ក្រុមគ្រួសារដ៏នៅអស់កល្បជានិច្ច ( សាសនា ២០០ )

រូបភាព

គ្រួសារនៅជិតព្រះវិហារបរិសុទ្ធ

សំណួរ

ហេតុអ្វីបានជាក្រុមគ្រួសារ មានសារៈសំខាន់ក្នុងផែនការនៃសុភមង្គលរបស់ព្រះវរបិតាសួគ៌ ?

ចម្លើយរបស់អ្នក គួរតែរួមមាននូវចំណុចដូចតទៅនេះ ៖
- ការបកស្រាយមួយអំពីគោលបំណងចម្បង ក្នុងផែនការនៃសេចក្ដីសង្គ្រោះ ។
- ការពន្យល់មួយអំពីរបៀបដែលក្រុមគ្រួសារសុចរិត ជួយសម្រេចគោលបំណងទាំងនោះពេញទាំងភាពអស់កល្បជានិច្ច ។
- ការពន្យល់មួយអំពីមូលហេតុដែលគោលលទ្ធិអំពីក្រុមគ្រួសារសំខាន់ចំពោះអ្នក និង ភាពរីកចម្រើនដ៏នៅអស់កល្បជានិច្ច ។
- ការពន្យល់មួយអំពីរបៀបដែលការយល់ដឹងរបស់អ្នក អំពីតួនាទីដ៏សំខាន់របស់ក្រុមគ្រួសារនៅក្នុងផែនការនៃសេចក្ដីសង្គ្រោះ មានឥទ្ធិពលលើជម្រើសដែលអ្នកធ្វើនៅក្នុងជីវិតនេះ ។
តើបទដ្ឋានរបស់ព្រះអម្ចាស់ចំពោះអាពាហ៍ពិពាហ៍ មានអ្វីខ្លះ ?

ចម្លើយរបស់អ្នក គួរតែរួមមានការពន្យល់ដូចតទៅនេះ ៖
- តួនាទី និង ទំនួលខុសត្រូវដ៏ទេវភាពរបស់គូស្វាមីភរិយា និង ឪពុកម្ដាយ ។
- តួនាទីរបស់ព្រះអង្គសង្គ្រោះ នៅក្នុងអាពាហ៍ពិពាហ៍ និង ក្រុមគ្រួសារ ។
- ក្រឹត្យវិន័យដែលមានឥទ្ធិពលលើព្រហ្មចារីភាព និង ភាពស្មោះត្រង់នៅក្នុងអាពាហ៍ពិពាហ៍ និង លក្ខណៈដ៏អស់កល្បជានិច្ចនៃក្រឹត្យវិន័យទាំងនោះ ។
- វិធីដែលអ្នកអាចអនុវត្តតាមគោលការណ៍ទាំងនេះ ដើម្បីត្រៀមខ្លួនទទួល ឬ អភិវឌ្ឍន៍អាពាហ៍ពិពាហ៍ និង ក្រុមគ្រួសាររបស់អ្នក ។
តើ « ក្រុមគ្រួសារ ៖ ការប្រកាសដល់ពិភពលោក » (Ensign ឬ Liahona ខែ វិច្ឆិកា ឆ្នាំ ២០១០ ទំព័រ ១២៩ ) មានឥទ្ធិពលវិជ្ជមានទៅលើជីវិតរបស់អ្នក អំឡុងពេលវគ្គសិក្សានេះយ៉ាងដូចម្ដេចខ្លះ ?

អ្នកអាចបង្កើត ឬភ្ជាប់គំនិតពីចម្លើយមុនៗរបស់អ្នក ឬសរសេរអំពីប្រធានបទថ្មីមួយ ។ ចម្លើយរបស់អ្នក គួរតែរួមមាននូវចំណុចដូចតទៅនេះ ៖
- ការពន្យល់មួយអំពីគោលការណ៍ ឬ គោលលទ្ធិជាក់លាក់មួយចេញពីការប្រកាសអំពីក្រុមគ្រួសារ ដែលភ្ជាប់មកជាមួយការពន្យល់បន្ថែមមួយដោយប្រើបទគម្ពីរ ឬ ប្រសាសន៍របស់ពួកព្យាការីថ្ងៃចុងក្រោយ ។
- គំរូមួយអំពីរបៀបធ្វើតាមដំបូន្មានរបស់ពួកព្យាការី បានជួយអ្នកឲ្យយល់កាន់តែច្បាស់ អំពីគោលការណ៍ ឬ គោលលទ្ធិដែលអ្នកបានជ្រើសរើស ។
- គំរូនៃពរជ័យដែលអ្នក ឬអ្នកផ្សេងទៀតទទួលបាន តាមរយៈការស្ដាប់តាមដំបូន្មានដែលមានក្នុងការប្រកាសអំពីក្រុមគ្រួសារ ។
- ការបកស្រាយមួយអំពីអ្វីដែលអ្នកនឹងធ្វើ ដើម្បីរស់នៅឲ្យបានពេញលេញស្របតាមគោលការណ៍ ឬ គោលលទ្ធិដែលអ្នកបានជ្រើសរើស ។

