« សេចក្តីណែនាំសម្រាប់ម៉ោងច្រៀងចម្រៀង និងបទបង្ហាញរបស់កុមារនៅក្នុងម៉ោងប្រជុំសាក្រាម៉ង់ » ចូរមកតាមខ្ញុំ—សម្រាប់អង្គការបឋមសិក្សា ៖ ព្រះគម្ពីរសញ្ញាចាស់ ឆ្នាំ ២០២៣ ( ឆ្នាំ ២០២៣ )
« សេចក្តីណែនាំសម្រាប់ម៉ោងច្រៀងចម្រៀង និងបទបង្ហាញរបស់កុមារនៅក្នុងម៉ោងប្រជុំសាក្រាម៉ង់ » ចូរមកតាមខ្ញុំ—សម្រាប់អង្គការបឋមសិក្សា ៖ ឆ្នាំ ២០២៣
សេចក្តីណែនាំសម្រាប់ម៉ោងច្រៀងចម្រៀង និងបទបង្ហាញរបស់កុមារនៅក្នុងម៉ោងប្រជុំសាក្រាម៉ង់
គោរពជូន គណៈប្រធានអង្គការបឋមសិក្សា និង អ្នកដឹកនាំតន្រី្ត
ចម្រៀងកុមារគឺជាឧបករណ៍ដ៏មានអានុភាព ដើម្បីជួយកុមារឲ្យរៀនអំពីផែនការនៃសុភមង្គលរបស់ព្រះវរបិតាសួគ៌ និងសេចក្ដីពិតជាមូលដ្ឋាននៃដំណឹងល្អរបស់ព្រះយេស៊ូវគ្រីស្ទ ។ នៅពេលកុមារច្រៀងអំពីគោលការណ៍នៃដំណឹងល្អ នោះព្រះវិញ្ញាណបរិសុទ្ធនឹងថ្លែងទីបន្ទាល់អំពីសេចក្ដីពិតដ៏ពេញលេញនៃគោលការណ៍ទាំងនោះ ។ ទំនុកច្រៀង និងទំនុកភ្លេងនឹងដក់ជាប់ក្នុងគំនិត និងដួងចិត្តរបស់កុមារពេញមួយជីវិតរបស់ពួកគេ ។
សូមស្វែងរកជំនួយពីព្រះវិញ្ញាណ នៅពេលបងប្អូនរៀបចំបង្រៀនដំណឹងល្អតាមរយៈតន្ត្រី ។ សូមចែកចាយទីបន្ទាល់របស់បងប្អូនអំពីសេចក្ដីពិតដែលបងប្អូនកំពុងច្រៀង ។ សូមជួយកុមារឲ្យមើលឃើញពីរបៀបដែលតន្ត្រីទាក់ទងនឹងអ្វីដែលពួកគេកំពុងរៀន និងកំពុងដកពិសោធន៍នៅឯគេហដ្ឋាន និងក្នុងថ្នាក់អង្គការបឋមសិក្សា ។ កុមារ និងក្រុមគ្រួសាររបស់ពួកគេនឹងមានពរជ័យតាមរយៈការខិតខំប្រឹងប្រែងរបស់បងប្អូន ដើម្បីជួយកុមារឲ្យច្រៀងតន្រ្តីពិសិដ្ឋ ។
យើងស្រឡាញ់បងប្អូន ហើយសូមសម្ដែងការដឹងគុណរបស់យើងចំពោះការបម្រើដ៏មានការលះបង់ខ្ពស់ដែលបងប្អូនកំពុងបម្រើ ដើម្បីពង្រឹង ហើយការពារកុមារដ៏មានតម្លៃរបស់យើង ។
គណៈប្រធានអង្គការបឋមសិក្សាទូទៅ
សេចក្តីណែនាំសម្រាប់ម៉ោងច្រៀងចម្រៀង
៥ នាទី ( គណៈប្រធានអង្គការបឋមសិក្សា ) ៖ ការអធិស្ឋានបើក បទគម្ពីរ ឬមាត្រានៃសេចក្ដីជំនឿ និងការឡើងនិយាយរបស់កុមារម្នាក់
២០ នាទី ( អ្នកដឹកនាំតន្ត្រី ) ៖ ម៉ោងច្រៀងចម្រៀង
