23.

Tibwaan te Euangkerio ao Kakorakoraaia Membwa aika Boou ao Ake a Manga Oki

23.0

Kabwarabwaraana

Kaokiia ni kabane bwa a na butimwaea te euangkerio bon mwakoron Ana mwakuri te Atua ibukin te kamaiuaki ao te karietataaki (taraa 1.2 n te aeniboki aei; Mataio 28:19–20). Aikai kanoana:

• Karaoan te mwakuri ni mitinare ao te beku bwa mitinare.

• Buokaia kaain te Ekaretia aika boou ao aika a oki ni waaki nako n kawain te berita.

23.1

Tibwa te Euangkerio

E tangiriira Iesu Kristo. E tibwaua Ana euangkerio ma ngaira ao ni kaoia ni kabane bwa a na Nakoina. Ti kona ni karaoa naba anne.

23.1.1

Te Tangira

Bon ngaira ni kabane natin Tamara are i Karawa, are E tangiriia natina n ae kororaoi. E anganiia ni kabane te tai bwa a na kaonaki n Ana tangira rinanon Iesu Kristo ao Ana euangkerio (taraa Ioane 3:162 Nibwaai 26:24–28Aramwa 26:37Taekan te Onimaki 1:3

Teuana te kawai ae ti na kaota ara tangira ibukin te Atua bon man tangiraia ao buokaia Natina n aron are e karaoia Iesu Kristo (taraa Mataio 22:36–39; 25:40). Te tangira aei e kaungaira bwa ti aonga ni kaitibo ma naake irarikira ao ni karoko irouia aomata n aroia aika a kakaokoro, katei, ao koaua (taraa Makuri 10:34; 2 Nibwaai 26:33; Iakobwa 2:17). Ti tataro ibukin ao n ukori taai ni kakabwaia n tibwaua te euangkerio ma tabeman (taraa Aramwa 6:6; 8:10).

23.1.2

Tibwaia

Ibukina bwa ti tangira te Atua ao Natina nako, ti na bon tangiria ni tibwaa te kakabwaia are E a tia n anganiira (taraa Ioane 13:34–35) ao ni buoka ikotaia Iteraera. Ti ukoria ni buokiia aomata n namakina te kimwareirei are ti namakinna (taraa Aramwa 36:24). Ngkai ana reirei Iesu Kristo, ti kaota ieta Otana (taraa 3 Nibwaai 18:24–25). Ti aki tiatiana taekinan te Tia Kamaiu ao Arona ni bitii maiura (taraa Reirei ao Berita aika Tabu 60:2).

Ti tibwa te tangira, koauan te euangkerio, te tai, taneiai, ao ana burokuraem te Ekaretia ni kakabwaiaia natin te Atua ao ni buokiia ni kaan riki nakon te Tia Kamaiu. Ti tibwai bwaai aikai n teina ao arona are e kakaraoaki iai bwa mwakoron arora, iaonrain, ao n reitakira riki tabeua.

Uoote ao titeiki a kona ni karaoi nako aanga ike a na karekea aia tai membwa n tibwatibwa ma tabeman. Teuana te kawai ni karaoa aei bon barongaan taai aika kakawaki ao waaki ni kakukurei. Ibukin rongorongo riki, tabeua, taraa “Share Ward Activities” inanon te Gospel Library.

Taan kairiiri n te uoote ao titeiki a na ikotaki ni marooro ni kinai (1) kainnanon te komiuniti ao (2) tibwaakin bwaai ni ibuobuoki man te Ekaretia ni buoka katokan kainnano akanne. Ibukin rongorongona riki tabeua, taraa “Share Church Resources” inanon te Gospel Library.

23.1.3

Kakao

Te Tia Kamaiu e kaoiia ni kabane bwa a na karekea Ana euangkerio ao ni katauraoi ibukin te maiu ae akea tokina (taraa Aramwa 5:33–34). Ngkai Ana reirei, ti ira Bannana, kaoiia ni kabane bwa a na “nakomai nakon Kristo, ao ni kakororaoaki irouna” (Moronaai 10:32).

Ti tataro i bukin te kairi mai ieta ao kairara bwa ti na kanga ni kaoiia tabeman bwa a na:

• Nakomai ao n nora te kakabwaia are e tauraoi rinanon Iesu Kristo, Ana euangkerio, ao Ana Ekaretia (taraa Ioane 1:37–39, 45–46).

