25.

Vakaduavatataki na Matavuvale me Tawamudu ena Cakacaka ni Valetabu kei na Tuvakawa

25.0

iVakamacala Taumada

Na valetabu e vale ni Turaga Na cakacaka vakalotu kei na veiyalayalati ni valetabu e vakalougatataki ira na luvena na Tamada Vakalomalagi. Sa sureti ira kece na luvena na Tamada Vakalomalagi mera kilikili kaya ka ciqoma na veicakacaka vakalotu eso ni valetabu.

Na vakaduavatataki ni matavuvale me tawamudu e tiki ni Nona cakacaka ni veivakabulai kei na bula vakacerecerei na Kalou (raica na 1.2). Na cakacaka ni valetabu kei na tuva kawa e sala ni veivakaduavatataki me vauci na matavuvale me tawamudu (raica na Maciu 16:19). Na cakacaka oqo e oka kina na:

• Na vakayacori ni veiyalayalati kei na noda ciqoma na noda dui cakacaka vakalotu ni valetabu (raica na Aisea 55:3; Vunau kei na Veiyalayalati 84:19–23).

• Na nodra kunei o ira na noda qase e liu era sa takali yani ka vakayacora na cakacaka vakalotu ena vukudra ena valetabu me rawa ni ra cakava na nodra veiyalayalati kei na Kalou (raica na Malakai 4:5–6; 1 Korinica 15:29; Vunau kei na Veiyalayalati 128:15–18).

• Dau lako wasoma ki na valetabu, kevaka e rawa, mo sokalou vua na Kalou ka vakayacora na cakacaka vakalotu me baleti ira na noda qase e liu (raica na Luke 24:52–53; Vunau kei na Veiyalayalati 109:13–14).

Na vakaitavi ena cakacaka oqo ena kauta mai na veivakalougatataki cecere. Ni ra cakava ka maroroya na lewenilotu na veiyalayalati tabu, era na rawata na kaukauwa ni Kalou. Era kune marau ena nodra veiqaravi ena vale ni Turaga ena vukudra na tubudra.

Na wase oqo e dusimaki ira na iliuliu ni Lotu kei ira na lewenilotu ena sala mera vakaitavi kina veivakaduavatataki ni matavuvale me tawamudu ena cakacaka ni valetabu kei na tuvakawa. Eso tale na ivakamacala e tiko ena “Temples (Veivaletabu),” “Proxy Baptism (Papitaiso Veisosomitaki),” kei na “Family History (Tuva Kawa)” (Topics and Questions (Ulutaga kei na Taro), Valenivola ni Kosipeli).

25.1

Vakaitavi ni Lewenilotu kei na iLiuliu ena Vakaduavatataki ni Matavuvale me Tawamudu

Sa nodra na madigi marautaki kei na itavi na lewe ni Lotu me ra veivuke ena vakaduavatataki ni nodra matavuvale me tawamudu. Era vakarautaki ira mera caka veiyalayalati nira ciqoma na veicakacaka vakalotu eso ni valetabu. Era segata mera maroroya na veiyalayalati oqori.

Era na vukei ira talega na lewe ni matavuvale me ra kila, ciqoma, ka saga me ra maroroya na veiyalayalati ni valetabu. Sa nodra itavi taumada na itubutubu me ra vukei ira na luvedra me ra vakila na reki kei na veivakalougatataki ni caka veiyalayalati me baleti ira kei na kena qaravi na cakacaka vakalotu ena vukudra na wekadra era sa mate (raica na 2.1.3).

Era sa vakauqeti na lewe ni Lotu me ra kilai ira na wekadra era sa mate ka ra se bera ni ciqoma na cakacaka vakalotu ni valetabu. Era qai vakayacora na lewenilotu na cakacaka vakalotu ena vukudra na wekadra oqori (raica na Vunau kei na Veiyalayalati 128:18). Ena vuravura ni yalo, sa rawa ni ra digitaka na tamata yadua era sa mate me ra ciqoma se vakasuka na cakacaka vakalotu sa vakayacori ena vukudra.

Era sa vakayaloqaqataki talega na lewenilotu me ra kunea na nodra italanoa na tubudra, ka rawa ni vakavutuniyautaka na veika era sa sotava ena vukudra na nodra qase e liu. Era sureti ira na tani o ira na lewenilotu me ra vakayacora vakakina.

E vuqa na iyaya ni cakacaka sa vakarautaki tu me vukei ira na lewenilotu ena nodra cakacaka ni valetabu kei na tuvakawa. Eso vei ira oqori era vakamacalataki ena 25.4.1 kei na 25.4.2.

25.1.1

iTavi ni Tamata Yadua Me Baleta na Sokalou e Valetabu

Era na vakatulewataka vakataki ira na lewenilotu na gauna kei na levu ni nodra na sokalou ena valetabu. Mera kakua ni dau lavaka na iliuliu edua na iwiliwili se ivakarau ni soli ripote me baleta na sokalou ena valetabu.

O ira yadua na lewenilotu kei na matavuvale ka tu vei ira na ivolatara ni valetabu vakabau era rawa ni gole ki na valetabu cava ga era gadreva. E rawa nira lokuca edua na gauna vata kei na valetabu. Raica na temples.ChurchofJesusChrist.org me baleta na gaunisala ni veitaratara ki na vei valetabu yadua.

25.1.2

iLakolako ni Tabanalevu kei na iTeki ki Valetabu

Na tabana ni Lotu yadua e lesi ki na dua na tikina ni valetabu. Na tuvalaki ni veisiko ena valetabu ni tabanalevu se iteki ena taudaku ni valetabu digitaki ni tikina e sega ni vakauqeti.

Na ilakolako kece ni tabanalevu kei na iteki ki valetabu e dodonu me na lokuci vata kei na valetabu. Raica na temples.ChurchofJesusChrist.org me baleta na gaunisala ni veitaratara ki na vei valetabu yadua.

