“33. Ol Rekod mo Ol Ripot,” Jeneral Hanbuk: Stap Givim Seves Insaed long Jos Ia blong Jisas Kraes blong Ol Lata-dei Sent (2020).
“33. “Ol Rekod mo Ol Ripot” Jeneral Hanbuk.
Pikja
ol man oli stap lukluk kompiuta
33.
Ol Rekod mo Ol Ripot
33.0
Fas Toktok
Ol fasin blong wok long japta ia i blong yusum long ol yunit we oli yusum ol tul blong kipim ol rekod blong Jos onlaen, we i tekem tu Ol Risos blong Ol Lida mo Klak (RLK), Member Tools, mo Ward Directory and Map. Ol yunit we oli no save aksesem ol tul ia oli mas wok wetem Global Services Dipatmen o eria ofis.
Blong stap kipim ol rekod, i oltaem impoten long Jos blong Lod. Eksampol:
Moronae i bin tijim se, oli bin rekodem ol nem blong olgeta we oli kasem baptaes i kam long Jos, blong mekem se “oli save tingbaot olgeta mo fidim olgeta wetem gudfala toktok blong God” (Moronae 6:4).
Josef Smit i bin givim instraksen se oli mas singaotem wan blong stap rekod long evri wod, blong “i testifae wetem trutok long fored blong Lod” (Doktrin mo Ol Kavenan 128:2). Hem i tokbaot bigwan tu hamas i impoten blong oltaem kipim rekod taem hem i raetem “Wanem we bae yufala i raetemdaon long wol, bae oli raetemdaon long heven, mo wanem we yufala i no raetemdaon long wol, bae oli no raetemdaon long heven” (Doktrin mo Ol Kavenan 28:8; luk tu long ves 2–9).
33.1
Bigfala Lukluk long Ol Rekod blong Jos
Ol rekod blong Jos oli tabu. Infomesen we i stap long hem i no blong talem olbaot mo oli mas kipim i sef. Ol Jos rekod sistem i givim raet blong aksesem infomesen blong membasip folem ol koling. Olgeta nomo we oli gat raet bae oli gat akses ia. Oli mas yusum infomesen ia folem ol stamba tingting blong ol koling blong olgeta nomo (luk long 33.8).
Ol rekod oli save helpem ol lida blong:
Luksave olgeta we oli nidim spesel kea.
Luksave wanem ol odinens blong sevem man we wan man o woman i bin kasem o bae i nidim.
Faenem ples we ol memba i stap long hem.
Olgeta kaen rekod ia, oli stap kipim insaed long ol yunit blong Jos:
Evri klak, oli no save kwestinim se oli stap tru mo stap ones o no mo stap folem ol komanmen blong Lod. Oli mas:
Gat wan tempol rekomen we i laef i stap.
Lukaotgud blong kipim ol rekod.
Save stap olsem ol tija mo administreta.
Ol klak oli lukaotgud blong folem ol apdeit polisi blong mekem se oli putum ol mane blong Jos oli save sef oltaem, mo blong mekemsua we ol rekod blong Jos oli stret evriwan. Ol klak oli talem kwik long ol prishud lida sapos i gat eni rong aksen we i stap hapen we bae i spolem ol mane. Sapos ol hadtaem i stap kam antap blong stretem ol samting we i stap hapen we i spolem mane, ol klak oli mas kontaktem Confidential Records Ofis long ol hedkwota blong Jos. Ol kontak infomesen ia, oli soem olgeta andanit ia.
Telefon: 1-801-240-2053 o 1-800-453-3860, ekstensen 2-2053
Taem blong seves blong ol klak i sapos blong i longwan inaf blong oli save lanem ol diuti blong olgeta mo holemtaet wok blong olgeta long wei we i save gogohed (luk long 30.5). From se oli no ol memba blong stek presidensi o bisoprik, oli no nid blong oli rilis taem we oli oganaesem bakegen stek presidensi o bisoprik.
33.3
Ol Stek Rekod mo Ripot
33.3.1
Stek Presidensi
Stek presiden i lukluk ova long fasin blong kipim ol rekod insaed long stek. Hem i save givim plante long ol wok ia i go long ol kaonsela mo ol klak blong hem. Hem i mekemsua se oli folem ol apdeit polisi blong Jos mo ol fasin blong wok.
33.3.2
Stek Klak
Evri stek i mas gat wan stek klak we i kwalifae mo i save mekem wok. Wan memba blong stek presidensi i singaotem mo i setem apat klak ia. Hem i mas holem Melkesedek Prishud mo gat wan tempol rekomen we i laef. Hem i wan memba blong stek kaonsel. Hem i stap go long ol stek miting we oli soem long 29.3.
Stek presidensi nao i givim instraksen long stek klak, mo hem i wok anda long daereksen blong olgeta. Oli save singaotem ol asisten stek klak blong help (luk long 33.3.3).
33.3.2.1
Ol Responsabiliti blong Kipim Ol Rekod
Stek klak, o wan we oli givim wok long hem olsem asisten klak, i gat olgeta responsabiliti ia:
Givim administresen sapot long stek presidensi.
Kipim wan rekod blong ol wok we oli bin givimaot, mo ol desisen we oli mekem long taem blong ol stek lidasip miting.
Folemap ol wok.
Mekemsua se ol rekod mo ol ripot, oli stret evriwan mo oli sendem olgeta long stret taem.
Stek klak i mas savegud ol tul blong kipim ol rekod blong Jos (luk long 33.0). Hem i yusum ol tul ia blong helpem ol lida blong luksave:
Ol nid blong ol memba mo ol oganaesesen.