គណៈប្រធានអង្គការបឋមសិក្សា និងអ្នកដឹកនាំតន្ត្រីជ្រើសរើសចម្រៀងសម្រាប់ខែនីមួយៗ ដើម្បីពង្រឹងគោលការណ៍ដំណឹងល្អដែលកុមារកំពុងរៀននៅក្នុងថ្នាក់ និងនៅឯគេហដ្ឋានរបស់ពួកគេ ។ បញ្ជីចម្រៀងមួយដែលពង្រឹងដល់គោលការណ៍ទាំងនេះត្រូវបានរួមបញ្ចូលនៅក្នុងសេចក្ដីណែនាំនេះ ។ ចម្រៀងទាំងនេះក៏មានណែនាំនៅក្នុងសៀវភៅ ចូរមកតាមខ្ញុំ—សម្រាប់អង្គការបឋមសិក្សា និង ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារផងដែរ ។
នៅពេលបងប្អូនបង្រៀនបទចម្រៀងនីមួយៗទៅកុមារ សូមអញ្ជើញពួកគេឲ្យចែកចាយអ្វីដែលពួកគេបានរៀនរួចហើយអំពីដំណើររឿង និងគោលការណ៍ខាងគោលលទ្ធិនោះនៅក្នុងបទចម្រៀងដែលបងប្អូនបង្រៀន ។ បងប្អូនអាចរំឭកក្នុងគម្រោងមេរៀននៃសៀវភៅ ចូរមកតាមខ្ញុំ—សម្រាប់អង្គការបឋមសិក្សា ដែលកុមារកំពុងរៀននៅក្នុងថ្នាក់របស់ពួកគេ ។ ការធ្វើបែបនេះនឹងជួយឲ្យបងប្អូនបានដឹងអំពីដំណើររឿង និងគោលការណ៍ទាំងឡាយដែលពួកគេកំពុងរៀន ដើម្បីបងប្អូនអាចពិចារណាពីរបៀបជួយដល់ការរៀនសូត្ររបស់ពួកគេដោយប្រើប្រាស់តន្រ្តី ។
នៅអំឡុងម៉ោងច្រៀងចម្រៀង បងប្អូនក៏អាចរំឭកបទចម្រៀងដែលកុមារបានរៀនពីមុនៗមក និងបទចម្រៀងដែលកុមារចូលចិត្តច្រៀងផងដែរ ។ នៅពេលបងប្អូនរំឭកបទចម្រៀងទាំងនោះ សូមឲ្យកុមារចែកចាយគំនិត និងអារម្មណ៍របស់ពួកគេសង្ខេបៗអំពីសេចក្តីពិតដែលមាននៅក្នុងបទចម្រៀងទាំងនោះ ។
សៀវភៅចម្រៀងកុមារ គឺជាធនធានមូលដ្ឋានសម្រាប់តន្រ្តីនៅក្នុងអង្គការបឋមសិក្សា ។ ទំនុកតម្កើងនៅក្នុងសៀវភៅទំនុកតម្កើង និងចម្រៀងនៅក្នុងទស្សនាវដ្តី ប្រិយមិត្ត ឬ លីអាហូណា ក៏អាចប្រើប្រាស់បានផងដែរ ។ ជួនកាល កុមារអាចច្រៀងចម្រៀងជាតិ ឬចម្រៀងថ្ងៃបុណ្យ ដែលសមរម្យសម្រាប់ថ្ងៃអាទិត្យ និងសម្រាប់អាយុរបស់កុមារ ។ ការប្រើចម្រៀងផ្សេងទៀតនៅក្នុងអង្គការបឋមសិក្សាត្រូវតែមានការអនុម័តពីគណៈប៊ីស្សព ( សូមមើល ក្បួនខ្នាតទូទៅ ៖ ការបម្រើនៅក្នុងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ១២.៣.៤ នៅលើគេហទំព័រ ChurchofJesusChrist.org ) ។