25.2

iLiuliu ena Tabanalevu

25.2.1

Matabisopi

Na matabisopi ena veitalanoa kei na mataveiliutaki ni kuoramu ni italatala qase kei na iSoqosoqo ni Veivukei me ratou liutaka na sasaga ni tabanalevu ena cakacaka ni tuvakawa ni valetabu. Era na dau veivakasalataki vakawasoma na vei iliuliu oqo.

Sa vakaoqo na ikuri ni nodra itavi ni mataveiliutaki na bisopi:

• Railesuva ka vakadonuya na ituvatuva ni cakacaka ni tuvakawa ni valetabu ena tabanalevu (raica na 25.2.6

• Vakadeitaka ni na inaki levu ni matabose ni valetabu kei na tuvakawa ni tabanalevu e yavutaki ena matabose ni tabanalevu kei na matabose ni tabagone ni tabanalevu.

• Raica raraba na tuvalaki ni vuli ni vakavakarau ki na valetabu (raica na 25.2.8).

• Solia na ivolatara ni valetabu (raica na wase e 26).

Ena veivosaki na matabisopi kei na peresitedi ni iteki me navuci kina se me kacivi e dua na iliuliu ni cakacaka ni tuvakawa ni valetabu ena tabanalevu (raica na 25.2.3 me baleta na ikuri ni ivakamacala).

25.2.2

Mataveiliutaki ni Kuoramu ni iTalatala Qase kei na iSoqosoqo ni Veivukei

Sa nodratou itavi na mataveiliutaki ni kuoramu ni italatala qase kei na iSoqosoqo ni Veivukei me ratou na liutaka e veisiga na sasaga ni cakacaka ni tuvakawa kei na valetabu ena tabanalevu, ka vukea na duavata ni matavuvale me tawamudu (raica na 8.2.4 kei na 9.2.4). Ena liutaka na sasaga oqo na mataveiliutaki ni kuoramu ni italatala qase ena vukudra na lewe ni kuoramu ni italatala qase. Na mataveiliutaki ni iSoqosoqo ni Veivukei e liutaka na nodra sasaga na lewe ni iSoqosoqo ni Veivukei. Era na cakacaka vata me liutaki na sasaga oqo vata kei na matabose ni tabanalevu, ena veivakacokotaki nei bisopi.

Oqo na nodra itavi na iliuliu oqori:

• Vukea na matabose ni tabanalevu me tarai cake ka vakayagataki na ituvatuva ni valetabu kei na tuva kawa ni tabanalevu (raica na 25.2.6

• Kerea e dua na daunivakasala ni valetabu kei na tuvakawa me vukei ira na lewenilotu me ra kunea ka vakarautaka na yacadra na tubudra sa mate me baleta na cakacaka vakalotu ni valetabu (raica na 25.4.1). Na sasaga oqo era vakanamata vei ira era se qai ciqoma walega na veikacivi ni kaulotu kei ira era se bera ni vakaedaumeni.

• Raica me tuvai ka ripotetaki na cakacaka ni valetabu kei na tuvakawa ena bose ni matabose ni tabanalevu kei na bose veicokonaki ni valetabu kei na tuvakawa.

• Liutaka na cakacaka nei iliuliu ni cakacaka ni tuvakawa ni valetabu ena tabanalevu. Kevaka e sega ni kacivi na iliuliu oqo, ena qarava na itavi oqo e dua na lewe ni mataveiliutaki ni kuoramu ni italatala qase (raica na 25.2.3

• Ena vanua e gadrevi kina, lesia na daunituvakawa ni valetabu ena tabanalevu me veiqaravi ena valenivolavola ni FamilySearch (raica na25.3.6).

O irau na peresitedi ni kuoramu ni talatala qase kei na iSoqosoqo ni Veivukei erau na dui lesia edua na lewe ni nodrau mataveiliutaki me veivuke ena liutaki ni cakacaka ni valetabu kei na tuvakawa ena tabanalevu. Erau cakacaka vata na lewe ni mataveiliutaki e rua oqo. E rau na tiko ena bose ni veivakacokotaki ni valetabu kei na tuva kawa ni tabanalevu (raica na 25.2.7).

25.2.3

iLiuliu ni Valetabu kei na Tuva Kawa ena Tabanalevu

Ena veitalanoa o bisopi kei na peresitedi ni iteki me vakatulewataki kina se me kacivi e dua na iliuliu ni cakacaka ni tuvakawa ni valetabu ena tabanalevu. Kevaka era nanuma me ra vakayacora na veikacivi oqo, me ratou veitalanoa na matabisopi kei ira na peresitedi ni kuoramu ni italatala qase kei na iSoqosoqo ni Veivukei ena kena navuci o cei me kacivi. Na tamata oqo e dodonu me lewe ni Matabete i Melikiseteki. Kevaka e sega ni kacivi na iliuliu oqo, ena vakatawana na ilesilesi oqo e dua na lewe ni mataveiliutaki ni kuoramu ni italatala qase.

Na iliuliu ni cakacaka ni valetabu kei na tuvakawa ena tabanalevu ena tokoni iratou na mataveiliutaki ni kuoramu ni italatala qase kei na mataveiliutaki ni iSoqosoqo ni Veivukei ena nodratou itavi ni cakacaka ni valetabu kei na tuvakawa. Sai koya talega oqo na nona ilesilesi:

• Vakacokotaka na sasaga ni valetabu kei na tuvakawa kei ira na iliuliu ni mataisoqosoqo ena tabanalevu, oka kina na mataveiliutaki ni kuoramu ni itabagone kei na kalasi.

• Liutaka na bose veicokonaki ni valetabu kei na tuvakawa ni tabanalevu (raica na 25.2.7).

• Tiko ena bose ni matabose ni tabanalevu ke sureti.

• Vukea na matabose ni tabanalevu me tarai cake ka vakayagataki na ituvatuva ni valetabu kei na tuva kawa ni tabanalevu (raica na 25.2.6).

