7.

Te ’episekōpora’a

7.1

Te ’episekōpo ’e tōna nā tauturu

Tē mau nei te ’episekōpo i te mau tāviri o te autahu’ara’a nō te arata’i i te ’ohipa a te ’Ēkālesia i roto i te pāroita (hi’o 3.4.1). ’Ua riro ’oia ’e tōna nā tauturu ’ei ’episekōpora’a. E fāri’i rātou i te arata’ira’a nā roto mai i te peresidenira’a titi. E ’atu’atu rātou i te mau melo o te pāroita ma te here, ma te tauturu ia rātou ’ia riro ’ei mau pipi mau nā Iesu Mesia (hi’o Moroni 7:48).

E mau tahu’a rahi te ’episekōpo ’e te tōna nā tauturu. Mai te mea e ’ere rātou i te tahu’a rahi i te taime ’a pi’ihia ai rātou, e fa’atōro’ahia rātou ’ei mau tahu’a rahi, hou rātou ’a fa’ata’ahia ai nō te tāvini.

E pae hōpoi’a mātāmua tā te ’episekōpo :

• E tahu’a rahi peresideni ’oia i roto i te pāroita.

• E peresideni ’oia nō te Autahu’ara’a a Aarona.

• E ha’avā ’oia nō te tā’āto’a.

• E fa’aau ’oia i te ’ohipa nō te fa’aorara’a ’e te fa’ateiteira’a, e tae noa atu i te ’atu’atura’a i te feiā i roto i te fifi.

• E hi’opo’a ’oia i te mau pāpa’a parau, te faufa’a moni, ’e te fa’a’ohipara’a i te fare purera’a.

Nō te mea tē mau nei te ’episekōpo i te mau tāviri o te autahu’ara’a, e ti’a roa iāna ’ia fāri’i i te heheura’a nō te pāroita (hi’o Te Ha’api’ira’a Tumu ’e te mau Fafaura’a 128:11). Nō reira, nāna ana’e te tahi mau hōpoi’a. ’Ua fa’ata’ahia te reira i roto i teie pene.

Te hōpoi’a faufa’a roa a te ’episekōpo ’o te u’i ’āpī ïa i roto i te pāroita (te mau tamari’i, te feiā ’āpī ’e te feiā ’āpī pa’ari ’ōtahi). Nō te fa’ati’a iāna ’ia fa’atumu i ni’a i teie hōpoi’a, e hōro’a ’oia e rave rahi mau ’ohipa (hi’o 4.2.5). E nehenehe ’oia e hōro’a i tōna nā tauturu, i te pāpa’i parau ’e te mau tauturu pāpa’i parau, i te pāpa’i parau, i te feiā fa’atere o te pupu autahu’ara’a ’e te mau ’āvirira’a ’e ia vetahi ’ē.

Mai te mea ’aita e ti’a i te ’episekōpo ’ia rave i tāna mau hōpoi’a, e nehenehe te hō’ē tauturu e ’ohipa nō te mono iāna nō te hō’ē taime poto, maori rā mai tei pāpa’ihia i roto i teie buka arata’i. E paraparau atu te ’episekōpo ’aore rā tōna tauturu i te peresideni titi, mai te mea e uira’a tāna nō ni’a i te monora’a te tauturu i te ’episekōpo.

7.1.1

Te tahu’a rahi peresideni

’O te ’episekōpo te ta’ata fa’atere pae vārua mātāmua o te pāroita. E fa’a’ite ’oia i te hō’ē hi’ora’a nā roto i te tāvinira’a « ma te ’ā’au ti’a » (Mosia 18:12). E ha’api’i ’oia, e fa’ateitei ’e e fa’auru (hi’o Mataio 20:28). E pe’e ’oia i te mau parau tumu nō te fa’aterera’a i roto Te Ha’api’ira’a Tumu ’e te mau Fafaura’a 121:34–46.