ទិដ្ឋភាពទូទៅនៃអង្គការបឋមសិក្សា
រៀងរាល់សប្តាហ៍ អង្គការបឋមសិក្សាមាននូវ ៖
-
ម៉ោងច្រៀងចម្រៀង ៖២៥ នាទី
-
ការប្ដូរទីកន្លែង ៖៥ នាទី
-
ម៉ោងបង្រៀន ៖២០ នាទី
ថ្នាក់ដឹកនាំរបស់អង្គការបឋមសិក្សាដែលមានចំនួនកុមារច្រើន អាចបំបែកកុមារជាពីរក្រុម ហើយឲ្យក្រុមមួយនៅក្នុងថ្នាក់អង្គការបឋមសិក្សា ខណៈដែលក្រុមមួយទៀតនៅក្នុងម៉ោងច្រៀង ។ បន្ទាប់មក ក្រុមទាំងពីរប្តូរទីកន្លែងគ្នា ។ នៅក្នុងករណីបែបនេះ ថ្នាក់ដឹកនាំអង្គការបឋមសិក្សាអាចត្រូវកែសម្រួលម៉ោងដែលបានបង្ហាញខាងលើ ដើម្បីឲ្យត្រូវតាមកាលៈទេសៈរបស់ពួកគេ ។
តន្ត្រីដែលលើកទឹកចិត្តឲ្យបម្រើនៅម៉ោងច្រៀងចម្រៀង
ខែ មករា
-
« ចូរមកតាមខ្ញុំ » ទំនុកតម្កើង ល.រ. ៦៣
-
« ការអធិស្ឋានរបស់កុមារ » សៀវភៅចម្រៀងកុមារ ទំព័រ ៦–៧
-
« គ្រាមួយកាលព្រះយេស៊ូវនៅតូច » សៀវភៅចម្រៀងកុមារ ទំព័រ ៣៤
ខែ កុម្ភៈ
-
« ពិធីបុណ្យជ្រមុជទឹក » សៀវភៅចម្រៀងកុមារ ទំព័រ ៥៤–៥៥
-
« ខ្ញុំនឹងធ្វើតាមផែនការព្រះ » សៀវភៅចម្រៀងកុមារ ទំព័រ ៨៦–៨៧
-
« ទ្រង់បញ្ជូនបុត្រាទ្រង់មក » សៀវភៅចម្រៀងកុមារ ទំព័រ ២០–២១
ខែ មីនា
-
« ខ្ញុំព្យាយាមក្លាយដូចព្រះយេស៊ូវ » សៀវភៅចម្រៀងកុមារ ទំព័រ ៤០–៤១
-
« តើបានអធិស្ឋានទេ? » ទំនុកតម្កើង ល.រ. ៧៩
-
« សូមប្រាប់ខ្ញុំពីរឿងព្រះយេស៊ូវ » សៀវភៅចម្រៀងកុមារ ទំព័រ ៣៦
ខែ មេសា
-
« ជំនឿ » សៀវភៅចម្រៀងកុមារ ទំព័រ ៥០
-
« ខ្ញុំស្គាល់ក្តីស្នេហ៍ព្រះសង្រ្គោះ » សៀវភៅចម្រៀងកុមារ ទំព័រ ៤២–៤៣
-
« ព្រះយេស៊ូវបានរស់ឡើងវិញ » សៀវភៅចម្រៀងកុមារ ទំព័រ ៤៤
ខែ ឧសភា
-
« រក្សាបទបញ្ញត្តិ » សៀវភៅចម្រៀងកុមារ ទំព័រ ៦៨–៦៩
-
« ក្រុមគ្រួសារអាចនៅជាមួយគ្នាជានិរន្តរ » សៀវភៅចម្រៀងកុមារ ទំព័រ ៩៨
-
« ខ្ញុំជាកូនរបស់ព្រះ » សៀវភៅចម្រៀងកុមារ ទំព័រ ២
ខែ មិថុនា
-
« ចូរអ្នកស្រឡាញ់គ្នា » សៀវភៅចម្រៀងកុមារ ទំព័រ ៧៤
-
« មើលព្រះប្រោសលោះយើងសុគតហើយ » ទំនុកតម្កើង ល.រ. ១១៣
-
« តើព្រះយេស៊ូវរស់ឡើងវិញឬ » សៀវភៅចម្រៀងកុមារ ៤៥
ខែ កក្កដា
-