• Vakasalataki ira na daunivakasala ni valetabu kei na tuvakawa ena tabanalevu. Vakaduavataki na nodra sasaga mera vukei na lewenilotu mera kunea na yacadra nodra qase e liu ka vakayacora na cakacaka vakalotu eso ni valetabu ena vukudra.

• Cakacaka vata kei na iliuliu ni kaulotu ena tabanalevu kei rau na daukaulotu me vukei ira na vulica tiko na kosipeli, lewenilotu vou, kei ira na lewenilotu era lesu mai mera vakaitavi ena cakacaka ni valetabu kei na tuva kawa (raica na 23.2 kei na 23.3).

25.2.4

Daunivakasala ni Tuva Kawa kei na Valetabu ena Tabanalevu

Era na veiqaravi na daunivakasala ni valetabu kei na tuvakawa ena nona veidusimaki na iliuliu ni valetabu kei na tuvakawa ena tabanalevu. Eratou na kacivi ira na lewenilotu oqo na matabisopi me ra veiqaravi. Sa rawa mera kacivi na uabula kei na itabagone. E rawa ni ratou vakatura na peresitedi ni kuoramu ni italatala qase, iSoqosoqo ni Veivukei, kei na Goneyalewa o cei me veiqaravi.

O ira na daunivakasala ni tuvakawa era na veivakavulici ena sala rawarawa mera vakaitavi kina ena cakacaka ni valetabu kei na tuvakawa. Era vakanamata vakabibi vei ira na itabagone, lewenilotu vou kei ira era sa lesu tale mai, kei na tacida kei na ganeda ka ra se bera ni vakaedaumeni. Nodra itavi na daunivakasala:

• Vukei ira na lewenilotu ena nodra vakavakarau me ra ciqoma na cakacaka vakalotu ni valetabu kei na vakayacori ni veiyalayalati ni valetabu.

• Vukei ira na lewenilotu me ra sotava na veivakalougatataki ena nodra kunei ira na tubudra ka vakayacora na cakacaka vakalotu ni valetabu ena vukudra.

• Vakaitavi ena soqoni cokovata ni valetabu kei na tuva kawa (raica na 25.2.7).

• Veiqaravi ena dua na valenivolavola ni FamilySearch e nodra vanua ena gauna e lesi kina (raica na 25.3.6).

Na ivurevure eso me vukei ira na daunivakasala ni valetabu kei na tuvakawa era sa volai tu ena 25.4.1 kei na 25.4.2.

25.2.5

Matabose ni Tabanalevu

Era na tauyavutaka ka vakayacora ena masumasu na lewe ni matabose ni tabanalevu na ituvatuva ni valetabu kei na tuvakawa. Me baleta na itukutuku ni ituvatuva, raica na 25.2.6.

Sa rawa vei bisopi me sureti iliuliu ni cakacaka ni tuvakawa ni valetabu ena tabanalevu me tiko ena bose ni matabose ni tabanalevu.

Oqo na itavi nodra na lewe ni matabose ni tabanalevu:

• Vukei ira yadua na lewenilotu mera vakavakarau mera caka veiyalayalati kei na Kalou nira ciqoma na veicakacaka vakalotu eso ni valetabu (raica na 27.1

• Vakayaloqaqataki ira kece na itabagone kei na lewenilotu uabula, oka kina o ira na lewenilotu vou, me dua na nodra ivolatara ni valetabu vakabau. (raica 26.0).

• Vakauqeti ira na lewenilotu mera sokalou ena vale ni Turaga ena kena levu ga e vakatara na nodra ituvaki.

• Sureta na tamata yadua kei na matavuvale mera vulica na ivunau kei na veivakalougatataki ni vakaitavi ena cakacaka ni vakaduavatataki ni matavuvale me tawamudu. Na cakacaka oqo e oka kina na vulici ni nodra qase e liu kei na qaravi ni cakacaka vakalotu ni valetabu ena vukudra.

• Tokoni ira na itubutubu ena nodra vakavulici ira tiko na luvedra ena ivunau ni cakacaka ni vakaduavatataki ni matavuvale me tawamudu. Oqo e oka kina na veivakalougatataki ni veiyalayalati ni valetabu kei na cakacaka vakalotu kei na vakayacori ni cakacaka vakalotu ni valetabu me baleti ira na nodra qase e liu era sa mate.

• Vakavulica wasoma na ivakavuvuli ni cakacaka oqo ena gauna ni soqoni ni Lotu.

Raica na wase e 26me baleta na itukutuku ni ivolatara ni valetabu.

25.2.6

iTuvatuva ni Valetabu kei na Tuva Kawa ena Tabanalevu

E dodonu me tiko ena tabanalevu yadua e dua na ituvatuva rawarawa ni valetabu kei na tuva kawa. Na ituvatuva oqo e vukei ira na lewe ni tabanalevu, oka kina o ira na gonelalai kei ira na itabagone, mera vakavakarau kina sokalou ena vale ni Turaga ka vakaitavi ena cakacaka ni tuvakawa kei na valetabu ena kena levu ga e rawa ni vakatara na nodra ituvaki.

E rau na veivuke na peresitedi ni kuoramu ni italatala qase kei na iSoqosoqo ni Veivukei ki na matabose ni tabanalevu ena kena tarai cake na ituvatuva. Ena veivuke talega na iliuliu ni valetabu kei na tuvakawa ena tabanalevu. Ena kena vakatorocaketaki na ituvatuva, era na:

• Vakasamataka ena masumasu na nodra gagadre na lewenilotu kei na veiivurevure eso sa vakarautaki tu.

• Vakatakila na cakacaka me vakayacori ena loma ni yabaki.

• Vakatulewataka na sala me vakayagataki kina na ituvatuva ka veilesi me vakakina.

Na ivakaraitaki ni veika e rawa ni okati ena ituvatuva e sa tuvani toka e ra:

• Vukei ira na lewenilotu vakatabakidua me ra kila na veivakalougatataki ni sokalou ena vale ni Turaga.

• Vukei ira na lewenilotu mera vakavakarau mera ciqoma na veivakalougatataki ni cakacaka vakalotu ni valetabu.