• Nakomai ao buokiia aomata ake a kainnano.

• Nakomai ao kaina Ana Ekaretia Iesu Kristo are e kaokaki.

N angiin te tai, te kakao ae beebete nanona n raonaki ma ara utu, raraora, ao kaain rarikira inanon te bwai are ti a bon tia ni kakaraoia. N aron te katooto, iangoia ni kaoiia aomata ni kaineti ma kainnanoia ao baike a nano iai nakon:

• Bootaki n toa ao bootaki riki tabeua n te Tabati. Teuana mai ibuakon taneiai ae moan te kakawaki ae ti kona n anganiia tabeman bon kakaean bootaki n toa ni kabane ao ni buokiia bwa a na karekeia aia taneiai n tamnei, ma te nano ni bubutimwaai (taraa 3 Nibwaai 18:22–23).

• Taai aika a Onoti n te Ekaretia, n aron kakabwaiakiia ataei aika a uarereke ke bwabetito.

• Waaki ni kakukurei n te uoote ao titeiki, n ikotaki ma aia waaki ni kakukurei te Moanrinan ao kairake (taraa “Share Ward Activities” inanon te Gospel Library).

• Waaki ni kakukurei i nanon mweengara.

• Ana burokuraem te Ekaretia, n aron te tieminari, intitute, rongorongon te utu, kiraati ibukin te maiu n toronibwai, ao JustServe.org mwakuri ni karikirake (n te tabo are a tauraoi iai).

• Reirei ma mitinare.

Ibukin iango riki ao bwaai ni ibuobuoki, taraa:

• share.ChurchofJesusChrist.org.

• “Tibwaa te Euangkerio” iaon te Gospel Library.

• Te tiekition i aon “Katiteuanaaki ma Membwa” inanon mwakoro 9 n Taetaekina Au Euangkerio: Te Kairi nakon Tibwauaakin ana Euangkerio Iesu Kristo.

Ngkai ti tangira, tibwatibwa, ao ni kakao n aron are e karaoia Kristo, e na katauraoi taai ni kakabwaia te Atua i nanon kawaira (taraa Reirei ao Berita aika Tabu 11:3–5, 8). Kekeiaki n tatabeua nako ni maiuakinan te tua n tangira, tibwatibwa ao ni kakao a rangi n tamaroa, ngkana tao e reke ana tai te aomata ke aki ni kaitibo ma mitinare ke ni kaaina te Ekaretia.

Te tua iaon te tangira, tibwatibwa, ao te kakao e kaineti naba nakon kakorakoraaia membwa ake a boou ao ake a manga tibwa oki.

23.2

Kakorakoraaia Membwa aika Boou

Kainakin te Ekaretia e bon tamaroa ao ni iai te kakaewenako naba iai irouia tabeman. E uota te kakabwaia ae bati, ma e tangira naba manga te bitaki nakon te koaua ae boou, te aroaro ae boou, ao te reitaki n tangira ae boou (taraa 1 I-Tetaronike 1:6).

Membwa aika boou n tatabemaniia a kainnanoa te reitaki n tangira, te tai ni beku, ao kamarurungan maiun tamneia. Ngkai membwa n te Ekaretia ngaira, ti anganiia membwa aika a boou ara tangira ao ara boutoka (taraa Motiaea 18:8–10). Ti buokiia n namakina ae ngaiia bon kaain te Ekaretia. Ti buokiia ni waaki iaon kawain te berita (taraa 23.4.1) ao n riki n rangi n nene n “rairaki nakon te Uea” (Aramwa 23:6). Ti buokiia bwa a na “kamwarakeaki n ana taeka te Atua ae raoiroi, bwa a na waaki n te kawai ae eti, … n ti onimakina ana mwakuri aika a raraoi Kristo” (Moronaai 6:4).

Ti kona naba ni buokiia membwa aika boou n:

• Reiakina ao n rinanon te kimwareirei ae reke man te riki bwa ana reirei Iesu Kristo.

• Reiakinna bwa a na kangaa n ataa te wirikiriki mai iroun te Tamnei.

• Ni karikirakea te anua n tataro i bon iroum ao te utu ao ni kamatebwaia koroboki aika a tabu.

• N tibwaua te euangkerio ma aia utu ao raoraoia.

• Kakaei araia aia bakatibu ao ni katauraoi nakon karekean otenanti n te tembora ibukiia (taraa 25.4).

