinohino Ako ʻa e Kau Ako ki he Ngaahi Fetuʻutaki ʻi he Nofo-malí mo e Fāmilí):

“Kuó u ʻosi ʻiloʻi ʻe ʻikai te te lava ʻo maʻu mai ha meʻa lahi ange ʻi he meʻa ʻokú te fakamolekí. ʻOku ou tui au ia ʻoku ʻikai ko hono lahi ʻo e paʻanga ʻoku maʻu mai ʻe ha tahá ʻokú ne ʻomi ʻa e nonga ʻo e fakakaukaú ʻo hangē ko ʻene mapuleʻi lelei ʻa ʻene paʻangá. ʻOku lava ke hoko ʻa e paʻangá ko ha tamaioʻeiki talangofua ka ko ha pule-ngāue fefeka ʻaupito ia. Ko e kakai ko ia ʻoku nau fokotuʻu ʻenau tuʻunga moʻuí ke nau lava ʻo fakatotoe ha meʻa ke fakahuú, ʻoku nau mapuleʻi lelei ʻa e tuʻunga ʻoku nau ʻi aí. Pea ko e kakai ko ia ʻoku nau fakamole lahi ange ʻi he meʻa ʻoku nau maʻu maí, ʻoku puleʻi kinautolu ia ʻe he ngaahi tuʻunga ʻoku nau ʻi aí. ʻOku nau nofo pōpula ai. Naʻe meʻa ʻa Palesiteni Hiipa H. Kalānite ʻi ha taimi ʻe taha ʻo pehē: ‘Kapau ʻoku ʻi ai ha meʻa ʻe taha te ne lava ʻo ʻomi ʻa e nongá mo e fiemālié ki he loto ʻo e tangatá, pea ki he fāmilí, ko e meʻa ko iá ʻa ʻetau moʻui ʻo fakatatau ki he meʻa ʻoku tau maʻú. Pea kapau ʻoku ʻi ai ha meʻa ʻe taha ʻoku fakamamahi mo fakalotosiʻi mo fakatupu loto-foʻi, ko e meʻa ko iá ʻa e ngaahi moʻua mo e ngaahi fatongia ʻoku ʻikai te tau lava ʻo totongi mo feau leleí’ “ (Gospel Standards, sel. G. Homer Durham [1941], 111).

“ ʻOku mahino ngofua ʻaupito ʻa e kī ki heʻetau fakamole ʻo siʻisiʻi hifo ʻi he meʻa ʻoku tau maʻu maí—ʻoku ui ia ko e mapuleʻi kitá. Kuo pau ke tau ako ke tau mapuleʻi kitautolu, mo hotau ngaahi uʻá, mo ʻetau ngaahi holi fakaʻekonōmiká, ʻo tatau ai pē pe ʻoku hoko vave mai ia ʻi heʻetau moʻuí, pe ʻe hoko mai ia kuo tau fuʻu motuʻa. ʻOku monūʻia moʻoni ʻa e tangata ko ia ʻokú ne ako ke fakamole ʻo siʻisiʻi ange ʻi he meʻa ʻokú ne maʻu maí peá ne fakahū ha paʻanga talifaki ki ha ʻaho ʻo e faingataʻá” (ʻi he Conference Report, Oct. 1979, 119; pe Ensign, Nov. 1979, 81).

Fakakaukau ke vahevahe ange ʻa e lea ko ʻeni naʻe fai ʻe Palesiteni Kōtoni B Hingikelí, ko e Palesiteni hono hongofulu mā nima ʻo e Siasí:

“Kuo hokosia ʻa e taimi ke fakamaau ai hotau ngaahi falé.

“ ʻOku fuʻu tokolahi ʻaupito hotau kakai ʻoku nau fakamoleki hono meimei kotoa ʻo e paʻanga ʻoku maʻu maí. ʻOku ʻi ai ʻa e niʻihi ʻoku nau moʻui ʻi ha paʻanga nō mai… .

“ ʻOku ou hohaʻa lahi ki hono lahi ʻo e moʻua ʻo e kau fakatau koloá ʻa ia ‘oku ʻi he fonuá, pea kau ai hotau kakaí…

“ ʻOku ou poupou kiate kimoutolu …kemou vakai ki he tuʻunga ʻoku ʻi ai hoʻomou ngaahi meʻa fakapaʻangá. ʻOku ou poupou kiate kimoutolu ke fakafuofua hoʻomou ngaahi fakamolé, ke mou fakaʻehiʻehi mei he fakamoʻuá pea totongi ʻa e moʻua ko iá ʻi he vave tahá pea fakatauʻatāinaʻi ʻa kimoutolu mei he pōpulá (ʻi he Conference Report, Oct. 1998; 70, 72; pe Liahona Sānuali 1999, 67–70).