• Vukei ira na lewenilotu mera vakayagataka na Cakacaka Vakalotu sa Vakarau me ra kauta na yaca ni dua na qase eliu kina valetabu (raica na 25.4.1).

• Vukei ira na lewenilotu mera vakayagataka na mataveilawa ni FamilySearch se app me ra vakuria kina na veika era kila me baleti ira na wekadra era sa mate ka ra gadreva tu na cakacaka vakalotu ( raica na 25.4.1).

• Vakaitavitaki ira na lewenilotu vou kei ira era sa lesu tale mai, itabagone, kei ira na gone ena cakacaka ni valetabu kei na tuva kawa. Na Veivuke ni Yaca ni Matavuvale e dua na sala rawarawa vei ira na iliuliu me ra vukei ira na lewenilotu oqo me ra vakarautaka na yaca ni matavuvale me ra ciqoma na cakacaka vakalotu ( raica na 25.4.1).

• Vukei ira na gone ena Lalai me ra vakavakarau me ra ciqoma e dua na ivolatara ni valetabu ka sokalou ena vale ni Turaga ena veigauna e rawa kina. E dodonu me tiko ena mataveiliutaki ni Lalai e dua na Soqoni ni Vakavakarau ki na Valetabu kei na Matabete ena veiyabaki (raica na 12.1.7 kei na 12.2.4).

Ena sega ni tauyavutaki ena ituvatuva ni valetabu kei na tuvakawa ni tabanalevu na lavaki ni dua na iwiliwili se gacagaca ni soli ripote me baleti ira era sokalou ena valetabu (raica na 25.1.1).

O bisopi ena railesuva ka vakadonuya na ituvatuva. Era na veiliutaki na lewe ni matabose ni tabanalevu ena kena vakayacori. Era na ripotetaka na toso ni veiqaravi ena bose ni matabose ni tabanalevu. Era na vakavouya talega na ituvatuva kevaka e gadrevi.

25.2.7

Bose ni Veivakacokotaki ni Matabose ni iLiuliu ni Valetabu kei na Tuva Kawa ena Tabanalevu

Me dau vakayacori vakawasoma na soqoni leleka ni veivakacokotaki ni cakacaka ni tuvakawa ni valetabu ni tabanalevu. Na iliuliu ni valetabu kei na tuva kawa ni tabanalevu ena liutaka na veisoqoni oqo.

Eso tale era sureti e oka kina na:

• Lewe ni mataveiliutaki ni iSoqosoqo ni Veivukei, kuoramu ni italatala qase, kei na Lalai.

• E dua na ivukevuke ena kuoramu ni bete (se peresitedi ni kuoramu ni ivakavuvuli se dikoni kevaka e sega na bete ena tabanalevu).

• E dua na lewe ni mataveiliutaki ni kalasi ni Goneyalewa qase duadua.

• Daunivakasala ni Valetabu kei na Tuva Kawa

O ira kece era tiko, oka kina o ira na itabagone, era na veivakasalataki vata me vaka nira vakaitavi vata tiko kina. Na soqoni oqo e vakanamata ki na nodra gagadre na tamata yadua kei na sala e rawa ni ra vakalougatataki kina ni ra vakaitavi ena cakacaka ni valetabu kei na tuvakawa. Era vakanamata vakabibi vei ira na itabagone, lewenilotu vou kei ira era sa lesu tale mai, kei na tacidra kei na ganedra ka ra se bera ni vakaedaumeni. Na bose e dau veitalanoataka na veiulutaga vakaoqo:

• Vakacokotaka na sasaga ni kena vakayagataki na ituvatuva ni valetabu kei na tuva kawa ni tabanalevu (raica na 25.2.6).

• Tuvana na sala mera vukei kina vakatabakidua na lewe ni tabanalevu mera vakavakarau ki na ciqomi ni veicakacaka vakalotu eso ni valetabu.

• Tuvanaka na sala mera vukei kina vakatabakidua na sasaga ni lewe ni tabanalevu ena nodra cakacaka ni valetabu kei na tuvakawa.

Na veisoqoni oqo e rawa me vakayacori vakatamata se vakatikitiki. Na veivakacokotaki e rawa talega ni yaco ena veisala tale eso, oka kina na qiri ena talevoni, se tex vakailawalawa.

Saga mo muria na ivakavuvuli ni cakacaka kei na vakatulewa vakataki koya ena 4.4.5. E rawa ni lesi e dua na tamata ena soqoni me vola ka vakavotuya vei ira na ilawalawa ni cakacaka sa tuvanaki tu.

E rawa ni ra digitaka na tabana lalai me ra cakava na nodra veivakacokotaki ni valetabu kei na tuvakawa ena matabose ni tabana.

25.2.8

Veituberi ni Vakavakarau ki na Valetabu

Ena nona veidusimaki na bisopi, e rawa ni tauyavutaki e dua na vuli ni vakavakarau ki na valetabu me vukei ira na lewenilotu ena nodra vakavakarau me ra vakayacora na nodra veiyalayalati ni ra ciqoma na nodra cakacaka vakalotu ni valetabu. Ena vakavulici na vuli oqo ena taudaku ni soqoni ena Sigatabu ena dua na gauna e ganiti ira na lewenilotu. E rawa ni ra vakayacori e valenilotu se e vale.

Era na digitaka ena yalomasumasu na lewe ni matabose ni tabanalevu na lewenilotu me ra sureti me ra vakaitavi ena vuli yadua. Na vuli oqo ena rawa ni veivuke sara vakalevu vei ira na tamata oqo:

• Lewenilotu Vou

• Lewenilotu ka ra vakavakarau tiko me ra ciqoma na nodra edaumeni se me ra vauci

• Lewenilotu era sa lesu tale tiko mai ki Lotu

• O ira na lewenilotu sa vaka edaumeni oti ka ra sa bera ni vakavouya na nodra ivolatara ni valetabu ena dua na gauna balavu

E ratou na kaciva na matabisopi e dua se sivia na qasenivuli ni vakavakarau ki na valetabu. Na lesoni kei na idusidusi ni tauyavutaki ni lesoni era sa tiko ena Vakalougatataki mai Lagi: iVolavakarau ni Qasenivuli ni Semina ena Vakavakarau ki Valetabu. E soli vei ira na vakaitavi na ilavelave ni Vakavakarau ki na Curu ki na Valetabu Me baleta na ivurevure ni vuli yadua kei na ivurevure ni lesoni, raica na temples.ChurchofJesusChrist.org.

