E mafai faapefea ona ou maua le faamoemoe?

O le uluai laasaga i le agai i luma o le faia lea o se talanoaga faamaoni ma lou toalua e uiga i lona faaaogaaga o ponokalafi. O le a fesoasoani lenei mea ia te oe e filima’oti ai ou laasaga i le lumanai. Mafaufau e amata i se tatalo, ma faamalosiau i lau paaga e faaali uma atu le mamao ua oo i ai lona faaaogaaga o ponokalafi. O lea talanoaga atonu o le a faigata mo oe, ae ia manatua o le a faigata foi mo lou toalua. E mafai ona pei e lofituina lagona o le ta’usalaina ma le faanoanoa i le tagata o loo foasoa mai lana tauiviga. O le a sili ona aoga la oulua talanoaga, pe a taialaina e le agaalofa ma le loto malamalama.

E ono manao lou toalua e tusi i lalo mea na te faailoa atu a o lei faia la oulua talanoaga ina ia mautinoa ai e atoa, ao nofouta foi i ou lagona. Fai atu ni fesili ma fautuaina le faailoa mai e faatatau:

I le ituaiga ponokalafi na faaaogaina.
I le umi na faaaoga ai e lou toalua ia ponokalafi.
I le pe na faafia ona faaaoga e lou toalua ia ponokalafi?
Se isi lava ituaiga o lē faamaoni po o le oōlega o le faatuatuaga.

Ia nofouta o le talanoaina o amioga patino a lou toalua atonu e le manaomia pe aoga foi ia te oe. O lau sini o le malamalama lea i le mea la e tupu. E mafai ona fesoasoani mafaufauga maloloina ia te oe i auga o ou lagona. Peitai, o le mea masani lava le tauivi ma mamanu o mafaufauga e le maloloina, e pei o le:

Oso i faaiuga.
Faafaigata mea po o le manatu i ni taunuuga sili atu ona leaga.
Taofimamau i mea e aunoa ma se avanoa e fetuunai ai.
Soona manatu lautele i le tulaga pe faatusatusa lou tulaga i se isi i se tulaga e ono le sa’o.

O nei amioga ma mafaufauga o le a seāseā taitai atu ai oe i ni faaiuga maloloina. Faaalu se taimi e faifai malie ai, saili ia malamalama i ou lagona ma le amio a lou toalua, ma ia faataga mo oe lava se taimi o le ootiaga ma se avanoa e faia ai faaiuga.

Taumafai e taumamao mai le talanoaina o faafitauli faigata i le taimi e oso maualuga ai le ita ma lagona. Atonu e te iloa le aoga o le faaaofia ai o se uo po o se tagata faatuatuaina o le aiga, taitai o le Ekalesia po o se tagata tomai faapitoa i le soifuamaloloina faalemafaufau e fesoasoani e tu i le va i le taimi o talanoaga faigata.

Manatu Faaopoopo

Taumafai e tusitusi i lalo nisi o ou mafaufauga ma lagona. O le tusia po o faamaumauga i se apitalaaga e tele ina mafai ona avea o se ala lelei e faagasolo ai ou aafiaga.

Mafaufau pe faapefea ona faalatalata atu i lou toalua e faatatau i le talanoaina o lona faaaogaaga o ponokalafi. E faapefea ona e faia lenei mea i se auala o le a fesoasoani ai ia te oe ma lou toalua ia faia se talanoaga saoloto faamaoni? O a ituaiga o fesili o le a e fai atua e iloa ai mea e manaomia ona e iloa?

Iloilo au sootaga faaagafesootai, ma ia faalatalata atili atu i tagata e faamalosia oe. E mafai ona fesoasoani tagata faatuatuaina o le aiga ma uo ia te oe e galueaiina ou mafaufauga ma lagona.

Vaavaai mo nisi punaoa, faamatalaga, ma sootaga ma isi e ala i le polokalama a le Ekalesia o le Spouse and Family Support .