E pipi ha’apa’o maita’i te ’episekōpo nā Iesu Mesia. E ta’ata ha’apa’o ’oia i tāna mau fafaura’a. E ta’ata ha’apa’o ’oia i tāna vahine ’e tōna ’utuāfare. E fa’a’ite ’oia i te hi’ora’a nō te parauti’a i tōna ’utuāfare, i te pāroita, ’e i te huira’atira. (Hi’o 1 Timoteo 3:2–7.) Mai te reira ato’a te huru o tōna nā tauturu.

E hōro’a te ’episekōpo i te arata’ira’a ’e te parau a’o i te tahi atu feiā fa’atere i roto i te pāroita. E fa’aitoito ’oia ia rātou i roto i tā rātou mau hōpoi’a.

7.1.1.1

Te mau ’āvirira’a o te pāroita ’e te mau pupu autahu’ara’a

Nā te ’episekōpo te hōpoi’a nō te mau ’āvirira’a o te Sōtaiete Tauturu ’e te feiā ’āpī tamāhine o te pāroita. E hōro’a ’oia i tōna nā tauturu te hōpoi’a nō te mau ’āvirira’a o te Ha’api’ira’a Sābati ’e te Paraimere ’e te tahi atu mau fa’anahora’a a te pāroita. (Hi’o 9.3.1, 11.3.1, 12.3.1, ’e 13.2.1..)

’Ua fa’ata’ahia te mau hōpoi’a a te ’episekōpo nō te mau pupu Autahu’ara’a a Aarona i roto te 7.1.2. ’Ua fa’ata’ahia tāna mau hōpoi’a nō te mau pupu peresibutero i roto te 8.3.1.

E arata’i ato’a te ’episekōpo i te mau peresideni pupu peresibutero ’e te Sōtaiete Tauturu i roto i te hi’opo’ara’a i te aupurura’a. E fārerei ’oia i teie nā peresideni e piti hō’ē a’e taime i te toru ’āva’e, nō te pāhono i te mau hina’aro o te mau ta’ata ’e o te mau ’utuāfare (hi’o 21.2).

7.1.1.2

Te mau ’ōro’a ’e te mau ha’amaita’ira’a

Nā te ’episekōpo e arata’i i te fa’aterera’a i te mau ’ōro’a ’e te mau ha’amaita’ira’a i muri nei i roto i te pāroita :

• Te ’ōro’a mo’a

• Te hōro’ara’a i te i’oa ’e te ha’amaita’ira’a i te mau tamari’i

• Te bāpetizora’a ’e te ha’amaura’a i te mau tamari’i e 8 matahiti tei tāpa’ohia (nō te feiā huma i te pae ferurira’a, hi’o 38.2.8.1 ; nō te feiā fa’afāriuhia, hi’o 31.2.3.2)

• Te hōro’ara’a i te Autahu’ara’a a Aarona ’e te fa’atōro’ara’a i te mau tōro’a di’akono, ha’api’i ’e tahu’a

Nō te mau ha’amāramaramara’a nō ni’a i te mau ’ōro’a ’e te mau ha’amaita’ira’a, hi’o pene 18.

7.1.1.3

Te mau ’āpo’ora’a ’e te mau rurura’a

Nā te ’episekōpo e arata’i i te ’āpo’ora’a pāroita ’e te ’āpo’ora’a a te feiā ’āpī pāroita (hi’o 29.2.5 ’e 29.2.6). E fa’a’ohipa ’oia i teie mau ’āpo’ora’a nō te tauturu i te fa’aaura’a i te ’ohipa nō te fa’aorara’a ’e te fa’ateiteira’a i roto i te pāroita. E hōro’a ’oia i te rahira’a o teie ’ohipa ’e e hi’opo’a ’oia i te mau fa’auera’a ’ohipa (hi’o 4.2.5).

E tītau te ’episekōpo i te feiā fa’atere ’ia ’āpo’o ’āmui nō ni’a e nāhea i te fa’arahi i te pūai pae vārua ’e te hō’ēra’a i roto i te pāroita. E fa’aitoito ’oia i te mau melo ato’a o te ’āpo’ora’a ’ia ’imi i te fa’aurura’a ’e ’ia ’āmui mai i roto i te mau ’āparaura’a. (Hi’o Te Ha’api’ira’a Tumu ’e te mau Fafaura’a 88:122 ; hi’o ato’a 4.4 i roto i teie buka arata’i.)

