Mga Pundasyon sa Ebanghelyo: Usa ka Klase sa Sunday School alang sa Bag-ong mga Miyembro ug sa mga Higala

Ang mga konseho sa ward mahimong mopili sa pag-organisar og opsiyonal nga klase sa Sunday School nga gitawag og Mga Pundasyon sa Ebanghelyo. Kini nga klase gituyo aron sa pagtabang sa bag-ong mga miyembro ug mga higala nga:

1. Mobati nga giabi-abi, komportable, gihatagan og bili, ug gikinahanglan sa ward o branch.

2. Makabaton og mga kasinatian nga moandam nila alang sa tibuok kinabuhi nga pagkadisipulo diha sa Simbahan sa Manluluwas.

3. Magkat-on sa sukaranang mga kamatuoran sa gipahiuli nga ebanghelyo sa Manluluwas.

Samtang kini nga klase gituyo alang sa mga hamtong nga bag-ong mga miyembro ug mga higala, ang mibalik nga mga miyembro mahimo usab nga dapiton sa pagtambong. Kasagaran ang mga kabataan ug kabatan-onan motambong sa mga klase uban sa mga grupo nga kaedad nila.

Human sa duha ngadto sa upat ka bulan, ang bag-ong mga miyembro moapil sa Dali, Sunod Kanako nga klase sa Sunday School uban sa mga miyembro sa ward o branch.

Kini nga kurso naglakip sa mga hilisgotan sa diskusyon ug mga kasinatian aron matabangan ang bag-ong mga miyembro ug mga higala nga mahimong mga disipulo ni Jesukristo sa tibuok kinabuhi. Ikonsiderar ang pagtutok sa mga hilisgotan ug mga kasinatian nga labing bililhon ngadto sa mga tawo diha sa klase.