25.3

Veiliutaki ena iTeki

25.3.1

Mataveiliutaki ena iTeki

E tiko vei peresitedi ni iteki na idola ni Nona cakacaka ni veivakabulai kei na bula vakacerecerei na Kalou ena iteki. Sa nodratou itavi oqo o koya kei rau na nona daunivakasala me rau vukea na vakaduavatataki ni matavuvale me tawamudu:

• Vukei ira na lewenilotu mera vakavakarau mera caka veiyalayalati tabu nira ciqoma na cakacaka vakalotu eso ni valetabu (raica na 27.1

• Vakayaloqaqataki ira na lewenilotu taucoko, vakabibi o ira na ganeda kei na tacida sega ni vakawati ka sega ni vakaedaumeni, me dua na nodra ivolatara ni gauna oqo ka sokalou ena vale ni Turaga ena veigauna kece e rawa kina.

• Raica me dau vakavulici wasoma ena soqoni ni iteki na vunau kei na veivakalougatataki ni vakaduavatataki ni matavuvale me tawamudu (me vaka e vakamacalataki tiko ena 1.2.4).

• Vakayaloqaqataki ira na lewenilotu me ra vulica na vei ka me baleti ira na nodra qase e liu ka vakayacora na cakacaka vakalotu ni valetabu ena vukudra.

• Vakayacora na veivakatarogi ni ivolatara ni valetabu (raica na wase e 26

Ena nona dau bose vata kei ira yadua na peresitedi ni kuoramu ni italatala qase, ena veivosakitaka e dua na lewe ni mataveiliutaki ni iteki na sasaga ni tabanalevu me vakaduavatataki ira na matavuvale tawamudu ena cakacaka ni valetabu kei na tuvakawa (raica na 8.3.1). E rawa ni rau tiko kina na daunivakasala ena mataveiliutaki ni kuoramu ni italatala qase kei na lewe ni matabose e cake e lesi ki na kuoramu.

25.3.2

Komiti ni Veiliutaki ni Qase ena iTeki

Na komiti ni veiliutaki ni qase ena iteki e oka kina na:

• Na mataveiliutaki ni iteki.

• Na mataveiliutaki ni iSoqosoqo ni Veivukei ena iteki.

• Lewe ni matabose e cake e lesi me cakacaka vata kei ira na kuoramu ni italatala qase.

O ira na iliuliu oqo era dusimaki ka tokoni ira na mataveiliutaki ni kuoramu ni talatala qase kei na iSoqosoqo ni Veivukei ena nodra itavi me baleta na cakacaka ni tuvakawa ni valetabu (raica na 25.2.2). Na veidusimaki e rawa ni vakayacori ena dua na ituvaki vakailawalawa se tamata yadudua. E rawa ni ra sureti na iliuliu ni cakacaka ni tuvakawa ni valetabu ena tabanalevu me ra ciqoma na veidusimaki oqo.

Me so tale na ka baleta na matabose ni komiti oqo, raica na 29.3.8

25.3.3

Lewe ni Matabose e Cake

Sa rawa ni na lesia na mataveiliutaki ni iteki na lewe ni matabose e cake me na veidusimaki ka tokoni ira na tamata oqo ena nodra sasaga me vakaduavatataki na matavuvale ena cakacaka ni valetabu kei na tuva kawa:

• Mataveiliutaki ni kuoramu ni italatala qase

• iLiuliu ni valetabu kei na tuva kawa ena tabanalevu

• Daunivakasala ni tuva kawa kei na valetabu ena iteki

• Ira na kodineita ni valenivolavola ni FamilySearch

Sa rawa me lesi e dua se sivia na lewe ni matabose e cake me liutaka na sasaga oqo. Ia, o ira kece na lewe ni matabose e cake e tiko na nodra itavi oqo me baleta na tabanalevu kei na kuoramu era sa lesi kina.

E rawa ni ra veivuke na lewe ni matabose e cake vei iratou na mataveiliutaki ni italatala qase kei na iliuliu ni valetabu kei na tuvakawa ena tabanalevu me ra vakasalataki ira na daunivakasala ni valetabu kei na tuvakawa ena tabanalevu. E rawa ni ra vukei na lewe ni matabose e cake mai vei ira na daunivakasala ni valetabu kei na tuvakawa ena iteki.

E rawa ni ratou lesia na mataveiliutaki ni iteki edua na lewe ni matabose e cake me raica na sasaga ni nodra tuvakawa na volodia ena iteki (raica na 25.4.3). O koya se e dua tale na lewe ni matabose e cake e sa rawa ni lesi me raica raraba na cakacaka ena valenivolavola ni FamilySearch (raica na 25.3.6).

25.3.4

Mataveiliutaki ni iSoqosoqo ni Veivukei ena iTeki

Ena veidusimaki nei peresitedi ni iteki, na mataveiliutaki ni iSoqosoqo ni Veivukei ena iteki ena dusimaki ka tokoni ira na mataveiliutaki ni iSoqosoqo ni Veivukei ena tabanalevu ena nodra itavi me baleta na cakacaka ni valetabu kei na tuvakawa (raica na 9.2.4).

25.3.5

Daunivakasala ni Valetabu kei na Tuva Kawa ena iTeki

O ira na daunivakasala ni valetabu kei na tuva kawa ena iteki era tokona na cakacaka ni valetabu kei na tuvakawa ena loma taucoko ni iteki. Era veiqaravi ena nodratou veidusimaki na mataveiliutaki ni iteki kei na dua se sivia na lewe ni matabose e cake e lesi kina cakacaka ni valetabu kei na tuvakawa.