E fa’anaho te ’episekōpora’a i te mau purera’a ’ōro’a ’e te tahi atu mau rurura’a pāroita tei tāpurahia i roto te pene 29. E peresideni te ’episekōpo i te mau purera’a pāroita maori rā e tae mai te hō’ē melo nō te peresidenira’a titi, hō’ē Hitu ’Ahuru ārea nō tōna ārea, ’aore rā hō’ē huimana fa’atere rahi. E nehenehe te mau tauturu o te ’episekōpo e arata’i i teie mau purera’a. E peresideni ato’a rāua mai te mea ’ua ma’iri te ’episekōpo.

7.1.1.4

Te mau pi’ira’a ’e te mau ha’amāuruurura’a

’Ua fa’ata’ahia te mau hōpoi’a a te ’episekōpo nō te mau pi’ira’a ’e te mau ha’amāuruurura’a i roto te pene 30. E nehenehe ’oia e fa’aue i tōna nā tauturu ’ia hōro’a i te mau pi’ira’a ’e te mau ha’amāuruurura’a mai tei fa’ata’ahia i roto te 30.8.

7.1.2

Te peresideni nō te Autahu’ara’a a Aarona

« ’O te ’episekōpora’a te peresidenira’a nō te autahu’ara’a a [Aarona], ’e ’o tē mau nei i te mau tāviri ’aore rā te ha’amanara’a nō taua autahu’ara’a ra » (Te Ha’api’ira’a Tumu ’e te mau Fafaura’a 107:15 ; hi’o ato’a ’īrava 20). Teie i muri nei te mau hōpoi’a a te ’episekōpo ’ei peresideni nō te Autahu’ara’a a Aarona i roto i te pāroita. E tauturu tōna nā tauturu iāna.

• E pāturu ’oia i te mau metua i roto i te ha’api’ira’a i te feiā ’āpī. E tauturu ’oia i te feiā ’āpī ’ia tāvini mā te ha’apa’o maita’i, ’ia rave ’e ’ia ha’apa’o i te mau fafaura’a mo’a, ’e ’ia fa’aineine nō te fāri’i i te mau ’ōro’a o te hiero. E tauturu ’oia i te feiā ’āpī tamāroa ’ia fa’aineine ’ia fa’atōro’ahia i te mau tōro’a o te autahu’ara’a ’e ’ia tāvini i te hō’ē misiōni rave tāmau. Mai te mea e hina’aro te feiā ’āpī tamāhine e tāvini i te hō’ē misiōni rave tāmau, e tauturu ’oia ia rātou ’ia fa’aineine. E nehenehe te fa’anahora’a a te mau tamari’i ’e a te feiā ’āpī e tauturu i roto i teie mau tauto’ora’a (hi’o ChildrenandYouth.ChurchofJesusChrist.org

• E hi’opo’a ’oia i te mau pupu Autahu’ara’a a Aarona ’e te mau piha a te Feiā ’Āpī Tamāhine. ’O te ’episekōpo te peresideni nō te pupu o te mau tahu’a (hi’o Te Ha’api’ira’a Tumu ’e te mau Fafaura’a 107:87–88). Nā tōna tauturu hō’ē te hōpoi’a nō te pupu o te mau ha’api’i. Nā tōna tauturu piti te hōpoi’a nō te pupu o te mau di’akono. Nō te mau ha’amāramaramara’a hau atu nō ni’a i te fa’aterera’a i te pupu Autahu’ara’a a Aarona, hi’o 10.3, 10.4, ’e 10.5.

• E ruru ’oia ’e te peresideni o te Feiā ’Āpī Tamāhine o te pāroita. ’Aita te ’episekōpo e hōro’a i teie hōpoi’a i te hō’ē tauturu. E ’āmui tāmau atu ’oia ’e tōna nā tauturu i roto i te mau putuputura’a a te Feiā ’Āpī Tamāhine, i tā rātou ’ōpuara’a nō te tāvinira’a ’e te mau ’ātivite. (Hi’o 11.3.1.)