• Rikirake man kakoroan nanon taian katabeaki n te Ekaretia ao ni irii waaki aika a mwaiti ake tabeua are e anga te Ekaretia.

23.3

Kakorakoraaia Membwa ake a Manga Oki

Tabeman membwa a rineia ni katoka iriiran waakin te Ekaretia. “Ma kam na aki,” e taku te Tia Kamaiu, “toki n ibuobuoki nakon ae aekan aei, bwa kam aki ataa te tai are a na rairaki iai man rairananoia, ma ni kawarai ma nanoia ni kabane, ao N na katoka aorakiia; ao kam na riki bwa taan kamaiu nakoia” (3 Nibwaai 18:32). Taeka aikai a kaineti nakoia ni kabane ake, tao ni bukina aika kakaokoro, a kainnanoa reitinakon te mwakuri n ibuobuoki.

Membwa ake a aki bati ni iriiri a na bon bae n tangiria ni kan oki ngkana iai reitakiia ae tamaroa ma membwa n te Ekaretia. Ara tangira ao boutoka a kona ni buokiia n tokanikai iaon kakaewenako. N aroia membwa ake a boou, a tangira naba te reitaki ni iraorao ae tamaroa, karekean aia tai ni beku, ao ni kamwarakeaki n te tamnei. Ataakin te bwai are a rinanona ao kakaewenako a kona ni buokiira n karaoi mwakuri n ibuobuoki nakoia ma te kai namakin inanora ao te tangira.

23.4

Kakaraoan Boowi ni Babaire ibukiia Mitinare Ni Katoa Wiiki

Ni katoa wiiki, te boowi ae uarereke a karaoaki ni barongaa te mwakuri n tibwaan te euangkerio. Oin te kantaninga ni boowi aikai bon ibukin buokaia naake a tia n reireinaki, membwa aika a boou, ao membwa ake a manga oki bwa a na karaoi ao ni kawakin aia berita aika tabu. Ngkana e weteaki te tia kairiiri n te mition n te uoote, ngaia ae e kairii boowi aikai. Ngkana akea te tia kairiiri, te membwa n te beretitentii n te kooram n unimwaane are e taua te nakoa ae te tia kairiiri n te mition n te uoote ngaia ae e na kairia.

Tabeman ake a weteaki n aron aikai:

• Membwa ake a tia ni mwiokoaki man te Bootaki n Aine, kooram n unimwaane, ao beretitentii n te Moanrinan.

• Mitinare n te Uoote.

• Te tia ibuobuoki n aia kooram ibonga (ke te beretitenti man aia kooram tia reirei ke rikan ngkana akea te ibonga n te uoote).

• Te membwa man te beretitentii n aia kiraati Ataeinaine ake a ikawai.

• Mitinare aika bwanin aia tai.

Aia boowi ni babaire mitinare ni katoa wiiki e boboto i aon kainnanoia aomata n tatabemaniia nako. E kona n rin n te akenta bwaai aikai:

• E kangaa aron buokakiia koraki ake a tia n reireinaki irouia mitinare

• Ti na kanga ni buokiia naake a tibwa tia ni bwabetitoaki

• Ti na kanga ni buoka te membwa are tii ngaia kaain te aro man ana utu ao membwa ake a manga oki

• Ti na kanga ni kakaeia riki aomata aika a na reireinaki

Te Te Ribooti n Te Rikirake ni Kawain te Berita, iango inanon te “Bowi ni Babaie ni Katoa Wiiki” tiekition n te mwakoro 13 man Tataekina Au Euangkerio, ao titiraki aika inano a kona n ibuobuoki ni kaira aron te babaire ni katoa wiiki.

• Ti na kanga ni buokiia aomata bwa a na nanako n taromauri, a na karekei taneiai aika a kaunganano, ao ni karekeia raoraoia?

• Ti na kanga ni boutoka ana babaire te uoote ibukin tibwauaan te euangkerio?

• E kanga te kauntira ni uoote n ibuobuoki, ao antai ae na reitaki ma ngaiia?

A na karaoaki bootaki aikai ma temanna te aomata ke n taabo aika raroanako. Te reitaki e kona naba n riki ni kawai riki tabeua, ni ikotaki ma tareboon, tekiti, ke tekiti n te kurubu.