Ol risos we i stap, we i tekem tu ol faenens.
Ol samting we stek i stap mekem, ol samting we i gud long hem mo ol samting we i no gud long hem.
Ol eria blong wari long hem.
Ol narafala diuti blong stap lukaotem ol rekod i save tekem tu:
Blong mekemsua se oli rekodem ol odinesen blong Melkesedek Prishud kwiktaem mo i stret evriwan.
Stap mekem ol tempol rekomen i laef.
Stap ademap ol medikol infomesen i go long ol aplikesen blong misinari.
Stek klak i mit wetem wanwan niufala klak blong wod i no longtaem afta we oli singaotem hem. Hem i mit fulap taem olsem we i nid wetem ol klak blong wod, be i mas tu taem o moa long wan yia. Ol miting ia, oli blong mekemsua se:
Oli rekodem taeting mo ol narafala faenens rekod, long stret wei (luk long 34.1.2 mo 34.2.2).
Ol membasip rekod, oli apdeitem kwiktaem mo oli rekodem stret.
Ol klak blong wod oli savegud ol tul blong kipim ol rekod blong Jos.
Oli givim ol setifiket blong ol blesing, blong baptaes mo konfemesen, mo prishud odinesen i go long ol memba blong wod.
Oli stap mekem yia odit blong membasip rekod mo oli mas stretem eni eksepsen long odit, long stret fasin (luk long 33.6.19).
Oli sendem yia histri blong wod i go long stek long en blong wanwan yia (luk long 33.7).
Stek presiden, o wan kaonsela we hem i givim wok long hem, i save singaotem mo setem apat wan o moa long wan asisten stek klak taem we i nid. Ol brata ia oli mas kasem Melkesedek prishud mo gat wan tempol rekomen we i laef i stap. Oli wok folem stek presidensi mo stek klak olsem we oli lidim.
Sapos i nid, bae oli save singaotem wan asisten klak blong i lukaotem wanwan long ol posisen ia:
Asisten stek klak—membasip (luk long 33.5 mo 33.6)
33.4
Ol Wod Rekod mo Ripot
33.4.1
Bisoprik
Bisop i lukluk ova long wok blong kipim ol rekod blong wod. Hem i save givim plante long ol wok ia i go long ol kaonsela mo ol klak blong hem. Hem i mekemsua se oli folem ol apdeit polisi blong Jos mo ol fasin blong wok.
33.4.2
Wod Klak
Evri wod i mas gat wan wod klak we i kwalifae mo i save mekem wok. Bisoprik nao i givim nem blong hem, mo wan memba blong stek presidensi, o wan hae kaonsela we oli givim wok ia long hem nao i singaotem mo setem olgeta apat. Hem i mas holem Melkesedek Prishud mo gat wan tempol rekomen we i laef. Hem i wan memba blong wod kaonsel. Hem i stap go long ol wod miting we oli soem long 29.2.
Bisoprik mo ol stek klak nao i givim instraksen long wod klak. Hem i wok anda long daereksen blong bisoprik. Oli save singaotem ol asisten wod klak blong help (luk long 33.4.3
33.4.2.1
Ol Responsabiliti blong Kipim Ol Rekod
Wod klak, o wan we oli givim wok long hem olsem asisten klak, i gat olgeta responsabiliti ia:
Givim administresen sapot long bisoprik.
Kipim wan rekod blong ol wok we oli bin givimaot, mo ol desisen we oli mekem long taem blong ol wod lidasip miting.
Folemap ol wok.
Mekemsua se ol rekod mo ol ripot, oli stret evriwan mo oli sendem olgeta long stret taem.
Faenemaot ol odinens we i nidim blong oli apruvum (luk long 38.2.6 mo 18.10.3).
Wod klak i mas savegud ol tul blong kipim ol rekod blong Jos (luk long 33.0). Hem i yusum ol tul ia blong helpem ol lida blong luksave:
Ol nid blong ol memba mo ol oganaesesen.
Ol risos we i stap, we i tekem tu ol faenens.
Ol samting we wod i stap mekem, ol samting we i gud long hem mo ol samting we i no gud long hem.
Ol eria blong wari long hem.
Taem hem i stap putum tugeta ol ripot long saed blong wok blong ol memba, klak i wok wetem ol sekretari blong stretem ol smosmol problem. Hem i tokbaot ol series problem wetem bisop.
Wod klak o wan asisten wod klak i soem long ol memba olsem wanem blong luk membasip infomesen blong olgeta long Member Tools ap. Hem i save givim tu wan kopi we oli printim sapos memba i askem. Ol wod klak oli leftemap tingting blong ol memba blong ripotem eni samting we i no stret long membasip infomesen blong olgeta.
Ol narafala diuti blong stap lukaotem ol rekod i save tekem tu:
Blong mekemsua se oli rekodem ol odinesen kwiktaem mo i stret evriwan.
Wod klak i givim instraksen long ol asisten wod klak mo kworom mo sekretari blong kworom mo ol oganaesesen. Hem i helpem olgeta blong oli andastanem olsem wanem infomesen we i kam long ol tul blong kipim ol rekod blong Jos, i save helpem ol lida.
Instraksen ia i impoten speseli taem:
Oli jes singaotem ol asisten wod klak mo kworom mo sekretari blong kworom mo ol oganaesesen.
Oli introdiusum o apdeitem wan tul blong kipim ol rekod blong Jos.