• E fārerei tāmau ’oia i te feiā ’āpī tāta’itahi. Nō te mau arata’ira’a nō ni’a i teie mau fārereira’a, hi’o 31.3.1.

• E pāturu ’oia i te mau ’utuāfare ’e te feiā fa’atere ’e te mau ’orometua o te Paraimere i roto i tā rātou mau tauto’ora’a, nō te tauturu i te mau tamari’i ’ia rave ’e ’ia ha’apa’o i te mau fafaura’a (hi’o pene 12).

7.1.3

Te ha’avā tāmau

’O te ’episekōpo te ha’avā nō te tā’āto’a i roto i te pāroita (hi’o Te Ha’api’ira’a Tumu ’e te mau Fafaura’a 107:71–74). E tūtava ’oia i te pe’e i te hi’ora’a o te Fa’aora ’ei ha’avā parauti’a (hi’o 3 Nephi 27:27). Teie i muri nei tāna mau hōpoi’a :

• E tauturu i te feiā ’āpī ’e te feiā pa’ari ’ia fa’ata’ahia rātou ’e ’ia ti’a-mā nō te fāri’i i te hō’ē parau fa’ati’a nō te hiero.

• E arata’i i te mau uiuira’a mai tei fa’a’itehia i roto te 31.2. E nehenehe ’oia e fa’ati’a i tōna nā tauturu ’ia rave i te tahi mau uiuira’a (hi’o 31.2.2). Nō te mau arata’ira’a, hi’o 31.1.

• E a’o ’oia i te mau melo o te pāroita ’o tē ’imi nei i te arata’ira’a pae vārua, e mau fifi teimaha tō rātou, ’aore rā tei rave i te mau hara rahi, i te tauturura’a ia rātou ’ia ti’aturi i te mana fa’aora o Iesu Mesia. E nehenehe te ’episekōpo e ani i tōna nā tauturu, i te mau peresideni o te pupu peresibutero ’e i te Sōtaiete Tauturu, ’e te tahi atu mau ta’ata ’ia fārerei atu i te mau melo o te pāroita nō ni’a i te tahi mau ’ohipa. Terā rā, ’o te ’episekōpo ana’e te fārerei atu i te mau melo o te pāroita nō ni’a i te parau nō te ti’a-mā-ra’a, te hāmani-’ino-ra’a, ’aore rā te parau fa’ati’a nō te fa’a’ohipa i te moni ha’apaera’a mā’a. Nō te mau arata’ira’a, hi’o 31.1.

• I raro a’e i te arata’ira’a a te peresideni titi, e fa’atupu ’oia i te mau ’āpo’ora’a fa’atītī’aifarora’a mai te mea e hina’arohia. Nō te mau arata’ira’a, hi’o pene 32.

7.1.4

Te fa’aaura’a i te ’ohipa nō te fa’aorara’a ’e te fa’ateiteira’a

E fa’aau te ’episekōpo i te ’ohipa nō te fa’aorara’a ’e te fa’ateiteira’a i roto i te pāroita (hi’o pene 1). E tauturu tōna nā tauturu ’e te tahi atu feiā fa’atere o te mau ’āvirira’a nō te pāroita iāna.

E tauturu te ’episekōpo i te mau melo ’ia ora i te ’evanelia. E tauturu ’oia ia rātou ’ia ha’apūai i tō rātou fa’aro’o i te Metua i te ao ra ’e ia Iesu Mesia ’e i tāna tāra’ehara (hi’o Te Ha’api’ira’a Tumu ’e te mau Fafaura’a 20:29). E ha’api’i ’oia ia rātou ’ia pure ’e ’ia tuatāpapa i te mau pāpa’ira’a mo’a. E ani ’oia ia rātou ’ia rave i te mau fafaura’a nā roto i te fāri’ira’a i te mau ’ōro’a nō te fa’aorara’a ’e te fa’ateiteira’a. E fa’aitoito ’oia ia rātou ’ia ha’apa’o i tā rātou mau fafaura’a.