ចំណុចសំខាន់ៗនៃគោលលទ្ធិ

ព័ត៌មានខាងក្រោមត្រូវបានចងក្រងដោយប្រើចំណុចសំខាន់ៗនៅក្នុងមេរៀន សម្រាប់វគ្គសិក្សានេះ ។ តួលេខនៅក្នុងវង់ក្រចក ដែលនៅបន្ទាប់ពីសម្ដីដកស្រង់ ចង្អុលបង្ហាញអំពីលេខមេរៀននៅក្នុង ក្រុមគ្រួសារដ៏អស់កល្ប សៀវភៅណែនាំសម្រាប់គ្រូបង្រៀន ( ឆ្នាំ ២០១៥ ) ដែលមាននូវសេចក្តីថ្លែងការណ៍នោះ ។ សូមប្រៀបធៀបចម្លើយរបស់អ្នកជាមួយនឹងព័ត៌មានខាងក្រោម ។ នៅក្នុងការរំឭកឡើងវិញ ប្រសិនបើអ្នកឃើញថាមានចំណុចសំខាន់ៗនៃគោលលទ្ធិណាមួយដែលអ្នកមិនបានដាក់ចូលក្នុងចម្លើយរបស់អ្នក នោះសូមពិចារណាធ្វើការកែតម្រូវចម្លើយរបស់អ្នកមុននឹងបញ្ជូនវា ។ អ្នកពុំចាំបាច់កត់ត្រាព័ត៌មាននេះឲ្យដូចគ្នាបេះបិទទៅក្នុងចម្លើយអ្នកឡើយ គ្រាន់តែឲ្យច្បាស់ថា អ្នកយល់គោលលទ្ធិទាំងនេះ ហើយបង្ហាញនូវការយល់ដឹងនោះទៅបានហើយ ។ ដោយសារសំណួរលេខ ៣ តម្រូវឲ្យឆ្លើយចម្លើយផ្ទាល់ខ្លួន ដូច្នោះគ្មានចំណុចសំខាន់ណានៅក្នុងសំណួរនោះឡើយ ។

ហេតុអ្វីបានជាក្រុមគ្រួសារមានសារៈសំខាន់ក្នុងផែនការនៃសុភមង្គលរបស់ព្រះវរបិតាសួគ៌ ?

គោលបំណងចម្បងនៅក្នុងផែនការនៃសេចក្ដីសង្គ្រោះ ៖
- « ផែនការរបស់ព្រះវរបិតាសួគ៌ប្រទានមាគ៌ាមួយសម្រាប់យើង ដើម្បីក្លាយដូចជាព្រះមាតាបិតាសួគ៌របស់យើង » (៣) ។
- « ផែនដីនេះត្រូវបានបង្កើតឡើង ដើម្បីជួយនាំមកឲ្យមាននូវអមតភាព និងជីវិតដ៏នៅអស់កល្បជានិច្ចដល់មនុស្ស » (៤) ។
របៀបដែលក្រុមគ្រួសារសុចរិត ជួយសម្រេចគោលបំណងទាំងនោះពេញទាំងភាពអស់កល្បជានិច្ច ៖
- «គ្រួសារជាផ្នែកដ៏សំខាន់មួយនៅក្នុងផែនការរបស់ព្រះ សម្រាប់ជីវិតមុនឆាកជីវិតនេះ ជីវិតរមែងស្លាប់ និងជីវិតដ៏នៅអស់កល្បជានិច្ច » (៦) ។
- « ដោយសារការធ្លាក់ លោកអ័ដាម និងនាងអេវ៉ា អាចមានកូន ហើយពូជពង្សរបស់ពួកគាត់អាចរីកចម្រើនទៅកាន់ជីវិតដ៏នៅអស់កល្បជានិច្ច » (៤) ។
- « ដោយមានរូបកាយសាច់ឈាម យើងជួបប្រទះនឹងស្ថានភាពនៃជីវិតរមែងស្លាប់ ដែលអាចរៀបចំខ្លួនយើងសម្រាប់ភាពអស់កល្បជានិច្ច » (៥) ។
- « នៅពេលយើងចូលក្នុងសេចក្ដីសញ្ញាថ្មី ហើយអស់កល្បអស់កាលជានិច្ចនៃអាពាហ៍ពិពាហ៍ នោះយើងអាចត្រូវបានលើកតម្កើងឡើងនៅក្នុងកម្រិតដ៏ខ្ពស់បំផុតនៃនគរសេឡេស្ទាល » (១៥) ។
តើបទដ្ឋានរបស់ព្រះអម្ចាស់ចំពោះអាពាហ៍ពិពាហ៍ មានអ្វីខ្លះ ?