Oli save singaotem ol asisten klak blong wod, olsem we i nid. Bisoprik nao i givim nem blong olgeta, mo wan memba blong stek presidensi, o wan hae kaonsela we oli givim wok ia long hem nao i singaotem mo setem olgeta apat. Ol brata ia oli mas holem Melkesedek o Aronik Prishud. Olgeta tu oli mas gat wan tempol rekomen we i laef i stap. Sapos wan asisten wod klak i kasem wok blong lukaot long ol faenens, hem i mas holem Melkesedek Prishud. Ol asisten wod klak oli wok anda long gaed blong bisoprik, mo wod klak.
Sapos i nid, bae oli save singaotem wan asisten klak blong i lukaotem wanwan long ol posisen ia:
Ol lida blong kworom mo ol oganaesesen oli lukluk ova long wok blong kipim ol rekod insaed long wanwan oganaesesen we oli lukaotem. Oli save givim wok long ol sekretari blong mekem fulap long ol wok ia. Oli wok wetem ol sekretari blong mekemsua se ol ripot oli stret evriwan mo oli sendem olgeta long stret taem.
33.5
Ol Ripot long saed blong Wok blong Ol Memba
Ol ripot long saed blong wok blong ol memba, i helpem ol lida blong lukluk nomo long progres mo ol nid blong ol memba. Taem i posibol, ol ripot ia oli mas luklukbak blong stretem olgeta long kompiuta bitim blong raetem. Taem i nidim blong printim ol ripot, oli mas lukaotgud long olgeta blong respektem praevet laef blong ol memba mo blong folem ol loa we i protektem ol lokol infomesen.
33.5.1
Ol Defren Kaen Ripot
33.5.1.1
Ol Atendens Ripot
Atendens ol sakramen miting mo ol Sandei Miting blong Prishud mo Oganaesesen., oli rekodem long kompiuta mo oli yusum RLK o Member Tools.
Sakramen Miting. Wod klak o wan asisten wod klak, i raetemdaon atendens blong sakramen miting evri wik. Namba we oli kaontem i tekem evri man we i kam, olgeta we oli joen onlaen, mo ol visita. Ol memba blong wod we oli no stap from se oli gat ol wok blong mekem long nara wod, o oli go long nara wod, oli kaontem olgeta long wod we oli go long hem.
Ol Sandei Miting blong Kworom mo Oganaesesen. Ol sekretari blong kworom mo oganaesesen mo ol advaesa, oli raetemdaon atendens. Ol lida blong yut oli save help tu blong raetemdaon atendens. Namba we oli kaontem i tekem evri man we i kam, olgeta we oli joen onlaen, mo ol visita. Oli tekem tu ol memba we oli stap givim seves long Praemeri o ol lida blong yut insaed long wod. Ol memba we oli go mekem wok long wan narafala wod, bae oli kaontem olgeta long wod we oli go long hem.
Wod klak i save rekodem atendens long bihaf blong eni oganaesesen.
Evri namba long wan ripot i ripresentem wan memba we i gat ol nid we i blong hemwan nomo (luk long Hileman 15:13). Ol lida oli askem daereksen long Lod taem oli lukluk long huia i nidim help blong olgeta.
Kwota Ripot i gat ol infomesen we i save mekem ol lida oli luksave ol samting taem oli stap lukaotem insperesen abaot ol efot blong givhan blong olgeta. Ripot ia i stap long Member Tools o RLK.
Ol lida blong stek mo wod oli yusum Kwota Ripot oltaem blong luklukbak long progres blong wanwan man mo woman. Ripot ia i tekem infomesen tu abaot:
Weaples ol memba we oli endao mo ol yut, oli stap long hem wetem tempol rekomen blong olgeta.
Ol man we oli gat 18–25 yia we oli stap givim seves o bin givim seves long wan misin.
Weaples ol givhan intaviu i stap long hem (luk long 21.3).
Ol fiuja elda we oli nidim sapot blong oli rere blong kasem Melkesedek Prishud.
Sandei miting atendens blong ol pikinini, yut, yang singgel adalt, mo adalt (luk long 33.5.1.1).
Progres blong ol niu memba we oli kasem baptaes mo konfemesen long ol 12 manis we i pas.
Evri atendens mo ol givhan intaviu, oli rekodem olgeta insaed long Member Tools o RLK. Infomesen ia i otomatik blong fulumap ol ples we i go wetem long Kwota Ripot.
Evri wod i finisim mo sendem wan Kwota Ripot i go long ol hedkwota blong Jos. Ol klak oli luklukbak long ripot wetem bisop mo oli sendem i go bifo namba 15 blong manis we i folem en blong wanwan kwota.
Stek presidensi i save luklukbak long Kwota Ripot we wanwan wod i sendem i go. Hemia bae i helpem olgeta blong oli kipim progres mo save weaples blong givim sapot mo instraksen. Ol stek kaonsel memba tu oli save luk wanwan Kwota Ripot.
33.5.2
Lis blong Ol Membasip
Ol tul blong kipim ol rekod blong Jos i mekem ol lida oli save aksesem ol lis blong membasip. Ol lis ia i save helpem ol lida blong luksave:
Huia ol memba we oli no kasem ol odinens yet we oli save kasem.
Huia ol yang man mo woman we oli save givim seves long wan misin.
Huia ol yut we oli no gat wan tempol rekomen blong naoia.
Huia ol yut we oli nidim blong putum taem blong oli gat ol miting wetem wan memba blong bisoprik.
Ol kworom mo oganaesesen lida oli save gat ol lis ia blong olgeta we oli stap long kworom o oganaesesen blong olgeta.