Kataia n irii tuua ibukin mwakuri ao te bukinaki inanon 4.4.5. Te aomata are e ira te boowi e kona ni mwiokoaki bwa e na taumwiin ao ni kauringa te kurubu ibukin mwakuri ake a tia ni baireaki.

A kona mwaanga aika a uarereke n rineia ni karaoa aia boowi ni babaire ni katoa wiiki i nanon kauntira ni mwaanga.

Taraa katotongan te akenta n te bowi ao bowi ni babaire ake tabeua n “Ideas for Weekly Missionary Coordination” in Gospel Library.

23.4.1

Kawaiu n Au Berita ae Tabu. ao Ribooti n te Rikirake ni Kawain te Berita

Bwaai n ibuobuoki aikai a kona n ibuobuoki ni kairii marooro n tain aia boowi ni babaire mitinare ni katoa wiiki:

• Kawaiu n Au Berita ae Tabu. Te ibuobuoki aei e kona ni buokiia aika a boou ao membwa aika a manga oki ni waaki ni kawain te berita ae tabu inanon te moan 12 nakon 24 te namwakaina imwiin te bwabetito ke imwiin manga okiran ma iriiran ana waaki te euangkerio. Kawaiu n Au Berita ae Tabu e reke inanon Gospel Library.

• Rekooti n te Rikirake ni Kawain te Berita. Taan kairiiri n te uoote a kabongana te bwai ni ibuobuoki aei n taua mwiin ao n tarai aia kekeiaki membwa ake a boou ao ake a manga oki ao aomata ake a reireinaki irouia mitinare. E kona n nooraki mwiin te kekeiaki n te Rikirake ni Kawain te Beritairouia taan kairiiri n te uote rinanon te Member Tools app ao Leader and Clerk Resources (LCR). Mitinare ake a bwanin aia tai a kona ni noori ao n ibitii Rikirake ni Kawain te Berita rinanon te app ae Taetaekina Au Euangkerio.

23.5

Taan Kairiiri n te Titeiki

23.5.1

Beretitentii n te Titeiki

Te titeiki beretitenti e taui kiing n te titeiki ibukin tibwaan te euangkerio ao kakorakoraaia membwa aika boou ao ake a manga oki. Ngaia ao ana kauntira a tararua iaon ni kabane waaki aikai. E kakoauaa bwa te mwakuri aei e maroroakinaki ni katoa tai n taian boowi n te titeiki.

Ni bon arona ni katoa namakaina, te titeiki beretitenti e reitaki ma te mition beretitenti ni barongaa te kekeiaki aei imarenan te titeiki ao taan kairiiri n te uoote ao mitinare ake a bwanin aia tai. Tabeman ake a kona n iria ni ikotaki ma:

• Taian kauntira n te titeiki ao beretitentii n te mition.

• Te kauntira ae rietaata are e mwiokoaki.

• Te beretitentii n te Bootaki n Aine n te titeiki.

• Mitinare ake a mwiokoaki mai iroun te mition beretiteinti.

23.5.2

Te Komete ni Kairiiri ibukiia Ikawai n te Titeiki

Te komete ni kairiiri ibukiia ikawai n te titeiki kaina bon:

• Te titeiki beretitentii.

• Te beretitentii n te Bootaki n Aine n te titeiki.

• Kauntira aika rietaata a katabeaki bwa a na mwakuri ma kooram n unimwaane.

Taan kairiiri aikai anga reirei ao ni boutokaia kooram n unimwaane ao te beretitentii n aia mwakuri korakora n tibwaan te euangkerio ao kakorakoraaia membwa aika a boou ao ake a manga oki (taraa 23.6.2). Waaki ni kaetieti a kona ni karaoaki n te kurubu ke nakon ti temanna. Taan kairiiri ni mition n te uoote a kona naba ni kaoaki bwa a na karekei kaetieti aikai.

Ibukin rongorongon te bowi ni komete aei, taraa 29.3.8.

23.5.3

Kauntira ae Rietaata

Te titeiki beretitentii e kona n mwiokoa te kauntira ae e rietaata n anga reirei ao ni boutokaia beretitentii n te kooram ni unimwaane ao taan kairiiri ni mition n te uoote. Temanna ke ae mwaiti te kauntira ae rietaata a kona n mwiokoaki ni kaiirii mwakuri aikai. E ngae n anne, kauntira ni kabane aika a rietaata iai tabeia aikai ibukiia uoote ao kooram ake a katabeaki iai.