« ឈរដោយសុចរិត » សៀវភៅចម្រៀងកុមារ ទំព័រ ៨១
-
« ខ្ញុំនឹងដើរជាមួយអ្នក » សៀវភៅចម្រៀងកុមារ ទំព័រ ៧៨–៧៩
-
« ខ្ញុំដឹងព្រះបិតារស់ » សៀវភៅចម្រៀងកុមារ ទំព័រ ៨
ខែ សីហា
-
« ពេលខ្ញុំបានជ្រមុជទឹក » សៀវភៅចម្រៀងកុមារ ទំព័រ ៥៣
-
« ព្រះវិញ្ញាណបរិសុទ្ធ » សៀវភៅចម្រៀងកុមារ ទំព័រ ៥៦
-
« ព្រះបានប្រទានវិហារឲ្យខ្ញុំ » សៀវភៅចម្រៀងកុមារ ទំព័រ ៧៣
ខែ កញ្ញា
-
« ពេលយើងជួយ » សៀវភៅចម្រៀងកុមារ ១០៨B
-
« ការអធិស្ឋានរបស់កុមារ » សៀវភៅចម្រៀងកុមារ ទំព័រ ៦–៧
-
« ខ្ញុំដឹងថាព្រះប្រោសលោះខ្ញុំនៅរស់ » ទំនុកតម្កើង ល.រ. ៧៦
ខែ តុលា
-
« ពេលទ្រង់យាងមកម្តងទៀត » សៀវភៅចម្រៀងកុមារ ទំព័រ ៤៦–៤៧
-
« សាសនាចក្រព្រះយេស៊ូវគ្រីស្ទ » សៀវភៅចម្រៀងកុមារ ទំព័រ ៤៨
-
« ខ្ញុំចូលចិត្តមើលព្រះវិហារបរិសុទ្ធ » សៀវភៅចម្រៀងកុមារ ទំព័រ ៩៩
ខែ វិច្ឆិកា
-
« ស្វែងរក គិត អធិស្ឋាន » សៀវភៅចម្រៀងកុមារ ទំព័រ ៦៦
-
« សូមប្រាប់កូន ឱព្រះអង្គអើយ » សៀវភៅចម្រៀងកុមារ ទំព័រ ៧៥
-
« ចិត្តល្អចាប់ផ្តើមនឹងខ្ញុំ » សៀវភៅចម្រៀងកុមារ ទំព័រ ៨៣
ខែ ធ្នូ
-
« ព្រះវរបិតាស្រឡាញ់ខ្ញុំ » សៀវភៅចម្រៀងកុមារ ទំព័រ ១៦–១៧
-
« ជ្រើសរើសផ្លូវត្រូវ » សៀវភៅចម្រៀងកុមារ ទំព័រ ៨២
-
« ពេលខ្ញុំបានជ្រមុជទឹក » សៀវភៅចម្រៀងកុមារ ទំព័រ ៥៣
ការប្រើប្រាស់តន្ត្រីដើម្បីបង្រៀនគោលលទ្ធិ
ម៉ោងច្រៀងចម្រៀងមានគោលបំណងដើម្បីជួយកុមារឲ្យទទួលអារម្មណ៍នូវព្រះចេស្ដានៃព្រះវិញ្ញាណបរិសុទ្ធ នៅពេលពួកគេរៀនអំពីសេចក្ដីពិតនៃដំណឹងល្អ ។ គំនិតខាងក្រោមនេះអាចជួយបាន ។
សូមបំពេញចន្លោះ ។ សូមសរសេរវគ្គមួយនៃបទចម្រៀងនៅលើក្តារខៀនដោយលុបពាក្យគន្លឹះមួយចំនួនចេញ ។ បន្ទាប់មក សូមឲ្យកុមារច្រៀងចម្រៀងនេះ ដោយផ្ទៀងស្តាប់រកពាក្យដើម្បីបំពេញនៅក្នុងចន្លោះទាំងនោះ ។ នៅពេលពួកគេបំពេញចន្លោះនីមួយៗហើយ សូមអញ្ជើញកុមារឲ្យចែកចាយពីគោលការណ៍ដំណឹងល្អ ដែលពួកគេរៀននៅក្នុងពាក្យដែលបាត់នេះ ។