Ko e hā ha founga ʻoku hoko ai ʻa e moʻuá ko ha pōpulaʻangá?
Ko e hā e ngaahi founga kuó ne tokoniʻi kimoutolu ke mou mavahe ai mei hemoʻuá pe taʻofi ʻaki ʻa e ʻefihia ʻi he fakamoʻuá? Ko e hā ha meʻa kuó ke fai ke ke malava ʻo fakahaofi ai ha kiʻi konga siʻi hoʻo paʻanga hū maí?

Ako ke ke lava ʻo ʻiloʻi hono faikehekehe ʻo e ngaahi meʻa ʻoku fie maʻú mo e ngaahi meʻa ʻokú ke loto pē ke maʻu maí.

Fekau ki ha taha ke ne lau ʻa e fakamatala ko ʻeni naʻe fai ʻe Palesiteni Tena (peesi 37 ʻi he Tohi Fakahinohino Ako ʻa e Kau Ako ki he Ngaahi Fetuʻutaki ʻi he Nofo-malí mo e Fāmilí):

“ ʻOku hanga ʻe he moʻui fakavalevalé mo e ʻikai mapuleʻi lelei ʻa e paʻangá mo e koloá ʻo fakatupu ha faingataʻaʻia ʻi he ngaahi fetuʻutaki ʻi he nofo-malí. ʻOku hangē ʻoku tupu ʻa e konga lahi ʻo e ngaahi palōpalema ʻi he nofo-malí mei he ngaahi meʻa fakaʻekonōmiká—ʻi ha ʻikai maʻu ha paʻanga hū mai feʻunga ke tauhi ʻa e fāmilí pe ko e ʻikai ke fakaʻaongaʻi lelei ʻa e paʻanga hū mai ne ngāueʻí” (ʻi he Conference Report, Oct. 1979, 119–20; pe Ensign, Nov. 1979, 81).

Ko e hā te tau lava ke fai ke fakafaikehekeheʻi ʻaki e ngaahi meʻa ʻoku fie maʻú mei he ngaahi meʻa ʻoku tau loto pē ke maʻu maí? Ko e hā ʻoku mahuʻinga ai ki he husepānití mo e uaifí ke na ngāue fakataha ki hení?

Faʻu mo moʻui ʻo fakatatau ki ha patiseti.

Fakamatalaʻi ange ʻe tatau ai pē pe ko e hā ha koloa ʻoku maʻu ʻe ha ongo meʻa mali, ʻoku totonu pē ke na ngāue fakataha ke fokotuʻu ha patiseti fakafāmili. Ko e patisetí ko ha fokotuʻutuʻu palani ʻo ha paʻanga hū mai ʻi ha vahaʻa taimi pau. ʻOkú ne tokoniʻi ʻa e ngaahi fāmilí ke fakapapauʻi ʻoku ʻikai laka ʻenau ngaahi fakamolé ʻi heʻenau paʻanga hū maí. ʻOku totonu ke aleaʻi ʻe he ngaahi hoa malí ʻenau patisetí ʻi heʻenau vakaiʻi ko ia ʻenau ngaahi fiemaʻú, ngaahi meʻa ʻoku nau loto ke nau maʻú, mo e ngaahi taumuʻa fakapaʻangá. Hangē ko ʻení, hili hono fakafuofuaʻi ʻo ʻena paʻanga hū mai ki he uike ʻe ua ka hoko maí, ʻe meimei ke fakafuofuaʻi heni ʻe he ongo meʻa malí e lahi ʻo e paʻanga te na ngāueʻaki ʻi he ngaahi fatongia kehekehe, hangē ko e vahehongofulu, mo e ngaahi foaki faka-siasi kehe, paʻanga ke fakahū ʻo maluʻi, meʻakai, mo e totongi ʻapi, pe nofo totongi. Lolotonga ʻo e vahaʻa taimi ʻo e uike ʻe uá, ʻoku nau hiki fakamāʻopoʻopo ʻenau ngaahi fakamolé mo e paʻanga hū maí. ʻOku nau feongoongoi ki muʻa pea nau toki fakahoko ha ngaahi fakatau lalahi, pe ko ha ngaahi meʻa kehe te ne uesia ʻa e patiseti kuo nau ʻosi fokotuʻú. Hili ha uike ʻe ua, te nau lava leva ke fakahoa ʻa ʻenau paʻanga hū mai totonú pea mo ʻenau ngaahi fakamolé ʻo fakatatau ki heʻenau palani ne tomuʻa fokotuʻú.