23.5.4

Beretitentii n te Bootaki n Aine n te Titeiki

Iaan ana kaetieti te titeiki beretitenti, te beretitentii n te Bootaki n Aine n te titeiki a reireiniia ao ni boutokaiia beretitentii n Bootaki n Aine n taian uoote n tabeia ibukin tibwaakin te euangkerio ao kakorakoraaia membwa aika boou ao ake a manga oki.

23.6

Taan Kairiiri n te Uoote

23.6.1

Bitiobiriki

Te bitiobiriki e reitaki ni mwakuri ma te kooram n unimwaane ao te beretitentii n te Bootaki n Aine ngkai a kaira te mwakuri n tibwaan te euangkerio ao ni kakorakoraia membwa ake a boou ao ake a manga oki. Taan kairiiri aikai a reitaki ni marooro ni katoa tai.

Te bitiobiriki e na kakoaua raoi bwa mwakuri aikai a maroroakinaki ao a barongaaki n te uoote kauntira ao inanon boowi ni kauntira ibukiia kairake. Te bitiobiriki a rinanon naba ao ni kariaia te babaire n te uoote ibukin tibwaan te euangkerio ao kakorakoraaia membwa aika a boou ao ake a manga oki (taraa 23.6.6).

Te bitiobiriki a reitaki ma te titeiki beretitenti ni baireia ngkana tao a na wetea te tia kairiiri n te mition n te uoote (taraa 23.6.3 ibukin riki rongorongona).

Te bitiobi e na intawiu ma membwa aika boou n te roro ake a tau ibukin te beba ni kariaia nakon te tembora ni karaoi mwakuri ni bonomwi ibukin te bwabetito ao te kamatoaaki (taraa 26.4.1). E intawiu naba ma taari n te roro ake a tau ni karekea te Nakoanibonga ae te Aaron (taraa 38.2.9.1 E kona ni kakoroi bukin kantaninga akana uoua n tain naba te intawiu anne. E bon kakaraoi intawiu aikai inanon te wiiki are e kamatoaaki iai te membwa. E kona te bitiobi ke te beretitenti n te mwaanga ni mwiokoa temanna ana kauntira bwa e na kaira te intawiu. Imwiin anne, e kona te bitiobi n anga bwa e na kabonganaaki te Family Name Assist ni buoka te membwa ae boou ni boretia aran ana utu are e a tia ni mate bwa e na kona te membwa ae boou ni karaoi otenanti inanon te tembora (taraa “Family Name Assist” inanon 25.4.1).

Te bitiobiriki e reitaki ni mwakuri ma taan kairiiri ake tabeman ni kakoauaa bwa naake a boou ao ake a manga tibwa oki e reke aia tai ni beku. Taai n aron aikai e kona ni buokiia membwa aikai n rikirake n te maiu n tamnei ao n namakina mwaakan te Uea inanon maiuia. Te mwakuri e kona naba ni buokiia membwa n namakina te kimwareirei ao ni katea te reitaki ae tamaroa ma tabeman n te uoote.

Taai ni mwakuri ni ibuobuoki a riai ni boboto i aon kainnanon te membwa ao ana konabwai. N tabeua keiti, te wewete e bon riai. Ao n tabeua, te katabeaki ae e uarereke tao e na raoiroi.

23.6.2

Kooram n Unimwaane ao Beretitentii n te Bootaki n Aine

Te kooram n unimwaane ao te beretitentii n te Bootaki n Aine a kaira waakin te mwakuri n te bong teuana ma teuana n tibwaan te euangkerio ao ni kakorakoraia membwa ake a boou ao ake a manga oki (taraa 8.2.3 ao 9.2.3). Te beretitentii n te kooram n unimwaane a kairii mwakuri aikai ibukiia membwa n te kooram ni unimwaane. Te beretitentii n te Bootaki n Aine a kairii mwakuri aikai ibukiia membwa n te Bootaki n Aine. A mwakuri ni ikotaki ni kairii mwakuri aikai ma kain te bowi ni kauntira n te uoote, iaan ana babaronga te bitiobi.

Taan kairiiri aikai iai katabeakia n aron aika:

• Ni buokiia membwa ni karekea te kairi mai ieta n tangiraia natin te Atua, n tibwa te euangkerio, ao ni kaoiia tabeman ni karekea ana kakabwaia te Tia Kamaiu (taraa 23.1).