សូមប្រើពាក្យដកស្រង់មកពីថ្នាក់ដឹកនាំសាសនាចក្រ ។ សូមអញ្ជើញកុមារឲ្យស្តាប់ពាក្យដកស្រង់មកពីថ្នាក់ដឹកនាំរបស់សាសនាចក្រ ដែលបង្រៀនពីគោលការណ៍ដំណឹងល្អដូចគ្នានៅក្នុងបទចម្រៀងអង្គការបឋមសិក្សា ។ សូមឲ្យពួកគេលើកដៃឡើង នៅពេលពួកគេបានឮអ្វីមួយដែលជួយពួកគេឲ្យយល់ពីសេចក្តីពិតដែលពួកគេកំពុងច្រៀង ។ សូមពួកគេឲ្យចែកចាយអ្វីដែលពួកគេបានឮ ។
សូមថ្លែងទីបន្ទាល់ ។ សូមថ្លែងទីបន្ទាល់ខ្លីៗដល់កុមារអំពីសេចក្តីពិតនៃដំណឹងល្អ ដែលមាននៅក្នុងចម្រៀងអង្គការបឋមសិក្សា ។ សូមជួយកុមារឲ្យយល់ថា ការច្រៀងចម្រៀងគឺជាវិធីមួយដែលពួកគេអាចថ្លែងទីបន្ទាល់ និងទទួលនូវអារម្មណ៍នៃព្រះវិញ្ញាណ ។
សូមប្រើប្រាស់រូបភាព ។ សូមឲ្យកុមារជួយបងប្អូនស្វែងរក ឬបង្កើតរូបភាពដែលត្រូវនឹងពាក្យ ឬឃ្លាសំខាន់ៗនៅក្នុងបទចម្រៀងនេះ ។ សូមអញ្ជើញពួកគេឲ្យចែកចាយនូវរបៀបដែលរូបភាពនេះទាក់ទងនឹងបទចម្រៀងនេះ ហើយថាតើបទចម្រៀងនេះបង្រៀនអ្វីខ្លះ ។ ឧទាហរណ៍ ប្រសិនបើបងប្អូនកំពុងបង្រៀនបទ « ខ្ញុំនឹងធ្វើតាមផែនការព្រះ » ( សៀវភៅចម្រៀងកុមារទំព័រ ៨៦–៨៧ ) នោះបងប្អូនអាចបង្ហាញរូបភាពដែលពិពណ៌នាអំពីពាក្យសំខាន់ៗចេញពីបទចម្រៀងនោះនៅក្នុងបន្ទប់បាន ( ដូចជា អំណោយ ស្ថានសួគ៌ ផ្ទះ ផែនដី និង កំណើត ) ។ សូមឲ្យកុមារប្រមូលរូបភាពទាំងនេះ ហើយកាន់រូបភាពតាមលំដាប់លំដោយ នៅពេលបងប្អូនច្រៀងចម្រៀងនេះជាមួយគ្នា ។
សូមចែកចាយវត្ថុ ។ បងប្អូនអាចប្រើវត្ថុដែលទាក់ទងនឹងបទចម្រៀងមួយ ។ ឧទាហរណ៍ បទចម្រៀង « ជំនឿ » ( សៀវភៅចម្រៀងកុមារ ទំព័រ ៥០–៥១ ) និយាយអំពីគ្រាប់ពូជតូចមួយ ។ បងប្អូនអាចបង្ហាញកុមារគ្រាប់ពូជមួយគ្រាប់ ដើម្បីជួយពួកគេឲ្យយល់ថា សេចក្តីជំនឿតូចមួយនៅលើព្រះយេស៊ូវគ្រីស្ទអាចរីកលូតលាស់បន្តិចម្តងៗ ។
សូមភ្ជាប់បទចម្រៀងជាមួយនឹងបទពិសោធន៍ផ្ទាល់ខ្លួន ។ សូមជួយកុមារឲ្យភ្ជាប់ទៅនឹងគោលការណ៍ដែលបានបង្រៀននៅក្នុងបទចម្រៀងនេះ ជាមួយនឹងបទពិសោធន៍ដែលពួកគេមានជាមួយគោលការណ៍ទាំងនោះ ។ ឧទាហរណ៍ មុនពេលច្រៀងបទ « ខ្ញុំចូលចិត្តមើលព្រះវិហារបរិសុទ្ធ » ( សៀវភៅចម្រៀងកុមារទំព័រ ៩៩ ) បងប្អូនអាចសូមឲ្យកុមារលើកដៃរបស់ពួកគេឡើង ប្រសិនបើពួកគេធ្លាប់បានឃើញព្រះវិហារបរិសុទ្ធ ។ នៅពេលពួកគេច្រៀង សូមអញ្ជើញពួកគេឲ្យគិតអំពីអារម្មណ៍ដែលពួកគេមាន នៅពេលពួកគេឃើញព្រះវិហារបរិសុទ្ធ ។