33.6
Ol Membasip Rekod
Ol membasip rekod, insaed i gat ol nem blong ol memba, kontak infomesen, ol ditel blong odinens, mo ol nara impoten infomesen. Wod i mas gat wan membasip rekod blong wanwan memba we i stap laef insaed long ol baondri blong hem.
Ol membasip rekod, oli mas stap insaed long wod ia we memba ia i stap laef long hem. Ol taem we oli no folem rul oli mas wanwan nomo, o i nidim raet blong bisop mo stek presiden. Blong askem wan eksepsen, stek presiden, i yusum RLK blong sendem rikwes i go long Ofis blong Fas Presidensi.
Ol membasip rekod, oli wan wei ia nomo blong rekodem daon ol odinens mo ol nara ofisol aksen blong i stap olwe insaed long ol rekod blong Jos. From hemia, bisop i mekemsua se ol klak oli stap kipim ol stret rekod. Hem i mekemsua tu se ol klak oli apdeitem infomesen long RLK. Hem i impoten blong mekem ol samting ia long stret mo kwik taem:
Rekodem odinens infomesen.
Muvum rekod blong ol memba we oli muv i kam insaed o go aotsaed long wod.
Krietem ol rekod blong ol niu memba mo niu pikinini blong ol papa mo mama we oli memba.
Rekodem ded blong wan memba. (Oli mas rekodem ded blong wan memba bifo we bae oli save mekem ol tempol odinens long bihaf blong memba ia. Luk long 28.1.)
Rekodem infomesen blong mared mo wanwan haos.
Bisop o stek presiden, i mekemsua se wan membasip rekod i stap long stret wod bifo wan memba i mekem intaviu blong kasem:
Wan Jos koling.
Wan tempol rekomen.
Melkesedek Prishud o blong oli odenem hem i go long wan ofis long prishud ia.
Hem i mekemsua tu se rekod ia i no tekem wan long olgeta samting ia:
Wan toktok o not i hang long membasip rekod
Wan komen abaot wan siling o wan toktok we i blokem wan odinens
Ol Strong Kondisen long Membasip
Samtaem wan memba i no bin stap gogohed blong laef insaed long wod blong wan ful yia. Long kes olsem, bisop o wan kaonsela we hem i givim wok ia long hem, i kontaktem hem we i bisop blong memba ia fastaem, bifo hem i mekem wan intaviu blong givim wan tempol rekomen o blong askem blong oli odenem hem i go long wan ofis blong Melkesedek Prishud. Stamba tingting blong kontaktem bisop ia i blong askem sapos i gat eni problem long saed blong stap klin inaf, we bae i nidim blong hem i lukluk long hem. Sapos wan kaonsela i faenemaot se i gat konfidensiol infomesen i stap, nao hem i stopem storian ia. Hem i talemaot long bisop blong hem blong kontaktem bisop blong fastaem, bifo hem i mekem intaviu.
I no gat eni situesen nating we i stap, we oli save givim o soem ol membasip rekod i go long wan man o woman; oli givim nomo i go long bisop o wan klak.
Ol memba oli save luk membasip infomesen blong olgetawan mo blong eni pikinini we oli stap lukaotem we oli stap laef wetem olgeta long Member Tools ap. Oli save askem tu ol kopi we oli printim blong Odinens Samari blong Wanwan Man o Woman blong olgetawan long klak. Sapos oli faenem sam mistek i stap, wan klak i mekemsua se hem i stretem olgeta long ol membasip rekod.
Ol instraksen blong olsem wanem blong krietem wan membasip rekod o stap long RLK. Ol instraksen blong olsem wanem blong rekodem wan mared o ded i stap tu.
Blong ol situesen we oli no tokbaot insaed long seksen ia, ol lida oli mas kontaktem Global Services Dipatmen o eria ofis.
33.6.1
Ol Nem blong Oli Yusum long Ol Rekod blong Jos
Oli yusum ful nem blong man o woman, folem loa, olsem we lokol loa o kastom i talem, mo oli mas yusum hemia nao long ol membasip rekod mo ol odinens setifiket.
33.6.2
Ol Memba blong Rekod
Ol man mo woman ia oli ol memba blong rekod mo oli mas gat wan membasip rekod:
Olgeta we oli bin kasem baptaes mo kasem konfemesen
Olgeta we oli no kasem 9 yia yet, we oli bin kasem blesing, be oli no kasem baptaes
Olgeta we oli no akaontebol from se oli gat ol disabiliti long tingting, i nomata long yia blong olgeta
Ol pikinini we oli no kasem 9 yia yet mo oli no blesem olgeta taem tufala samting ia i aplae:
Wan papa o mama o wan apu man o apu woman i wan memba blong Jos.
Papa mo mama i givim raet blong oli krietem wan rekod. (Sapos papa o mama nomo, i gat raet long pikinini, folem loa, blong lukaot long wan pikinini blong hem, hem bae i givim raet ia blong krietem rekod.)
Wan we i gat 9 yia o moa, we i gat wan membasip rekod be i no kasem baptaes mo konfemesen, i no wan memba blong rekod. Be, wod ia we boe o gel ia i stap long hem, i holemtaet membasip rekod blong hem kasem taem hem i gat 18 yia. Long taem we hem i kasem eitin yia, sapos boe o gel ia i jusum blong i no baptaes, bisop bae i kanselem membasip rekod. I nidim blong stek presiden i apruvum.
Oli no stap kanselem rekod blong olgeta we oli no baptaes from se oli gat wan disabiliti long tingting; be nomo sapos man o woman ia, o wan we i gat raet blong lukaot long hem folem loa, mo i tekem tu papa o mama, i askem blong oli kanselem.
