ការប្រើប្រាស់សៀវភៅនេះ

រូបភាពនៅក្នុងសៀវភៅនេះត្រូវបានរៀបចំឡើងជាប្រាំមួយផ្នែក ៖ ព្រះគម្ពីរសញ្ញាចាស់ ព្រះគម្ពីរសញ្ញាថ្មី ព្រះគម្ពីរមរមន ប្រវត្តិសាសនាចក្រ ដំណឹងល្អនៅក្នុងសកម្មភាព និងពួកព្យាការីថ្ងៃចុងក្រោយ ។ អ្នកអាចប្រើរូបភាពទាំងនេះសម្រាប់ការរៀនសូត្រ និងការបង្រៀននៅឯគេហដ្ឋាន ឬនៅឯព្រះវិហារ ។ បញ្ជីខាងក្រោមនេះផ្ដល់ជាចំណងជើងរៀបរាប់មួយសម្រាប់រូបភាពនីមួយៗ ក៏ដូចជាសេចក្ដីយោងទៅនឹងបទគម្ពីរ និងប្រភពនានាដែលអាចយកមកប្រើដើម្បីរៀន ហើយពិភាក្សាអំពីរូបភាពទាំងនេះ ។ ការស្រាវជ្រាវបទគម្ពីរ និងប្រភពដែលភ្ជាប់មកជាមួយទាំងនេះនឹងធ្វើឲ្យការយល់ដឹងរបស់អ្នកអំពីព្រឹត្តិការណ៍នានា និងគោលការណ៍ទាំងឡាយនៃដំណឹងល្អដែលបានបរិយាយកាន់តែស៊ីជម្រៅ ។ សូមពិចារណាពីគំនិតខាងក្រោមនេះពេលប្រើប្រាស់រូបភាព និងសេចក្ដីយោងទាំងឡាយ ៖

សូមអញ្ជើញបុគ្គលទាំងឡាយឲ្យស្រាវជ្រាវបទគម្ពីរ ឬប្រភពផ្សេងទៀតដែលត្រូវគ្នានឹងរូបភាពមួយជាក់លាក់ ។ សូមឲ្យពួកគេអាន ឬសង្ខេបសម្ភារនេះនៅក្នុងការពិភាក្សាមួយអំពីរូបភាពនោះ ។
សូមឲ្យសមាជិកគ្រួសារ ឬសិស្សពិពណ៌នាថាតើពួកគេឃើញអ្វីខ្លះនៅក្នុងរូបភាពមួយ ឬថាតើពួកគេមានអារម្មណ៍បែបណាចំពោះរូបភាពនោះ ។ តើរូបភាពនោះបង្រៀនអ្វីខ្លះអំពីគោលការណ៍នៃដំណឹងល្អ ? តើការអនុវត្តអ្វីខ្លះដែលអាចធ្វើឡើងនៅក្នុងជីវិតរបស់យើងសព្វថ្ងៃនេះ ?
សូមអញ្ជើញបុគ្គលទាំងឡាយឲ្យមើលរូបភាពទាំងនោះដោយខ្លួនឯង ។ ពួកគេអាចរើសយករូបភាពពីរមកប្រៀបធៀបគ្នា ។ ការសង្កេតឃើញ និងសំណួរទាំងឡាយរបស់ពួកគេអំពីអ្វីដែលពួកគេឃើញអាចដឹកនាំទៅរកការសន្ទនាអំពីបទគម្ពីរ និងអំពីគោលការណ៍ទាំងឡាយនៃដំណឹងល្អ ។