សូមសួរសំណួរ ។ មានសំណួរជាច្រើនដែលបងប្អូនអាចសួរបាន នៅពេលបងប្អូនច្រៀងចម្រៀង ។ ឧទាហរណ៍ បងប្អូនអាចសួរកុមារថា តើពួកគេរៀនបានអ្វីខ្លះពីវគ្គនីមួយៗនៅក្នុងបទចម្រៀងនេះ ។ បងប្អូនក៏អាចសូមឲ្យពួកគេគិតអំពីសំណួរដែលចម្រៀងនោះឆ្លើយប្រាប់ផងដែរ ។
សូមស្តាប់រកចម្លើយ ។ សូមឲ្យកុមារស្ដាប់រកចម្លើយចំពោះសំណួរដូចជា « នរណា ? » « អ្វីខ្លះ ? » « កន្លែងណា ? » « នៅពេលណា ? » ឬ « ហេតុអ្វី ? » ឧទាហរណ៍ នៅក្នុងបទចម្រៀងនេះ « ពិធីបុណ្យជ្រមុជទឹក » ( សៀវភៅចម្រៀងកុមារ ទំព័រ ៥៤–៥៥ ) ពួកគេអាចស្តាប់រកថាតើនរណាធ្វើពិធីបុណ្យជ្រមុជទឹកឲ្យព្រះយេស៊ូវ ហើយនៅកន្លែងណា នៅពេលណា ដោយរបៀបណា និងហេតុអ្វីទ្រង់បានទទួលបុណ្យជ្រមុជទឹក ។ បងប្អូនក៏អាចសូមឲ្យកុមារស្តាប់រកពាក្យគន្លឹះ ឬរាប់ម្រាមដៃរបស់ពួកគេ ថាតើពួកគេច្រៀងពាក្យណាមួយចំនួនប៉ុន្មានដង ។
ការជួយកុមារឲ្យរៀន និងចងចាំបទចម្រៀងកុមារ និងទំនុកតម្កើង
កុមាររៀនច្រៀងចម្រៀងមួយបានតាមរយៈការស្តាប់ និងការច្រៀងម្តងហើយម្តងទៀត ។ សូមច្រៀងពាក្យនៃចម្រៀងថ្មីមួយឲ្យកុមារស្ដាប់ជានិច្ច—សូមកុំគ្រាន់តែអាន ឬសូត្រពាក្យទាំងនោះឡើយ ។ ការធ្វើបែបនេះជួយកុមារឲ្យភ្ជាប់ទំនុកភ្លេងទៅនឹងពាក្យទាំងនោះ ។ បន្ទាប់ពីបានបង្រៀនបទចម្រៀងមួយរួចហើយ សូមរំឭកបទចម្រៀងនេះឡើងវិញតាមរបៀបសប្បាយៗពេញមួយឆ្នាំ ។ ខាងក្រោមនេះគឺជាគំនិតមួយចំនួនដើម្បីជួយកុមារឲ្យរៀន ហើយរំឭកចម្រៀងនានា ។
សូមធ្វើប័ណ្ណប្រកាស ។ សូមបង្ហាញប័ណ្ណប្រកាសដែលមានពាក្យចេញមកពីវគ្គនីមួយៗ ឬរូបភាពដែលតំណាងឲ្យពាក្យទាំងនោះ ។ នៅពេលកុមារច្រៀង សូមបាំងពាក្យមួយចំនួន ឬរូបភាពរហូតដល់ពួកគេអាចច្រៀងវគ្គទាំងមូលបានដោយគ្មានប័ណ្ណប្រកាសនោះ ។ បងប្អូនក៏អាចអញ្ជើញឲ្យកុមារជួយបងប្អូនធ្វើប័ណ្ណប្រកាសនោះផងដែរ ។