33.6.3
Ol Rekod blong Ol Niu Memba blong Wod
Wod klak o wan wod asisten klak i kontaktem ol niu memba blong wod stret afta we oli kasem membasip rekod blong olgeta blong oli luklukbak long Odinens Samari blong Wanwan Man o Woman, blong jekem se evri samting i stret.
Blong kasem ol instraksen abaot fasin blong presentem ol niu memba afta we oli kasem membasip rekod blong olgeta, o afta we oli baptaes mo kasem konfemesen, luk long 29.2.1.1.
33.6.4
Ol Rekod blong Ol Memba we Oli Muv, o Oli Stap Longwe long Hom blong Sot Taem
Ol lida blong wod, ol givhan brata mo sista, o ol klak oli mas kasem ol niufala adres blong ol memba stret long taem we oli save se ol memba oli gat tingting blong muvaot long wod. Ol klak oli muvum ol rekod i go long niu wod taem ol memba oli muvaot. Ol klak oli save askem tu ol rekod blong ol memba we oli stap muv i kam insaed long wod blong olgeta, taem wod blong ol memba ia bifo oli no sendem ol rekod i kam.
Sapos wan klak i no faenem weaples ol memba ia oli bin muv i go long hem, oli muvum rekod i go long lis blong Faenem Ol Memba We Oli Lus long RLK. Ol lida blong Kworom blong Ol Elda mo Rilif Sosaeti oli luklukbak long ripot ia oltaem mo yusum ol risos we i stap blong faenem ol memba ia. Ol wod kaonsel memba o misinari oli save help.
Sapos oli faenem weaples ol memba ia oli stap long hem, bae klak i muvum rekod blong olgeta i go long ples ia. Sapos oli no faenem weaples ol memba ia oli stap long hem afta we oli yusum evri risos blong faenem olgeta, klak i mas askem bisop blong i apruvum blong oli givimbak rekod i go long ol hedkwota blong Jos.
Oli asaenem ol rekod insaed long Faenem Ol Memba We Oli Lus long wod yet, be oli no kamaot long lis blong ol memba mo ol ripot, mo oli no tekem olgeta insaed long ol statistik blong wod.
Taem wan man o woman i muvaot long wan wod blong moa long tri manis, wan klak i muvum membasip rekod i go long niu wod, be i no mekem olsem taem memba i gat tingting blong kambak long wod afta we hem i aot blong smol taem, o sapos hem i aot blong wok long ovasi o skul blong sot taem, mo taem ia i save ova long tri manis taem.
Taem wan memba i muv i go aot long wod blong wan taem we i no kasem tri manis, mo i plan blong kambak, bae membasip rekod blong hem, oli holemtaet nomo insaed long wod.
Taem wan lida i no sua long hamas taem wan man o woman bae i go, oli kipim wan rekod insaed long wod ia we i save lukluk gud long ol nid blong memba ia.
33.6.5
Aot-long-Yunit Rekod blong Ol Memba
Oli save holemtaet membasip rekod blong wan memba insaed long wan wod nomo long wan taem. Bisop blong wod ia nomo i save lukluk wok ia blong apdeitem membasip rekod ia, mekem ol odinens, mo mekem ol intaviu blong faenemaot se memba ia i klin inaf o no.
Long sam situesen, bae i nidim blong rekodem nem mo kontak infomesen blong wan memba tu long nara wod (luk long 33.6.11 mo 33.6.13 blong gat ol eksampol). Long ol kes olsem, klak blong nara wod i krietem wan aot-long-yunit memba rekod. Hem i yusum RLK blong krietem rekod ia.
Ol memba we oli gat wan aot-long-yunit rekod, oli save kasem wan koling insaed long wod ia. Mo tu, oli stap tu long ol daerektri mo atendens rol blong wod.
33.6.6
Ol Rekod blong Ol Memba we Oli Givim Seves Aotsaed long Jeografik Wod blong Olgeta
33.6.6.1
Ol Rekod blong Ol Memba we Oli Gat Ol Narafala Wok blong Jos
Sapos ol memba oli kasem sam wok blong Jos blong mekem aotsaed long jeografik wod blong olgeta, nao membasip mo faenens rekod blong olgeta, oli kipim i stap long jeografik wod blong olgeta. Sapos ol wok ia blong Jos i mekem se ol memba oli mas muv aot long jeografik wod blong olgeta blong tri manis o moa, mo sapos ol pikinini blong olgeta i folem olgeta, nao bae oli muvum ol membasip rekod blong olgeta i go long niu wod. (Luk long 33.6.4.)
Ol yang singgel adalt we ol gat bitwin 18 mo 30 yia, oli save jusum blong stap ol memba long jeografik wod blong olgeta o wan YSA wod sapos i gat wan we oli stanemap long eria blong olgeta. Sapos oli jusum wan YSA wod, bae oli go long wod we oli asaenem long ol eria we oli stap laef long hem. Oli talemaot tu long bisop abaot jeografik wod blong olgeta. Bae oli kipim membasip rekod long wod we oli stap go long hem.
Ol prinsipol ia oli aplae tu long ol singgel adalt we oli gat 31 kasem 45 yia, we oli jusum blong stap olsem ol memba blong wan singgel adalt wod.
Sapos wan yang singgel adalt i wantem blong go long wan wod blong sot taem (eksampol, taem oli stap go long skul), bae oli holemtaet membasip rekod blong hem insaed long wod we hem i wantem go long hem. Wetem raet blong memba ia, klak blong wod we famli blong memba ia i stap long hem, i save krietem wan aot-long-yunit rekod blong memba ia (luk long 33.6.5).