Ke tokoniʻi e kau akó ke mahino e founga hono fokotuʻutuʻu ʻo ha patisetí, fekau ke nau vakai ki he ngaahi sīpinga fakapatiseti ko ʻení, ʻa ia ʻoku toe maʻu pē ʻi he peesi 40 ʻo e Tohi Fakahinohino Ako ʻa e Kau Ako ki he Ngaahi Fetuʻutaki ʻi he Nofo-malí mo e Fāmilí.

ʻĪmisi

budget

Patiseti mei ahó ki he ahó

PAʻANGA HÒ MAÍ	TAUMU‘Á	FAKAKÅTOÁ
Vāhenga hili hono to‘o ‘o e tukuhaú
Pa‘anga hū mai kehé
Fakakātoa ʻo e paʻanga hū maí
NGAAHI FAKAMOLÉ	TAUMU‘Á	FAKAKÅTOÁ
Vahehongofulú
Ngaahi Foaki Faka-siasi kehé
Pa‘anga Fakahū Taimi Lōloá
Pa‘anga ‘oku fakahū ki he ngaahi me‘a fakatu‘upakē ‘e hokó
Me‘akai
Totongi falé pe nofo totongí
‘Uhilá, telefoní, vaí,
Me‘alelé
Ngaahi totongi mo‘uá
Malu‘í
Ngaahi fakamole fakafaito‘ó
Vala
Me‘a kehe
Me‘a kehe
Me‘a kehe
Fakakātoa ʻo e ngaahi fakamolé

Fakaafeʻi ha taha ke ne lau ʻa e lea ko ʻeni ʻa Palesiteni Tena ʻi he (peesi 38–39 ʻo e Tohi Fakahinohino Ako ʻa e Kau Ako ki he Ngaahi Fetuʻutaki ʻi he Nofo-malí mo e Fāmilí):

“Kuó u fakatokangaʻi ʻi heʻeku ʻinitaviu ha kakai tokolahi ʻi he ngaahi taʻu lahi, ʻoku tokolahi ʻaupito ʻa e kakai ʻoku ʻikai ke ʻi ai haʻanau patiseti te nau lava ʻo ngāueʻaki, pea ʻoku ʻikai te nau lava ʻo mapuleʻi lelei kinautolu ke nau moʻui ʻo fakatatau ki he patiseti ko iá. ʻOku pehē ʻe ha kakai tokolahi ʻoku hanga ʻe he patisetí ʻo toʻo meiate kinautolu ʻa ʻetau tauʻatāiná. ʻOku ʻikai moʻoni ia, he kuo ʻiloʻi ʻe he kakai lavameʻá ʻoku hanga ʻe he patisetí ʻo fakafaingamālieʻi ʻa ʻete tauʻatāina fakaʻekonōmika moʻoní” (ʻi he Conference Report, Oct. 1979, 121; pe Ensign, Nov. 1979, 82).

Ke ke faitotonu ʻi hoʻo ngaahi meʻa fakapaʻanga kotoa pē.

Kole ki ha taha ke lau ʻa e lea ko ʻeni ʻa Palesiteni Tena (peesi 39 ʻo e Tohi Fakahinohino Ako ʻa e Kau Ako ki he Ngaahi Fetuʻutaki ʻi he Nofo-malí mo e Fāmilí):

“ ʻE ʻikai pē ha taimi ia ʻe ʻikai fie maʻu ai ʻa e ʻulungāanga faitotonú ia. ʻOku kau ia ki he ngaahi meʻa kotoa pē ʻoku tau faí. ʻOku totonu ke tau hoko ko e tumutumu ʻo e faʻifaʻitakiʻanga ʻo e faitotonú ʻi heʻetau hoko ko e kau takimuʻa mo e kāingalotu ʻo e Siasí” (ʻi he Conference Report, Oct. 1979, 121; pe Ensign, Nov. 1979, 82).

Ko e hā ʻoku hoko ai ʻa e faitotonú ko e konga mahuʻinga ʻo ʻetau fengāueʻaki fakapaʻangá?

Fakaʻosí

Fakamamafaʻi ange kuo pau ke ngāue fakataha ʻa e husepānití mo e uaifí ke levaʻi ʻenau meʻa fakapaʻangá. Kole ki he kau akó ke nau fakakaukauʻi pē ʻe anga fēfē ʻenau muimui ki he ngaahi tefitoʻi moʻoni naʻe aleaʻi ʻi he lēsoní. Fakaafeʻi kinautolu ke nau palani ke toe fakaleleiʻi ange ʻa ʻenau founga ki hono levaʻi ʻenau paʻangá.