O ira na daunivakasala oqo era tokoni ira na lewe ni matabose e cake kei na mataveiliutaki ni iSoqosoqo ni Veivukei ena iteki ena nodra sasaga me ra dusimaki ira na iliuliu ni tabanalevu ena cakacaka ni valetabu kei na tuvakawa (raica na 25.3.3 kei na 25.3.4 Sa rawa talega me soli vei ira na ilesilesi oqo:

• Veivuke ena nodra vakavulici ka tokoni na lewenilotu ena veikacivi ni valetabu kei na tuvakawa ena tabanalevu.

• Vukea na cokonaki ni sasaga ni volodia (raica na 25.4.3).

• Veiqaravi ena valenivolavola ni FamilySearch (raica na 25.3.6).

25.3.6

Veivalenivolavola ni FamilySearch

Kevaka era tu na ivurevure, sa rawa ki na iteki me tauyavutaka e dua se sivia na valenivolavola ni FamilySearch. Na vei valenivolavola oqo mena vukei ira na vulagi mera kunea, vakasokomuna na itukutuku eso, ka vakaduavatataka na lewe ni matavuvale era bula tiko kei ira era sa mate ena veicakacaka vakalotu eso ni valetabu. E sa dola tu na valenivolavola ki vei ira kece era via vakayagataka.

Ena kaciva o peresitedi ni iteki edua na kodineita ni valenivolavola ni FamilySearch me raica raraba na sasaga ena veivalenivolavola yadua ni FamilySearch. Na valenivolavola yadua, ena dau veiqaravi tiko kina edua na daunivakasala ni valetabu kei na tuva kawa ni iteki, e lesi kina. E dodonu me dau dolavi ena vei gauna veiganiti eso na valenivolavola ni FamilySearch. Na veivalenivolavola ni FamilySearch ka voleka ki na valetabu e rawa mera veisautaka na nodra ituvatuva me salavata kei na ituvatuva ni valetabu ena nodra vanua.

Vakavo ga, eso na valenivolavola lelevu ni FamilySearch era raici raraba tiko mai na Mataveiliutaki ni iWasewase.

25.3.7

Kodineita ni Valenivolavola ni FamilySearch

Ena tuvanaka na kodineita ni valenivolavola ni FamilySearch na cakacaka ni veisiga ni valenivolavola ni FamilySearch. Ena veiqaravi ena nona veidusimaki na peresitedi ni iteki se dua na lewe ni matabose e cake sa lesi. Na itavi e rawa ni oka kina o ira ka volai toka e ra:

• Vukei ira na lewenilotu mera vakarautaka na yaca ni matavuvale me rawa nira vakayacora na cakacaka vakalotu eso ena vale ni Turaga.

• Vakayaco itaviqaravi ni valenivolavola me vukei ira na lewe ni Lotu kei ira na vulagi ena itikotiko raraba mera kunei ira na nodra qase e liu.

• Cakacaka vata kei (1) na lewe ni matabose e cake ka lesi me tokona na cakacaka ni valetabu kei na tuva kawa kei (2) na kenadau ni tekinolaji ni iteki me sotava na gagadre ni veiqaravi ni valenivolavola ka maroroya na kena ivurevure eso.

Na FamilySearch Center Operations Guide (iDusidusi ni Cicivaki ni Valenivolavola ni FamilySearch) e vakarautaka na idusidusi ni ivakarau ni kena cicivaki e dua na valenivolavola ni FamilySearch.

25.3.8

Daunivakasala ni Valetabu kei na Tuva Kawa ni iWasewase

Sa rawa vei iratou na Mataveiliutaki ni iWasewase me ratou kacivi ira na daunivakasala ni valetabu kei na tuvakawa ni iwasewase. Kevaka e rawa, me kacivi e dua na tamata se dua na veiwatini kina matabose ni veivakacokotaki yadua. Era na dau veiqaravi tu na daunivakasala ena tolu ki na lima na yabaki.

E rawa ni lesi e dua na dauvakasala ni iwasewase se veiwatini me tokona na nodra sasaga na daunivakasala tale eso ni iwasewase e lesi ki na matabose ni veivakacokotaki ena iwasewase.

Sa rawa vei iratou na Mataveiliutaki ni iWasewase me ratou lesi ira na Vitusagavulu ni iWasewase me ra raica na nodra cakacaka na daunivakasala oqo ena matabose ni veivakacokotaki. Na nodra cakacaka na dauvakasala e dodonu me salavata kei na vakanamata ni iwasewase.

Ena nodratou veidusimaki na Mataveiliutaki ni iWasewase se dua na Vitusagavulu ni iWasewase, na daunivakasala era na vukei peresitedi ni iteki me ra vakayacora na nodra itavi me vukea na vakaduavatataki ni matavuvale me tawamudu ena cakacaka ni valetabu kei na tuvakawa (raica na 25.3.1). Era na vukei ira na peresitedi ni iteki na daunivakasala ena nodra vakavulici na tamata era veiqaravi ena veikacivi e ra me baleta na nodra itavi:

• Lewe ni matabose e cake

• Mataveiliutaki ni iSoqosoqo ni Veivukei ena iTeki

• Komiti veiliutaki vei ira na uabula ena iteki

• Daunivakasala ni tuva kawa kei na valetabu ena iteki

• Ira na kodineita ni valenivolavola ni FamilySearch

E rawa ni ra lesi na daunivakasala me ra vukei ira na mataveiliutaki ni iteki me ra vakarautaki ira na lewenilotu me ra sokalou ena veivaletabu kacivaki vou ena loma ni wasewase. Na itavi tale eso e rawa ni oka kina na nodra vakasalataki na iliuliu ni iteki ena ivakavuvuli kei na ivalavala ni cakacaka ni valetabu kei na tuva kawa. Oqo e oka kina na:

• Na sala mera vukei kina na lewenilotu era se qai sotava vakadua na papitaiso veisosomitaki kei na veivakadeitaki ena valetabu (raica na 23.2).