33.6.8
Ol Rekod blong Ol Memba we Oli Stap long Ol Hospital, o Oli Stap long Ol Kea Fasiliti
Ol rekod blong ol memba we oli stap long ol hospital o ol kea fasiliti, i mas stap long wod ia we bae i save luklukgud long olgeta. Long plante kes, hem i wod ia we hospital o fasiliti ia i stap long hem.
33.6.9
Ol Rekod blong Ol Memba we Oli Stap long Militeri Seves
Taem wan memba i go long militeri seves blong kasem trening, membasip rekod blong hem i stap nomo long jeografik wod kasem taem we memba ia i kasem wok blong go long diuti stesen blong hem blong wan taem we i moa longfala. Long tetaem ia we hem i kasem wok ia blong hem long nara ples, hem i mas kontaktem jeografik wod blong hem mo givim nem mo adres blong niu wod blong hem.
33.6.10
Ol Rekod blong Ol Memba we Oli Gat Disabiliti long Tingting
Wan we i gat 8 yia o moa, mo hem i gat wan disabiliti long tingting, papa mo mama blong hem (taem i gat), mo bisop, oli toktok tugeta blong faenemaot sapos hem we i gat disabiliti ia, i akaontebol. Sapos man o woman ia i no akaontebol, bisop o wan klak, i putum “No Akaontebol” insaed long seksen blong baptaes, insaed long membasip rekod blong man o woman ia long RLK. Oli no kanselem rekod ia. Ol odinens i no wan nid blong wan man o woman we rekod blong hem i soem se hem i no akaontebol.
Samtaem wanwan man o woman, papa mo mama blong hem mo bisop, bae oli kaonsel tugeta afta blong talemaot se man o woman ia i akaontebol afta we oli putum long rekod se hem i “No Akaontebol.” Long kes ia, bisop o wan klak (wetem raet we bisop i givim) i karemaot “No Akaontebol” long rekod ia. Blong kasem moa infomesen, luk long 38.2.4
33.6.11
Ol Rekod blong Ol Memba we Sora i Fas, O Oli No Save Haremgud Samting
Ol memba we oli yusum ol saen lanwis, mo ol stret memba blong famli blong olgeta, o olgeta we oli gat raet blong lukaot long olgeta folem loa, oli save jusum blong Jos membasip rekod blong olgeta i stap long eni long ol ples ia:
Jeografik wod blong olgeta
Wan wod blong ol memba we sora i fas, o oli no save haremgud samting, we oli stap laef insaed long baondri blong wod
Wan wod we i stap lukaotem wan grup blong ol memba we sora i fas, o oli no save haremgud samting, we oli stap insaed long wan eria we stek presiden o Eria Presiden i talem.
Long situesen olsem ia, rekod blong wanwan man o woman, o blong famli, i save stap long wan yunit, mo oli save stap tu olsem ol memba we oli stap aot-long-yunit long wan nara wod. Eksampol: pat blong wan famli, i save putum rekod blong olgeta long wan yunit blong olgeta we sora i fas o oli no save haremgud samting, mo oli save stap olsem ol “aot-long-yunit” memba insaed long jeografik yunit blong olgeta bakegen. Blong kasem moa infomesen, luk long 33.6.25.
Ol memba we sora i fas o oli no save haremgud samting, oli save go long ol wod o grup, onlaen, we oli oganaesem blong olgeta we sora i fas o oli no save haremgud samting; yunit o grup ia i save stap aotsaed long baondri blong ples we memba ia i stap long hem. Oli save mekem hemia, iven sapos rekod blong olgeta i no stap long yunit ia. Bifo oli joen onlaen, oli mas kontaktem mo talemaot long bisop blong wod ia we oli wantem go long hem.
33.6.12
Rekod blong Ol Pikinini we Oli Adoptem Olgeta
Ol rekod blong ol pikinini we oli adoptem olgeta, oli save krietem o apdeitem nomo afta we ol pepa blong adopsen i finis evriwan. Nem we i sapos blong stap long rekod, i mas folem wanem i stap long pepa blong adopsen. Ol rekod blong ol papa mo mama we oli adoptem olgeta, oli save apdeitem nomo afta we ol pepa blong adopsen i finis evriwan.
33.6.13
Ol Rekod blong Ol Pikinini we Papa mo Mama oli Divos
Evri membasip rekod i yusum nem blong wan man o woman folem loa, mo olsem we lokol loa o kastom i talem. Hemia i tekem tu ol pikinini we papa mo mama oli divos. Nem ia we i folem loa long membasip rekod, oli mas rekodem tu long ol setifiket blong ol blesing mo prishud odinens.
Ol pikinini we papa mo mama i divos, fulap taem oli stap atendem ol miting blong Jos long tugeta wod, hemia we papa i stap go long hem, mo hemia we mama i stap go long hem. From se wan yunit nomo i save holemtaet mo apdeitem ofisol membasip rekod blong wan pikinini, bae narafala wod o branj we pikinini ia i stap atendem i save krietem wan aot-long-yunit memba rekod (luk long 33.6.5). Hemia i mekem se infomesen blong nem mo kontak blong pikinini ia i kamaot long lis mo klas rol blong yunit.
Ol pikinini we oli gat wan aot-long-yunit memba rekod, olgeta tu oli save kasem wan koling long yunit ia. Hemia i help bigwan blong mekemsua se ol pikinini ia oli pat mo oli save tekpat fulwan long weaples oli stap go long hem.