Fakamoʻoni ki he ngaahi moʻoni ne aleaʻi ʻi he lēsoní ʻo fakatatau mo e ueʻi ʻa e Laumālié.

Vakai ki he peesi 35–40 ʻo e Tohi Fakahinohino Ako ʻa e Kau Ako ki he Ngaahi Fetuʻutaki ʻi he Nofo-malí mo e Fāmilí. Poupouʻi e kau akó ke nau toe fakamanatu e ngaahi tokāteline mo e ngaahi tefitoʻi moʻoni ʻi he lēsoni ko ʻení ʻaki ʻenau (1) muimui ki ha taha ʻo e ngaahi fakakaukau ʻi he “Ngaahi Fakakaukau ki Hono Fakahokó” pea mo nau (2) lau e fakamatala ʻa ʻEletā Tena “Ko e Taʻefeliliuaki ʻi he Taimi ʻo e Feliliuakí.” Fakamahinoʻi ange ʻe lava ke maʻu ʻe he ongo meʻa malí ha ngaahi lelei lahi ʻi haʻana lau mo aleaʻi fakataha ʻa e ngaahi fakamatala ʻi he tohi fakahinohino akó.

Ngaahi Maʻuʻanga Tokoni Kehé

Toe vakaiʻi ʻo e ngaahi lēsoni ʻi he konga A ʻo e kalasi ko e Ngaahi Fetuʻutaki ʻi he Nofo- malí mo e Fāmilí

ʻOku fakaʻosi ʻe he lēsoni ko ʻení ‘a e konga A ʻo e kalasi ko e Ngaahi Fetuʻutaki ʻi he Nofo- malí mo e Fāmilí. Kapau ʻokú ke akoʻi e foʻi kalasí kakato, peá ke fakakaukau ke fai e kiʻi ʻekitivitī ko ʻení:

ʻOange ki he toko taha ako taki taha ha lauʻipepa mo ha peni pe peni vahevahe. Kole ki he kau akó ke fakamoleki ha miniti ʻe 3 ke nau hiki ai e ngaahi tokāteline mo e ngaahi tefitoʻi moʻoni ʻoku nau manatuʻi mei he ʻuluaki lēsoni ʻe valu ʻo e konga ko ʻení. Fekau ke nau laineʻi ʻa e ngaahi tokāteline mo e ngaahi tefitoʻi moʻoni na mahuʻinga mālie taha kia kinautolú. Fakalotolahiʻi kinautolu ke nau mateuteu ke talanoa fekauʻaki mo e ngaahi meʻa naʻa nau laineʻí. Kapau ʻoku nau fie maʻu ha tokoni, peá ke ngāueʻaki e tēpile fakahokohoko ʻo e tohí ʻi he peesi v–viii ʻo e tohi lēsoni ko ʻeni pe ko e vakaiʻi fakalūkufua ʻo e kalasí ʻi he peesi vii–viii ʻo e Tohi Fakahinohino Ako ʻa e Kau Ako ki he Ngaahi Fetuʻutaki ʻi he Nofo-malí mo e Fāmilí.

Hili ha miniti ʻe tolu, peá ke kole ki he tokotaha taki taha ke ne lau ha meʻa pē ʻe taha mei heʻene lisí pea fakamatalaʻi pē ko e hā ʻoku mahuʻinga makehe ai kiate iá. Hiki fakanounouʻi ʻa e tali ʻa e kau akó ʻi he palakipoé peá ke lave ki hono mahuʻinga ʻo e tali takitaha. Vahevahe ange leva hoʻo ongoʻi ʻaʻaú. ʻO ka toe lahi e taimí, peá ke toe fakahoko pē ʻa e ʻekitivitī ko ʻení.

Fakamālō ange kiate kinautolu kuó ke akoʻí ko ʻenau kau mai ki he konga ʻuluaki ʻo e kalasí. Fakamatalaʻi ange ko e konga hono ua ʻo e kalasí ʻoku ʻi ai ha lēsoni ʻe valu ʻo fekauʻaki mo e founga ʻe lava ke fakamālohia ai ʻe he ngaahi mātuʻá honau ngaahi fāmilí pea mo maʻu ha fiefia ʻi honau ngaahi fatongiá. Talitali lelei kotoa e kau akó ke hokohoko atu ʻenau kau mai ki he kalasí.