E ha’apūai te ’episekōpo i te mau melo o te ’Ēkālesia. E fa’aitoito ’oia i te mau ’utuāfare ’ia pure ’āmui tāmau ’e ’ia tuātapapa ’āmui tāmau i te ’evanelia, i roto iho ā ra i te purera’a pō ’utuāfare. E ha’api’i ’oia ia rātou ’ia here ’e ’ia tāvini i te tahi ’e te tahi. E ha’api’i ’oia nā roto i te parau ’e te hi’ora’a ē, e nehenehe te mau pi’ira’a o te ’Ēkālesia e ravehia ma te ’ore e ha’afifi i te mau hōpoi’a ’utuāfare. E ha’apāpū ’oia ē, e pāturu te mau fa’a’oa’oara’a a te ’Ēkālesia i te mau tauto’ora’a a te mau metua nō te aupuru i tā rātou mau tamari’i i roto i te parauti’a.

Ta’a ’ē noa atu i te tauturura’a i te mau melo ’ia ora i te ’evanelia, e mau hōpoi’a ’ē atu tā te ’episekōpo i roto i te ’ohipa nō te fa’aorara’a ’e te fa’ateiteira’a. ’Ei hi’ora’a :

• E tauturu ’oia i te mau tāne ’ia fa’aineine ’ia fa’atōro’ahia i te mau tōro’a o te autahu’ara’a.

• E arata’i ’oia i te mau tauto’ora’a nō te ’atu’atu i te feiā i roto i te fifi i roto i te pāroita (hi’o 7.1.4.1 ’e 22.2.1).

• E arata’i ’oia i te mau peresidenira’a o te pupu peresibutero ’e te Sōtaiete Tauturu, ’a arata’i ai rātou i te mau tauto’ora’a nō te aupurura’a i roto i te pāroita (hi’o 21.2.1).

• E fa’aau ’oia i te ’ohipa a te mau peresidenira’a o te pupu peresibutero ’e te Sōtaiete Tauturu, ’a arata’i ai rātou i te mau tauto’ora’a a te pāroita nō te fa’a’ite i te ’evanelia ’e nō te ha’apūai i te mau melo ’āpī ’e tei ho’i mai (hi’o 23.1).

• E fa’aau ’oia i te mau tauto’ora’a a te mau peresidenira’a o te pupu peresibutero ’e te Sōtaiete Tauturu, ’a arata’i ai rātou i te ’ohipa hiero ’e te ’ā’amu ’utuāfare i roto i te pāroita (hi’o 25.2).

• E tauturu ’oia i te mau melo ’ia fa’aineine nō te fāri’i i te hō’ē parau fa’ati’a nō te hiero ’e te mau ’ōro’a o te hiero (hi’o 27.1).

7.1.4.1

Te arata’ira’a i te mau tauto’ora’a nō te ’atu’atu i te feiā e fifi ra i te pae tino

E fa’auera’a hanahana tō te ’episekōpo ’ia ’imi ’e ’ia ’atu’atu i te feiā e fifi ra i te pae tino (hi’o Te Ha’api’ira’a Tumu ’e te mau Fafaura’a 84:112). E hōro’a ’oia i te rahira’a o teie ’ohipa i te mau peresidenira’a o te Sōtaiete Tauturu ’e o te pupu peresibutero.

Nā te ’episekōpo ana’e e rave i te tahi atu mau ’ohipa. ’Ei hi’ora’a, nāna e fa’ata’a i te huru, te tino moni ’e te roara’a o te tauturu pae tino e hōro’ahia e te ’Ēkālesia. Nō te reira ’ohipa, e fārerei pinepine ’oia i te peresideni o te Sōtaiete Tauturu ’e te peresideni o te pupu peresibutero. Nō te mau ha’amāramaramara’a hau atu, hi’o 22.4 ’e 22.5.