Sapos wan memba i muv taem we hem i stap yet long wan strong kondisen long membasip o wan nara series situesen, bae bisop, o wan klak we i kasem raet, i save putum wan not blong blokem eniwan blong muvumaot membasip rekod ia. Hem i yusum RLK blong mekem hemia.
Wan rekod we i gat wan not blong no muvumaot rekod, bae oli no muvum i go long wan niu yunit kasem taem we prishud lida we i askem not ia blong no muvumaot rekod, i givim raet blong oli karemaot.
33.6.16
Ol Rekod wetem “No Save Adres” long Fael
Samtaem oli faenem wan memba we rekod blong hem i bin stap long “no save adres fael” long ol hedkwota blong Jos. Long situesen ia, wod klak i askem rekod ia insaed long RLK. Rekod ia bae i tekem tu wan mesej we i leftemap tingting blong bisoprik, kworom, mo ol oganaesesen lida blong visitim man o woman kwiktaem olsem we i posibol mo blong felosip wetem olgeta. Oli save askem ol fultaem misinari blong save go visitim mo felosip long ol memba ia.
Evri yia, stek klak o wan asisten stek klak i mekemsua se oli mekem wan odit blong ol membasip rekod insaed long wanwan wod mo oli yusum RLK. Stek presiden i save singaotem ol narawan, we oli gat eksperiens long wok blong kipim ol membasip rekod blong save help wetem ol odit ia. Ol odit ia, oli mas finisim olgeta bifo long namba 30 Jun blong evri yia.
33.7
Ol Histri Rekod
33.7.1
Ol Wod mo Stek Histri
Lod i bin givim komanmen se oli mas raetem mo holemtaet “wan histri blong evri impoten samting” blong Jos blong Hem (Doktrin mo Ol Kavenan 69:3.; luk tu long ves 5; Alma 37:2).
Wanwan yunit insaed long Jos i mas rekodem evri impoten samting abaot yunit blong olgeta. Ol samting ia i tekem tu ol histri akaon blong ol lida long yunit. Blong faenemaot ol samting we oli impoten, oli mekem i gud moa taem we:
Oli tingtingbak long ol hadwok blong helpem wanwan man, woman, mo famli.
Oli luksave ol eksperiens we oli gat mining we oli soem paoa blong God long laef blong ol pikinini blong Hem.
Blong stap kipim wan histri, hem i wan wok long saed blong spirit we bae i mekem fet blong olgeta we oli stap raet mo ridim, i kam strong moa. Blong stap putum tugeta ol stori truaot long yia bae i mekem kwaliti blong histri i kam antap moa.
Ol stek mo wod lida blong prishud mo ol oganaesesen, oli kontribiut long ol stori mo oli mekem hemia long Yunit Histri tul on ChurchofJesusChrist.org. Ol stek mo wod klak oli gat stamba responsabiliti ia blong oganaesem mo kodinetem wok ia. Stek presidensi mo bisoprik i save singaotem wan stek o wod histri speselis blong help. I gat sam moa instraksen i stap long Quick Start Guide.
Ol memba oli save yusum Yunit Histri tul blong luk ol stori we ol stek mo wod lida blong olgeta i bin putumaot. Ol stori we oli putumaot, Jos i sevem olgeta otomatik nomo.
33.7.2
Jos Histri
Jos Histri Dipatmen, i jusum mo pikimap ol rekod blong histri, mo tu, ol rekod blong wanwan man o woman, ol art, mo ol samting we oli wokem long han “blong gud blong Jos, mo gud blong jeneresen” (Doktrin mo Ol Kavenan 69:8). Ol kwestin abaot histri valiu blong ol rekod ia, oli save askem long:
Ol rekod blong Jos oli konfidensiol i stap, i nomata se oli stap long pepa o long ol kompiuta. Olgeta ia, i gat:
Ol Membasip rekod.
Ol Faenens rekod.
Ol not blong ol miting.
Ol ofisol fom mo pepa (we i tekem tu ol rekod blong ol membasip kaonsel).
Ol not we oli mekem long ol praevet kaonsel.
Ol lida mo ol klak oli mas lukaotgud mo putum ol rekod blong Jos oli stap sef, long fasin blong stap holem mo storem, mo fasin blong sakem ol rekod ia; oli mas mekem long wan wei we i protektem praevet laef blong wanwan man o woman. Ol lida oli meksua se ol infomesen we oli karem long ol memba oli:
Inaf nomo folem wanem we Jos i nidim.
Yusum nomo long ol stamba tingting blong Jos we oli apruvum.
Givim nomo long olgeta we oli gat raet blong save yusum.
Infomesen we oli putum gud i stap long lektronik wei, bae oli mas kipim i sef mo protektem long stret wei (luk long 33.9.1). Ol lida oli meksua se ol kaen data ia, oli no yusum blong wan stamba tingting we i blong wan man nomo, blong politik, o blong mekem bisnis. Infomesen we i kamaot long ol rekod blong Jos, wetem ol histri infomesen, bae oli no save givim i go long wanwan man o woman, o ol kampani o ejensi we oli stap mekem ol stadi, o ol sevei (luk long 38.8.37).
Ol lida mo memba oli mas folem ol gaedlaen insaed long 38.8.13 blong protektem ol daerektri blong stek mo wod.
33.9
Lukaotem Gud Ol Rekod
Ol lida blong stek mo wod oli mas lukaotem gud ol rekod olsem pat long fasin blong wok blong olgeta blong kipim ol rekod. Ol trifala impoten eria blong lukaotem gud ol rekod, oli putum gud i stap long ol seksen ia.