តួនាទី និង ទំនួលខុសត្រូវដ៏ទេវភាពរបស់គូស្វាមីភរិយា និង ឪពុកម្ដាយ ៖
- « ស្វាមី និងភរិយាមានការទទួលខុសត្រូវដ៏ឧឡារិកដើម្បីស្រឡាញ់ និងថែរក្សាគ្នាទៅវិញទៅមក » ( « ក្រុមគ្រួសារ ៖ ការប្រកាសដល់ពិភពលោក » ទំព័រ ១២៩ ) ។
- « នៅពេលស្វាមី និងភរិយាមួយគូនាំកូនម្នាក់មកកាន់ផែនដី នោះពួកគេកំពុងតែបំពេញផ្នែកមួយនៃផែនការនៃសុភមង្គលរបស់ព្រះវរបិតាសួគ៌ » (១៧) ។
- « ឪពុកម្ដាយក៏ត្រូវបានត្រាស់បង្គាប់ឲ្យបង្រៀនដល់កូនចៅរបស់ពួកគេឲ្យចេះស្រឡាញ់ និងបម្រើគ្នាទៅវិញទៅមក ចេះគោរពព្រះបញ្ញតិ្តទាំងឡាយនៃព្រះ ហើយធ្វើជាពលរដ្ឋល្អ » (២២) ។
តួនាទីរបស់ព្រះអង្គសង្គ្រោះ នៅក្នុងអាពាហ៍ពិពាហ៍ និង ក្រុមគ្រួសារ ៖
- « ដង្វាយធួននៃព្រះយេស៊ូវគ្រីស្ទ អាចធ្វើឲ្យយើងម្នាក់ៗ ទទួលបាននូវពរជ័យដែលបានសន្យាទាំងអស់ពីព្រះវរបិតារបស់យើង ដែលគង់នៅលើស្ថានសួគ៌ » (២៤) ។
- « នៅពេលក្រុមគ្រួសារសង់គ្រឹះរបស់ពួកគេនៅលើព្រះយេស៊ូវគ្រីស្ទ នោះសាតាំងនឹងគ្មានអំណាចដើម្បីបំផ្លាញពួកគេឡើយ » (១៩) ។
ក្រឹត្យវិន័យដែលមានឥទ្ធិពលលើព្រហ្មចារីភាព និង ភាពស្មោះត្រង់នៅក្នុងអាពាហ៍ពិពាហ៍ និង លក្ខណៈដ៏អស់កល្បជានិច្ចនៃក្រឹត្យវិន័យទាំងនោះ ៖
- « អាពាហ៍ពិពាហ៍រវាងបុរសម្នាក់ និងស្ត្រីម្នាក់ត្រូវបានតែងតាំងឡើងដោយព្រះ » (« ក្រុមគ្រួសារ ៖ ការប្រកាសដល់ពិភពលោក » ទំព័រ ១២៩ ) ។
- « ព្រះបានត្រាស់បង្គាប់ថា អំណាចពិសិដ្ឋនៃការបង្កើតកូន គឺត្រូវបានប្រើរវាងតែបុរស និងស្ដ្រីដែលបានរៀបអាពាហ៍ពិពាហ៍យ៉ាងស្របច្បាប់ជាប្ដី និងប្រពន្ធប៉ុណ្ណោះ » (« ក្រុមគ្រួសារ ៖ ការប្រកាសដល់ពិភពលោក » ទំព័រ ១២៩ ) (១៦) ។
- « ការផ្លាស់ប្ដូរក្នុងច្បាប់ស៊ីវិល មិនអាចផ្លាស់ប្ដូរក្រឹត្យវិន័យខាងសីលធម៌ ដែលព្រះបានបង្កើតឡើយ ។ ព្រះសព្វព្រះទ័យឲ្យយើងកាន់ខ្ជាប់ ហើយគោរពតាមព្រះបញ្ញត្តិរបស់ទ្រង់ ទោះជាមានយោបល់ ឬ ទំនោរចិត្តខុសប្លែកពីគ្នានៅក្នុងសង្គមយ៉ាងណាក្ដី » ( ដកស្រង់នៅក្នុង Gospel Topics « Same-Sex Marriage lds.org/topics) (៧) ។