សូមបង្ហាញចង្វាក់ភ្លេង ។ ដើម្បីជួយកុមារឲ្យរៀនទំនុកភ្លេងនៃបទចម្រៀងមួយ សូមលើកដៃរបស់បងប្អូនឡើងជាទម្រង់ផ្តេក ហើយខណៈដែលបងប្អូនច្រៀងពាក្យទាំងនោះ សូមធ្វើចលនាដៃរបស់បងប្អូនឡើងដើម្បីបង្ហាញពីចង្វាក់ខ្ពស់ ហើយចុះក្រោមដើម្បីបង្ហាញពីចង្វាក់ទាប ។
សូមធ្វើសូររំពង ។ សូមឲ្យកុមារធ្វើជាសូររំពងរបស់បងប្អូនដោយថាតាមអ្វីដែលបងប្អូនកំពុងច្រៀង ។ សូមច្រៀងឃ្លា ឬវគ្គខ្លីមួយឲ្យកុមារស្ដាប់ រួចហើយសូមឲ្យពួកគេច្រៀងឲ្យបងប្អូនស្ដាប់វិញ ។
សូមប្រើវិធីផ្សេងៗគ្នា ។ សូមច្រៀងចម្រៀងតាមរបៀបខុសៗគ្នា ដូចជាការខ្សឹបប្រាប់ ការគ្រហឹម ការទះដៃតាមចង្វាក់ភ្លេង ការប្តូរល្បឿន ឬការច្រៀងចម្រៀងកាលកំពុងអង្គុយ ឬឈរ ។
សូមច្រៀងជាក្រុម ។ សូមឲ្យសិស្សក្នុងថ្នាក់ ឬកុមារម្នាក់ៗមានឃ្លាមួយដើម្បីច្រៀងខណៈដែលកំពុងឈរ រួចហើយសូមឲ្យពួកគេប្ដូរឃ្លាគ្នារហូតដល់សិស្សក្នុងថ្នាក់ ឬកុមារម្នាក់ៗបានច្រៀងឃ្លានីមួយៗ ។
សូមប្រើកាយវិការដៃ ។ សូមឲ្យកុមារគិតពីកាយវិការដៃងាយៗដើម្បីជួយពួកគេឲ្យចងចាំពាក្យ និងសារលិខិតនៃបទចម្រៀងមួយ ។ ឧទាហរណ៍ នៅពេលបងប្អូនច្រៀងបទ « ដោយគោរព ដោយស្ងៀមស្ងាត់ » ( សៀវភៅចម្រៀងកុមារ ទំព័រ ១១ ) នៅពេលបងប្អូនអញ្ជើញកុមារឲ្យឱបដៃរបស់ពួកគេ ឱនក្បាលរបស់ពួកគេ ហើយប៉ះបេះដូងរបស់ពួកគេ នៅពេលពួកគេច្រៀងឃ្លាទាក់ទងនឹងបទចម្រៀងនេះ ។
កុមារីច្រៀង កុមារាច្រៀង ។ សូមគូររូបរបស់កុមារា និងកុមារី ហើយសូមបិទរូបនោះជាមួយកាវ ឬស្កុតលើឈើពីរផ្សេងគ្នា ។ ពេលដែលរំឭកបទចម្រៀងនេះ សូមលើករូបភាពនេះឡើង ដើម្បីបង្ហាញថាតើនរណាត្រូវច្រៀងផ្នែកណា ។
សូមផ្គូផ្គងរូបភាពទៅនឹងឃ្លាបទចម្រៀង ។ សូមសរសេរឃ្លានីមួយៗនៃបទចម្រៀងនៅលើក្រដាសផ្សេងៗគ្នា ហើយស្វែងរករូបភាពដែលតំណាងឲ្យឃ្លានៃបទចម្រៀងនីមួយៗ ។ សូមបិទរូបភាពនៅលើជញ្ជាំងម្ខាងនៃបន្ទប់ ហើយបិទក្រដាសនៅជញ្ជាំងម្ខាងទៀត ។ សូមច្រៀងចម្រៀងនោះ ហើយឲ្យកុមារផ្គូផ្គងរូបភាពជាមួយនឹងពាក្យ ។
គោលការណ៍ណែនាំសម្រាប់ធ្វើបទបង្ហាញរបស់កុមារនៅក្នុងម៉ោងប្រជុំសាក្រាម៉ង់