33.9.1
Proteksen
Evri Jos rekod, ripot mo infomesen, bae oli mas protektem blong mekem se man o woman we i no gat raet, bae i no save tekem, jenisim, prapa spolem, o soemaot long man. Infomesen ia i mas stap long wan sef ples. Ol rekod we oli konfidensiol tumas, we i tekem tu ol pepa we oli printim, bae oli kipim i stap insaed long wan dro we i lok o insaed long wan kabod insaed long ofis blong lida taem oli no yusum ol samting ia.
Taem i posibol, oli sapos blong putum kod mo paswod blong protektem ol lektronik kopi blong ol rekod, ripot mo infomesen. Ol lektronik tul o storej blong media we i blong Jos mo i bin lus o oli stilim, oli mas ripotem kwiktaem long incidents.ChurchofJesusChrist.org. Jos infomesen we oli no yusum long stret wei, oli mas ripotem tu.
33.9.1.1
Ol Yusanem mo Paswod
Ol stek presiden, bisop mo ol nara lida oli no mas serem Jos yusanem mo paswod blong olgeta wetem ol kaonsela, klak, eksekutiv sekretari, o ol narawan. Oli no mas kipim i stap tu long ol lektronik tul we ol nara man i save luk mo yusum.
Ol paswod oli mas gat 12 namba o leta o moa longwan, mo i no mas isi blong man i save. Oli leftemap tingting blong ol lida fulap blong yusum tu-step verifikesen (we oli save tu olsem maltifakta otentikesen) long ol Jos akaon blong olgeta taem i posibol.
33.9.1.2
Ol Kompiuta we Oli Serem mo Data Storej
Ol lida mo ol klak oli no mas putum ol membasip mo faenens infomesen long ol kompiuta we oli serem mo ol narawan we oli no gat raet, oli save yusum mo gat infomesen ia.
33.9.1.3
Praevet Data
Plante kantri oli pasem ol loa we i protektem data, olsem ol praevet data. Hemia i tekem tu infomesen long ol membasip rekod mo ol nara Jos rekod we i soemaot aedentiti blong wan man o woman. Ol lida we oli gat ol kwestin abaot aplikesen blong ol loa blong data we oli protektem i go long lokol manejmen blong ol Jos rekod, oli save kontaktem Jos praevet data ofis long DataPrivacyOfficer@ChurchofJesusChrist.org.
33.9.2
Holemtaet Rekod
Oli holemtaet ol rekod i go kasem taem we oli nomo nidim long saed blong administresen, ol ligel samting, mo histri. Ol faenens rekod, oli mas holemtaet olgeta blong wan taem blong tri yia, plas yia we i stap gohed. Ol lida we oli gat ol kwestin long fasin blong kipim ol rekod, oli save kontaktem Global Service Dipatmen o eria ofis.
33.9.3
Sakem Rekod
Ol rekod we oli nomo gat ol stret infomesen long hem, o oli nomo nidim, oli mas sakem olgeta long wan wei we, infomesen ia, bae oli no save faenem bakegen, o oli no save putum tugeta bakegen. Taem oli stap dilitim membasip o faenens infomesen, lida i mas meksua se bae oli no save tekembak infomesen ia tru long eni wei.
Ol rekod we i posibol se oli gat valiu long histri, bae oli no sakemaot, prapa spolem o putum insaed long wod risos senta (laebri). Ol kwestin abaot histri valiu blong ol rekod ia, oli save askem long Jos Histri Laebri (luk kontak infomesen we i stap long 33.7.2
33.10
Ol Stek mo Wod Teknoloji Speselis
Stek presidensi i singaotem wan memba, o moa long wan memba blong stek blong i givim seves olsem stek teknoloji speselis. Bisoprik i save singaotem wan, o moa long wan memba blong wod blong givim seves olsem wod teknoloji speselis. Ol man, ol woman, mo ol yut oli save holem ol koling ia.
Ol stek teknoloji speselis oli givim seves anda long daereksen blong stek klak. Ol teknoloji speselis blong wod oli givim seves anda long daereksen blong wod klak o eksekutiv sekretari, olsem we bisop i talem. Ol responsabiliti blong olgeta, i gat olgeta ia:
Help ol stek o wod lida long ol teknikol nid.
Tijim ol memba olsem wanem blong kasem mo yusum Jos media, ol ap, mo ol nara teknoloji tul, we i tekem tu FamilySearch.org.
Sapotem ol lida mo ol tija we oli stap yusum ol teknoloji tul blong mekem ol koling blong olgeta.
Manejem ol miting mo ol klas onlaen blong olgeta we oli no save atendem (luk long 29.7).
Antap long ol responsabiliti ia, stek teknoloji speselis i gat olgeta responsabiliti ia blong manejem ol kompiuta blong Jos insaed long stek, wetem olgeta kompiuta blong ol FamilySearch senta:
Hem i holem wan ful lis blong evri kompiuta insaed long stek, wetem ol serial namba, ol model, paoa blong ol kompiuta ia mo weaples stret oli stap long hem.
Mekemsua se (1) ol kompiuta, ol kompiuta program, mo ol konfidensiol infomesen oli stap long wan sef ples, mo (2) mekem ol bakap fael oltaem.
Hem i mas savegud ol jeneral polisi long saed blong ol kompiuta blong Jos (luk long 38.8.10).
Hem i mas savegud tu ol gaedlaen blong kasem mo manejem ol kompiuta blong Jos.
Olsem we i nid, ol teknoloji speselis blong stek oli kodinetem wok blong wod teknoloji speselis. Oli givim instraksen tu.