E ha’api’i te mau melo o te ’episekōpora’a i te mau parau tumu, nō te ’atu’atura’a i te feiā e fifi ra ’e te ha’amaita’ira’a te fa’arava’ira’a iāna iho (hi’o 22.1). E ha’api’i ato’a rātou i te ture nō te ha’apaera’a mā’a (hi’o 22.2.2). E hi’opo’a rātou i te ha’aputuputura’a o te mau ō ha’apaera’a mā’a (hi’o 34.3.2).

E ha’api’i te ’episekōpo i te tahi atu feiā fa’atere o te pāroita i roto i tā rātou mau hōpoi’a, ’ia ’atu’atu i te feiā e fifi ra. E arata’i ato’a ’oia i te ’āpo’ora’a pāroita i roto i teie mau tauto’ora’a.

Nō te mau ha’amāramaramara’a hau atu nō ni’a e nāhea te ’episekōpo ’ia ’atu’atu i te feiā i roto i te fifi, hi’o 22.6.1.

7.1.5

Te mau pāpa’a parau, te faufa’a moni ’e te fare purera’a

E hi’opo’a te ’episekōpo i te mau pāpa’a parau o te pāroita, te faufa’a moni a te pāroita, ’e te fare purera’a. E nehenehe ’oia e hōro’a i te rahira’a o te ’ohipa nō te mau pāpa’a parau ’e te faufa’a moni i tōna nā tauturu ’e te mau pāpa’i parau. E nehenehe ’oia e fa’aue i te hō’ē o tōna nā tauturu ’ia riro ’ei ti’a nō te fare purera’a o te pāroita, ’aore rā e nehenehe ’oia e pi’i i te tahi atu melo ’ia rave i te reira.

Nō te mau ha’amāramaramara’a nō ni’a i te mau pāpa’a parau, hi’o pene 33. Nō te mau ha’amāramaramara’a nō ni’a i te faufa’a moni, hi’o pene 34. Nō te mau ha’amāramaramara’a nō ni’a i te mau fare purera’a, hi’o pene 35.

7.2

Te mau ta’a-’ē-ra’a i roto i te mau peresidenira’a ’āma’a ’e te mau ’episekōpora’a

I roto i te hō’ē ’āma’a, e pi’ihia te hō’ē taea’e tei mau i te Autahu’ara’a a Melehizedeka ’ei peresideni ’āma’a. E mau ’oia i te mau tāviri o te autahu’ara’a e tītauhia nō te peresideni (hi’o 3.4.1.1). E tāvini ’oia ’e tōna nā tauturu mai te hō’ē ’episekōpora’a, ma teie rā mau ta’a-’ē-ra’a i muri nei :

• E nehenehe te hō’ē peresideni ’āma’a e riro ’ei peresibutero ’aore rā ’ei tahu’a rahi. E ti’a i te hō’ē ’episekōpo ’ia riro ’ei tahu’a rahi.

• ’Aita te hō’ē peresideni ’āma’a e fa’ata’ahia ’ei tahu’a rahi peresideni. Terā rā, e peresideni ’oia i ni’a i te ’āma’a ’e tei iāna te mau hōpoi’a ato’a i fa’ata’ahia i roto te 7.1.1.

• ’Aita te mau tauturu i roto i te peresidenira’a ’āma’a e hōro’a i te parau fa’ati’a nō te hiero (hi’o 26.3.1).

7.3

Te pāpa’i parau fa’atere pāroita ’e te mau tauturu pāpa’i parau fa’atere pāroita

E ani te ’episekōpora’a i te hō’ē ta’ata tei mau i te Autahu’ara’a a Melehizedeka, ’ia tāvini ’ei pāpa’i parau fa’atere nō te pāroita. E hōro’a rātou i teie anira’a i te peresidenira’a titi. ’Ia ti’a-mā te pāpa’i parau fa’atere nō te mau i te hō’ē parau fa’ati’a nō te hiero. Nā te hō’ē melo o te peresidenira’a titi ’aore rā, te hō’ē melo nō te ’āpo’ora’a teitei e pi’i ’e e fa’ata’a iāna.