• Reitaki ni marooro ma te kooram ke membwa n te Bootaki n Aine bwa a na kanga n tibwa te euangkerio. Maroroakinna bwa a na kanga ni kuneia aomata ibukiia mitinare bwa a na reireiniia ao a na kanga ni boutokaia aomata ake a reireinaki. Uaia ni marooro i aon kainnanoia naake a boou ao ake a manga tibwa oki ao bwa a na kangaa ni katauraoi buoka.

• Katabeia taari ke titita n te mwakuri n ibuobuoki nakoia ake a boou ao naake a manga tibwa oki (taraa 21.2.1). Taari ao titita n te mwakuri n ibuobuoki a kona naba ni katabeaki nakoia aomata ake a reireinaki irouia mitinare (aio e karaoaki ma te reitaki ni mwakuri ma mitinare). Ngkana e konaa, taan kairiiri a katabeia membwa ake iai ke ni kona ni karikirakea te reitaki ae tamaroa ma aomata aikai. Taan kairiiri a kaungaia taari ao titita n te mwakuri n ibuobuoki n anga are n ai aron katein Kristo n tangira ao ni boutoka.

• Anganiia naake a boou ao ake a manga tibwa oki aia tai bwa a na beku bwa taari ao titita n te mwakuri n ibuobuoki. Ibukin riki rongorongon te mwakuri n ibuobuoki, taraa mwakoro 21.

• Bouka te uoote kauntira ni karikirakea te baire ibukin tibwaan te euangkerio ao kakorakorakiia membwa aika boou ao ake a manga oki (taraa 23.6.6).

• Kaira ana mwakuri te tia kairiiri n te mition n te uoote. Ngkana e aki weteaki te tia kairiiri aei, te membwa n te beretitentii n te kooram n unimwaane e na kanoa te mwakuri aei (taraa 23.6.3).

Te beretitenti n te kooram n unimwaane ao te beretitenti n te Bootaki n Aine ni bon aia bootaki a katabea temanna n aia beretitentii ni buoka kairan mwakuri aikai. Beretitentii aika uoman aikai a uaia ni mwakuri imarenaia. A irii boowi ni babaire ni katoa wiiki (taraa 23.4).

23.6.3

Te Tia Kairiiri Ibukin te Mition n te Uoote

Te bitiobiriki e reitaki ma te titeiki beretitenti ni baireia ngkana tao a na wetea te tia kairiiri n te mition n te uoote. Ngkana a baireia bwa a kanakoa te wewete aio, te bitiobiriki e marooro ma te beretitenti n te kooram n unimwaane ao n te Bootaki n Aine ni iangoia bwa antai ae a na weteia.

Te tia kairiiri n te mition n te uoote e riai ni iai irouna te Nakoanibonga ae te Merekitereka. Ngkana e aki weteaki te tia kairiiri aei, te membwa n te beretitentii n te kooram n unimwaane e na kanoa te nakoa aei.

Te tia kairiiri n te mition n te uoote e boutokaa te beretitentii n te kooram n unimwaane ao te beretitentii n te Bootaki n Aine n tabeia n te mwakuri ni mitinare. Iai naba mwiokoana n aron aikai:

• E barongaa aia mwakuri membwa n te uoote ao taan kairiiri, mitinare n te uoote, ao mitinare ake a bwanin aia tai. Aio e kona ni kaairaki ma barongaan mwakuri n anga reirei, te bootaki n taromauri n te bwabetito, ao te mwakuri ni kakorakoraia membwa aika boou. E kona naba n raonaki ma bairean kawai ni buokiia membwa n te uoote ni tibwa te euangkerio.

• Ni kaira te reitaki ni boowi ni katoa wiiki (taraa 23.4).

• Irii bootakin te kauntira n te uoote ngkana e kaoaki.

• Buoka te kauntira n te uoote ni karkirakea ao ni waakina karaoan nanon ana baire te uoote ibukin tibwaan te euangkerio ao kakorakoraaia membwa aika a boou ao naake a tibwa manga oki (taraa 23.6.6).

• Ukori aanga ni buokiia mitinare ake a bwanin aia tai ni kakoroa nanon bukinaia man tibwauan te euangkerio ao katean te reitaki ma membwa. Ngkana e kariaiaki, aei e kona raonaki ma te amwarake ma membwa (nanonaki riki ma membwa ake tiaki membwa kain mwengaia ngkana e angaraoi; taraa 24.6.2.3).