• Na sala mera vukei kina na lewenilotu era vakavakarau tiko mera ciqoma na nodra edaumeni se na veivauci (raica na 25.2.8, 27.2, 27.3, kei na 27.4).

• Na sala me tuvanaki kina na cakacaka ni valetabu kei na tuvakawa ena iteki kei na tabanalevu (raica na 25.2).

• Na sala mera tokoni kina na mataveiliutaki ni kuoramu ni italatala qase kei na iSoqosoqo ni Veivukei ena nodra itavi (raica na 25.2.2

• Na sala e rawa ni vakalougatataki ira kina na gone kei na itabagone na cakacaka oqo (raica na 10.2.4, 11.2.4, kei na 12.2.4).

• Na sala me vakayacori kina na soqoni ni veivakacokotaki mana (raica na 25.2.7).

• Na sala me ra vukei kina na veiliutaki ena tabanalevu me ra tauyavutaka e dua na ituvatuva mana ni valetabu kei na tuvakawa ni tabanalevu (raica na 25.2.6).

Na idusidusi me baleta tiko na cakacaka oqo, raica naiDusidusi ni Veiliutaki ena Valetabu kei na Tuvakawa.

25.4

iVurevure ni Tuva Kawa

25.4.1

iVurevure ena Initaneti

Na FamilySearch e vakarautaka na ivurevure eso me vukei ira na lewenilotu me raica ka vakarautaka na yaca ni matavuvale me ra vakaitavi ena cakacaka vakalotu baleti ira nodra qase e liu era sa mate. Na cakacaka vakalotu oqo e vakaduavatataka na matavuvale me tawamudu. Na ivurevure eso ni FamilySearch e oka kina na veika oqo:

• FamilySearch.org. Na mataveilawa ni Lotu me vukei ira na lewena mera kunea ka vakarautaka na yacadra na nodra qase e liu me baleta na veicakacaka vakalotu eso ni valetabu.

• App ni Vunikau ni Matavuvale. E vuqa na cakacaka ni mataveilawa ni FamilySearch era sa tu talega ena app veikauyaki oqo.

• Sa Vakarau tu na Cakacaka Vakalotu. Na iyaya ni cakacaka oqo e vakarautaki kina e dua na sala rawarawa me ciqomi kina na matavuvale se yaca tale eso me kau ki valetabu. E sa vakarautaki ruarua ena FamilySearch.org vakakina ena app ni Vunikau ni Matavuvale.

• Veivuke ni Yaca ni Matavuvale. Era na vakayagataka na iliuliu na iyaya ni cakacaka oqo ena initaneti me ra vukei na lewenilotu vou kei ira era lesu tiko mai, vakakina na itabagone, ka vakarawarawataka na vakarautaki ka tabaki ni kadi ni yaca ni matavuvale me baleta na papitaiso kei na veivakadeitaki veisosomitaki.

• App ni Vakanananu. Na app veikauyaki oqo ena vukei ira na tamata yadua kei na matavuvale mera kunea, wasea, ka maroroya na italanoa kei na itaba ni tubudra.

Raica na FamilySearch apps me baleta na apps kece e vakarautaki tu.

25.4.2

Noqu Matavuvale: iTalanoa Eso E Kauti Keitou Vata Mai

Na ivolalailai Na iTalanoa ni Noqu Matavuvale e Kauti Keitou Vata Mai ena vukei ira na tamata mera kumuna vata ka maroroya na yaca kei na italanoa ni matavuvale. E rawa talega ni vukei ira na lewenilotu mera tekivu vakarautaka na yaca ni matavuvale me baleta na cakacaka vakalotu ni valetabu.

E rawa ni otataki na kena ilavelave ena store.ChurchofJesusChrist.org.

25.4.3

iTaviqaravi ni Volodia ni Tuva Kawa

Na app Mo Vakaitavi se Mo Vakaitavi na menu ena FamilySearch.org e vakatarai ira na voladia mera vakaitavi ena itaviqaravi oqo:

• Na tuvatuva vakamatanivola, sa ikoya na iwalewale ni kena vakacurumi edua na ivolatukutuku makawa volai ki na dua na kato ni itukutuku vakalivaliva ni vakasaqaqara ena FamilySearch.org.

• Railesuvi ni ivolatukutuku me baleta na kena dodonu.

• Vakatorocaketaki ni dodonu ni Vunikau ni Matavuvale.

O ira era vakaitavi ena veitaviqaravi oqo era vakarawarawataka vei ira na tani mera kunei ira na nodra qase e liu ka vakayacora na cakacaka vakalotu ni valetabu ena vukudra.

E rawa ni dua e vakaitavi ena itaviqaravi ni volodia ena nona vakayagataka na app ni Mo Vakaitavi se na Menu ni Mo Vakaitavi ena FamilySearch.org. Oqo e rawa ni dua na gauna ni vakataucokotaki ni veika oqo:

• iTabagone

• iTabagone qase cake

• O ira na lewenilotu era sega ni rawa ni tiko vakawasoma ena veisoqoni ni Lotu

• Lewenilotu Vou

• Lewenivanua raraba

E rawa ni ratou lesia na mataveiliutaki ni iteki e dua na daunivakasala ni valetabu kei na tuvakawa ena iteki se dua na lewe ni matabose e cake me qarava na cakacaka oqo.