ក្រោមការដឹកនាំរបស់ប៊ីស្សព នោះបទបង្ហាញរបស់កុមារនៅម៉ោងប្រជុំសាក្រាម៉ង់ គឺជាធម្មតាធ្វើនៅត្រីមាសទីបួននៅក្នុងឆ្នាំនីមួយៗ ។ ក្នុងនាមជាគណៈប្រធានអង្គការបឋមសិក្សា និងអ្នកដឹកនាំតន្រ្តី សូមរៀបចំជួបគ្នាជាមួយទីប្រឹក្សានៅក្នុងគណៈប៊ីស្សព ដែលមើលការខុសត្រូវលើអង្គការបឋមសិក្សានៅដើមឆ្នាំ ដើម្បីចាប់ផ្តើមពិភាក្សាពីផែនការក្នុងការធ្វើបទបង្ហាញនេះ ។ នៅពេលបងប្អូនបានបញ្ចប់ផែនការនេះ សូមទទួលការអនុម័តពីពួកគាត់ ។
បទបង្ហាញនេះគួរអនុញ្ញាតឲ្យកុមារបង្ហាញអ្វីដែលពួកគេ និងក្រុមគ្រួសាររបស់ពួកគេបានរៀនចេញពីព្រះគម្ពីរសញ្ញាថ្មីនៅឯផ្ទះ និងនៅក្នុងថ្នាក់អង្គការបឋមសិក្សា រួមទាំងបទចម្រៀងថ្នាក់អង្គការបឋមសិក្សា ដែលពួកគេបានច្រៀងនៅក្នុងឆ្នាំនេះផងដែរ ។ សូមពិចារណាប្រកបដោយការអធិស្ឋាននូវគោលការណ៍នៃដំណឹងល្អ និងបទចម្រៀងណាមួយដែលជួយគាំទ្រនូវអ្វីដែលពួកគេបានរៀន ។ សូមធ្វើការកត់ចំណាំសុន្ទរកថា និងបទពិសោធន៍ផ្ទាល់ខ្លួនរបស់កុមារពេញមួយឆ្នាំ ដើម្បីអាចយកមកប្រើនៅក្នុងបទបង្ហាញនេះ ។ សូមអញ្ជើញកុមារឲ្យចែកចាយបទគម្ពីរ ដំណើររឿង និងទីបន្ទាល់របស់ពួកគេនៅក្នុងបទបង្ហាញ ។ នៅពេលបងប្អូនរៀបផែនការធ្វើបទបង្ហាញនេះ សូមគិតពីវិធីជាច្រើនដែលវាអាចជួយក្រុមជំនុំឲ្យផ្តោតយកចិត្តទុកដាក់ទៅលើព្រះវរបិតាសួគ៌ ព្រមទាំងព្រះអង្គសង្រ្គោះ និងការបង្រៀនទាំងឡាយរបស់ទ្រង់ទាំងពីរអង្គ ។
អង្គភាពដែលមានកុមារតិចអាចពិចារណានូវវិធីនានា ដែលសមាជិកក្រុមគ្រួសារអាចចូលរួមជាមួយនឹងកូនៗរបស់ពួកគាត់ ។ សមាជិកម្នាក់នៅក្នុងគណៈប៊ីស្សពអាចបញ្ចប់ការប្រជុំនេះដោយការថ្លែងទីបន្ទាល់សង្ខេបៗ ។
នៅពេលបងប្អូនរៀបចំបទបង្ហាញ សូមចងចាំគោលការណ៍ណែនាំដូចខាងក្រោម ៖
-
ការហាត់សមមិនគួរយកពេលមិនចាំបាច់ពីថ្នាក់អង្គការបឋមសិក្សា ឬក្រុមគ្រួសារឡើយ ។
-
បទបង្ហាញជារូបភាព សម្លៀកបំពាក់ និងប្រព័ន្ធផ្សព្វផ្សាយផ្សេងៗគឺមិនសមរម្យចំពោះការប្រជុំសាក្រាម៉ង់នោះទេ ។
សូមមើល ក្បួនខ្នាតទូទៅ ៖ ការបម្រើនៅក្នុងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ១២.២.១.២ នៅលើគេហទំព័រ ChurchofJesusChrist.org ។