• Mwakuri ma te tia kairiiri ao taan ibuobuoki n te mwakuri n te tembora ao rongorongon te utu n te uoote ni buokiia naake a reiakina te eungkerio, membwa aika boou, ao membwa ake a tibwa manga oki bwa a na karaoa te mwakuri n te tembora ao rongorongon te utu.

23.6.4

Mitinare n te Uoote

Mitinare n te uoote a buokiia membwa n te uoote ni karekea te kimwareirei n tibwaakin te euangkerio n aron are e kabwarabwaraaki inanon 23.1. A beku iaan ana kaetieti te tia kairiiri n te mition n te uoote ke te membwa n te beretitentii n aia kooram unimwaane are e kaira te mwakuri aei. Te beretitenti n te kooram n unimwaane ao te Botaki n Aine a kona n anga araia membwa ake a kona ni beku.

Mitinare n te uoote a reirei n te taetae ao ni bannaia bwa a kanga n tangiriia tabeman, tibwaa aia onimaki, ao ni kaoiia tabeman ni karekea ana kakabwaia te euangkerio. A buokiia naba membwa n te uoote n ibuobuoki nakoia membwa ake a boou ao ake a manga tibwa oki.

Mitinare n te uoote a ira te reitaki ni boowi ni katoa wiiki (taraa 23.4).

23.6.5

Uoote Kauntira ao Uoote Kauntira ibukiia Kairake

Tibwaan te euangkerio ao kakorakoraaia membwa aika boou ao ake a manga oki a riai ni maroroakinaki ni katoatai inanon boowi ni uoote kauntira. E kona te bitiobi ni butiia te tia kairiiri n te mition n te uoote (ke te membwa n te beretitentii n te kooram n unimwaane are e mwiokoaki n te beku aei), te beretitenti n te kooram n unimwaane, ke te beretitenti n te Bootaki n Aine bwa e na kairii marooro aikai. (Taraa 23.4.)

Te kauntira e kona ni maroroakina ana babaire te uoote ibukin tibwaan te euangkerio ao kakorakoraaia membwa aika boou ao ake a manga oki. A na bairei mwioko n taian bootaki nako.

Bwaai n ibuobuoki n aron Kawaiu n Au Berita ae Tabu. ao te ribboti n te Rikirake ni Kawain te Berita. e na rangi n ibuobuoki inanon marooro aikai (traa 23.4.1).

Iaon riki rongorongon te uoote kauntira, taraa 29.2.5

Aia kauntira kairake n te uoote a na rangi ni mwamwannano nakoia kairake aika:

• Membwa aika boou ao aika okira te aro.

• Membwa are tii ngaiia kaain te aro man aia utu.

• Ake a reiakinaki irouia mitinare.

• Raao man aaro ke onimaki ake tabeua.

23.6.6

Ana Baire te Uoote ibukin Tibwaan te Euangkerio ao Kakorakoraaia Membwa aika Boou ao Ake a Manga Oki

Uoote n tatabeua nako a riai ni iai aia baire ae bebete ibukin tibwaan te euangkerio ao kakorakoraaia membwa aika boou ao ake a manga oki. Aei are e kona ni buoka n tararuai bootaki, mwakuri ni ibuobuoki, ao waaki ni kakukurei. E kona ni karini iai babaire ao iango ibukin:

• Buokaia aomata ni kabane n namakina ae a butimwaeaki n ana bootaki te uoote ao waaki ni kakukurei.

• Buokiia membwa ni karekea te kimwareirei n tibwaakin te euangkerio.

• Boutokakia aomata ake a reireinaki irouia mitinare.

• Buokiia membwa ake a boou ao ake a tibwa manga oki n rikirake n mauia n tamnei.

Beretitenti n te kooram n unimwaane ao te Botaki n Aine a buoka te uoote kauntira ni karaoa te baire aei. Te tia kairiri n te mition n te uoote e ibuobuoki naba. Te Bitiobi e rinanoa ao ni anga ana kariaia iaona.

Membwa n te uoote kauntira ngaiia ae a riimoa ni kaira ao ni karaoa nanon te babaire. A ribooti iaon te rikirake n tain te boowi ni kauntira n te uoote. A na rinanon naba te babaire ngkana e kainnanoaki.