25.5

Vakatututaki kei na Kacivi ni Liganicakacaka ni Valetabu

25.5.1

Vakaturi ni Liganicakacaka ni Valetabu

O ira na dau ni veiqaravi ena valetavu era na digitaki vaka oqo:

• Lewenilotu e digitaki mai vua na bisopi se dua tale na iliuliu ni tabanalevu

• Lewenilotu era vakaraitaka na nodra gagadre ni veiqaravi ki vua na bisopi

• Lewenilotu era vakaturi mai vei peresitedi ni valetabu, metereni, se dua tale na iliuliu ni valetabu

• O ira na lewenilotu era vakavakarau tiko se ra se qai lesu mai ena veiqaravi vakadaukaulotu (raica na wase e 24)

Na yacadra na dau veiqaravi ena valetabu sa vakatututaki me na vakau ena Vakatutu ni Tamata Cakacaka ni Valetabu. Na sala oqo esa vakarautaki tu vei ira na bisopi, peresitedi ni iteki, kei na mataveiliutaki ni valetabu. Na iwalewale ni kena vakau na yaca sa tuvai koto e ra.

Ni ratou sa raica rawa na mataveiliutaki ni dua na valetabu e dua ena rawa ni cakacaka ena valetabu, e ratou na vakauta na yacai koya na tamata oqori vua na bisopi ena vakayagataki ni iyaya ni Vakatutu ni Tamata Cakacaka ni Valetabu.

Ni sa vakatakila e dua na bisopi e dua me na liganicakacaka ni valetabu se me ciqoma e dua ka vakaturi mai vua e dua na peresitedi ni valetabu, ena veitalanoa vata kei na lewenilotu me baleta na madigi ni veiqaravi. Ena railesuva na veika e gadrevi vei ira na liganicakacaka ena valetabu (raica na 25.5.2). Kevaka e rau nanuma ruarua na bisopi kei na lewenilotu ni na veiganiti na madigi, ena vakalewena ka vakauta na bisopi na vakatutu ena vakayagataki ni iyaya ni Recommend Temple Worker tool [Vakaturi na Liganicakacaka ni Valetabu]. E dodonu me kila tiko na lewenilotu ni vakatutu e sa vakau ena sega ni vakadeitaka ni na kacivi se lesi o koya me liganicakacaka ni valetabu.

E na railesuva tarava na vakatutu na peresitedi ni iteki. Kevaka e vakadonuya na peresitedi ni iteki na vakatutu, ena vakauta vua na peresitedi ni valetabu me railesuva ena vakayagataki ni Recommend Temple Worker tool (iyaya ni Vakatututaki ni Liganicakacaka ni Valetabu).

O ira na lewenilotu era kacivi se lesi me ra liganicakacaka ni valetabu era dau yalataka me ra dau veiqaravi vakawasoma ena valetabu ena veimacawa. Me ra kakua ni solia na iLiuliu eso tale na veikacivi ka na rawa ni vakataotaka na nodra veiqaravi na lewenilotu ena valetabu.

Nai Recommend Temple Worker tool (iyaya ni Vakatututaki ni Liganicakacaka ni Valetabu) e vakaraitaka talega vei ira na bisopi kei na peresitedi ni iteki e dua na lisi ni lewenilotu kece mai na nodra tabanalevu se iteki era veiqaravi tiko e valetabu ena gauna sara ga oya.

25.5.2

Veika e Gadrevi baleti ira na Liganicakacaka ni Valetabu

Era na veivuke na liganicakacaka ni valetabu ena kena qaravi na cakacaka vakalotu se veivuke ena cakacaka ni valetabu, me vaka na valenivolavola, sava ni sulu, se cakacaka e lomanibai. Me vakaturi edua me liganicakacaka e valetabu, sa dodonu me sotava o lewenilotu na veika oqo:

• Vakaitikotiko ena tikina ni valetabu era na veiqaravi kina.

• Sa vakaedaumeni, bulataka na veiyalayalati ni valetabu, ka tiko e dua na nona ivolatara vakabau ni valetabu.

• Me matua na nona ivakadinadina baleta na kosipeli vakalesui mai i Jisu Karisito.

• Me rawa ni qarava vakayago vakavinaka na nona cakacaka e lesi ena valetabu. Na tamata cakacaka vakalotu e veiqaravi vei ira na petereni se qarava na cakacaka vakalotu e dodonu me rawa ni cakava vakayago ka sega ni vukei.

• Me kilikili ka rokovi mai na Lotu kei na lewenivanua.

• Cakacaka vinaka kei ira na tamata tale eso.

• Me nuitaki ka bulabula vinaka.

• Sega vakadua ni se bau vakatakilakilataki na nona ivolatukutuku vakalewenilotu.

Me kena ikuri, ena vakadeitaka o bisopi na veika oqo:

• Kevaka e a yalani ka vakaivolataki na nona lewenilotu edua na tamata, e rawa ni vakaturi o koya me liganicakacaka ni valetabu me kakua ni lailai mai na lima na yabaki mai na gauna era a kau tani kina na vakatatabu. (Raica na 32.11.3 kei na 32.16.1.)

• Kevaka e a vakasukai na nona lewenilotu edua na tamata sega ni vakaedaumeni, se kevaka a vakacegui na nona lewenilotu, e rawa ni vakaturi o koya me dua na liganicakacaka ni valetabu ni oti vinaka e lima na yabaki mai na gauna e a vakacurumi tale kina ki na Lotu. (Raica na 32.11.4, 32.14.9, 32.16.1, kei na 32.16.2.)

• Kevaka e a vakasukai na nona lewenilotu edua sa edaumeni oti, se kevaka a vakacegui na nona lewenilotu, e rawa ni vakaturi o koya me liganicakacaka ni valetabu ni oti vinaka e lima na yabaki mai na gauna e a ciqoma tale kina na vakalesui mai ni veivakalougatataki. (Raica na 32.11.4, 32.14.9, kei na 32.17.2.)

25.5.3

Nodra Kacivi ka Vakatikori na Liganicakacaka ni Valetabu

Ni sa ciqoma oti o peresitedi ni valetabu na vakatutu me veiqaravi e dua vaka liganicakacaka ni valetabu, edua na lewe ni mataveiliutaki ni valetabu se dua e lesi kina ena veivakatarogi vua na tamata oya. Ni vakauqeti, o koya ka vakayacora na veivakatarogi ena kacivi ira era na rawa ni veiqaravi vaka liganicakacaka ni valetabu ka vakatikori ira.