E ’ohipa fātata roa te pāpa’i parau fa’atere i pīha’i iho i te ’episekōpo ’e tōna nā tauturu, e ’ere rā ’oia i te hō’ē melo nō te ’episekōpora’a. Teie i muri nei tāna mau hōpoi’a :

• E ruru ’oia ’e te ’episekōpora’a ’e e fa’aineine ’oia i te tāpura ’ohipa mai tei fa’auehia mai.

• E melo ’oia nō te ’āpo’ora’a pāroita ’e e ’āmui atu ’oia i roto i te mau rurura’a a te ’āpo’ora’a pāroita. I raro a’e i te arata’ira’a a te ’episekōpora’a, e hi’o ’oia i te mau fa’auera’a ’ohipa tei ravehia i roto i teie mau rurura’a.

• E fa’anaho ’oia i te tārena fārereira’a nō te ’episekōpora’a.

• E fa’anaho ’oia i te mau uiuira’a a te feiā ’āpī ’e a te feiā pa’ari e ti’a ’ia fa’a’āpīhia i tā rātou parau fa’ati’a nō te hiero.

• Mai te mea e fa’auehia e te ’episekōpora’a, e fa’aau ’oia i te mau tauto’ora’a a te pāroita, nō te tauturu i te mau melo ’ia fāri’i i te mau ve’a a te ’Ēkālesia (hi’o 38.8.7).

• E tauturu ’oia i te ’episekōpora’a i roto i te mau ’ohipa nō te séminaire ’e te institut, mai te tauturura’a i te mau melo o te pāroita ’ia tāpa’o ia rātou i roto i te mau piha ha’api’ira’a (hi’o pene 15).

• E tāpe’a ’oia i te hō’ē tāpura pāpū nō te mau i’oa ’e te mau vāhi nohora’a, o te mau melo o te pāroita i roto i te ’āua fa’ehau. E ara ’oia ē ’ua ’ite te feiā fa’atere o te pāroita tei hea teie mau melo (hi’o 38.9.2). E fa’aara ato’a ’oia i te pāpa’i parau fa’atere o te titi, ’ia ’ōpua ana’e te mau melo e fa’aō ia rātou i roto i te ’āua fa’ehau.

E nehenehe hō’ē ’aore rā, e piti tauturu pāpa’i parau fa’atere nō te pāroita e pi’ihia mai te mea e hina’arohia. Nā te ’episekōpora’a e hōro’a i tō rātou i’oa ’e nā te hō’ē melo nō te peresidenira’a titi ’aore rā te hō’ē melo nō te ’āpo’ora’a teitei tei fa’auehia, e pi’i ’e e fa’ata’a. ’Ia ti’a-mā teie mau taea’e nō te mau i te hō’ē parau fa’ati’a nō te hiero.

7.4

Te pāpa’i parau o te pāroita ’e te mau tauturu pāpa’i parau o te pāroita

E ani te ’episekōpo i te hō’ē ta’ata tei mau i te Autahu’ara’a a Melehizedeka ’ia tāvini ’ei pāpa’i parau nō te pāroita. E hōro’a ’oia i teie anira’a i te peresidenira’a titi. ’Ia ti’a-mā te pāpa’i parau nō te mau i te hō’ē parau fa’ati’a nō te hiero. Nā te hō’ē melo o te peresidenira’a titi ’aore rā, te hō’ē melo nō te ’āpo’ora’a teitei e pi’i ’e e fa’ata’a iāna.

E nehenehe ato’a e pi’i i te mau tauturu pāpa’i parau o te pāroita (hi’o 33.4.3). Nā te hō’ē melo o te peresidenira’a titi ’aore rā, te hō’ē melo nō te ’āpo’ora’a teitei e pi’i ’e e fa’ata’a ia rātou.

E ’ohipa te mau pāpa’i parau i pīha’i iho i te ’episekōpo ’e tōna nā tauturu, e ’ere rā rātou i te mau melo nō te ’episekōpora’a. ’Ua fa’ata’ahia te mau hōpoi’a a te pāpa’i parau o te pāroita ’e te mau tauturu pāpa’i parau o te pāroita i roto te 33.4.2 ’e 33.4.3.